ពលរដ្ឋជាង១០០នាក់ដែលអះអាងថា ជាជនរងគ្រោះពីការទិញ គម្រោងដីឡូពីអ្នកឧកញ៉ា ឡេង ណាវ៉ាត្រា នៅតាមបណ្ដោយជាតិ ផ្លូវ6A និងគម្រោងជ្រែ១០០នៅរាជធានីភ្នំពេញ បាននាំគ្នាតវ៉ា បិទផ្លូវនៅមុខក្រសួងរៀបចំដែនដី នគរូបនីយកម្ម និងសំណង ដើម្បីទាមទារឱ្យក្រសួងជួយអន្តរាគមន៍ រកដំណោះស្រាយ ជូនដល់ពលរដ្ឋ។ ទន្ទឹមគ្នានោះពួកគាត់ស្នើឱ្យក្រុមហ៊ុនត្រូវតែ សងលុយដល់អតិថិជនវិញ ប្រសិនបើក្រុមហ៊ុនពិតជា គ្មានលទ្ធភាពសាងសង់ផ្ទះជូនដល់អតិថិជន។
ក្រោយពីស្ងប់ស្ងាត់មួយរយៈ នៅថ្ងៃទី១៥ ខែមករា អតិថិជនដែលបានទិញគម្រោង ដីឡូ និងផ្ទះល្វែង របស់ក្រុមហ៊ុន ឡេង ណាវ៉ាត្រា ក្នុងចំណោម អតិថិជនរាប់ពាន់នាក់ គេឃើញមាន អតិថិជន ជាង១០០នាក់ បានចេញមុខតវ៉ាបិទផ្លូវជាថ្មី ដើម្បីឱ្យក្រសួងដែនដី ជួយរកដំណោះស្រាយ។ ក្រុមបាតុករទាំងនោះ អ្នកខ្លះដៃកាន់បដា ដោយមានសារថា «ឡេង ណាវ៉ាត្រា ត្រូវសងលុយមកខ្ញុំវិញ» រួមនឹងសំឡេងស្រែកដោយប្រើឧបករណ៍បំពងសំឡេង បន្ទរថា«លោក ឧកញ៉ា បោកប្រាស់ សងលុយខ្ញុំវិញ»។
អតិថិជនម្នាក់ ក្នុងចំណោមអតិថិជនជាង១០០នាក់ ដែលបានមកតវ៉ានៅមុខក្រសួងដែនដី កញ្ញា ខាត់ សុជាតិ ប្រាប់ទូរទស្សន៍អាស៊ីសេរីនៅថ្ងៃទី១៥ ខែមករា ថា ការតវ៉ាជាថ្មីនេះ គឺដោយសារតែ លោក ឡេង ណាវ៉ាត្រា បានរំលោភលើកិច្ចសន្យាទិញ-លក់ ក្រោយពីក្រុមហ៊ុននេះ ចេះតែយកលេសមិនសាងសង់ ផ្ទះឱ្យអតិថិជន អស់រយៈពេលជិត៥ឆ្នាំមកហើយ។ កញ្ញាបានទិញផ្ទះល្វែង ពីក្រុមហ៊ុនរបស់ លោក ឡេង ណាវ៉ាត្រា ចំនួនពីរកន្លែង អស់លុយជិត៨ម៉ឺនដុល្លារ ប៉ុន្តែពុំទទួលបានផ្ទះនៅឡើយ ។ កញ្ញារៀបរាប់ថា បញ្ហានេះ បានប៉ះទង្គិចផ្លូវចិត្តជាខ្លាំង ព្រោះកញ្ញាគិតច្រើន ហើយ ណាមួយ ត្រូវរកលុយ សងធនាគារ ដែលយកលុយមកទិញផ្ទះ ប៉ុន្តែ លុយក៏អស់ផ្ទះក៏គ្មាន។
កញ្ញា ខាត់ សុជាតិ៖ «ខាងគម្រោងបុរីនេះគាត់បានរំលោភលើកិច្ចសន្យាមកច្រើនឆ្នាំដែរ។ គឺខ្ញុំមានទុក្ខលំបាកក្នុងការចំណាយលុយលើការជួលផ្ទះគេនៅ។ ខ្ញុំត្រូវការផ្ទះដើម្បីនៅ។ ស្ថានភាពសេដ្ឋកិច្ចសព្វថ្ងៃប្រជាពលរដ្ឋរស់នៅពិបាកណាស់ រកលុយអត់បានទេ។ ពួកខ្ញុំត្រូវរកលុយមកសងធនាគារផង ជួលផ្ទះគេនៅផង»។
ចំណែកពលរដ្ឋម្នាក់ទៀត លោក សុក ផាន់មាន់នី លើកឡើងថា ការតវ៉ារបស់ពលរដ្ឋនេះ គ្មានចង់បានអ្វីក្រៅពីសំណង និងផ្ទះនោះទេ។ លោកស្នើឱ្យក្រសួងត្រូវជួយដោះស្រាយបញ្ហានេះជូនដល់ពលរដ្ឋ ឱ្យបានឆាប់បំផុត។ លោកថា អតិថិជនភាគច្រើនសុទ្ធសឹង តែជាអ្នកមានមានជីវភាពខ្វះខាត ហើយខំសន្សំលុយ បានបន្តិចបន្តួច យកមកទិញដី និងផ្ទះ ដោយរំពឹងថា នឹងបានផ្ទះនៅ តែជាក់ស្ដែងបែរជាត្រូវបានក្រុមហ៊ុនបោកប្រាស់ ទំនុកចិត្តម្ដងហើយម្ដងទៀត។ លោកព្រមានថា ប្រសិនបើក្រុមហ៊ុន មិនដោះស្រាយឱ្យបានត្រឹមត្រូវទេ នឹងចេញតវ៉ាជាបន្តបន្ទាប់ទៀត។
លោក សុក ផាន់មាន់នី៖ «ភាគច្រើននៅក្នុងបុរីនេះ ករណីដូចគ្នាទាំងអស់។ អ៊ីចឹងសូមយើងគិតលើរឿងនេះផង កុំសប្បាយតែខ្លួនឯង ហើយភ្លេចប្រជាពលរដ្ឋអ្នកក្រីក្រ។ វាគ្មានអីពិបាកក្នុងការដោះស្រាយទេ សងតែផ្ទះឱ្យគ្នាទៅ វាចប់ហើយ។ វាគ្មានចង់បានអីលើសហ្នឹង»។
ភ្លាមៗ អំឡុងពេល ពលរដ្ឋកំពុងស្រែកតវ៉ាបិទផ្លូវ អស់ជិត២ម៉ោង គេឃើញនាយករងខុទ្ទកាល័យក្រសួងរៀបចំដែនដីនគរូបនីយកម្ម និងសំណង់ និងជាប្រធានក្រុមការងារសម្របសម្រួល ដោះស្រាយបញ្ហា ក្រុមហ៊ុន ឡេង ណាវ៉ាត្រា លោក សុំ មនោរម្យ ចេញមកសម្របសម្រួលឱ្យពលរដ្ឋបញ្ឈប់ការតវ៉ា ដោយអះអាងថា ករណីនេះក្រសួងកំពុងតែដោះស្រាយ ហើយក្រុមហ៊ុនក៏បានដាក់ លក់ទ្រព្យសម្បត្តិ និងដីធ្លីដើម្បីជួយពន្លឿនការសាងសង់ផ្ទះជូន អតិថិជនផងដែរ។ ចំណែក ក្រសួងសន្យាថា នឹងប្រគល់ប្លង់ដី ជូនដល់ពលរដ្ឋទាំងអស់ ដែលបានទិញដី និងផ្ទះល្វែងពីក្រុមហ៊ុន ក្នុងរយៈពេល ៤ខែខាងមុខ។
លោក សុំ មនោរម្យ៖ «ការសាងសង់ដូចខ្ញុំបានបញ្ជាក់អ៊ីចឹង ខ្ញុំបានឱ្យជាងចូលតាំងពីម្សិលម្ង៉ៃ ហើយ។ អ៊ីចឹង ការពង្រីកការសាងសង់ជាជំហានៗបន្តទៀត ពេលដែលយើងប្រមែប្រមូល បានពីការលក់ដី និងទ្រព្យផ្សេងៗ យកមកសងបញ្ចប់។ រឿងចេញប័ណ្ណដូចខ្ញុំបានបញ្ជាក់ច្រើនដងហើយ យើងកំពុងតែធ្វើការលើរឿងនឹង ។ សង្ឃឹមថា វគ្គទី៤ នឹងចែកឱ្យបងប្អូនបញ្ចប់។ ជាក់ស្ដែងមកដល់ម៉ោងនេះ យើងស្នើសុំឱ្យអតិថិជនដែលមិនទាន់បានមកបំពេញឯកសារ សូមឱ្យមកបំពេញទាំងអស់គ្នា»។
បើទោះជាបែបនេះក្ដី នៅអំឡុងពេលដែល លោក សុំ មនោរម្យ និយាយទៅកាន់ប្រជាពលរដ្ឋ លោក បានបញ្ជាក់ប្រាប់ពលរដ្ឋថា លោក ឡេង ណាវ៉ាត្រា ទើបតែដាក់លក់ទ្រព្យសម្បត្តិ និងដីធ្លី ក្នុងរយៈពេល៣ខែចុងក្រោយនេះ បើទោះជាពលរដ្ឋតវ៉ាច្រើនដងមកហើយក្ដី។ ទន្ទឹមគ្នានោះលោកពុំហ៊ានសន្យា ថា ពលរដ្ឋនឹងទទួលបានផ្ទះរស់នៅ ក្នុងឆាប់នោះទេ ព្រោះទ្រព្យសម្បត្តិដែលក្រុមហ៊ុនដាក់លក់ មិនទាន់លក់ចេញនៅឡើយ។ ភ្លាមៗនោះ ថ្វីត្បិតតែក្រុមបាតុករ សម្រេចរំសាយ ការតវ៉ាក្ដី ពួកគាត់ ហាក់ពុំសូវមានជំនឿចិត្តថា ក្រុមហ៊ុននឹងពន្លឿនការដោះស្រាយនោះទេ ហើយពួកគាត់ថា នឹងតវ៉ាជាថ្មី បើគ្មានអ្វីវិវដ្ដទៅមុខទេនោះ។
ជុំវិញរឿងនេះ អនុប្រធានផ្នែកសិទ្ធិមនុស្ស ដីធ្លី និងធនធានធម្មជាតិនៃសមាគមអាដហុក (Adhoc) លោក យិន ម៉េងលី លើកឡើងថា ការចេញតវ៉ារបស់ពលរដ្ឋជាថ្មីនេះ ឆ្លុះបញ្ចាំងអំពីភាពកម្សោយនៃការដោះស្រាយ របស់អាជ្ញាធរ ដែលបណ្ដោយឱ្យករណីនេះអូសបន្លាយអស់ជាពេលយូរ។ លោកថា ក្រសួងត្រូវតែពិនិត្យឡើងវិញ លើទ្រព្យសម្បត្តិ ដែលក្រុមហ៊ុនមានទាំងអស់ ត្រូវយកទៅលក់ ដើម្បី យកលុយមកសងដល់អតិថិជន ប្រសិនបើក្រុមហ៊ុនពិតជាក្ស័យធន ឬគ្មានលទ្ធភាព សាងសង់ផ្ទះ បន្ត ជូនដល់ពលរដ្ឋទេនោះ។
លោក យិន ម៉េងលី៖ «កាលណានិយាយពីក្រុមហ៊ុន គាត់ត្រូវមានទ្រព្យផ្ទាល់ខ្លួនរបស់គាត់។ ទ្រព្យផ្ទាល់ខ្លួនរបស់ក្រុមហ៊ុន។ គាត់ត្រូវបើឱ្យអស់ទ្រព្យទាំងអស់ដែលគាត់មាន ចលនទ្រព្យ អចលនទ្រព្យ និងសាច់ប្រាក់ផ្សេងៗទៀត ហើយធ្វើការកត់ត្រា ទុកអ្វីដែលក្រសួងអាចលក់បាន។ លក់ដើម្បីយកលុយទៅសងប្រជាពលរដ្ឋ និងធ្វើការដោះស្រាយជាបន្តបន្ទាប់បង្ហាញពីឆន្ទៈ និងបង្ហាញពីដំណើរការ»។
អ្នកឧកញ៉ា ឡេង ណាវ៉ាត្រា គឺជាសេដ្ឋីវ័យក្មេងមួយរូបនៅកម្ពុជា ដែលរងការចោទថា ជាអ្នករកស៊ីកាន់លុយកខ្វក់ឲ្យក្រុមគ្រួសារលោក ហ៊ុន សែន។ លោកក្ដោបក្ដាប់មុខជំនួញជាច្រើនចាប់តាំង ពីវិស័យ អចលនទ្រព្យ ហិរញ្ញវត្ថុ ធនាគារ កសិកម្ម រហូតដល់ វិស័យសិល្បៈ។ លោកធ្លាប់បានផ្ដល់លុយឱ្យប្រធានព្រឹទ្ធសភា លោក ហ៊ុន សែន រាប់លានដុល្លារ កាលពីកន្លងមក។ ជាមួយគ្នានោះ លោក មានរថយន្តម៉ាកល្បីៗ ប្រមាណ១០ គ្រឿង ដូចជា រ៉ូលរ៉យស៍ (Roll Royce) ឡាំបូហ្គីនី (Lamborghini) ហ្វើរ៉ារី (Ferrari) ផច្ឆ (Porsche) និងប៊ែនលី (Bentley) ព្រមទាំងឧទ្ធម្ភាគចក្រផ្ទាល់ខ្លួនមួយគ្រឿងទៀត ដែលសរុបជាទឹកប្រាក់រាប់សិបលានដុល្លារ។
ទោះជាយ៉ាងណា ប្រជាពលរដ្ឋ ជាច្រើននាំគ្នាចេញតវ៉ាជាបន្តបន្ទាប់ ដោយចោទ លោក ឡេង ណាវ៉ាត្រា ថាជាឧកញ៉ាបោកប្រាស់លក់គម្រោងដីឡូ និងផ្ទះល្វែងខ្យល់ ក្រោយពីអតិថិជនជាច្រើនទិញហើយពុំទាន់ទទួលបានផ្ទះ និងដីមកកាន់កាប់។ ក្រោយមកទៀត លោក ឡេង ណាវ៉ាត្រា បានចេញលិខិតបំភ្លឺថា ក្រុមហ៊ុនកំពុងតែខ្វះខាតថវិកា ទើបមានភាពយឺតយ៉ាវក្នុងសាងសង់ផ្ទះ ប៉ុន្តែ មកទល់ពេលនេះ គេនៅមិនឃើញលោក ឡេង ណាវ៉ាត្រា ប្រកាសលក់ទ្រព្យសម្បត្តិ និងរថយន្តម៉ាកល្បីៗ យកមកដោះស្រាយជូនពលរដ្ឋនោះទេ៕
ខ្ញុំជាអតិថិជនរងគ្រោះបុរីឡេង ណាវ៉ាត្រា