អាជ្ញាធរមូលដ្ឋាននៅឃុំរួសរាន់ ស្រុករវៀង ខេត្តព្រះវិហារ អះអាងថា ក្រុមហ៊ុន គ្លូប៊ល ហ្គ្រីន (Global Green) របស់លោក ទ្រី ដាលុច នឹងមិនកាត់ឆ្វៀលដីស្រែចម្ការ ដែលរងផលប៉ះពាល់ពីការធ្វើអាជីវកម្មរ៉ែដែក ឲ្យពលរដ្ឋក្នុងខេត្តព្រះវិហារនោះឡើយ។ សង្គមស៊ីវិលថា អាជ្ញាធរ និងក្រុមហ៊ុន គួររកដំណោះស្រាយមុនឈូសឆាយផលដំណាំនិងដីស្រែចម្ការរបស់ពលរដ្ឋរងគ្រោះ។
អស់រយៈពេលជាង ៣ឆ្នាំមកហើយ ដែលក្រុមហ៊ុន គ្លូប៊ល ហ្គ្រីន (ខេមបូឌា) អេនើជី ឌីវេឡុបមេន (Global Green (Cambodia) Energy Development) របស់លោក ទ្រី ដាលុច ធ្វើអាជីវកម្មរ៉ែដែក នៅស្រុករវៀង ខេត្តព្រះវិហារ។ អាជ្ញាធរមូលដ្ឋាន អះអាងថា ក្រុមហ៊ុនមួយនេះ នឹងមិនកាត់ឆ្វៀលដីស្រែចម្ការ ឲ្យពលរដ្ឋដែលរងផលប៉ះពាល់ពីការធ្វើអាជីវកម្មរ៉ែដែកឡើយ បើទោះបីប្រជាពលរដ្ឋ នៅក្នុងឃុំរួសរាន មិនព្រមទទួលយកសំណងដែលក្រុមហ៊ុនបានកំណត់ឲ្យក្ដី។
មេឃុំរួសរាន់ លោក ប្រាក់ វ៉េត ប្រាប់ទូរទស្សន៍អាស៊ីសេរី នៅថ្ងៃទី០១ ខែធ្នូថា ក្រុមហ៊ុន គ្លូប៊ល ហ្គ្រីន នឹងមិនកាត់ឆ្វៀលដីស្រែចម្ការដែលរងផលប៉ះពាល់ឲ្យពលរដ្ឋវិញឡើយ ដោយក្រុមហ៊ុនសំអាងថា ដីស្រែចម្ការទាំងនោះ គឺរដ្ឋាភិបាលបានផ្ដល់ឲ្យក្រុមហ៊ុនធ្វើការវិនិយោគទៅលើអាជីវកម្មរ៉ែដែក ហើយក្រុមហ៊ុននឹងឈូសឆាយដីធ្លីទាំងនោះ បើទោះបីពលរដ្ឋមិនព្រមទទួលយកសំណង និងចេញមកតវ៉ាយ៉ាងណាក្ដី។ លោកមេឃុំ អះអាងទៀតថា អាជ្ញាធរមូលដ្ឋានគ្មានសិទ្ធិសម្រេចអ្វីឡើយ ក្រៅពីជួយសម្របសម្រួលសុំឲ្យក្រុមហ៊ុនផ្ដល់សំណងសមរម្យដល់ពលរដ្ឋរងគ្រោះទាំងនោះ។
លោក ប្រាក់ វ៉េត៖ «កាលពីម្សិលមិញខ្ញុំបានទៅជួបធ្វើការដោះស្រាយដែរ អំពីតំបន់ដែលត្រូវកាត់ឆ្វៀល ខ្ញុំទទួលបានពីក្រុមហ៊ុនដែលគេបាននិយាយ គឺគេធ្វើនៅក្នុងអាជ្ញាប័ណ្ណដែលរដ្ឋបានផ្ដល់សិទ្ធិឲ្យទៅគេ តែបើឲ្យគេកាត់ឆ្វាល គេអត់អាចកាត់ឆ្វៀលឲ្យបានទេ»។
លោក ប្រាក់ វេត បន្ថែមទៀតថា បច្ចុប្បន្នក្រុមហ៊ុន គ្លូប៊ល ហ្គ្រីន បានផ្ដល់សំណងឲ្យពលរដ្ឋដែលមានដីស្រែចម្ការ និងដីមានផលដំណាំជាង២ពាន់ដុល្លារ ក្នុង១ហិកតារ និងដីស្រែដែលមិនមានផលដំណាំ ចំនួន៦លានរៀល (៦.០០០.០០០) ហើយសព្វថ្ងៃប្រជាពលរដ្ឋរងផលប៉ះពាល់មិនដល់១០គ្រួសារនោះទេ ដែលមិនព្រមទទួលយកសំណង និងស្នើឲ្យកាត់ឆ្វៀលដីទុកអាស្រ័យផល។
ពលរដ្ឋម្នាក់រស់នៅឃុំរួសរានសុំមិនបញ្ចេញឈ្មោះ និងសំឡេងព្រោះបារម្ភពីសុវត្ថិភាព អះអាងថា លោកត្រូវប្រឈមមុខគ្រោះថ្នាក់ជារៀងរាល់ថ្ងៃ ដោយសារក្រុមហ៊ុនបានលួចដាក់គ្រឿងចក្រឈូសឆាយផលដំណាំ ដែលកំពុងប្រមូលផល ហើយមិនព្រមរកដំណោះស្រាយឲ្យបានសមរម្យដល់ពលរដ្ឋ។
ប្រជាពលរដ្ឋរងផលប៉ះពាល់ពីការធ្វើអាជីវកម្មរ៉ែដែក របស់ក្រុមហ៊ុន គ្លូប៊ល ហ្គ្រីន ជិត១០០គ្រួសារ ស្ថិតនៅឃុំរួសរាន់ ស្រុករវៀង ខេត្តព្រះវិហារ ស្នើសុំឲ្យក្រុមហ៊ុន និងអាជ្ញាធរកាត់ឆ្វៀលដីស្រែចម្ការរបស់ពួកគាត់ ចេញពីក្នុងបរិវេណអាជីវកម្មរ៉ែរបស់ក្រុមហ៊ុន។ ប៉ុន្តែក្រុមហ៊ុន និងអាជ្ញាធរមិនបានរកដំណោះស្រាយតាមសំណើរបស់ពលរដ្ឋនោះទេ ក្រៅពីបង្ខំឲ្យពួកគាត់ទទួលយកសំណងពីក្រុមហ៊ុនបានកំណត់។
ជុំវិញរឿងនេះ ទូរទស្សន៍អាស៊ីសេរី មិនអាចទាក់ទងប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា និងអ្នកនាំពាក្យក្រសួងរ៉ែ និងថាមពល លោក អ៊ឹង ឌីប៉ូឡា ដើម្បីសុំការអត្ថាធិប្បាយបានទេ នៅថ្ងៃទី១ ខែធ្នូ ដោយទូរស័ព្ទចូលតែគ្មានអ្នកលើក។ ចំណែកតំណាងក្រុមហ៊ុន គ្លូប៊ល ហ្គ្រីន លោក ដេត សិលា និងអ្នកនាំពាក្យសាលាខេត្តព្រះវិហារលោក ណុប វុធ្ធី ក៏ទូរទស្សន៍អាស៊ីសេរី មិនអាចទាក់ទងបានដែរនៅថ្ងៃដដែលនេះ។
ទាក់ទិននឹងបញ្ហានេះ អនុប្រធានផ្នែកសិទ្ធិមនុស្ស ដីធ្លី និងធនធានធម្មជាតិ នៃសមាគមការពារសិទ្ធិមនុស្សអាដហុក (Adhoc) លោក យិន ម៉េងលី យល់ឃើញថា បើទោះបីក្រុមហ៊ុនទទួលបានសិទ្ធិវិនិយោគពីរដ្ឋាភិបាលក៏ដោយ ក្រុមហ៊ុន និងអាជ្ញាធរត្រូវតែរកដំណោះស្រាយឲ្យបានសមរម្យ និងផ្ដល់សំណងឲ្យបានគ្រប់គ្រាន់ដើម្បីឲ្យពួកគាត់អាចយកទៅប្រកបរបរចិញ្ចឹមជីវភាពបានល្អប្រសើរ។ លោកថា អាជ្ញាធរ និងក្រុមហ៊ុន មិនគួរឈូសឆាយបំផ្លាញផលដំណាំរបស់ពលរដ្ឋរួចហើយ ទើបរកដំណោះស្រាយឲ្យគាត់នោះទេ ពីព្រោះការធ្វើបែបនេះ គឺវាផ្ទុយនឹងច្បាប់។
លោក យិន ម៉េងលី៖ «ជាគោលការណ៍ច្បាប់ត្រូវរកដំណោះស្រាយមុនក្រុមហ៊ុនចាប់ផ្ដើម ដំណើរការ មិនមែនក្រុមហ៊ុនចាប់ផ្ដើមប៉ះពាល់ យកមិនយក មិនមែនជាយន្តការដំណោះស្រាយល្អសម្រាប់ប្រជាពលរដ្ឋនោះទេ ហើយរដ្ឋាភិបាលពិនិត្យមើលឡើងវិញ អំពីបញ្ហាទាំងអស់នេះ ហើយអាជ្ញាធរមូលដ្ឋានត្រូវរាយការណ៍ការពិត ហើយរាយការណ៍អ្វីឲ្យជាការពិត ឲ្យឆាប់រហ័សនូវរបាយការណ៍ហ្នឹងបញ្ចូលឲ្យទៅប្រមុខរដ្ឋាភិបាល ដើម្បីដោះស្រាយយើងអត់អាចទុកឲ្យក្រុមហ៊ុនធ្វើការឈូសឆាយអ្វីៗតាមអំពើចិត្តបានទេ»។
កាលពីថ្ងៃទី២០ ខែកក្កដា ឆ្នាំ២០២៣ រដ្ឋលេខាធិការប្រចាំការទីស្ដីការគណៈរដ្ឋមន្ត្រី លោក ហ៊ីង ថូរ៉ាក់ស៊ី បានចុះហត្ថលេខាអនុញ្ញាតនិងគាំទ្រឲ្យក្រុមហ៊ុន គ្លូប៊ល ហ្គ្រីន (ខេមបូឌា) របស់លោក ទ្រី ដាលុច រុករកនិងធ្វើអាជីវកម្មរ៉ែដែកទូទាំងប្រទេស ក្រោមហេតុផលថាដើម្បីជួយរដ្ឋាភិបាលក្នុងការអភិវឌ្ឍន៍សេដ្ឋកិច្ចជាតិក្រោយកូវីដ១៩ ហើយបច្ចុប្បន្នក្រុមហ៊ុនមួយនេះ កំពុងតែធ្វើអាជីវកម្មរ៉ែដែកក្នុងខេត្តព្រះវិហារ និងខេត្តស្ទឹងត្រែង រួចដឹកយកទៅលក់នៅក្រៅប្រទេស តាមច្រកអន្តរជាតិ ក្អមសំណរ ខេត្តកណ្ដាល ដោយដឹកជញ្ជូនមកដាក់សាឡង់នៅស្រុកកំពង់លែង ខេត្តកំពង់ឆ្នាំង ។
ក្រុមហ៊ុន គ្លូប៊ល ហ្គ្រីន គឺជារបស់លោក ទ្រី ដាលុច ដែលជាកូនប្រុសច្បងរបស់អ្នកឧកញ៉ា ទ្រី ភាព ល្បីល្បាញខាងរកស៊ីឈើនិងបំផ្លិចបំផ្លាញធនធានធម្មជាតិនៅកម្ពុជា។ បច្ចុប្បន្នលោក ទ្រី ដាលុច ជាទីប្រឹក្សារបស់លោក ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា ស៊ី.ឌី.ស៊ី (CDC)៕
