មេធាវីការពារក្ដីឱ្យប្រធានគណបក្សសង្គ្រោះជាតិដែលកំពុងជាប់ឃុំនៅក្នុងផ្ទះគឺ លោក កឹម សុខា នៅថ្ងៃទី១៧ ខែធ្នូ បានឱ្យដឹងថា សាលាឧទ្ធរណ៍ភ្នំពេញ បានជូនដំណឹងថា សវនាការលើសំណុំរឿងរបស់ លោក កឹម សុខា ដែលនឹងគ្រោងធ្វើនៅថ្ងៃទី១៨ ខែធ្នូ នេះ ត្រូវបានពន្យារពេលដោយគ្មានហេតុផល និងគ្មានកាលកំណត់ច្បាស់លាស់។
ទោះជាយ៉ាងណា អ្នកច្បាប់ និងអ្នកវិភាគឯករាជ្យ លោក វន់ ចាន់ឡូត បានលើកឡើងនៅលើគណនីហ្វេសប៊ុករបស់លោកថា ការសម្រេចពន្យារពេលសវនាការលោក កឹម សុខា នៅថ្ងៃទី១៨ ធ្នូ របស់តុលាការនេះ គឺជារឿងមួយ ប៉ុន្តែដើម្បីឆ្លើយតបនឹងទិដ្ឋភាពជាក់ស្ដែងក្នុងកាលៈទេសៈនេះ និង ស្របតាមការអំពាវរបស់លោក ហ៊ុន ម៉ាណែត ឱ្យខ្មែររួបរួម តុលាការគួរលើកលែងការចោទប្រកាន់ ឬអនុញ្ញាតឱ្យលោក កឹម សុខា បាននៅក្រៅឃុំ។
លោកបានលើកហេតុផលបួន នៃការដោះលែងលោក កឹម សុខា ហើយកម្ពុជានឹងទទួលបានផលចំណេញ ស្របពេលដែលថៃកំពុងតែ បន្តឈ្លានពានទឹកដីខ្មែរ។ ហេតុផលនោះរួមមាន ប្រែក្លាយពីវោហារស័ព្ទរបស់នាយករដ្ឋមន្ត្រី ហ៊ុន ម៉ាណែត ដែលថា ឱ្យពលរដ្ឋរួមរួបគ្នាទៅជាភាពជាក់ស្ដែងនៃការរួបរួមរបស់ខ្មែរ និង បង្កើនការជឿទុកចិត្តពីពលរដ្ឋ តាមរយៈនិយាយហើយធ្វើ មិនមែនប្រជាភិថុតិ។
មួយទៀត លោកថា អន្តរជាតិនឹងងាកគាំទ្រកម្ពុជា និងឈរជាមួយកម្ពុជា ព្រោះជំហរ លោក កឹម សុខា មិនខុសពីរដ្ឋាភិបាល និងពលរដ្ឋខ្មែរ ពាក់ព័ន្ធនឹងការឈ្លានពានរបស់ថៃ។ ជាចុងក្រោយ ការដោះលែងលោក កឹម សុខា ក៏នឹងជំរុញឱ្យការអំពាវរបស់មេដឹកនាំចលនាប្រឆាំងផ្ដួលរំលំរដ្ឋាភិបាលពេលនេះកាន់តែសាប និងលែងមានតម្លៃ។
កាលពីថ្ងៃទី៣ មីនា ឆ្នាំ ២០២៣ សាលាដំបូងរាជធានីភ្នំពេញ បានប្រកាសសាលក្រមកាត់ទោសលោក កឹម សុខា ដាក់ពន្ធនាគារ ២៧ឆ្នាំ ដោយដកសិទ្ធិធ្វើនយោបាយ និងដាក់ឲ្យស្ថិតនៅក្រោមការត្រួតពិនិត្យរបស់តុលាការ ពាក់ព័ន្ធបទចោទប្រកាន់ ឃុបឃិតជាមួយរដ្ឋបរទេសដើម្បីផ្ដួលរំលំរដ្ឋាភិបាល ជាបទចោទដែលលោក កឹម សុខា បានច្រានចោល៕
