ឡានដឹក កម្មកររោងចក្រកាត់ដេរ ចំនួន៧០នាក់ នៅព្រឹកថ្ងៃទី២៧ ខែកុម្ភៈ បានជួបគ្រោះថ្នាក់ចរាចរណ៍ នៅតាមបណ្ដោយផ្លូវជាតិលេខ៨ ក្នុងខេត្តកណ្ដាល ដែលបណ្ដាលឱ្យអ្នកខ្លះបាក់ជើង បែកក្បាលធ្ងន់ធ្ងរ និង អ្នកខ្លះទៀត របួសស្រាល កំពុងតែសម្រាកព្យាបាលនៅមន្ទីរពេទ្យ រាជធានីភ្នំពេញ ខ្លះ និងនៅមន្ទីរ ពេទ្យបង្អែកខេត្តកណ្ដាលខ្លះ។
កម្មករទាំង៧០នាក់នោះ គឺជាស្ត្រីទាំងអស់ ហើយមានម្នាក់ជាស្ត្រីមានផ្ទៃពោះ ។ ពួកគាត់ធ្វើការនៅរោងចក្រ ចំនួន ៦ផ្សេងគ្នា នៅក្នុងតំបន់សេដ្ឋកិច្ច 7NG ស្ថិត នៅឃុំវិហារសួគ៌ ស្រុកខ្សាច់កណ្ដាល ខេត្តកណ្ដាល ។ កម្មករម្នាក់ នៅក្នុងហេតុនោះ លោកស្រី ប៊ុន បុរី ប្រាប់ទូរទស្សន៍អាស៊ីសេរី ថា មានកម្មករជិត៥០ នាក់ បានរងធ្ងន់ និងស្រាល។ លោកស្រីបន្តថា អ្នកដែលរបួសធ្ងន់ រហូតដល់ដាច់ជើង មានម្នាក់ ហើយអ្នកខ្លះទៀតដាច់ ស្លឹកត្រចៀក ទាំងសងខាង និងអ្នកខ្លះ ធ្លាយក្រលៀន មានប្រហែល ជាង ៦នាក់ ក្រៅពីនោះ រងរបួសស្រាល។
លោកស្រីរំលឹកថា អំឡុងពេលធ្វើដំណើរនោះ ឡានក្រុង ដឹកកម្មករ បានបើកយ៉ាងលឿន ដើម្បីវ៉ាឡើង ក៏ប៉ុន្តែ ទៅវាក់អើ ជាមួយនឹងរម៉កកងបីនៅពីមុខ ពេលនោះ អ្នកបើកបានកាច់ចង្កូតគេចរម៉ក បណ្ដាលឱ្យ ក្រឡាប់ឡាន។ លោកស្រីថា អ្នកបើកឡាននេះ ទើបតែមកបើកថ្មី បានប្រហែល២ថ្ងៃ ប៉ុណ្ណោះ ក្រោយពីអ្នកបើកចាស់បានលក់ឡាននោះ ឱ្យទៅអ្នកផ្សេង។
ជុំវិញរឿងនេះ អនុប្រធានសហព័ន្ធសហជីពប្រជាធិបតេយ្យកម្មករកាត់ដេរកម្ពុជា (ស៊ីខឌូ) លោក អាត់ ធន់ យល់ថា ករណីនេះ អាចបង្កឡើងដោយសារតែអ្នកបើកឡាននោះបើកលឿនពេក ទើបធ្វើឱ្យស្មារតីមិននឹងន រហូតកាចចង្កូតរេទៅធ្លាក់ផ្លូវ។ ទន្ទឹមគ្នានោះ លោកមើលឃើញឡានដឹកកម្មករភាគច្រើន ជាប្រភេទឡានកែច្នៃ ខុសស្តង់ដារ ហើយដឹកកម្មករលើសចំនួន។ ដូច្នេះ លោក ថា នៅពេលឡានផ្អៀងម្ដងៗ ងាយណាស់ នឹងក្រឡាប់ ព្រោះកម្មករ តែងតែផ្អៀងទៅតាមឡាន។ លោកស្នើឱ្យក្រសួងការងារ គួរតែតម្រូវឱ្យ ថៅកែរោងចក្រនីមួយៗ ត្រូវគិតគូរពីមធ្យោបាយដឹកកម្មករដែលមានស្តង់ដារ និងមិនមែនជា ឡានកែច្នៃ ដើម្បីធានាសុវត្ថិភាពកម្មករ៕
