មន្ត្រីសិទ្ធិមនុស្ស និងអ្នកឃ្លាំមើលជំរុញឲ្យរដ្ឋាភិបាលចាត់វិធានការច្បាប់លើក្រុមហ៊ុនឧកញ៉ា ដែលមិនសាងសង់ផ្ទះ និងដោះស្រាយបញ្ហាជូនអតិថិជន ដោយគ្មានការយោគយល់ ដើម្បីកុំឲ្យពលរដ្ឋបន្តរងគ្រោះ។ ការលើកឡើងនេះបន្ទាប់ពីនាយទាហានកម្ពុជាម្នាក់បានទាមទារឲ្យឧកញ៉ា ឡេង ណាវ៉ាត្រា ពន្លឿន ដំណោះស្រាយសង់ផ្ទះឲ្យគាត់តាមកិច្ចសន្យាទិញ-លក់។
បញ្ហាក្រុមហ៊ុនឧកញ៉ាជាច្រើន ដែលធ្វើជំនួញលក់ផ្ទះខ្យល់ឲ្យអតិថិជន ដូចជា ក្រុមហ៊ុនរបស់ឧកញ៉ា ឡេង ណាវ៉ាត្រា ជាដើម ក្លាយទៅជាប្រពៃណី វិបត្តិគ្មានដំណោះស្រាយរាប់ឆ្នាំមកហើយនៅប្រទេសកម្ពុជា។ ទោះបីជាអតិថិជនចេញតវ៉ាម្ដងហើយម្ដងទៀត ក៏ក្រុមហ៊ុនទាំងនោះ មិនខ្វល់អនុវត្តកិច្ចសន្យាឲ្យបាន ត្រឹមត្រូវដែរ។ ផ្ទុយទៅវិញ ពួកគេបង្ហាញរូបភាពស្និទ្ធស្នាលជាមួយអ្នកមានអំណាច ដើម្បីគំរាមបិទមាត់ពលរដ្ឋដែលចេញតវ៉ាទាមទារយុត្តិធម៌។
អនុប្រធានផ្នែកសិទ្ធិមនុស្ស ដីធ្លី និងធនធានធម្មជាតិ នៃសមាគមការពារសិទ្ធិមនុស្សអាដហុក (Adhoc) លោក យិន ម៉េងលី លើកឡើងថា រដ្ឋាភិបាលត្រូវតែចាត់វិធានការច្បាប់លើក្រុមហ៊ុនឧកញ៉ា ដែលធ្វើជំនួញបំពានកិច្ចសន្យា ដោយគ្មានការលើកលែង ទោះបីជាមានបក្ខពួកពីខាងណា ឬ ស្ថាប័នណាក៏ដោយ។
លោក យិន ម៉េងលី ប្រាប់ទូរទស្សន៍អាស៊ីសេរី ថា ការទិញ-លក់ មានកិច្ចសន្យាវាងអ្នកទិញ និងអ្នកលក់ ហើយកិច្ចសន្យាគឺជាច្បាប់ ដែលកំណត់ឲ្យភាគីទាំងពីរ ត្រូវប្រតិបត្តិតាម ដូច្នេះ ភាគីណាមួយដែលមិនធ្វើតាមកិច្ចសន្យា ជាភាគីរំលោភ ច្បាប់ហើយ។ លោកកត់សម្គាល់ថា កន្លងទៅនេះ មានបញ្ហាជាច្រើនពាក់ព័ន្ធ នឹងឧកញ៉ាមួយចំនួន ដែលធ្វើជំនួញសង់ផ្ទះលក់ ឬក៏ ឲ្យអតិថិជនដាក់ ប្រាក់ យកការប្រចាំខែជាដើម មិនបានគោរពតាមកិច្ចសន្យានោះទេ ហើយក៏ពុំឃើញ មានចំណាត់ការគួរឲ្យជឿជាក់ពីរដ្ឋាភិបាលដែរ។
លោក យិន ម៉េងលី ថា រដ្ឋាភិបាលត្រូវមានចំណាត់ការឡើងវិញ ពីព្រោះកាលណារដ្ឋាភិបាលមិនលូកដៃជួយទេ នោះនឹងធ្វើឲ្យខាតបង់ប្រជាពលរដ្ឋផង និងប៉ះពាល់ដល់វិស័យអចលនទ្រព្យរបស់ជាតិផង ដោយប្រជាពលរដ្ឋ លែងហ៊ានទិញ-លក់ជាមួយក្រុមហ៊ុនឧកញ៉ា ព្រោះតែពលរដ្ឋបាត់ជំនឿចិត្ត ពីគំរូមិនល្អ របស់ឧកញ៉ាមួយចំនួន ដូច្នេះក៏ក្លាយជាកត្តាធ្វើឲ្យប៉ះពាល់សេដ្ឋកិច្ចជាតិដែរ។ លោកជំរុញឲ្យបំបាត់វប្បធម៌របស់មន្ត្រីអនុវត្តន៍ច្បាប់ ដែលលំអៀងការពារតែ បក្ខពួកជាអ្នកមានអំណាច និងឧកញ៉ា ហើយចាត់ការបែបរើសអើង ដោយដាក់ទោសបានតែពលរដ្ឋក្រីក្រដែលអត់បក្ខពួក។ លោកថា នេះជាការអនុវត្តច្បាប់ ដែលមានការបែងចែករវាងអ្នកមានលុយ មានអំណាច ហើយនិងអ្នកទន់ខ្សោយនៅក្នុងសង្គម ដែលជារបៀបប្រតិបត្តិខុសពីគោលការណ៍ច្បាប់។
លោក យិន ម៉េងលី៖ «ពីពេលនេះ បើសិនជារដ្ឋាភិបាលមិនខិតខំស្ដារឡើងវិញទៅ លើបញ្ហា ការអនុវត្តច្បាប់ ចំពោះអ្នកឧកញ៉ា អ្នកវិនិយោគទេ វានឹងធ្វើឲ្យប៉ះពាល់ដល់អ្នកវិនិយោគដ៏ទៃទៀត គេអត់ហ៊ានមកវិនិយោគទេ វាប៉ះពាល់ដល់កេរ្តិ៍ឈ្មោះ វានឹងធ្វើឲ្យវិស័យអចលនទ្រព្យយើង វាលែងមានអ្នកហ៊ានទិញ វាធ្លាក់ចុះ។ អ៊ីចឹងធ្វើឲ្យប៉ះពាល់សេដ្ឋកិច្ចទាំងសេដ្ឋកិច្ចរបស់រដ្ឋាភិបាល ទាំងសេដ្ឋកិច្ចរបស់ប្រជាពលរដ្ឋ ដែលកំពុងជាប់បំណុលនៅធនាគារនេះ។ អ៊ីចឹងសំខាន់ណាស់យើងការអនុវត្តច្បាប់ ដោយគ្មានយោគយល់ចំពោះបុគ្គលណាទេ ទោះបីអ្នកនោះមានឋានៈតួនាទីប៉ុណ្ណាក៏ដោយ អាហ្នឹងបានស្ដារមុខមាត់រដ្ឋាភិបាលឡើងវិញបាន»។
ការលើកឡើងនេះ ធ្វើឡើងបន្ទាប់ពីនាយទាហានឈ្មោះ វ៉ិត គឹមសាន បានលើកឡើងក្នុងកិច្ចប្រជុំនៅក្រសួងរៀបចំដែនដី នគរូបនីយកម្ម និង សំណង់ កាលពីថ្ងៃទី៩ ខែមករា ដោយលោកអះអាងថា រយៈពេល ៣ទៅ៤ឆ្នាំហើយ ក្រុមហ៊ុនឧកញ៉ា ឡេង ណាវ៉ាត្រា មិនបានគោរពតាមកិច្ចសន្យា ជាមួយលោក និងអតិថិជនដទៃទៀតទេ។ លោកថា បច្ចុប្បន្នលោកជួលផ្ទះស្នាក់នៅ ហើយប្រាក់ខែទាហានបើកមក គឺសម្រាប់តែសងទៅធនាគារអស់។
លោក វ៉ិត គឹមសាន៖«ខ្ញុំសុំទោស ខ្ញុំនិយាយបន្តិចទៀត។ លោកឯកឧត្ដមនិយាយយូរណាស់ហើយ កន្លះម៉ោង ខ្ញុំសុំនិយាយបន្តិច គិតមើលទៅខ្ញុំរាល់ថ្ងៃជួលផ្ទះគេនៅមួយខែ ៥០ ទឹកភ្លើងទឹកអី ប្រាក់ខែទាហានបើកមកសងធនាគារ អង្គការអេស៊ីលីដា ប្រាក់ខែមានទាំងអស់ ឯកសារមាន ជំពាក់ធនាគារប៉ុន្មានបង់ ហើយលុយយកបង់ផ្ទះអស់រលីងហើយ ហើយខ្ញុំមិនចង់បានអីទេ។ ខ្ញុំសុំៗនិយាយបន្តិច អត់ទាន់បាន ៥នាទីទេ ខ្ញុំសុំនិយាយតែ ៥ នាទីទេ អត់ទាន់បាន ៥នាទីផង។ គិតមើលទៅ ខ្ញុំទាហាន ឥឡូវកំពុងមានបញ្ហានៅព្រំដែន ឥឡូវខ្ញុំសុខចិត្តឲ្យមេខ្ញុំ ដាក់ឈ្មោះទៅព្រំដែនវាយជាមួយថៃ ខ្ញុំខឹងថៃណាស់»។
ទូរទស្សន៍អាស៊ីសេរីមិនអាចសុំការអត្ថាធិប្បាយពីប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា បានទេ នៅថ្ងៃទី១២ ខែមករា។
អ្នកនាំពាក្យគណបក្សប្រជាធិបតេយ្យជឿនលឿន និងជាអ្នកវិភាគ លោក ប៉ោ មករា លើកឡើងថា បើការសងត្រឡប់ទៅវិញ ឬ ការសាងសង់លំនៅឋាន ឬ ការ រៀបចំដីឡូតិ៍ ជូនអតិថិជន មិនគ្រប់ចំនួនតាមកិច្ចសន្យាទេ គួរតែចាត់វិធានការតាមផ្លូវច្បាប់។ លោកថា រដ្ឋាភិបាលមិនអាចពន្យារពេលម្ដងហើយម្ដងទៀតឡើយ ពីព្រោះធ្វើឲ្យខូចប្រយោជន៍ពលរដ្ឋ។
លោក ប៉ោ មករា ប្រាប់ទូរទស្សន៍អាស៊ីសេរីថា ការពន្យាពេលដំណោះស្រាយ គឺជាបញ្ហាដែលពលរដ្ឋបារម្ភ ហើយភ័យខ្លាច រហូតដល់វីរៈកងទ័ព ចេញតវ៉ាតាមបណ្ដាញសង្គម។ លោកថា រឿងបែបនេះ បង្កការឈឺចាប់ និងការបែកបាក់សាមគ្គីជាតិ ដោយសារការមិនផ្ដល់យុត្តិធម៌ទៅឲ្យជនរងគ្រោះនៅក្នុងស្ថានភាព ប្រទេសជាតិជួបការលំបាក។
លោក ប៉ោ មករា៖ «ឧកញ៉ាអត់ទទួលខុសត្រូវទៅលើអ្វីដែលជាកិច្ចសន្យាអតិថិជន វាជារឿងមួយដែលច្បាប់ត្រូវតែចាត់ការ។ ទី២ ច្បាប់ត្រូវតែអនុវត្តស្មើភាពគ្នាចំពោះប្រជាពលរដ្ឋទូទៅ។ អ៊ីចឹងបើសិនជាមានបញ្ហា ពាក់ព័ន្ធដំណើរការ នឹងការសាងសង់យឺត តើច្បាប់គួរតែពិនិត្យមើល ហើយវិនិច្ឆ័យមើល វាមិនគួរណាយកបង្អែកអ្នកនយោបាយល្បីៗ ឬឥស្សរជនល្បីៗ ណាមួយយកមកកាង។ អ៊ីចឹងគិតថា ជារឿងមួយដែលធ្វើឲ្យសង្គមមានការឈឺចាប់ ធ្វើឲ្យសង្គមនឹងកាន់តែមានការបែកបាក់គ្នា តាមរយៈភាពអយុត្តិធម៌នៅក្នុងសង្គម»។
ក្នុងប៉ុន្មានឆ្នាំចុងក្រោយ បន្ទាប់ពីរំលាយគណបក្សសង្គ្រោះជាតិកាលពីខែវិច្ឆិកា ឆ្នាំ២០១៧ មានការផ្ទុះឡើងនូវជំនួញលាងលុយកខ្វក់ តាមរយៈឧក្រិដ្ឋកម្មឆ្លងដែន និងការឆបោក ទាំងបណ្ដាញអន្តរជាតិ និង ទាំងបណ្ដាញក្រុមហ៊ុននៅក្នុងប្រទេសកម្ពុជា ជាពិសេស ក្នុងវិស័យសំណង់អចលនទ្រព្យ ការចងការប្រាក់ និងហិរញ្ញវត្ថុ។
ក្រៅពីក្រុមហ៊ុនលក់ផ្ទះខ្យល់របស់ឧកញ៉ា ឡេង ណាវ៉ាត្រា ក្រុមហ៊ុនដែលល្បីល្បាញ ខាងឆបោក នៅកម្ពុជាផ្សេងទៀត រួមមាន ក្រុមហ៊ុន ប្រ៊ីលាន ស៊ីធី (Brilliant City) របស់អតីតឧកញ៉ា ឡេង ចាន់ណា ក្រុមហ៊ុនស៊ីអាយស៊ី (CIC) របស់លោក គុយ វ៉ាត ក្រុមហ៊ុន ជា សារ៉ន របស់អតីតឧកញ៉ា ជា សារ៉ន ក្រុមហ៊ុនពិភពដីមាសរបស់អតីតឧកញ៉ា ហ៊ីង គឹមហុង ជាដើម ។ ក្រុមឧកញ៉ា និងបុគ្គលទាំងនេះ ត្រូវពលរដ្ឋខ្មែរកត់សម្គាល់ឃើញមានភាពជិតស្និទ្ធ ជាមួយក្រុម គ្រួសារលោក ហ៊ុន ម៉ាណែត ឬ អ្នកមានអំណាចក្នុងរដ្ឋាភិបាល គ្រួសារត្រកូល ហ៊ុន៕
មន្រ្ដីបក្សប្រឆាំងជំរុញឲ្យរដ្ធាភិបាលរកវិធីទាមទារទឹកដីដែលថៃកាន់កាប់ ជាងវាយប្រហារខ្មែរគ្នាឯង♥️
ជួយប្រជាជន71 អ្នក