ពលរដ្ឋកម្ពុជារងរបួសធ្ងន់ស្រាល ៣នាក់ ដោយសារការវាយប្រហាររបស់យោធាថៃ នៅខេត្តឧត្ដរមានជ័យ គិតត្រឹមម៉ោង ១១ព្រឹកថ្ងៃទី៨ ធ្នូ។ នេះបើយោងតាមការអះអាងរបស់អ្នកនាំពាក្យសាលាខេត្តឧត្ដរមានជ័យ លោក ម៉េត មាសភក្ដី។
អ្នកនាំពាក្យសាលាខេត្តរូបនេះសរសេរលើហ្វេសប៊ុកថា ជាព័ត៌មានបឋមមានជនស៊ីវិលស្លូតត្រង់ចំនួន ៣នាក់ ក្នុងនោះស្រី ១នាក់ បានរងគ្រោះថ្នាក់ ដោយសារការវាយប្រហារពីកម្លាំងយោធាថៃ និងកំពុងជួយសង្គ្រោះពីក្រុមគ្រូពេទ្យ។
ចំណែកក្រសួងការពារជាតិកម្ពុជាអះអាងថា យោធាថៃបានបាញ់ប្រហារចូលដល់ក្នុងភូមិរស់នៅរបស់ពលរដ្ឋក្នុងខេត្តឧត្តរមានជ័យ និងខេត្តព្រះវិហារ បណ្តាលឱ្យរបួសជនស៊ីវិលមួយចំនួន និងឆេះផ្ទះសម្បែងប្រជាពលរដ្ឋស្លូតត្រង់អស់ជាច្រើនខ្នង ដែលធ្វើឱ្យពលរដ្ឋក្មេងចាស់ បង្ខំចិត្តជម្លៀសរកទីកន្លែងសុវត្ថិភាពបណ្តោះអាសន្នភ្លាមៗ។
ក្រសួងបន្តថា យោធាថៃបានប្រើយន្តហោះចម្បាំង F-16 នៅឃុំស្រអែម ស្រុកជាំក្សាន្ត និងបាញ់ផ្សែងពុលលើតំបន់ភ្នំខ្មោច និងប្រាសាទព្រះវិហារ ព្រមទាំងប្រើអាវុធធន់ធ្ងន់ជាច្រើនវាយប្រហារកម្ពុជា ដោយចោទកម្ពុជាថា វាយប្រហារមុន និងធ្វើឱ្យទាហានខ្លួនម្នាក់ស្លាប់ និងរងរបួសមួយចំនួន។ ប៉ុន្តែ ក្រសួងការពារជាតិកម្ពុជាបដិសេធការចោទប្រកាន់នេះ ដោយកម្ពុជាអះអាងថា ខ្លួនរក្សាភាពអត់ធ្មត់មិនទាន់តបតទេទៅថៃវិញ។ ក្រសួងការពារជាតិកម្ពុជាថា កំពុងអំពាវនាវសហគមន៍អន្តរជាតិជួយអន្តរាគមន៍បញ្ឈប់ឱ្យយោធាវាយប្រហារកម្ពុជា ព្រមទាំងស្នើក្រុមអ្នកសង្កេតការណ៍អាស៊ាន (AOT) ចុះទៅទីតាំង ដើម្បីធ្វើការស្រាវជ្រាវស៊ើបអង្កេត ដើម្បីស្វែងរកការពិត និងធានាឱ្យបាននូវតម្លាភាព យុត្តិធម៌ និងភាពត្រឹមត្រូវ។
