សាលារាជធានីភ្នំពេញមិនអនុញ្ញាតឲ្យសង្គមស៊ីវិលជួបជុំប្រារព្ធទិវាសិទ្ធិនារី អន្តរជាតិ ៨ មីនា នៅទីលានប្រជាធិបតេយ្យនោះទេ។ សង្គមស៊ីវិលសោកស្ដាយ និងចាត់ទុកការសម្រេចរបស់អាជ្ញាធររាជធានីភ្នំពេញថា រុញច្រានសេរីភាពបញ្ចេញមតិនៅកម្ពុជាឱ្យកាន់តែរួមតូច។
ការបដិសេធនេះ ធ្វើឡើងបន្ទាប់ពីក្រុមអង្គការសង្គមស៊ីវិល បានដាក់លិខិតទៅកាន់សាលារាជធានីភ្នំពេញ កាលពីថ្ងៃទី២៧ ខែកុម្ភៈ ដើម្បីជូនដំណឹងអំពីការប្រារព្ធខួបលើកទី១១៥ នៃទិវាសិទ្ធិអន្តរជាតិនារី ដែលនឹងប្រព្រឹត្តទៅនៅថ្ងៃទី៨ ខែមីនា នៅទីលាន ប្រជាធិបតេយ្យ ដោយមានអ្នកចូលរួមប្រមាណ ៥០០នាក់។
ប៉ុន្តែលុះដល់ថ្ងៃទី៤ ខែមីនា សាលារាជធានីភ្នំពេញ តាមលិខិតជូនដំណឹងរបស់ ខ្លួន មិនអនុញ្ញាតឱ្យជួបជុំនៅទីលានប្រជាធិបតេយ្យនោះទេ តែបានស្នើឲ្យក្រុម អង្គការសង្គមស៊ីវិលរៀបចំប្រារព្ធពិធីនៅទីស្នាក់ការសមាគមរបស់ខ្លួន ឬទីតាំង ឯកជនណាមួយដែលម្ចាស់ទីតាំងបានយល់ព្រម។ ទោះជាយ៉ាងណា អាជ្ញាធរមិន បានបញ្ជាក់ពីមូលហេតុនៃការមិនអនុញ្ញាតនេះឡើយ។
ក្រៅពីមិនអនុញ្ញាតអភិបាលរងរាជធានីភ្នំពេញ លោក សុខ ពេញវុធ ក៏បានព្រមានតាមរយៈលិខិតថា ក្នុងករណីអង្គការសង្គមស៊ីវិល នៅតែរៀបចំកម្មវិធី បង្កឱ្យប៉ះពាល់ដល់សន្តិសុខសុវត្ថិភាព សណ្ដាប់ធ្នាប់ និងរបៀបរៀបរយសាធារណៈ នោះពួកគេត្រូវទទួលខុសត្រូវទាំងស្រុងចំពោះមុខច្បាប់។
ប្រធានសហព័ន្ធសហជីពកម្មករចំណីអាហារ និងសេវាកម្មកម្ពុជាអ្នកស្រី អ៊ូ ទេពផល្លីន យល់ថា អាជ្ញាធរមិនបានបំពេញកាតព្វកិច្ចទៅតាមច្បាប់ស្ដីពីបាតុកម្មដោយសន្តិវិធី និងធ្វើលើសពីច្បាប់កំណត់ ខណៈការមិនអនុញ្ញាតនេះ អាជ្ញាធរក៏មិនបានបង្ហាញអំពីមូលហេតុដែរ។
អ្នកស្រីប្រាប់ទូរទស្សន៍អាស៊ីសេរីនៅថ្ងៃទី៤ ខែមីនា ថា ទីលានប្រជាធិបតេយ្យ ជាទីតាំងសម្រាប់ពលរដ្ឋសម្ដែងមតិទៅលើបញ្ហាអ្វីមួយ ហើយចង់ឲ្យរដ្ឋាភិបាលដោះស្រាយ។
អ្នកស្រី អ៊ូ ទេពផល្លីន៖ «គាត់[អាជ្ញាធរ]នៅក្នុងការសម្រេចចិត្ត ដែនសមត្ថកិច្ច ហើយវាហាក់បីដូចជា បង្ហាញអំពីការមិនគោរពប្រជាជន មិនគោរពពលរដ្ឋរបស់ខ្លួនឯង។ តាមពិតទៅវាមិនមានអីខានដល់រដ្ឋាភិបាលទេ នៅពេលដែលយើងយកកន្លែង ដែលយើងអាចប្រើប្រាស់ទីលានជាកន្លែងសម្ដែងមតិ អីហ្នឹង វាមិនមែនជាការខាត របស់រដ្ឋាភិបាល។ ប៉ុន្តែផ្ទុយទៅវិញ ការដែលមិនអនុញ្ញាត ហើយមិនបំពេញកាតព្វកិច្ចរបស់រដ្ឋ ហើយភាពអសកម្មរបស់រដ្ឋ ហើយការមិនឆ្លើយតប មិនខ្វាយខ្វល់ទៅ សេចក្ដីត្រូវការរបស់ពលរដ្ឋឬក៏បណ្ដាញរបស់ក្រុម ក្រុមណាក៏ដោយ ក្រុមតូចក្រុមធំក៏ដោយត្រូវចាំ ថា ក្រុមតូចក៏ដោយ ក៏ជាក្រុមពលរដ្ឋដែលមិនឲ្យរដ្ឋាភិបាល ត្រូវតែទុកចោលដែរ។ មិនមែនថាក្រុមតូច ឬក្រុមអីទេ មិនធំណាក៏ដោយ តូចណាក៏ដោយ ចង់និយាយថា កម្រិតណាក៏ដោយ គឺថា នៅតែជាមនុស្ស ដែលត្រូវយកកង្វល់របស់ពួកគាត់ទៅដោះស្រាយ»។
ស្រដៀងគ្នានេះដែរ អនុប្រធានផ្នែកសិទ្ធិមនុស្ស ដីធ្លី និងធនធានធម្មជាតិ នៃសមាគមការពារសិទ្ធិមនុស្សអាដហុក (ADHOC) លោក យិន ម៉េងលី ប្រាប់ទូរទស្សន៍អាស៊ីសេរី នៅថ្ងៃទី៤ ខែមីនា ថា ទីលានប្រជាធិបតេយ្យ គឺជាកន្លែងបញ្ចេញមតិ សម្រាប់គ្រប់ភាគីទាំងអស់ ដើម្បីឲ្យពួកគេបង្ហាញអំពីកង្វល់ និងបញ្ហាអ្វីមួយ ខណៈនៅតាមខេត្តរដ្ឋាភិបាលក៏ត្រូវរៀបចំឲ្យមានទីលានប្រជាធិបតេយ្យដែរ ប៉ុន្តែបច្ចុប្បន្នមិនមាននោះទេ។ លោកចាត់ទុកការបដិសេធរបស់អាជ្ញាធរ នៅពេលនេះ បង្ហាញថា សិទ្ធិសេរីភាពបញ្ចេញមតិ នៅប្រទេសកម្ពុជាកាន់តែរួមតូច។
លោក យិន ម៉េងលី ថា បញ្ហាសិទ្ធិ និងសិទ្ធិស្ត្រី មិនមែនជាបញ្ហារបស់អង្គការសង្គមស៊ីវិលឡើយ ប៉ុន្តែវាគឺជាកាតព្វកិច្ចរបស់រដ្ឋាភិបាលដែលបានចុះហត្ថលេខាទទួលយកច្បាប់អន្តរជាតិ ហើយសិទ្ធិទាំងនេះ ក៏មានចែងនៅក្នុងរដ្ឋធម្មនុញ្ញផងដែរ។ ហេតុដូច្នេះហើយ លោកថា ការមិនអនុញ្ញាតនេះមិនបានផ្តល់ផលចំណេញអ្វីឡើយ។ ផ្ទុយទៅវិញមានតែធ្វើឲ្យប៉ះពាល់ដល់មុខមាត់របស់រដ្ឋាភិបាលនៅលើឆាកអន្តរជាតិបន្ថែមទៀត។
លោក យិន ម៉េងលី៖ «អត់មានលើកច្បាប់ទេ គឺសម្រេចមិនឲ្យធ្វើ ហើយឲ្យធ្វើនៅតាមការិយាល័យ ឬនៅតាមទីកន្លែងឯកជនវិញ។ យើងអត់ចង់ទៅប្រារព្ធទិវាទាំងអស់ហ្នឹង នៅក្នុងបន្ទប់ទេ យើងចង់បង្ហាញជាសាធារណៈនៅការប្រារព្ធ។ អាហ្នឹងគ្រាន់ តែជាថ្ងៃរំលឹកនៃទិវាហ្នឹងទេ។អ៊ីចឹងចង់ធ្វើនៅទីសាធារណៈឲ្យមនុស្សទាំងអស់ បានដឹងអំពីបញ្ហាសិទ្ធិទាំងអស់ហ្នឹង វាមិនមែនជារបស់ក្រុមណាមួយ របស់អ្នកណាមួយទេ អ៊ីចឹងយើងមានការសោកស្ដាយយ៉ាងខ្លាំងណាស់ចំពោះការមិនអនុញ្ញាតឲ្យនេះ។ អ៊ីចឹងយើងទទូចស្នើសុំឲ្យពិនិត្យមើលឡើងវិញ ទៅលើសេចក្ដីសម្រេចនេះ»។
រដ្ឋាភិបាលត្រកូល «ហ៊ុន» ត្រូវរងការរិះគន់ពីមជ្ឈដ្ឋានជាតិ និងអន្តរជាតិថា បានរំលោភសិទ្ធិមនុស្សធ្ងន់ធ្ងរ ជាពិសេសការរំលោភសិទ្ធិស្ត្រី ដែលឈឺឆ្អាលបញ្ហាសង្គម តាមរយៈការប្ដឹងផ្ដល់ពួកគេទៅតុលាការ ការគំរាមកំហែង និងការចាប់ខ្លួនមនុស្សដាក់ពន្ធនាគារ ។ បច្ចុប្បន្នស្ត្រី ដែលចូលរួមកិច្ចការសង្គម និងនយោបាយ កំពុងជាប់ពន្ធនាគារ រួមមានមេធាវីខ្មែរសញ្ជាតិអាមេរិក កញ្ញា សេង ធារី សកម្មជនបរិស្ថាន កញ្ញា ភួន កែវរស្មី កញ្ញា ឡុង គន្ធា និងសកម្មជនកិច្ចព្រមព្រៀងសន្តិភាពទីក្រុងប៉ារីស កញ្ញា ភឹង សោភា រួមទាំងលោកស្រី សែម សុផល ជាដើម កំពុងជាប់ពន្ធនាគារ ដោយសារការបញ្ចេញមតិ និងទាមទារយុត្តិធម៌សង្គម៕
