ដំណាំស្រូវជិតមួយម៉ឺន (១០.០០០) ហិកតារនិងដំណាំដំឡូងមីជាច្រើនហិកតារផ្សេងទៀតរបស់ប្រជាកសិករនៅក្នុងខេត្តសៀមរាប កំពុងរងការខូចខាតដោយជំនន់ទឹកភ្លៀង។ កសិករដែលរងគ្រោះមានចំនួនជាង ៧ពាន់គ្រួសារនៅក្នុងស្រុកចំនួន៦ នៃខេត្តសៀមរាប។ នេះបើតាមមន្ទីរព័ត៌មានខេត្តសៀមរាបដែលបាន ចេញផ្សាយរបាយការណ៍របស់មន្ទីរកសិកម្ម ខេត្តសៀមរាប កាលពីថ្ងៃទី១៩ ខែវិច្ឆិកា។
ខេត្តសៀមរាប បានទទួលរងឥទ្ធិពលពីព្យុះចំនួន២ ដែលបានបង្កឱ្យមានភ្លៀងធ្លាក់ពីមធ្យមទៅច្រើន ចាប់តាំងពីថ្ងៃទី១៧ ខែវិច្ឆិកាមក។ អាជ្ញាធរពាក់ព័ន្ធក្នុងខេត្តនេះ ក៏បានប្រកាសពីកិច្ចសហការគ្នាដើម្បីជួយដល់កសិករដូចជាការដាំដុះស្ដារឡើងវិញ តាមមធ្យោបាយផ្សេងៗ និងបន្តតាមដានស្ថានភាពទឹកជំនន់ទឹកភ្លៀងជាដើម។
ក្រៅពីខេត្តសៀមរាបនេះ ទឹកជំនន់ ក៏កំពុងបង្កការគំរាមកំហែងដល់ប្រជាពលរដ្ឋនៅខេត្តពោធិ៍សាត់ដែរ។ អភិបាលខេត្តពោធិ៍សាត់ លោក ខូយ រីដា បានបង្ហោះសារ នៅលើទំព័រហ្វេសប៊ុករបស់លោក នៅថ្ងៃទី២១ វិច្ឆិកា ថា ទឹកស្ទឹងពោធិ៍សាត់កំពុងពង្រីកផលប៉ះពាល់កាន់តែខ្លាំងដល់ក្រុង និងស្រុកមួយចំនួនក្នុងខេត្តពោធិ៍សាត់។ លោកអះអាងថា អាជ្ញាធរខេត្តភាគខាងលិចនេះ កំពុងអន្តរាគមន៍សង្គ្រោះពលរដ្ឋមកកាន់ទីទួលសុវត្ថិភាព ព្រមទាំងកំណត់គោលដៅផលប៉ះពាល់នៃជំនន់ទឹកភ្លៀងនេះផងដែរ។ ទោះជាយ៉ាងណា អាជ្ញាធរខេត្តពោធិ៍សាត់ មិនទាន់បញ្ជាក់អំពីទំហំនៃផលប៉ះពាល់និងការខូចខាតនៅឡើយទេ។ ប៉ុន្តែអាជ្ញាធរខេត្ត បានចុះចែកអំណោយដូចជាគ្រឿងបរិភោគមួយចំនួន និងអំពាវនាវឲ្យពលរដ្ឋគ្រប់រូបប្រុងប្រយ័ត្នសុវត្ថិភាពឲ្យបានខ្ពស់៕
