ក្រុមឈ្មួញកំពុងសំងំធ្វើអាជីវកម្មរ៉ែមាសនៅឧទ្យានជាតិវីរៈជ័យ បានបង្ហូរសារធាតុគីមីចូលអូរធម្មជាតិ បង្កផលប៉ះពាល់ប្រជាពលរដ្ឋរាប់រយគ្រួសារ នៅស្រុកតាវែង ខេត្តរតនគិរី។ អាជ្ញាធរមូលដ្ឋានទទួលស្គាល់ថា ពិតជាមានពលរដ្ឋរងផលប៉ះពាល់ និងកើតរោគរមាស់ប្រាកដមែន ប៉ុន្តែមិនទាន់ប្រាកដថា មកពីបញ្ហាអាជីកម្មរ៉ែមាសនៅផ្នែកខាងលើនោះទេ។
ក្រុមឈ្មួញធ្វើអាជីវកម្មរ៉ែមាសនៅឧទ្យានជាតិវីរៈជ័យ បានបង្ហូរសារធាតុគីមីចូលអូរតាបូក និងចូលទន្លេស្រែពក បង្កផលប៉ះពាល់ដល់ពលរដ្ឋរាប់រយគ្រួសារ រស់នៅក្នុងឃុំតាវែងលើ ស្រុកតាវែង ខេត្តរតនគិរី ដែលធ្វើឲ្យពលរដ្ឋកើតជំងឺរមាស់ស្បែក និងប្រឈមគ្រោះថ្នាក់ដល់អាយុជីវិត។
ប្រធានសហគមន៍មណ្ឌលយ៉ន លោក គុប ណី រស់នៅភូមិអូរតាបូក ឃុំតាវែងលើ អះអាងប្រាប់ទូរទស្សន៍អាស៊ីសេរី នៅថ្ងៃទី១៩ ខែវិច្ឆិកា ថា ជិតមួយឆ្នាំមកហើយ ដែលទឹកអូរតាបូក និងទន្លេស្រែពក ប្រែពណ៌ពីថ្លាឈ្វេងទៅជាពណ៌ក្រហម។ លោកថា ពលរដ្ឋប្រទះឃើញក្រុមឈ្មួញមួយក្រុមធំ កំពុងសំងំធ្វើអាជីវកម្មរ៉ែមាសនៅចុងអូរតាបូក និងបានបង្ហូរសាធារតុគីមីចូលក្នុងអូរធម្មជាតិ និងទន្លេស្រែពក ធ្វើឲ្យពលរដ្ឋរាប់រយគ្រួសារមិនអាចប្រើប្រាស់ទឹកអូរធម្មជាតិ និងទន្លេបានទៀតនោះទេ។ លោកបន្ថែមថា ពលរដ្ឋបានស្នើឲ្យអាជ្ញាធរពាក់ព័ន្ធជួយរកដំណោះស្រាយ។
លោក គុប ណី៖ «ចង់ឲ្យអាជ្ញាធរគាត់ចុះសិក្សាអំពីផលប៉ះពាល់ដែលគាត់អាស្រ័យផលផ្ទាល់ អំពីទឹក និងត្រី ពួកគាត់រស់នៅពឹងលើរបស់ទាំងអស់នេះអ៊ីចឹង អាជីវកម្មរ៉ែ អាជីវកម្មដែលធ្វើឲ្យប៉ះពាល់ គាត់មុនធ្វើអ្វីមួយត្រូវពិគ្រោះយោបល់ជាមួយប្រជាពលរដ្ឋថា វាប៉ះពាល់ដល់កម្រិតណា និងស្ដាប់សំណូមពរ ដោយសារគាត់រងផលប៉ះពាល់រួចទៅហើយ បច្ចុប្បន្ននៅតែមានផលប៉ះពាល់ទៀត»។
ស្រដៀងគ្នានេះដែរ មេភូមិអូតាបូក លោក ឈិន ចាន់ អះអាងថា ពិតជាមានពលរដ្ឋកើតជំងឺរមាស់ស្បែក ទឹកអូរធម្មជាតិ និងទឹកទន្លេ ប្រែពណ៌ពីថ្លាឆ្វេងទៅជាពណ៌ក្រហម ប្រាកដមែន ហើយអាជ្ញាធរមូលដ្ឋានកំពុងតែតាមដាន និងស្រាវជ្រាវរកបញ្ហាពិតប្រាកដ។
លោក ឈិន ចាន់៖ «ខ្ញុំមានការព្រួយបារម្មដែរ មិនដឹងថាមកពីបញ្ហាធ្វើផ្លូវ ឬមកពីបញ្ហាធ្វើចម្ការ ខ្ញុំចង់ស្នើសុំឲ្យក្រុមហ៊ុននៅខាងលើឲ្យពួកគាត់ជួយសម្រួលបើទឹកនៅតែល្អក់ពិបាកពួកគាត់ប្រើប្រាស់ មិនទាន់ដឹងថាក្រុមហ៊ុន ឬក៏ដោយសារខែនេះជាខែភ្លៀង»។
ជុំវិញរឿងនេះ ទូរទស្សន៍អាស៊ីសេរីមិនអាចទាក់ទងអ្នកនាំពាក្យក្រសួងបរិស្ថាន លោក ខ្វៃ អាទិត្យា និងអ្នកនាំពាក្យក្រសួងរ៉ែ និងថាមពល លោក អ៊ឹង ឌីប៉ូឡា បានទេនៅថ្ងៃទី១៩ ខែវិច្ឆិកា ដោយទូរស័ព្ទចូលតែគ្មានអ្នកទទួល។ ចំណែកអភិបាលខេត្តរតនគិរី លោក ញ៉ែម សំអឿន និងប្រធានមន្ទីររ៉ែ និងថាមពលខេត្តរតនគិរី លោក អ៊ុង ហួរ ក៏ទូរទស្សន៍អាស៊ីសេរី មិនអាចទាក់ទងបានដែរនៅថ្ងៃដដែលនេះ។
ទោះជាយ៉ាងណា កាលពីដើមឆ្នាំ២០២៥ អាជ្ញាធរខេត្តរតនគិរី បានចាត់វិធានការម្ដងរួចហើយ ចំពោះជនជាតិវៀតណាមដែលលួចចូលប្រទេសកម្ពុជា និងធ្វើអាជីវកម្មរ៉ែមាស ស្ថិតក្នុងឧទ្យានជាតិវីរៈជ័យ ស្រុកតាវែង និងស្រុកអណ្ដូងមាស ខេត្តរតនគីរី ដោយអាជ្ញាធរបានបណ្ដេញជនជាតិវៀតណាមទាំងនោះត្រឡប់ទៅប្រទេសកំណើតវិញ។
ទាក់ទិននឹងបញ្ហានេះ អ្នកស្រាវជ្រាវ និងឃ្លាំមើលធនធានធម្មជាតិនៅកម្ពុជា លោក សេង សុខហេង លើកឡើងថា រដ្ឋាភិបាលគួរតែចុះសិក្សាស្រាវជ្រាវឲ្យបានច្បាស់លាស់ ប្រសិនបើអាជីវកម្មរ៉ែមាសទាំងនោះមិនស្របទៅតាមច្បាប់ អាជ្ញាធរត្រូវតែចាត់វិធាការឲ្យបានតឹងរ៉ឹងទៅលើអ្នកប្រព្រឹត្ត និងអ្នកជាប់ពាក់ព័ន្ធ ដើម្បីបង្ហាញពីការយកចិត្តទុកក្នុងការការពារធនធានធម្មជាតិ និងអាយុជីវិតរបស់ពលរដ្ឋរស់នៅជុំវិញតំបន់នោះ។
លោក សេង សុខហេង៖ «ភាពជាក់ស្ដែងយើងឃើញថាការធ្វើអាជីវកម្មរ៉ែជាច្រើនមិនស្របទៅតាមច្បាប់ មានការប្រើប្រាស់នូវសារធាតុហាមឃាត់ ឬសារធាតុទាំងឡាយដែលធ្វើឲ្យប៉ះពាល់ដល់បរិស្ថាន ទៅដល់ការរស់នៅរបស់ប្រជាពលរដ្ឋនៅក្នុងតំបន់ បុគ្គល ឬក្រុមណាដែលប្រើប្រាស់សារធាតុហាមឃាត់ ដែលមានចែងនៅក្នុងច្បាប់បរិស្ថាន ពួកទាំងនោះត្រូវតែទទួលទោស»។
ប្រជាពលរដ្ឋស្នើឲ្យអាជ្ញាធរពាក់ព័ន្ធចុះសិក្សាស្រាវជ្រាវ និងត្រូវចាត់វិធានការជាបន្ទាន់ដើម្បីទប់ស្កាត់ក្រុមឈ្មួញទាំងនោះ បញ្ឈប់បង្ហូរសារធាតុគីមីចូលអូរធម្មជាតិបន្តទៀត។ ពលរដ្ឋថា ប្រសិនបើអាជ្ញាធរពាក់ព័ន្ធមិនចុះទប់ស្កាត់នោះទេ ពលរដ្ឋរស់នៅ ស្រុកតាវែង ខេត្តរតនគិរី នឹងប្រឈមកើតជំងឺអាសន្នរោគ និងគ្រោះថ្នាក់ដល់អាយុជីវិតជាក់ជាមិនខាន៕
