ក្រសួងការបរទេសកម្ពុជា ប្រកាសថា ប្រជាពលរដ្ឋកម្ពុជា រួមទាំងសិស្ស-និស្សិតសរុប ៥៩៥នាក់ ដែលកំពុងស្នាក់នៅតំបន់មជ្ឈិមបូព៌ា បានរក្សាការប្រុងប្រយ័ត្នយ៉ាងខ្ជាប់ខ្ជួន និងមានសុវត្ថិភាពទាំងអស់គ្នា។
ទោះជាយ៉ាងណា ក្រសួងការបរទេសកម្ពុជា លើកឡើងក្នុងសេចក្តីប្រកាសចុះថ្ងៃទី១០ មីនាថា ក្រសួងកំពុងបន្តតាមដាន និងមានក្តីបារម្ភបំផុតចំពោះការវិវត្តនៃសភាពការណ៍ជម្លោះក្នុងតំបន់មជ្ឈិមបូព៌ា។
ក្រសួងបញ្ជាក់ថា ស្ថានទូតកម្ពុជាប្រចាំនៅក្នុងតំបន់នេះ បានទទួលការណែនាំឱ្យទាក់ទងជាប្រចាំជាមួយអាជ្ញាធរពាក់ព័ន្ធរបស់ប្រទេសម្ចាស់ផ្ទះ ក៏ដូចជាជាមួយតំណាងប្រជាពលរដ្ឋ និងនិស្សិតកម្ពុជា ដើម្បីតាមដានអំពីសុខទុក្ខ និងសេចក្តីត្រូវការជំនួយជាយថាហេតុ ដើម្បីធានាសុខសុវត្ថិភាពរបស់ពួកគេ។
ជាមួយគ្នានេះ ក្រសួងការបរទេសកម្ពុជា អំពាវនាវដល់ពលរដ្ឋកម្ពុជា ដែលកំពុងស្នាក់នៅតាមបណ្តាប្រទេសនានាក្នុងតំបន់មជ្ឈិមបូព៌ា រួមមានដូចជា អ៊ីស្រាអែល កាតា គុយវ៉ែត អារ៉ាប៊ីសាអូឌីត អេមីរ៉ាតអារ៉ាប់រួម និងប្រទេសបារ៉ែន ត្រូវបន្តគោរពតាមការណែនាំរបស់ប្រទេសម្ចាស់ផ្ទះអំពីកិច្ចការពារសុវត្ថិភាពផ្ទាល់ខ្លួន។ បន្ថែមពីនេះ ក្រសួងបានប្រកាសលេខទូរស័ព្ទរបស់ស្ថានឯកអគ្គរាជទូតកម្ពុជាប្រចាំប្រទេសនោះដែរ សម្រាប់ឲ្យពលរដ្ឋនិងសិស្ស-និស្សិតខ្មែរ ទាក់ទងសុំជំនួយក្នុងករណីចាំបាច់៕
