មន្ត្រីគណបក្សប្រឆាំង និងអ្នកវិភាគ លើកឡើងថា ការដែលលោក ហ៊ុន ម៉ាណែត ចេញអនុក្រឹត្យព្រមានដកក្របខ័ណ្ឌមន្ត្រីនគរបាល និងពិន័យជាប្រាក់ដល់ ម្ចាស់ទីតាំង ដែលលាក់បាំង ឱ្យជនបរទេស បន្តរស់នៅកម្ពុជា ដោយខុសច្បាប់នោះ នឹងគ្មានប្រសិទ្ធភាពនោះទេ។ ពួកគាត់ថា មិនអាចដោះស្រាយបានដោយសារតែ បញ្ហាទាំងនោះ ជាប់ពាក់ព័ន្ធអំពើពុករលួយចាក់ស្រេះ ហើយ បក្សកាន់អំណាចសព្វថ្ងៃរស់បានដោយសារតែ បានចំណូលពីក្រុមឧក្រិដ្ឋជនទាំងនោះ។
មន្ត្រីគណបក្សប្រឆាំង និងអ្នកវិភាគថា ដើម្បីបោសសម្អាត ជនបរទេសដែលរស់នៅដោយខុសច្បាប់ ហើយបាន ពាក់ព័ន្ធនឹងឧក្រិដ្ឋកម្ម អនឡាញ ដំបូងឡើងរដ្ឋាភិបាលត្រូវតែហ៊ានបោសសម្អាត មន្ត្រីធំៗ ចាប់ពីថ្នាក់លើចុះមកក្រោម ហើយត្រូវចាប់មន្ត្រីពាក់ព័ន្ធទាំងនោះ មកផ្ដន្ទាទោសចំពោះមុខច្បាប់ ដោយបើកចំហនោះទើបមានប្រសិទ្ធភាព។
ទីប្រឹក្សាគណបក្សកម្លាំងជាតិ លោក រ៉ុង ឈុន ប្រាប់អាស៊ីសេរីនៅថ្ងៃទី៨ ខែមករាថា ការចេញអនុក្រឹត្យជាថ្មី របស់រដ្ឋាភិបាល លោក ហ៊ុន ម៉ាណែត ដើម្បីបោសសម្អាត ជនបរទេសខុសច្បាប់នៅកម្ពុជា លោក ហាក់គ្មានជំនឿទាល់តែសោះ ខណៈដែលបញ្ហាទាំងនោះ ជាប់ពាក់ព័ន្ធ អំពើពុករលួយជាប្រព័ន្ធ។ លោកថា ដើម្បីដោះស្រាយបញ្ហានេះ ទាល់តែរដ្ឋាភិបាល ហ៊ានបោសសម្អាត ពីមន្ត្រីគ្រាក់ៗ នៅក្នុងជួររដ្ឋាភិបាល ជាមុនសិន ព្រោះថា អ្នកដែលហ៊ានលាក់បាំង ជនបរទេសខុសច្បាប់ និងផ្ដល់ទីកន្លែងឱ្យពួកគេរស់នៅ ពុំមែនមន្ត្រីតូចតាចអាចធ្វើបាននោះទេ។
លោក រ៉ុង ឈុន៖ «សំខាន់ថាតើស្មារតី និងឧត្ដមគតិ ឆន្ទៈហ្នឹងចង់លុបបំផុតពិតប្រាកដដែលឬអត់។ នេះជាជំហរមួយឱ្យច្បាស់លាស់។ បើគ្រាន់តែចេញអនុក្រឹត្យ ព្រះរាជក្រឹត្យ ឱ្យតែល្អមើល ហើយការអនុវត្តធូររលុង អាហ្នឹង វាអត់បានផលអីទេ។ សំខាន់ដែលរឿងកើតមកជារឿយៗ ជាប់ទៅនឹងបញ្ហាពុករលួយ»។
នាយករដ្ឋមន្ត្រី លោក ហ៊ុន ម៉ាណែត ថ្ងៃទី០៥ ខែមករា បានចេញអនុក្រឹត្យស្ដីពីការគ្រប់គ្រងសន្តិសុខសុវត្ថិភាពតាមទីតាំងរស់នៅប្រមូលផ្ដុំ ដែលអនុក្រឹត្យនោះ មាន៧ជំពូក និង២៤មាត្រា។ អនុក្រឹត្យនេះ ធ្វើឡើងដើម្បីធានាដល់សន្តិសុខ សុវត្ថិភាពសង្គម និងសណ្ដាប់ធ្នាប់សាធារណៈ។ ក្នុងនោះមាន មាត្រា១៩ និងមាត្រា២០ នៃជំពូកទី៦ បានចែងពីទណ្ឌកម្ម ដោយលើកឡើងថា ម្ចាស់ទីតាំង ដែលមានជនបរទេស រស់នៅប្រមូលផ្តុំគ្នា ហើយធ្វេសប្រហែសមិនជូនដំណឹងដល់អាជ្ញាធរមានសមត្ថកិច្ច ក្នុងរយៈពេល២៤ម៉ោង នឹងត្រូវផាកពិន័យជាប្រាក់ចំនួន ៤សែនរៀល។
ទន្ទឹមគ្នានោះ ម្ចាស់ទីតាំង ឬ អ្នកគ្រប់គ្រងទីតាំង ដែលមានចេតនាលាក់បាំង និងអនុញ្ញាតឲ្យជនបរទេស រស់នៅក្នុងប្រទេសកម្ពុជាដោយខុសច្បាប់ នឹងត្រូវផាកពិន័យជាប្រាក់ចំនួន ៤លានរៀល សម្រាប់ជនបរទេសម្នាក់ ដោយមិនទាន់គិតដល់ទោសព្រហ្មទណ្ឌ ដែលបានកំណត់ក្នុងច្បាប់ជាធរមាន។ ចំណែក អាជ្ញាធរមានសមត្ថកិច្ច វិញ ក៏ត្រូវប្រឈមនឹងការដកចេញពីក្របខ័ណ្ឌការងារដែរ ដោយមិនទាន់គិតដល់ទោសព្រហ្មទណ្ឌ ប្រសិនបើបានប្រព្រឹត្តកំហុសខាងលើ។
ការចេញអនុក្រឹត្យរបស់ លោក ហ៊ុន ម៉ាណែត នៅពេលនេះ ធ្វើឡើងក្រោយពេលដែលកម្ពុជារងការចោទប្រកាន់ពីបណ្ដាប្រទេសមួយចំនួនដូចជា សហរដ្ឋ អាមេរិក ចក្រភពអង់គ្លេស និងអូស្ត្រាលី ជាដើម ថា កម្ពុជាសម្បូរដោយជនបរទេសរស់នៅដោយខុសច្បាប់ ប្រព្រឹត្តឧក្រិដ្ឋកម្ម ឆបោកអនឡាញ។ ថ្វីត្បិតថា បញ្ហានេះ បានកើតឡើងអស់ជាច្រើនខែមកហើយក្ដី គេឃើញថា រដ្ឋាភិបាលកម្ពុជាពុំមានឆន្ទៈពិតប្រាកដ ក្នុងការបោសសម្អាត ក្រុមឧក្រិដ្ឋជនទាំងនោះឱ្យមានប្រសិទ្ធភាពនោះទេ ខណៈដែលអាជីវកម្ម ឆបោកអនឡាញ នៅតែដំណើរការដដែល។
ចំណែកអ្នកនាំពាក្យគណបក្សប្រជាធិបតេយ្យជឿនលឿន លោក ប៉ោ មករា លើកឡើងថា បញ្ហានេះ ពុំមែនជារឿងដែលពិបាកដោះស្រាយនោះទេ ប្រសិនបើរដ្ឋាភិបាលមានឆន្ទៈពិតប្រាកដ។ លោកថា ដំបូង រដ្ឋាភិបាលត្រូវរឹតត្បិតនៅតាមច្រកព្រំដែនទាំងផ្លូវអាកាស ផ្លូវទឹក និងផ្លូវគោក ថាតើ ពួកគេចូលមកកម្ពុជាគោលបំណងអ្វី? ហើយការចូលមករបស់ជនបរទេសទាំងនោះ ស្របច្បាប់ ឬក្រោមហេតុផលអំពើពុករលួយ។ លោកថា រកហេតុផលទាំងនោះឱ្យឃើញជាមុន រួចចាត់វិធានការ ផ្លូវច្បាប់ ឱ្យបានតឹងរ៉ឹង លើមន្ត្រីពុករលួយ ដើម្បីគំរាមកុំឱ្យមន្ត្រីដទៃធ្វើតាម។
លោក ប៉ោ មករា៖ «ខ្ញុំនៅតែមើលឃើញថា បញ្ហាធំ បញ្ហាដែលអនុវត្តការងារទៅវាគ្មានប្រសិទ្ធភាព នោះគឺពាក់ព័ន្ធនឹងបញ្ហាអំពើពុករលួយ។ ចាំបាច់ត្រូវតែកម្ចាត់អំពើពុករលួយ ចាំបាច់ត្រូវតែហ៊ានកាត់សាច់ មន្ត្រីពុករលួយឱ្យអស់ ដើម្បីឱ្យការងារនេះមានប្រសិទ្ធភាព។ ហើយមន្ត្រីដែលនៅមូលដ្ឋានគ្រាន់តែជាមន្ត្រីបន្ទាប់បន្សំប៉ុណ្ណោះ»។
ជុំវិញរឿងនេះ អ្នកនាំពាក្យ គណបក្សប្រជាជនកម្ពុជា លោក ជា ធីរិទ្ធ ប្រាប់ទូរទស្សន៍អាស៊ីសេរី នៅថ្ងៃទី០៨ ខែមករា ថា ចំពោះអ្នកដែលរិះគន់រដ្ឋាភិបាល គឺជា មនុស្សជ្រុលនិយម និងមានគំនិតទុទ្ទិដ្ឋិនិយម រហូតដល់មើលមិនឃើញពីកិច្ចការខិតខំប្រឹងប្រែងរបស់រដ្ឋាភិបាល ដើម្បីផលប្រយោជន៍ ប្រជាពលរដ្ឋ និងប្រទេសជាតិ។
លោក ជា ធីរិទ្ធ៖ «បុគ្គលដែលមានភាពជ្រុលនិយម និងមានទុទ្ទិដ្ឋិនិយម នៅពេលឃើញអំពើល្អ ពូកគេមិនថា វាជាអំពើល្អសាទរទេ។ ពួកគេនៅតែនិន្ទាថ្កោលទោស និងបរិហារតែប៉ុណ្ណឹង។ អ៊ីចឹងវាអត់មានអ្វីចម្លែកទេ សម្រាប់ការលើកឡើង បរិហាររបស់ពួកគេនោះ ព្រោះយើងមិនអាចផ្គាប់ចិត្តបុគ្គលទុទ្ទិដ្ឋិនិយមបានទេ។ អ្វីដែលយើងផ្គាប់ចិត្ត គឺផ្គាប់ចិត្តប្រជាជនរបស់យើង»។
ទោះជាបែបនេះក្ដី អ្នកច្បាប់ និងជាអ្នកវិភាគឯករាជ្យ លោក វ៉ន ចាន់ឡុត លើកឡើងថា ការចេញអនុក្រឹត្យរបស់ លោក ហ៊ុន ម៉ាណែត ក្រោមហេតុផល ដើម្បីរក្សា សណ្ដាប់ធ្នាប់សង្គម នោះហាក់ពុំមែនជាការពិតនោះទេ លោកថា នេះគ្រាន់តែជាលេសដើម្បីងាយស្រួលក្នុងការគ្រប់គ្រងដោយផ្ទាល់របស់រដ្ឋាភិបាល ក្នុងការ ការពារក្រុមឧក្រិដ្ឋជនទាំងនោះជាប្រព័ន្ធ។ ទន្ទឹមគ្នានោះ លោកថា កន្លងមក ម្ចាស់ទីតាំងដែលឱ្យ ឧក្រិដ្ឋកម្មរស់នៅសុទ្ធសឹងតែ ជាអ្នកមានលុយមានអំណាចក្នុងជួររដ្ឋាភិបាល ដូចជាឧកញ៉ា កុក អាន និងឧកញ៉ា លី យ៉ុងផាត់ ជាដើម។ ដូច្នេះ លោកថា លោក ហ៊ុន ម៉ាណែត មិនពិន័យលើអ្នកទាំងនោះឡើយ។
លោក វ៉ន ចាន់ឡុត៖ «អំពើទាំងអស់នេះនឹងវិលមកដូចដើមឡើងវិញ ហើយទំនងកាន់តែខ្លាំងក្លាជាងមុន។ កត្តាច្បងមួយដែលនាំ ឱ្យអំពើឧក្រិដ្ឋនៅកម្ពុជាមិនស្រាប់រលាប និងមិនថមថយ ព្រោះតែវាជាប់ពាក់ព័ន្ធរវាងទំនាក់ទំនងនៃឧក្រិដ្ឋជន និងអ្នកកាន់អំណាច ភាគីទាំងពីរនេះ បានជួយគ្នាទៅវិញ ទៅមក ដោយក្រុមឧក្រិដ្ឋជនជួយរកប្រភពធនធានហិរញ្ញវត្ថុ ដើម្បីជួយពង្រឹងអំណាចនៃ គណបក្សប្រជាជនកម្ពុជា ជាថ្នូរនឹងការធានា សុខសុវត្ថិភាព ចំពោះពួកគេ»។
កន្លងមក សារព័ត៌មានអន្តរជាតិធំៗ បានចុះផ្សាយព្រោងព្រាតដោយរកឃើញថា មន្ត្រីជាន់ខ្ពស់រដ្ឋាភិបាល និងក្រុមឧកញ៉ាដែលនៅកៀកជាមួយគ្រួសារលោក ហ៊ុន សែន បានសាងសង់អាគារធំៗនៅតាមទីក្រុងនិងតាមបណ្ដោយព្រំដែន ដើម្បីដាក់ជួលឲ្យក្រុមឧក្រិដ្ឋជនបរទេស ស្នាក់នៅនិងប្រើប្រាស់ សម្រាប់ប្រតិបត្តិការឆបោកអនឡាញ។ ប្រតិបត្តិការឆបោកអនឡាញ នេះ បង្កើតឲ្យមានឧក្រិដ្ឋកម្មផ្សេងៗទៀតកើតឡើងដែរ ដូចជាឃុំឃាំងមនុស្សខុសច្បាប់ ការធ្វើទារុណកម្ម អំពើឃាតកម្ម ការចាប់ជំរិត និងការជួញដូរមនុស្ស ព្រមទាំងការជួញដូរគ្រឿងញៀននិងអាវុធខុសច្បាប់ជាដើម។
ក្រសួងសេដ្ឋកិច្ចអាមេរិក កាលពីថ្ងៃទី១២ កញ្ញា ឆ្នាំ២០២៤ បង្កកទ្រព្យសម្បត្តិរបស់លោក លី យ៉ុងផាត់ ចំនួន៥ក្រុមហ៊ុន រួមមាន ក្រុមហ៊ាន L.Y.P. Group រមណីយដ្ឋាន អូស្មាច់ សណ្ឋាគារ ហ្គាឌិនស៊ីធី (Garden City) រមណីយដ្ឋានកោះកុង និងសណ្ឋាគារភ្នំពេញជាដើម ក្រោយរកឃើញថា បានប្រតិបត្តិការជួញដូរមនុស្ស និងបោកប្រាស់តាមប្រព័ន្ធអនឡាញ។ ចំណែក លោក កុក អាន ក៏មាន ក្រុមហ៊ុនជាច្រើនជាប់ព័ន្ធការបោកប្រាស់តាមប្រព័ន្ធអនឡាញនេះដែរ។
ទាក់ទិន បញ្ហាឧក្រិដ្ឋកម្មអនឡាញនេះ ប្រមុខដឹកនាំរដ្ឋាភិបាលឯករាជ្យ២៣តុលាការ លោក សម រង្សី បង្ហោះសារនៅលើហ្វេសប៊ុកថា បន្ទាប់ពីក្រសួងមហាផ្ទៃបានប្រកាសថា ទីប្រឹក្សាលោក ហ៊ុន សែន និង លោក ហ៊ុន ម៉ាណែត គឺ លោក ចេន ហ្ស៊ី (Chen Zhi) ត្រូវបានចាប់ខ្លួន បញ្ជូនទៅប្រទេសចិន រួចមក លោកថា នេះជាភស្តុតាង បញ្ជាក់ថា លោក ហ៊ុន សែន ពិតជាបានលាក់ លោក ចេន ហ្ស៊ី និង រួមគំនិតជាមួយឧក្រិដ្ឋជននៅកម្ពុជា ពិតមែន ដែលធ្វើឱ្យពលរដ្ឋនិងប្រទេសជាតិបានក្លាយជា ជនរងគ្រោះយ៉ាងធ្ងន់ធ្ងរលើកឆាកអន្តរជាតិ។ ហេតុនេះ លោកថា ការប្ដូរមេដឹកនាំត្រកូលហ៊ុន ចេញពីអំណាច ជាជម្រើសតែមួយគត់ ដើម្បីស្ដារមុខមាត់ប្រទេសជាតិឡើងវិញ៕
