អតិថិជនក្រុមហ៊ុនហួយវ័ន ផេ (Huione Pay) មួយចំនួនបានបង្ខំចិត្តដាក់បញ្ចាំងទ្រព្យសម្បត្តិ ដើម្បីយកលុយមកដោះស្រាយបញ្ហាជីវភាពប្រចាំថ្ងៃ បន្ទាប់ពីក្រុមហ៊ុនលោក ហ៊ុន តូ បានប្រកាសផ្អាកដំណើរការសេវាកម្ម និងបង្កកលុយអតិថិជន។ អ្នកឃ្លាំមើលលើកឡើងថា ជនរងគ្រោះខ្មែរ និងបរទេសដែលក្រុមហ៊ុន ហួយវ័ន ផេ បង្កកលុយគួរចេញប្រមូលផ្តុំគ្នាទាមទារឱ្យអាជ្ញាធរពាក់ព័ន្ធជួយអន្តរាគមន៍ និងចាប់មេខ្លោងធំនៃក្រុមហ៊ុន ដើម្បីទប់ស្កាត់បណ្ដាញឧក្រិដ្ឋកម្មលាងលុយកខ្វក់នៅកម្ពុជា។
ពលរដ្ឋដែលជាអតិថិជនរបស់ក្រុមហ៊ុន ហួយវ័ន ផេ មួយចំនួនកំពុងប្រឈមនឹងបញ្ហាជីវភាព និងខ្វះលុយកាក់បង្វិលការប្រកបអាជីវកម្មរបស់ខ្លួន ដោយសារតែមិនអាចដកលុយចេញពីគណនីបាន។
អតិថិជនក្រុមហ៊ុន ហួយវ័ន ផេ ម្នាក់ថ្លែងសុំមិនបញ្ចេញឈ្មោះព្រោះបារម្ភពីបញ្ហាសុវត្ថិភាពឱ្យទូរទស្សន៍អាស៊ីសេរីដឹងនៅថ្ងៃទី៥ ខែធ្នូ ថា កញ្ញាមានមួយចំនួនធំគឺនៅក្នុងគណនី ហួយវ័ន ផេ ហើយថា ការផ្អាកសេវាធ្វើឱ្យកាន់តែពិបាកក្នុងការចំណាយប្រចាំថ្ងៃ។ កញ្ញាបានបង្ខំចិត្តបញ្ចាំងគ្រឿងអលង្ការយកលុយប្រើប្រាស់ក្នុងគ្រួសារ។
ពលរដ្ឋថ្លែងលាក់ឈ្មោះ៖ «និយាយទៅអត់មានលុយក្រៅតែម្ដង និយាយប្រាប់បងតាមត្រង់ថ្ងៃហ្នឹងគឺយកខ្សែកបញ្ចាំង ដើម្បីយកលុយមកប្រើប្រាស់ ដោយសារតែទុកលុយក្នុងហ្នឹង ហើយខ្ញុំគិតថា សេវាហ្នឹងថ្លៃពេកខ្ញុំចេះតែទុកបន្តអ៊ីចឹង ហើយខ្ញុំអត់ដឹងទេ អត់ដឹងថា គេផ្អើលខ្ញុំអត់ដឹង។ ដូចបងៗខ្ញុំគេមានលុយច្រើនជាងខ្ញុំទៀត គឺគាត់ដកអត់បានដូចគ្នាហើយអ្នកខ្លះគាត់ភ័យអ៊ីចឹងទៅគាត់ដកលុយ គេកាត់ ៤០ដុល្លារ ៥០ដុល្លារអីក៏គាត់សុខចិត្តដកដែរ។ ធ្វើម៉េចបើអត់មានលុយប្រើប្រាស់ផងហ្នឹង»។
អតិថិជនបន្តថា បើទោះបីអាចដកប្រាក់តាមភ្នាក់ងារបានក៏ដោយ ថ្លៃសេវាកម្មមានតម្លៃបានកើនឡើងគួរឱ្យកត់សម្គាល់។ ដកលុយ ១០០ដុល្លារត្រូវបង់ថ្លៃសេវាកម្មពី ៤៥ ទៅ ៥០ ដុល្លារ។ មិត្តភ័ក្ដិរបស់កញ្ញាមួយចំនួនក៏កំពុងស្ទាក់ស្ទើរក្នុងការដកលុយដោយខ្លាចសេវាខ្ពស់ និងខ្លាចការក្លែងបន្លំពីភ្នាក់ងារក្លែងក្លាយលើបណ្ដាញសង្គម។
ទាក់ទងនឹងរឿងនេះដែរ នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ (LICADHO) លោក អំ សំអាត បញ្ជាក់ថា ជនរងគ្រោះអាចដាក់ពាក្យប្ដឹងស្នើអន្តរាគមន៍ពីធនាគារជាតិនៃកម្ពុជា ក៏ប៉ុន្តែរិះគន់ថា រដ្ឋខ្វះសមត្ថភាពក្នុងការតាមដាន និងស៊ើបអង្កេតប្រតិបត្តិការក្រុមហ៊ុន ហួយវ័ន ផេ បន្ទាប់ពីធនាគារជាតិនៃកម្ពុជាបានដកអាជ្ញាប័ណ្ណតាំងពីខែមីនា ឆ្នាំ២០២៥។
លោក អំ សំអាត៖ «ធនាគារជាតិក៏ដូចជា អាជ្ញាធរដែលពាក់ព័ន្ធគួរតែពិនិត្យមើលទៅលើរឿងទាំងអស់នេះ ហើយស្វែងរកកិច្ចអន្តរាគមន៍ណាមួយសម្រាប់ដោះស្រាយជូនប្រជាពលរដ្ឋ ហើយមួយទៀតទាក់ទងនឹងបញ្ហាក្រុមហ៊ុននេះនៅពេលដែលធនាគារជាតិដកអាជ្ញាប័ណ្ណហើយ នៅតែប្រតិបត្តិការដំណើរការបន្តទៀត វាត្រូវតែមានការបង្កើតគណៈកម្មាធិការស៊ើបអង្កេតលើគ្រឹះស្ថាន ឬក្រុមហ៊ុន ហើយចាត់វិធានការតាមផ្លូវច្បាប់ បើរកឃើញថា ក្រុមហ៊ុននេះបានបំពាន ឬធ្វើខុសច្បាប់»។
ការជ្រួលច្របល់សម្រុកទៅដកប្រាក់ពីសំណាក់អតិថិជនកើតឡើង បន្ទាប់ពីក្រុមហ៊ុន ហួយវ័ន ផេ របស់លោក ហ៊ុន តូ ប្រកាសផ្អាកសេវាកម្មទាំងអស់របស់ក្រុមហ៊ុនក្នុងរយៈពេលជាង ១ខែកាលពីថ្ងៃទី១ ខែធ្នូ ដោយអះអាងថា មានការដកប្រាក់រាប់សិបលានដុល្លារយ៉ាងឆាប់រហ័សចេញពីគណនីអតិថិជន។
ទោះជាយ៉ាងណា ធនាគារជាតិនៃកម្ពុជានៅថ្ងៃទី៥ ខែធ្នូ បានចេញសេចក្ដីជូនដំណឹងថា គោលបំណងនៃការអាជ្ញាប័ណ្ណក្រុមហ៊ុន ហួយវ័ន ផេ របស់លោក ហ៊ុន តូ គឺដើម្បីធានាស្ថិរភាព សុវត្ថិភាពនៃប្រព័ន្ធធនាគារ និងហិរញ្ញវត្ថុកម្ពុជា និងការពារផលប្រយោជន៍សាធារណជន។ ធនាគារជាតិ ស្នើដល់ម្ចាស់បំណុល និងបុគ្គលដែលពាក់ព័ន្ធទាំងអស់មិនទាន់ទទួលបានការទូទាត់ប្រាក់ពីក្រុមហ៊ុន ហួយវ័ន ផេ យកភស្តុតាង ឬឯកសារពាក់ព័ន្ធនានាទៅធនាគារជាតិនៃកម្ពុជាចាប់ពីថ្ងៃទី៩ ដល់ថ្ងៃទី ១៩ ខែធ្នូ។ ធនាគារជាតិនៃកម្ពុជាក៏បន្តព្រមានដល់សាធារណជនឱ្យប្រុងប្រយ័ត្នចំពោះប្រតិបត្តិការពាក់ព័ន្ធនឹងគ្រីបតូនៅកម្ពុជាដែលមិនទាន់មានអាជ្ញាប័ណ្ណពីអាជ្ញាធរនៅឡើយ។
អ្នកស៊ើបអង្កេតអន្តរជាតិ សារព័ត៌មានបរទេសក៏កំពុងតាមដានប្រតិបត្តិការហិរញ្ញដែលវត្ថុពាក់ព័ន្ធនឹងក្រុមហ៊ុន ហួយវ័ន ផេ នេះ និងទំនាក់ទំនងជាមួយបណ្ដាញលាងលុយកខ្វក់នៅតំបន់អាស៊ីអាគ្នេយ៍ផងដែរ។
ប្រធានចលនាខ្មែរដើម្បីប្រជាធិបតេយ្យ អ្នកស្រី មូរ សុខហួរ ពន្យល់ថា ជនរងគ្រោះដែលបន្តរក្សាភាពស្ងៀមស្ងាត់មិនហ៊ានចេញតវ៉ាទាមទារឱ្យក្រុមហ៊ុន និងអាជ្ញាធរទទួលខុសត្រូវលើបញ្ហានេះថា គឺជាការបើកដៃឱ្យក្រុមឧក្រិដ្ឋជន និងបក្ខពួកពង្រីកអាជីវកម្មលាងលុយកខ្វក់កាន់តែធំ។ អ្នកស្រីបន្តថា ប្រសិនបើជនរងគ្រោះគ្មានជំនឿលើប្រព័ន្ធតុលាការ និងច្បាប់កម្ពុជា ជនរងគ្រោះអាចដាក់ពាក្យបណ្ដឹងតាមរយៈអ៊ីមែល (Email) ឬប្រអប់សារ (Inbox) បណ្ដាញសង្គមរបស់បណ្ដាប្រទេសប្រជាធិបតេយ្យ ដើម្បីឱ្យជួយអន្តរាគមន៍។
អ្នកស្រី មូរ សុខហួរ៖ «ផ្ញើអ៊ីមែល! អ៊ីមែលគេមានសរសេរលិខិតជូនព័ត៌មានទាំងអស់នេះរាប់នាក់នេះ សហការជាមួយប្រទេសអង់គ្លេស និងប្រទេសអាមេរិកក្នុងការរកយុត្តិធម៌ជូនខ្លួនឯង។ កុំនៅស្ងៀ។ ខ្ញុំស្ដាប់អតិថិជននៅស្ងៀមហ្នឹងលើដៃសំពះ និងសុំអង្វរ។ បាតុកម្មនៅប្រទេសកម្ពុជាគឺចេញអត់រួចទេ ព្រោះជារបស់ ហ៊ុន តូ របស់ ចេន ហ្ស៊ី (Chen Zhi) យើងត្រូវរកប្រព័ន្ធផ្សេងទៀតហើយ ចក្រភពអង់គ្លេសស្វាហាប់មែនទែន ប្រទេសកូរ៉េកំពុងតែស្វាហាប់មែនទែន អាមេរិក ប្រទេសសិង្ហបុរី (Singapore) និងប្រទេសថៃ គេស្វាហាប់មែនទែនមានតែប្រទេសកម្ពុជាមួយស្ងាត់ស្ងៀមតែម្ដង ហើយឱ្យឃើញថា រឿងនេះលោក ហ៊ុន ម៉ាណែត អត់ហ៊ានប៉ះពាល់ទេ»។
ជាមួយគ្នានេះដែរ អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងស្រាវជ្រាវ លោក សេក សុជាតិ លើកឡើងថា ធនាគារជាតិនៃកម្ពុជា រួមទាំងក្រសួងសេដ្ឋកិច្ច និងស្ថាប័នពាក់ព័ន្ធគួរចេញមុខអន្តរាគមន៍ដោះស្រាយបញ្ហាអតិថិជន ហួយវ័ន ផេ ដែលដកប្រាក់មិនបាន ដើម្បីឱ្យមហាជនមានជំនឿ និងទុកចិត្តលើប្រព័ន្ធធនាគារ និងហិរញ្ញវត្ថុនៅកម្ពុជា។
លោក សេក សុជាតិ៖ «ភាគីពាក់ព័ន្ធគួរតែសហការជាមួយអាជ្ញាធរមានសមត្ថកិច្ចរបស់ធនាគារជាតិធ្វើការដោះស្រាយ ដើម្បីឱ្យភាគីពាក់ព័ន្ធទាំងអស់គាត់មានប្រាក់ត្រឡប់មកវិញ និងមានជំនឿ និងទុកចិត្តលើវិស័យហិរញ្ញវត្ថុ និងធនាគារ។ នេះក៏ជាសញ្ញាជាមួយវិជ្ជមានដែរ ដែលយើងអាចធ្វើយើងអាចទទួលបានការគាំទ្រពីប្រជាពលរដ្ឋ សហគមន៍អន្តរជាតិ ក៏មើលឃើញពីការប្ដេជ្ញាចិត្ត និងការអនុវត្តច្បាប់ប្រកបដោយភាពច្បាស់លាស់ និងត្រឹមត្រូវចំពោះបញ្ហាទាំងអស់នេះផងដែរ»។
អ្នកឃ្លាំមើលលើកឡើងថា បញ្ហាឧក្រិដ្ឋជនមានទំនាក់ទំនងជាមួយក្រុមគ្រួសារត្រកូល ហ៊ុន កំពុងពង្រីករបរអាជីវកម្មលាងលុយកខ្វក់ និងអំពើឆបោកតាមអនឡាញកាន់តែរីកសាយភាយនៅក្នុងប្រទេសកម្ពុជា និងបានបំផ្លាញមុខមាត់ប្រទេសជាតិ សង្គម និងបំផ្លាញសេដ្ឋកិច្ចជាតិរហូតដល់សេដ្ឋកិច្ចពលរដ្ឋតាមទីជនបទ។ ក្រៅពីនេះ អ្នកស្រី មូរ សុខហួរ ជំរុញឱ្យរដ្ឋាភិបាលលោក ហ៊ុន ម៉ាណែត មានសេចក្ដីក្លាហានចាប់ខ្លួនប្រធានក្រុមហ៊ុន ហួយវ័ន ផេ លោក ហ៊ុន តូ និងក្រុមហ៊ុន ព្រីនស៍ គ្រុប (Prince Group) របស់លោក ចេន ហ្ស៊ី (Chen Zhi) ដើម្បីបង្ហាញប្រាប់សហគមន៍អន្តរជាតិថា រដ្ឋាភិបាលត្រកូល ហ៊ុន មិនដឹកនាំប្រទេសតាមបែបឧក្រិដ្ឋកម្មម៉ាហ្វីយ៉ា (Mafia) នោះឡើយ៕
