សាលាឧទ្ធរណ៍ភ្នំពេញកាលពីព្រឹកថ្ងៃទី១២ ខែកុម្ភ: បានសម្រេចតម្កល់ការផ្ដន្ទាទោសលើសមាជិកគណបក្សភ្លើងទៀន៣នាក់ ឲ្យជាប់ពន្ធនាគារ២ឆ្នាំ ៦ខែពីបទ “ក្លែងបន្លំ និងប្រើប្រាស់លិខិតក្លែង” ពាក់ព័ន្ធនឹងការចុះបញ្ជីបេក្ខជនសម្រាប់ចូលរួមការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ កាលពីឆ្នាំ២០២៤។
ទោះជាយ៉ាងណា ក្នុងចំណោមសមាជិកបក្សភ្លើងទៀនទាំង ៣នាក់នោះ គឺមានតែប្រធានស្ដីទីគណបក្សភ្លើងទៀនរាជធានីភ្នំពេញ លោក ខឹម ចាន់វណ្ណៈ ម្នាក់ប៉ុណ្ណោះដែលកំពុងជាប់ឃុំនៅពន្ធនាគារត្រពាំងផ្លុង ខេត្តត្បូងឃ្មុំ ។ ចំណែកសមាជិកបក្សភ្លើងទៀន២នាក់ទៀត គឺលោក ម៉ា ចិន្តា និងលោក ហាក់ កុសល ត្រូវបានតុលាការសម្រេចព្យួរទោស និងដោះលែងឲ្យនៅក្រៅឃុំ បន្ទាប់ពីពួកគាត់ជាប់ពន្ធនាគារអស់រយ:ពេលជាង៩ខែ និងក្រោយពីចុះចូលជាមួយគណបក្សកាន់អំណាចរបស់លោក ហ៊ុន សែន។
ប្រពន្ធរបស់លោក ខឹម ចាន់វណ្ណៈ គឺលោកស្រី ឡង់ សូដានី ថ្លែងថា ការបន្តឃុំខ្លួនប្តីរបស់លោកស្រី គឺជារឿងនយោបាយ និងជារឿងអយុត្តិធម៌បំផុត ព្រោះគាត់មិនបានប្រព្រឹត្តកំហុសដូចការចោទប្រកាន់ឡើយ។ លោកស្រី នៅតែបន្តទាមទារឲ្យតុលាការដោះលែងប្តីលោកស្រីឲ្យមានសេរីភាពឡើងវិញ។
អាជ្ញាធររបបក្រុងភ្នំពេញបានចាប់ខ្លួន លោក ខឹម ចាន់វណ្ណៈ លោក ហាក់ កុសល និងលោក ម៉ា ចិន្តា ជាបន្តបន្ទាប់កាលពីខែមករា ឆ្នាំ២០២៤ នៅមុនការបោះឆ្នោតអសកល គឺការបោះឆ្នោតជ្រើសតាំងសមាជិកព្រឹទ្ធសភានីតិកាលទី៥ និងការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៤ ឆ្នាំ២០២៤ ។ អង្គការសិទ្ធិមនុស្ស និងគណបក្សប្រឆាំងចាត់ទុកថា ការប្រើប្រាស់បទចោទប្រកាន់ពីបទក្លែងបន្លំ និងប្រើប្រាស់លិខិតក្លែងទៅលើអ្នកនយោបាយបក្សប្រឆាំងនេះ គឺជាការធ្វើទុក្ខបុកម្នេញផ្នែកនយោបាយ និងជាការបំបិទសំឡេងថ្នាក់ដឹកនាំបក្សប្រឆាំង នៅមុនការបោះឆ្នោត។
លោក ខឹម ចាន់វណ្ណៈ គឺជាជនជាប់ឃុំនយោបាយម្នាក់ ក្នុងចំណោមអ្នកជាប់ឃុំដោយប្រើសិទ្ធិចំនួន ៩៦ នាក់ ដែលត្រូវបានចងក្រងដោយអង្គការលីកាដូ៕
