លោកនាយករដ្ឋមន្ត្រី ហ៊ុន ម៉ាណែត ចង់ឱ្យពលរដ្ឋចូលរួមកម្ចាត់ឧក្រិដ្ឋកម្មអនឡាញជាមួយសមត្ថកិច្ច ខណៈសិទ្ធិអំណាចពិតប្រាកដស្ថិតនៅលើរដ្ឋាភិបាល ហើយករណីជាច្រើនដូចជា ការចាប់ខ្លួនអ្នករិះគន់ដែលពលរដ្ឋទាមទារដោះលែង ពុំត្រូវបានរដ្ឋាភិបាលអើពើឡើយ។
លោក ហ៊ុន ម៉ាណែត បង្ហោះសារលើហ្វេសប៊ុករបស់លោកនៅយប់ថ្ងៃទី១៣ មករា បន្ទាប់ពីកម្ពុជាផ្ទុះរឿងអាស្រូវមេឧក្រិដ្ឋជនអនឡាញលោក ចេន ហ្ស៊ី (Chen Zhi) ដែលសមត្ថកិច្ចកម្ពុជាបានចាប់ខ្លួនបញ្ជូនទៅប្រទេសចិន។
លោក ហ៊ុន ម៉ាណែត សរសេរថា៖ «ជាមួយគ្នានេះ និងចំពោះមុខនេះ យើងមានភាពចាំបាច់ ក្នុងការរួបរួមសាមគ្គីគ្នាជាធ្លុងមួយជាមួយនឹងការប្តេជ្ញាចិត្តរួមរបស់ជាតិ ដើម្បីពង្រឹងសក្ដានុពលជាតិលើគ្រប់វិស័យ និង លុបបំបាត់ភាពអសកម្មភាពទាំងឡាយក្នុងសង្គមជាតិ ដែលធ្វើឱ្យជាតិចុះខ្សោយ។ សន្តិសុខនិងសណ្ដាប់ធ្នាប់សង្គម និងការប្រយុទ្ធប្រឆាំងនឹងឧក្រិដ្ឋកម្ម គឺជាអាទិភាពមួយនៃគោលនយោបាយរបស់រាជរដ្ឋាភិបាល ដើម្បីធានាការរស់នៅសុខសាន្តរបស់ប្រជាពលរដ្ឋ ហើយការប្រយុទ្ធប្រឆាំងនឹងឧក្រិដ្ឋកម្មឆបោកតាមប្រព័ន្ធបច្ចេកវិទ្យា គឺជាចំណុចដ៏សំខាន់នាពេលនេះ បន្ថែមពីលើកិច្ចខិតខំប្រឹងប្រែងលើកិច្ចការអាទិភាពសំខាន់ៗរបស់ជាតិផ្សេងទៀត»។
ក្រៅពីសារអំពាវនាវនេះ លោក ហ៊ុន ម៉ាណែត ក៏បានរំលេចសារសំខាន់មួយ គឺពាក្យឈ្លានពាន ដែលលោកតែងតែប្រុងប្រយ័ត្នប្រើដើម្បីស្អំចិត្តថៃ ក្រោយភាគីថៃទើបព្រមានលែងឱ្យប្រើពាក្យថា ថៃឈ្លានពានកម្ពុជា។
កាលពីថ្ងៃទី១០ មករា លោក ហ៊ុន ម៉ាណែត បញ្ជាក់ត្រឹមថា ជាជម្លោះព្រំដែន ខណៈដីផ្ទះពលរដ្ឋជាច្រើនគ្រួសារត្រូវយោធាថៃកាន់កាប់ និងឈូសបំផ្លាញហេដ្ឋារចនាសម្ព័ន្ធស្ទើរគ្មានសល់។ ចំណែកក្រសួងការបរទេសកម្ពុជាហៅចំៗថា ជាការឈ្លានពានយ៉ាងកម្រោល និងបំពានច្បាប់អន្តរជាតិពីសំណាក់យោធាថៃ។
ការដូរប្រើពាក្យឈ្លានពានរបស់លោក ហ៊ុន ម៉ាណែត វិញនៅពេលនេះ ធ្វើឡើងក្រោយពេលពលរដ្ឋជាច្រើនបានរិះគន់ និងសម្ដែងការខឹងសម្បារចំពោះការបន្ទន់ឥរិយាបថជ្រុលពេករបស់កម្ពុជា។
សាររបស់លោក ហ៊ុន ម៉ាណែត ក៏បន្តអំពាវនាវឱ្យមានការរួមសាមគ្គីភាពគ្នាជាធ្លុងមួយ ដើម្បីឱ្យខ្មែរបានរឹងមាំ។ ទន្ទឹមនឹងការអំពាវនាវនេះ សមត្ថកិច្ចរដ្ឋាភិបាល កាលពីថ្ងៃទី៨ មករា ទើបបានចាប់ខ្លួនសមាជិកក្រុមប្រឹក្សាគណបក្សភ្លើងទៀន នៅសង្កាត់ចោមចៅ២ លោក សរ ណាល់ និងជាអ្នកគាំទ្រគណបក្សកម្លាំងជាតិ រាជធានីភ្នំពេញ។ បច្ចុប្បន្នអ្នកទោសមនសិការជិត ១០០នាក់ កំពុងស្ថិតក្រោមការឃុំឃាំងរបស់តុលាការ ដែលគេមើលឃើញថា ស្ថិតក្រោមការបញ្ជារបស់មេដឹកនាំគណបក្សកាន់អំណាច ដែលជាអ្នកកាន់នាវាកម្ពុជាស្ថិតក្នុងស្ថានភាពគ្រោះថ្នាក់ ទាំងសង្គ្រាមឈ្លានពាន និងឧក្រិដ្ឋកម្មអនឡាញដែលពិភពលោកមើលមកកម្ពុជាក្នុងផ្លូវអាក្រក់៕
សេរីភាពដោះលេងគ្រួសារអ្នកទោស
សេរីភាពដោះលេងគ្រួសារអ្នកទោស