រដ្ឋាភិបាលចេញអនុក្រឹត្យថ្មីរឹតបន្តឹងជនបរទេសស្នាក់នៅកម្ពុជា និងពិន័យអ្នកពាក់ព័ន្ធធ្ងន់ធ្ងរ ស្របពេលជនបរទេសចម្រុះជាតិសាសន៍ជាច្រើនកំពុងរស់នៅ ប្រកបមុខរបរនៅកម្ពុជាដោយសេរី និងមានជាប់ពាក់ព័ន្ធនឹងការប្រព្រឹត្តឧក្រិដ្ឋកម្មអនឡាញ។
អនុក្រឹត្យរបស់ប្រមុខរដ្ឋាភិបាលកាលពី២ថ្ងៃមុន ទើបត្រូវបានចេញផ្សាយនៅថ្ងៃទី៧ មករា បញ្ជាក់ថា ម្ចាស់ទីតាំងរស់នៅប្រមូលផ្ដុំ ឬអ្នកគ្រប់គ្រងតំបន់ ដែលធ្វេសប្រហែសមិនសហការជាមួយអាជ្ញាធរ ឬមិនផ្ដល់ដំណឹង ឬលាក់បាំងជនបរទេសចូលមកនៅកម្ពុជាដោយខុសច្បាប់ នឹងត្រូវពិន័យជាប្រាក់ ៤លានរៀលសម្រាប់ជនបរទេសម្នាក់ ដោយមិនទាន់គិតពីទោសព្រហ្មទណ្ឌនៅឡើយ។ ចំណែក អាជ្ញាធរមានសមត្ថកិច្ចដែលគប់គិតលាក់កំបាំងជនបរទេស នឹងត្រូវបណ្ដេញពីការងារ រួមទាំងអនុវត្តទោសព្រហ្មទណ្ឌតាមច្បាប់ជាធរមាន។
អនុក្រឹត្យនេះតម្រូវឱ្យអ្នកពាក់ព័ន្ធត្រូវរាយការណ៍ពីវត្តមានស្នាក់នៅរបស់ជនបរទេសទាំងនោះ ទៅអាជ្ញាធរមានសមត្ថកិច្ចនៅមូលដ្ឋាន ក្នុងរយៈពេល ២៤ម៉ោងយ៉ាងយូរ។ ចំណែកជនបរទេសចូលមកថ្មី ត្រូវបង្ហាញឯកសារស្នាក់នៅស្របច្បាប់នៅកម្ពុជា មុនអាចស្នាក់នៅបាន។ រីឯជនបរទេសមានឯកសាររស់នៅស្របច្បាប់ហើយ ត្រូវរាយការណ៍ដើម្បីចុះបញ្ជីស្នាក់នៅក្នុងរយៈពេលយ៉ាងយូរ ៤៨ម៉ោង។
កន្លងទៅរដ្ឋាភិបាលតែងចេញបទបញ្ជា និងអនុក្រឹត្យដើម្បីឆ្លើយតបក្រោយមានបទឧក្រិដ្ឋលើជនបរទេសនៅកម្ពុជា។ ការចេញបទបញ្ជាជាថ្មីនៅពេលនេះ ស្របពេលកម្ពុជាមានជនបរទេសចំរុះជាតិសាសន៍ជាច្រើនកំពុងរស់នៅ ហើយខ្លះបានបង្កអសន្តិសុខនៅក្នុងប្រទេស និងមានជនបរទេសជាច្រើនកា្លយជាជនរងគ្រោះដោយបទឧក្រិដ្ឋកម្មប្រព្រឹត្តដោយជនបរទេសដូចគ្នា ដូចជាករណីស្លាប់យុវជនកូរ៉េខាងត្បូងម្នាក់នៅលើភ្នំបូកគោ ដែលគេសង្ស័យថា ប្រព្រឹត្តដោយជនជាតិចិន ក្នុងអំពើជំរិតទារប្រាក់ពាក់ព័ន្ធនឹងបទល្មើសអនឡាញ៕
