ពលរដ្ឋរស់នៅខេត្តកំពង់ធំ ចោទមន្ត្រីបរិស្ថានថា បានលួចព័ទ្ធយកដីពលរដ្ឋនៅស្រុកសន្ទុក ខេត្តកំពង់ធំ ជាង១០០គ្រួសារ ដែលមានផ្ទៃដីជាង ៥០០ហិកតារលក់ឲ្យក្រុមឈ្មួញមានលុយ និងមានអំណាច។ ពួកគាត់ថា ករណីនេះមិនមានអាជ្ញាធរពាក់ព័ន្ធស្វែងរកដំណោះស្រាយជូនពលរដ្ឋឡើយ។ មន្ត្រីសង្គមស៊ីវិល យល់ឃើញថា អាជ្ញាធរខេត្តគួរចុះសិក្សាឲ្យច្បាស់លាស់ និងរកដំណោះស្រាយឲ្យបានឆាប់។
ស្របពេលសង្គ្រាមព្រំដែនកម្ពុជា-ថៃ កំពុងឡើងកម្ដៅ មន្ត្រីបរិស្ថានខេត្តកំពង់ធំ ឆ្លៀតឱកាស លួចព័ទ្ធយកដីអាស្រ័យផលរបស់ពលរដ្ឋជាង១០០គ្រួសារ នៅឃុំបឹងល្វា ស្រុកសន្ទុក ខេត្តកំពង់ធំ លក់ទៅឲ្យក្រុមឈ្មួញមានលុយ និងមានអំណាច ដោយមិនមានអាជ្ញាធរពាក់ព័ន្ធចុះរកដំណោះស្រាយឲ្យពលរដ្ឋនោះទេ បើទោះបីពលរដ្ឋបានស្នើទៅអាជ្ញាធរពាក់ព័ន្ធជាច្រើនលើកយ៉ាងណាក្ដី។
តំណាងពលរដ្ឋនៅឃុំបឹងល្វា លោក ថៃ កាឆា ប្រាប់ទូរទស្សន៍អាស៊ីសេរី នៅថ្ងៃទី០៩ ខែមករាថា ដីស្រែចម្ការរបស់ពលរដ្ឋដែលធ្លាប់អាស្រ័យផលតាំងពីដូនតា និងអ្នកខ្លះទៀតតាំងពីឆ្នាំ២០០០ ត្រូវបានមន្ត្រីបរិស្ថានខេត្តកំពង់ធំ ហ៊ុមព័ទ្ធលក់ឲ្យក្រុមឈ្មួញមានលុយ និងមានអំណាច ហើយគំរាមពលរដ្ឋមិនឲ្យតវ៉ាទាមទារ និងចូលទៅអាស្រ័យផលលើដីស្រែចម្ការទាំងអស់នេះនោះទេ ប្រសិនបើពលរដ្ឋនៅតែរឹងទទឹងចូលទៅអាស្រ័យផល មន្ត្រីបរិស្ថាននឹងចាប់ដាក់គុក។ លោកបន្ថែមថា ប្រជាពលរដ្ឋបានដាក់លិខិតសុំកិច្ចអន្តរាគមន៍ទៅអាជ្ញាធរខេត្តកំពង់ធំរួចហើយ ដើម្បីឲ្យជួយរកដំណោះស្រាយ ប៉ុន្តែរហូតមកដល់ពេលនេះ មិនទាន់មានដំណោះស្រាយនៅឡើយនោះទេ។
លោក ថៃ កាឆា៖ «យើងនាំគ្នាចូលទៅអាស្រ័យផលលើដីចម្ការរបស់យើងវិញអត់បានទេ ចាប់ដាក់គុក តែសម្រាប់គ្នាគាត់វិញ គាត់ការពារឲ្យ២៤ម៉ោង សុំឲ្យចៅហ្វាយខេត្តជួយអន្តរាគមន៍ ជួយរកយុត្តិធម៌ឲ្យប្រជាពលរដ្ឋ ដែលមន្ត្រីបរិស្ថានរំលោភយកដីរបស់ប្រជាពលរដ្ឋយកទៅលក់ឲ្យឈ្មួញ សុំឲ្យគាត់ជួយរកយុត្តិធម៌ឲ្យពួកគាត់ផង»។
លោក ថៃ កាឆា អះអាងទៀតថា នៅក្នុងអំឡុងពេលសង្គ្រាមកម្ពុជា-ថៃលើកទី២កើតឡើង មន្ត្រីសុរិយោដី បានចុះទៅវាស់វែងដើម្បីចេញប័ណ្ណកម្មសិទ្ធិនៅលើដីស្រែចម្ការរបស់ប្រជាពលរដ្ឋរងគ្រោះដែរ ប៉ុន្តែត្រូវបានមន្ត្រីបរិស្ថាន ឈ្មោះ ជួន ជិន បានទៅហាមឃាត់មិនឲ្យវាស់វែងឲ្យពលរដ្ឋរងគ្រោះឡើយ ដោយតម្រូវវាស់វែងដីស្រែចម្ការទាំងនោះឲ្យទៅក្រុមឈ្មួញដែលមន្ត្រីបរិស្ថានបានលក់ឲ្យប៉ុណ្ណោះ។
ជុំវិញបញ្ហានេះ ទូរទស្សន៍អាស៊ីសេរី មិនទាន់អាចទាក់ទង មន្ត្រីបរិស្ថានដែលរងការចោទប្រកាន់ លោក ជួន ជិន និងប្រធានមន្ត្រីបរិស្ថានខេត្តកំពង់ធំ លោក អោង ប៊ុនធឿន ដើម្បីឆ្លើយតបបានទេ នៅថ្ងៃទី៩ ខែមករា។ ចំណែកអភិបាលខេត្តកំពង់ធំ លោក នួន ផារ័ត្ន ក៏ទូរទស្សន៍អាស៊ីសេរី មិនទាន់អាចទាក់ទងបានដែរ នៅថ្ងៃដដែលនេះ។
ទាក់ទិននឹងបញ្ហានេះ អនុប្រធានផ្នែកសិទ្ធិមនុស្ស ដីធ្លី និងធនធានធម្មជាតិ នៃសមាគមការពារសិទ្ធិមនុស្សអាដហុក (Adhoc) លោក យិន ម៉េងលី លើកឡើងថា រដ្ឋបាលខេត្តកំពង់ធំត្រូវតែចុះសិក្សាស្រាវជ្រាវឲ្យបានច្បាស់លាស់ និងត្រូវរកដំណោះស្រាយជាក់ស្ដែង ទៅលើបញ្ហាដីធ្លីពលរដ្ឋកំពុងអាស្រ័យផល។ លោកថា ប្រសិនបើដីស្រែចម្ការទាំងនោះ ស្ថិតនៅក្នុងតំបន់ព្រៃការពារគួរកាត់ឆ្វៀលឲ្យពលរដ្ឋបានអាស្រ័យផល មិនគួរយកដីទាំងនោះទៅលក់ឲ្យអ្នកផ្សេងនោះទេ។ លោកថា ប្រសិនបើអាជ្ញាធរខេត្តបន្តអូសបន្លាយបញ្ហានេះ មិនស្វែងរកដំណោះស្រាយឲ្យប្រជាពលរដ្ឋនោះទេ ពលរដ្ឋនឹងជួបវិបត្តិសេដ្ឋកិច្ច និងមិនអាចបង្កបង្កើនផលផ្គត់ផ្គង់ជីវភាពគ្រួសារបានឡើយ។
លោក យិន ម៉េងលី៖ «ការណ៍ព្រងើយកន្តើយមិនដោះស្រាយឲ្យប្រជាពលរដ្ឋនេះនឹងនាំឲ្យមានបញ្ហាជាច្រើនកើតឡើងប៉ះពាល់បញ្ហាសេដ្ឋកិច្ចរបស់គាត់ ធ្វើឲ្យគាត់ខកខានមិនបានបង្កបង្កើន អ៊ីចឹងស្នើសុំឲ្យខេត្ត និងក្រសួងពាក់ព័ន្ធ បើមានបញ្ហាកើតឡើងសុំឲ្យក្រសួងពាក់ព័ន្ធធ្វើអធិការកិច្ចពាក់ព័ន្ធនឹងបញ្ហានេះ ជាពិសេសក្រសួងបរិស្ថាន»។
ពលរដ្ឋថា ប្រសិនបើអាជ្ញាធរខេត្តកំពង់ធំ នៅតែមិនព្រមរកដំណោះស្រាយសមរម្យឲ្យពលរដ្ឋ នៅឃុំបឹងល្វា ស្រុកសន្ទុកនោះទេ ពួកគាត់នឹងដាក់លិខិតសុំអន្តរាគមន៍ពីអាជ្ញាធរថ្នាក់ជាតិវិញម្ដង ដើម្បីស្វែងរកដំណោះស្រាយ ដោយតម្រូវឲ្យមន្ត្រីបរិស្ថានប្រគល់ដីស្រែចម្ការទាំងនោះឲ្យទៅប្រជាពលរដ្ឋជាង១០០គ្រួសារវិញ ពីព្រោះពលរដ្ឋគ្មានដីសម្រាប់បង្កបង្កើនផល ដើម្បីផ្គត់ផ្គង់ជីវភាពគ្រួសារនោះទេ៕
