ក្រសួងការពារជាតិកម្ពុជាអះអាងថា ពលរដ្ឋខ្មែរពីរនាក់ទៀតហើយបានស្លាប់ដោយសារការបាញ់ពីយោធាថៃ ចូលទឹកដីខ្មែរនៅស្រុកថ្មពួក ខេត្តបន្ទាយមានជ័យ។
រដ្ឋមន្ត្រីក្រសួងព័ត៌មានលោក នេត្រ ភក្ត្រា ប្រកាសនៅព្រឹកថ្ងៃទី៩ ធ្នូ ថា នៅវេលាម៉ោង ១២:៥៩នាទីរំលងអាធ្រាត្រចូល ថ្ងៃទី៩ ខែធ្នូ យោធាថៃបានបាញ់ផ្លោងលើប្រជាពលរដ្ឋស៊ីវិលដែលកំពុងធ្វើដំណើរ លើផ្លូវជាតិលេខ៥៦ បណ្ដាលឱ្យបាត់បង់ជីវិតចំនួន ២នាក់។ លោកថា យោធាថៃបានបាញ់ប្រហារបន្តរហូតឥតដាច់ស្ទើរពេញមួយយប់នៅក្នុងភូមិសាស្ត្រយោធភូមិភាគទី៥ និងបើកការបាញ់ប្រហារមកលើកម្ពុជាកាន់តែខ្លាំងឡើង នៅភូមិសាស្ត្រស្រុកថ្មពួក ខេត្តបន្ទាយមានជ័យ។
ទោះជាយ៉ាងណា លោកអះអាងថា ក្រសួងការពារជាតិ និងកងយោធពលខេមរភូមិន្ទបន្តគោរព និងអនុវត្តឥតងាករេនូវរាល់ការសម្រេចចិត្តរបស់រាជរដ្ឋាភិបាលក្នុងការដោះស្រាយបញ្ហាដោយសន្តិវិធី ស្របតាមច្បាប់អន្តរជាតិ ប៉ុន្តែលោកថា កម្ពុជាបានត្រៀមខ្លួនរួចជាស្រេចដើម្បីការពារអធិបតេយ្យ និងបូរណភាពទឹកដី ព្រមទាំងសុខសុវត្ថិភាពរបស់ប្រជាជនកម្ពុជា ដោយមិនអនុញ្ញាតឱ្យប្រទេសណាមួយឈ្លានពានដោយខុសច្បាប់ មកលើទឹកដីរបស់ខ្លួនបានជាដាច់ខាត ទោះក្នុងតម្លៃណាក៏ដោយ។
កាលពីថ្ងៃទី៨ ធ្នូ មានពលរដ្ឋស៊ីវិល ៤នាក់បានស្លាប់ដោយសារការវាយប្រហារដោយអាវុធធុនធំគ្រប់ប្រភេទរបស់យោធាថៃ នៅខេត្តឧត្ដរមានជ័យ និងខេត្តព្រះវិហារ។ គិតមកដល់ពេលនេះ យ៉ាងណាស់ យុទ្ធជនកម្ពុជា ៤នាក់បានស្លាប់ និងបញ្ជូនទៅធ្វើបុណ្យរួមគ្នា នៅក្រុងតាខ្មៅ ខេត្តកណ្ដាល បន្ទាប់ពីយោធាថៃវាយប្រហារឈ្លានពានចូលទឹកដីកម្ពុជាតាំងពីម្សិលមិញមក។
សូមរង់ចាំតាមដានព័ត៌មានក្នុងកម្មវិធីផ្សាយនារាត្រីនេះ…
