ប្រជាពលរដ្ឋរងគ្រោះរឿងឆបោកប្រាក់រកស៊ីដីព្រមានមិនឈប់តវ៉ា បើតុលាការមិនចេញដីកាចាប់ខ្លួនអតីតឧកញ៉ា ហ៊ី គឹមហុង និងឧកញ៉ា ៣ រូបទៀត ខណៈសំណុំរឿងនេះ បានអូសបន្លាយជិត ៣ឆ្នាំហើយ ប៉ុន្តែ នៅមិនមានដំណោះស្រាយ។ សង្គមស៊ីវិលជំរុញឱ្យរដ្ឋាភិបាលអន្តរាគមន៍ចំពោះរឿងនេះ។
សាលាដំបូងរាជធានីភ្នំពេញ សុំពេលពីរសប្តាហ៍ ដើម្បីស៊ើបសង្កេតរឿងចាប់ខ្លួនលោក ហ៊ី គឹមហុង ប្រធានក្រុមហ៊ុនពិភពដីមាស បន្ទាប់ពីពលរដ្ឋ ប្រមាណ ១ពាន់នាក់ ស្ទើរតែគ្រប់រាជធានី-ខេត្ត ដែលចាញ់បោកក្រុមហ៊ុននេះ បាននាំគ្នាឡើងមកប្រមូលផ្ដុំធ្វើការតវ៉ាបិទផ្លូវនៅខាងមុខសាលាដំបូងរាជធានីភ្នំពេញដោយទាមទារតុលាការចេញដីកាចាប់ខ្លួនអតីតឧកញ៉ា ហ៊ី គឹមហុង និងបក្ខពួក។
តុលាការអះអាងថា នឹងជូនដំណឹងតាមរយៈមេធាវី និងតំណាងពលរដ្ឋរងគ្រោះ ប្រសិនបើរយៈពេលពីរសប្ដាហ៍ មិនមានការឆ្លើយតបទេ ប្រជាពលរដ្ឋ រងគ្រោះទាំងអស់គ្នា មានសិទ្ធិឡើងតវ៉ាម្តងទៀត។
យ៉ាងណា ពលរដ្ឋរងគ្រោះលោក អ៊ុក ហុលសេដ្ឋា ដែលចាញ់បោកក្រុមហ៊ុនពិភពដីមាស ៦ម៉ឺនដុល្លារ អះអាងថា លោកមិនសូវមានជំនឿលើការសន្យារបស់តុលាការ និងអាជ្ញាធរទេ ព្រោះជារឿងដដែល។ លោកថា ក្រុមហ៊ុនពិភពដីមាស មានឥទ្ធិពលឱ្យមនុស្សរបស់ខ្លួន ដើរគំរាមកំហែង ប្រជាពលរដ្ឋមិនឱ្យចេញតវ៉ាទៀត។
លោក អ៊ុក ហុលសេដ្ឋា៖ «បងប្អូនប្រជាពលរដ្ឋយើងគាត់អត់ទទួលយកទេ ព្រោះវាយចូលតាមរដ្ឋបាលវាហាក់ដូចជាធ្វើដំណើរជាថ្មី ប៉ុន្តែសំខាន់បងប្អូនយើងចង់តុលាការចេញដីកាចាប់ខ្លួន ហ៊ី គឹមហុង មកឱ្យពួកគាត់។ ចេញដីកាមកឱ្យពួកគាត់មក ហើយចាប់ថ្ងៃណាចាប់ទៅ ស្រេចតែលោកតុលាការ ក៏ប៉ុន្តែឱ្យមានភស្តុតាងដីកាចាប់ខ្លួនមកឱ្យពួកគាត់ អាហ្នឹងបានគាត់សុខចិត្ត។ ឯលិខិតមិញនេះ គឺជាលិខិតចូលតាមផ្លូវរដ្ឋបាលធម្មតាទេ យកទៅបើតុលាការអត់អនុវត្តការងារហ្នឹង ពួកខ្ញុំនឹងតែពីស្បោង និងស្ពៃទៀតហើយ»។
លោកបន្តថា តុលាការបានសន្យាបែបនេះ បន្ទាប់ពីក្រុមអ្នកតវ៉ា អះអាងថា មិនត្រឡប់ទៅផ្ទះវិញឡើយ ហើយប្ដេជ្ញាបន្តសកម្មភាពទាមទាររហូតទាល់តែមានដំណោះស្រាយ។
លោក អ៊ុក ហុលសេដ្ឋា៖ «ណាច្បាប់អត់បានហៅ ហ៊ី គឹមហុង និងបក្ខពួកអត់បានចូលមកដោះស្រាយជាមួយខ្ញុំ ពួកខ្ញុំសុខចិត្តអត់បានក្រហាយទឹកស្លាប់នៅទីនេះ ប្រសើរជាងទៅស្លាប់នៅផ្ទះ ដោយសារតែគេយកដី យកផ្ទះសម្បែងទាំងអស់គ្នា»។
លោក ឈូក វុធ មកពីខេត្តកំពត ប្រាប់ទូរទស្សន៍អាស៊ីសេរីថា ពួកគាត់ប្រឈមនឹងទុកលំបាកវេទនា និងវ័ណ្ឌកនឹងបំណុលធនាគារ តាំងពីខែសីហា ឆ្នាំ២០២៣ ដោយសារតែចាញ់បោកក្រុមហ៊ុនពិភពមាសរបស់អតីតឧកញ៉ា ហ៊ី គឹមហុង។ លោកថា ក្រុមហ៊ុននេះ បបួលលោកឱ្យដាក់លុយយកការប្រាក់ គឺមិនមែនទិញដីរបស់ក្រុមហ៊ុននោះទេ។
លោក ឈូក វុធ៖ «បានន័យនេះ កូនចៅរបស់ ហ៊ី គឹមហុង ហ្នឹង ហៅឱ្យបងប្អូនយើងរកស៊ីដាក់លុយយក ៣ ភាគរយ។ ខ្ញុំនឹងជំពាក់ធនាគារមុនខ្លះហើយ ៣ ទៅ ៤ដុល្លារហើយ ប៉ុន្តែដោយសារតែ ហ៊ី គឹមហុង ប្រើបក្ខពួកគាត់ហ្នឹង បបួលខ្ញុំថា យកលុយនឹងថែមទៅ ឱ្យ ៣ភាគរយ យកលុយនឹងមកមិនបាច់រកស៊ីអីទេ ចាំតែយកចុងមកគឺសងគេរួចហើយ ប៉ុនពេលខ្ញុំដាក់បានរយៈពេល ៣ ខែ បានចុងតែ ៣ខែទេ។ អ៊ីចឹង ហ៊ី គឹមហុង ក៏មានចលាចលលែងវេរផលចំណេញមកឱ្យខ្ញុំ ហើយកុំថា ទិញដីបានដី អត់ទេ។ បបួលខ្ញុំរកស៊ី គឺឱ្យខ្ញុំ ៣ ភាគរយ ខ្ញុំអត់ទិញដីយកដីទេ»។
ចំណែកលោក នួន សាវាន មកពីខេត្តស្វាយរៀង ដែលចាញ់បោកក្រុមហ៊ុន ពិភពដីមាសអស់ប្រាក់ ៣ម៉ឺន ២ពាន់ដុល្លារលើកឡើងថា ជិត៣ឆ្នាំមកនេះ ពលរដ្ឋដែលចាញ់បោកក្រុមហ៊ុនក៏ឈឺស្លាប់ច្រើននាក់ រីឯធនាគារចេះតែ តាមគំរាមរឹបអូសទ្រព្យសម្បត្តិ ។ លោកថា នេះជាការចេញមុខតវ៉ាលើកទី៤ របស់លោក ខណៈពលរដ្ឋផ្សេងទៀត នាំគ្នាតវ៉ាលើសពី ៤ដងផង យ៉ាងណា លោកថា នៅតែគ្មានដំណោះស្រាយ ហើយឮតែពាក្យនីតិវិធីពីអាជ្ញាធរ និងតុលាការតែគ្មានលទ្ធផលអ្វីទាំងអស់។
លោក នួន សាវាន៖ «ហ៊ី គឹមហុង គឺបានចាប់ខ្លួនម្ដងហើយ ប៉ុន្តែដល់គាត់និយាយថា ឱ្យតែគាត់បានចេញពីពន្ធនាគារវិញ គាត់នឹងលក់ទ្រព្យសម្បត្តិសងប្រជាពលរដ្ឋទាំងអស់ ទោះបីជាគាត់នៅសល់តែខ្លួនក៏ដោយ។ ប៉ុន្តែដល់ពេលឥឡូវនេះ គាត់ចេញមករយៈពេល ២ឆ្នាំហើយ គាត់មិនបានធ្វើអីទាំងអស់ គាត់មានតែលួចផ្ទេរទ្រព្យសម្បត្តិទៅឱ្យបងប្អូនគាត់ផ្សេងៗទៀត រីឯពួកខ្ញុំលំបាកវេទនាគាត់អត់ដែលធ្វើបានទេ គាត់សន្យាហើយសន្យាទៀត មិនដែលធ្វើបានមួយចំណុចណាទេ ហើយពួកខ្ញុំហ្នឹងយល់ព្រមទាំងអស់ ប៉ុន្តែឥឡូវអត់យល់ព្រមទេ»។
ប្រជាពលរដ្ឋម្នាក់ទៀតមកពីខេត្តស្វាយរៀងដែរ គឺលោកស្រី ម៉ៅ រ៉ានី ដែល គ្រួសារលោកស្រី ចាញ់បោកក្រុមហ៊ុនពិភពដីមាសយ៉ាងតិច ៧ ម៉ឺន ២ ពាន់ ដុល្លារ មានប្រសាសន៍ថា គ្រួសារលោកស្រី ធ្លាក់ខ្លួនចាញ់បោកក្រុមហ៊ុន ពិភពដីមាសនេះ ដោយសារតែក្រុមហ៊ុននេះ បង្ហាញរូបភាពសហការជាមួយ អាជ្ញាធរមូលដ្ឋានដើម្បីទាក់ទាញទំនុកចិត្តអតិថិជន។
លោកស្រី ម៉ៅ រ៉ានី៖ «ហ៊ី គឹមហុង នៅវាំងននខ្មៅកន្លែងណា ដែលអាជ្ញាធរទាំងអស់ហ្នឹង ធ្វើមិនកើតចំពោះ ហ៊ី គឹមហុង ខ្ញុំសួរថា វាំងននខ្មៅនៅកន្លែងណា ដែលធ្វើមិនកើតចំពោះ ហ៊ី គឹមហុង ឱ្យ ហ៊ី គឹមហុង ដើរបោកប្រជាជនទៀត ហ៊ី គឹមហុង មានឥទ្ធិពលអី ខ្ញុំចង់ដឹងកន្លែងត្រង់ហ្នឹង។ អ៊ីចឹងបានពួកខ្ញុំលែងជឿទៅលើតំណាង ព្រោះអីតំណាង[និយាយ]តែនីតិវិធីៗ បានពួកខ្ញុំលែងជឿលើតំណាងទាំងអស់ បានពួកខ្ញុំក្រោកឈរឡើងដោយកម្លាំងចិត្តឈឺចាប់»។
ក្រោយពីមានការតវ៉ាបិទផ្លូវនោះ អនុប្រធានសាលាដំបូងរាជធានីភ្នំពេញ លោក ទិតសុទ្ធី បូរ៉ាឆាត បានចេញមកទទួលពាក្យបណ្ដឹង និងស្នើឱ្យប្រជាពលរដ្ឋ ទុកពេលឱ្យតុលាការរយៈពេលពីរសប្ដាហ៍ ដើម្បីឱ្យតុលាការដោះស្រាយ។
អនុប្រធានផ្នែកសិទ្ធិមនុស្ស ដីធ្លី និងធនធានធម្មជាតិ នៃសមាគមការពារ សិទ្ធិមនុស្សអាដហុក (Adhoc) លោក យិន ម៉េងលី ប្រាប់ទូរទស្សន៍អាស៊ីសេរីថា បទល្មើសឆបោក ដែលគ្មានលក្ខណៈស្មុគស្មាញដូចករណីក្រុមហ៊ុនពិភពដីមាសនេះ មិនគួរណាឱ្យពលរដ្ឋរងគ្រោះ រង់ចាំយុត្តិធម៌ដល់ទៅជិត៣ ឆ្នាំនោះទេ ហើយរឿងបែបនេះ រដ្ឋាភិបាលក៏ត្រូវចេញធ្វើអន្តរាគមន៍ជួយពលរដ្ឋដែរ ដែលមិនរាប់ជាការជ្រៀតជ្រែកកិច្ចការតុលាការឡើយ។
លោកថា អតីតឧកញ៉ា ហ៊ី គឹមហុង ត្រូវតុលាការដោះលែងពីពន្ធនាគារ ដោយភ្ជាប់លក្ខខណ្ឌដោះស្រាយបញ្ហា ប៉ុន្តែពេលមានសេរីភាពហើយ បែរជាមិនគោរពលក្ខខណ្ឌ នោះតុលាការអាចចាប់លោក ហ៊ី គឹមហុង ឱ្យទៅទទួលខុសត្រូវវិញ។
លោក យិន ម៉េងលី៖ «ប្រជាពលរដ្ឋរង់ចាំយុត្តិធម៌យូរពេក។ យើងមើលរយៈពេលប្រមាណ ២ឆ្នាំជាង ជិត ៣ឆ្នាំហើយ អ៊ីចឹងគាត់ឃើញថា យុត្តិធម៌ដូចជាមិនមានសោះសម្រាប់ពួកគាត់ហើយឃើញថា វាអត់ទាន់ឃើញអ្វីមួយដែលលេចធ្លោជាចំណាត់ការច្បាស់លាស់ ដែលឱ្យពួកគាត់មានការជឿទុកចិត្តបាន។ អ៊ីចឹងពួកគាត់រង់ចាំយូរទៅៗ ក៏អស់សង្ឃឹមទៅៗ»។
ប្រជាពលរដ្ឋស្នើសុំរឹបអូសទ្រព្យសម្បត្តិរបស់ម្ចាស់ក្រុមហ៊ុនលោក ហ៊ី គឹមហុង និងបក្ខពួក មកទូទាត់ឲ្យពលរដ្ឋរងគ្រោះ ។ ពលរដ្ឋរងគ្រោះ ក៏ស្នើសុំឱ្យតុលាការជួយអន្តរាគមន៍ដោះស្រាយបញ្ហាពួកគាត់ ជំពាក់លុយ ធនាគារដែរ ហើយតុលាការប្រាប់ឱ្យប្រជាពលរដ្ឋរងគ្រោះ ដែលជាប់ បំណុលនៅធនាគារត្រៀមឯកសារ។ សាលាដំបូងរាជធានីភ្នំពេញថា នឹងបើកសវនាការជំនុំជម្រះលើលោក ហ៊ី គឹមហុង នៅថ្ងៃទី២៤ ខែធ្នូ ឆ្នាំ២០២៥ខាងមុននេះ។
អតីតឧកញ៉ា ហ៊ី គឹមហុង ត្រូវបានសមត្ថកិច្ចចាប់ខ្លួន កាលពីខែសីហា ឆ្នាំ២០២៣ ពាក់ព័ន្ធនឹងបទចោទឆបោកមានស្ថានទម្ងន់ទោស បន្ទាប់ពីក្រុមប្រជាពលរដ្ឋបានដាក់ពាក្យបណ្ដឹងប្ដឹងឧកញ៉ារូបនេះ។ ប៉ុន្តែ កាលពីដើមខែវិច្ឆិកាឆ្នាំ២០២៣ ម្ចាស់ក្រុមហ៊ុនពិភពដីមាសអតីតឧកញ៉ា ហ៊ី គឹមហុង ត្រូវបានសាលាឧទ្ធរណ៍ ភ្នំពេញដោះលែងឱ្យនៅក្រៅឃុំបណ្ដោះអាសន្ន បន្ទាប់ពីជាប់ពន្ធនាគារប្រមាណ ៣ខែ៕
