អ្នកឃ្លាំមើលសង្គម ជំរុញឲ្យក្រសួងមហាផ្ទៃដោះស្រាយបណ្តឹងដែលមន្ត្រីរាជការ ប្ដឹងមន្ត្រីដូចគ្នា និងបណ្តឹងពលរដ្ឋដែលប្ដឹងមន្ត្រីរបស់ក្រសួងមហាផ្ទៃ លើការផ្តល់សេវាសាធារណៈមិនបានល្អ ដោយតម្លាភាព និងមានយន្តការការពារសុវត្ថិភាពខ្ពស់ចំពោះពលរដ្ឋ ដែលហ៊ានរាយការណ៍ ។ ការជំរុញបែបនេះ គឺបន្ទាប់ពីក្រសួងមហាផ្ទៃបានដាក់ឲ្យដំណើរការផ្លូវការ នៃការទទួលបណ្ដឹងតាមប្រព័ន្ធអនឡាញ ជាង០២សប្តាហ៍ ហើយទទួលបានបណ្ដឹងជាង៦០បណ្ដឹង។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវលោក សេក សុជាតិ ប្រាប់ទូរទស្សន៍អាស៊ីសេរីថា ការទទួលបណ្ដឹងតាមប្រព័ន្ធអនឡាញ ជាជម្រើសមួយដ៏ល្អ ហើយសង្ឃឹមថា រដ្ឋាភិបាលនិងអាជ្ញាធរដែលពាក់ព័ន្ធអាចប្រើប្រាស់នៅប្រព័ន្ធថ្មីនេះដើម្បីកែលម្អភាពខ្វះចន្លោះដែលមានកន្លងមក។
លោក សេក សុជាតិ បន្ថែមទៀតថា ចំពោះការប្ដឹងផ្ទៃក្នុងរវាងមន្ត្រីនិងមន្ត្រីគឺជារឿងចាំបាច់ដែលត្រូវដោះស្រាយ ពីព្រោះវាគឺជាមូលហេតុដែលនាំឲ្យមានបញ្ហាអំពើពុករលួយ ហើយក៏ជាបញ្ហាមួយដែលគេមើលឃើញថា ការប្រកាន់បក្សពួកឬក៏ការរើសអើងកើតឡើងនៅក្នុងស្ថាប័ន។
លោក សេក សុជាតិ៖ «ដូច្នេះនៅត្រង់ចំណុចនេះរដ្ឋាភិបាលត្រូវពិចារណា ហើយនឹងធ្វើការសិក្សាលំអិតឡើងវិញ តើតួនាទីភារកិច្ចនិងកាតព្វកិច្ចដែលបានកំណត់សម្រាប់មន្ត្រីនីមួយៗដែលអនុវត្តបានល្អរឺអត់ ហើយបើសិនជារកឃើញថា វាដូចអ្វីដែលជាការប្ដឹងគួរតែអនុវត្តដោយស្មើភាពនិងមានតម្លាភាព ហើយជាពិសេស គឺចាត់ចែងកិច្ចការទាំងអស់ដើម្បីដោះស្រាយកុំឱ្យមានបញ្ហាដែលៗកើតឡើងនៅក្នុងស្ថាប័ន»។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត រូបនេះបន្ថែមថា ចំពោះពាក្យបណ្ដឹងផ្សេងៗដែលសាធារណជនប្តឹង ក៏ត្រូវតែបើកការស៊ើបអង្កេតដោយឈរលើគោលការណ៍តម្លាភាព គណនេយ្យភាព ពីព្រោះវាគឺជាគោលដៅមួយដែលរដ្ឋាភិបាលចង់កែលម្អ ដូច្នេះត្រូវតែធ្វើដោយស្មើភាព ពីព្រោះការប្រកាន់បក្សពួកឬក៏ការអនុវត្តន៍ដោយផ្អែកតែទៅលើក្រុមឬក៏ខ្សែ វានឹង ក្លាយទៅជាឧបសគ្គសម្រាប់ការអនុវត្តទៅវិញ។
ការអះអាងរបស់ឃ្លាំមើលសង្គម រូបនេះ បន្ទាប់ពីអ្នកនាំពាក្យរងក្រសួងមហាផ្ទៃ លោក ទូច សុឃៈ បានលើកឡើងថា ក្រោយការដាក់ឲ្យដំណើរការផ្លូវការ នៃការទទួលបណ្ដឹងតាមប្រព័ន្ធអនឡាញ អស់រយៈពេល០២សប្តាហ៍កន្លងមក ក្រសួងមហាផ្ទៃ ទទួលបានបណ្ដឹងជាង៦០បណ្ដឹង ក្នុងក្របខណ្ឌរបស់ខ្លួន ដោយមានទាំងពលរដ្ឋ និងមន្ត្រីរាជការ។
លោក ទូច សុឃៈ បន្ថែមទៀតថា បណ្ដឹងទាំងជាង៦០ដែលអគារលេខាធិការដ្ឋានក្រសួងមហាផ្ទៃទទួលបាន មានបណ្ដឹងពីពលរដ្ឋមានប្តឹងពលរដ្ឋដូចគ្នា ចំនួន២៤បណ្ដឹង ពលរដ្ឋប្ដឹងមន្ត្រីរាជការ នៃក្របខណ្ឌក្រសួងមហាផ្ទៃ ចំនួន០៦បណ្ដឹង ពលរដ្ឋប្ដឹងអង្គភាពដែលឋិតក្រោមរចនាសម្ព័ន្ធរបស់ក្រសួងមហាផ្ទៃ លើការផ្តល់សេវាសាធារណៈមិនបានល្អប្រសើរចំនួន០៣បណ្ដឹង ករណីមន្ត្រីរាជការ ប្ដឹងមន្ត្រីដូចគ្នា ពាក់ព័ន្ធការអនុវត្តតួនាទីភារកិច្ចមិនបានត្រឹមត្រូវ និងរំលោភសិទ្ធិមន្ត្រីដូចគ្នា ចំនួន០៣បណ្ដឹង។
ទាក់ទងទៅនឹងបញ្ហានេះប្រធានអង្គការប្រជាធិបតេយ្យខ្មែរដែលមានមូលដ្ឋាននៅប្រទេសអូស្ត្រាលីលោក សឹង សែនករុណា បានឲ្យដឹងថា ការដាក់ឲ្យប្រើប្រាស់ជាផ្លូវការនូវប្រព័ន្ធទទួលពាក្យបណ្តឹងតាមអនឡាញរបស់ក្រសួងមហាផ្ទៃនេះ គឺជារឿងល្អមួយក្នុងការសម្រួលដល់ការដាក់ពាក្យបណ្តឹងរបស់ពលរដ្ឋ។ តែប្រសិទ្ធភាពនៃការឆ្លើយតបទៅនឹងពាក្យបណ្តឹងរបស់ពលរដ្ឋ មានភាពលឿនរហ័សកម្រិតណា ដើម្បីដោះស្រាយបញ្ហារបស់ពលរដ្ឋឲ្យទាន់ពេលវេលា។
លោក សឹង សែនករុណា បន្ថែមទៀតថា ក្រសួងគួរផ្សព្វផ្សាយឱ្យបានទូរលំទូលាយដើម្បីឲ្យប្រជាពលរដ្ឋបានដឹងពីរបៀបប្រើប្រាស់ និងរបៀបបំពេញពាក្យក្នុងប្រព័ន្ធពាក្យបណ្តឹងតាមអនឡាញនេះ។ ហើយក្រសួងមហាផ្ទៃក៏គួរមានយន្តការការពារសុវត្ថិភាពខ្ពស់ចំពោះពលរដ្ឋទាំងឡាយណាដែលហ៊ានរាយការណ៍ពីភាពមិនប្រក្រតីរបស់មន្ត្រីរាជការ។
លោក សឹង សែនករុណា៖ «ជាបញ្ហានៅពេលដែលការដាក់បណ្តឹងនេះធ្វើឡើងតើនីតិវិធីបន្ទាប់ធ្វើយ៉ាងម៉េច អីចឹងនៅពេលទទួលពាក្យបណ្តឹងត្រូវបើកការស៊ើបអង្កេតឲ្យបានត្រឹមត្រូវច្បាស់លាស់ជៀសវាងអ្នកដែលគាត់មានបញ្ហា គាត់មានរឿងរ៉ាវរបស់ខ្លួនដែលបានដាក់ពាក្យបណ្តឹងទៅហើយបែរជាមិនមាចំណាត់ការណាមួយដែលធ្វើឲ្យពួកគាត់មានទំនុកចិត្តនឹងអាចទទួលយកបាន»។
ក្រសួងមហាផ្ទៃ កាលពីថ្ងៃទី១៩ ខែកុម្ភៈ ឆ្នាំ២០២៦ បានចេញសេចក្តីជូនដំណឹងលើការដាក់ឲ្យប្រើប្រាស់ជាផ្លូវការប្រព័ន្ធទទួលបណ្តឹងអនឡាញ ដែលហៅជាភាសាអង់គ្លេសថា Complain Submission System ( CSS ) ដើម្បីបង្កលក្ខណៈងាយស្រួលក្នុងការជួយពន្លឿននីតិវិធីដោះស្រាយ និងឆ្លើយតបជូនប្រជាពលរដ្ឋបានឆាប់រហ័សសំដៅដល់ការដោះស្រាយបណ្ដឹងតវ៉ា និងបណ្តឹងបរិហាររបស់ប្រជាពលរដ្ឋពាក់ព័ន្ធសមត្ថកិច្ចនឹងសកម្មភាព របស់មន្ត្រីរាជការក្របខណ្ឌក្រសួងមហាផ្ទៃ និងដើម្បីអង្កេតស្រាវជ្រាវ ស្វែងរកយុត្តិធម៌ ភាពស្អាតស្អំជូនភាគីពាក់ព័ន្ធ។
ទាក់ទងនឹងភាពអសកម្មរបស់មន្ត្រីដែលបង្កើតឲ្យមានអំពើពុករលួយនេះ អង្គការតម្លាភាពអន្តរជាតិ (Transparency International) បានចេញរបាយការណ៍ស្តីអំពីអំពើពុករលួយកាលពីថ្ងៃទី១០ ខែកុម្ភៈ ឆ្នាំ២០២៦ ថា ប្រទេសកម្ពុជាជាប់ចំណាត់ថ្នាក់លេខរៀងទី១៦៣ ក្នុងចំណោមប្រទេសសរុប ១៨២ នៅលើពិភពលោក៕
