ពលរដ្ឋដែលចាញ់បោកក្រុមហ៊ុន ប្រ៊ីលានស៊ីធី របស់អតីតឧកញ៉ា ឡេង ចាន់ណា នៅតាមខេត្តផ្សេងៗ បាននាំគ្នាឡើងមកភ្នំពេញ តវ៉ានិងដាក់ញត្តិនៅក្រសួងយុត្តិធម៌ និងក្រុមមេធាវីរដ្ឋាភិបាល ឲ្យជួយអន្តរាគមន៍ទៅតុលាការ ខេត្តសៀមរាប ឲ្យពន្លឿនដំណើរការសំណុំរឿងនេះឲ្យបានឆាប់ ព្រោះជាប់គាំង ជិត៣ឆ្នាំហើយ។
ក្រុមពលរដ្ឋរងគ្រោះ អះអាងថា ការពន្យារពេលរកដំណោះស្រាយរបស់តុលាការខេត្តសៀមរាប ពីមួយឆ្នាំទៅមួយឆ្នាំ ធ្វើឲ្យកូនៗរបស់ពួកគាត់មិនបានរៀនសូត្រ គ្រួសារបែកបាក់គ្នា និងខ្លះទៀតសម្លាប់ខ្លួន ដោយសារតែការជំពាក់បំណុល វ័ណ្ឌក។
ដោយពិបាកទ្រាំរង់ចាំដំណោះស្រាយយូរពេក ពលរដ្ឋរងគ្រោះ មកពីតាមបណ្ដាខេត្តនានា បានលើកគ្នាទៅតវ៉ានៅខាងមុខក្រសួងយុត្តិធម៌ ក្នុងរាជធានីភ្នំពេញ តាំងពីព្រឹកថ្ងៃទី១៣ ខែមករា ដោយបានបិទផ្លូវខាងមុខក្រសួងនេះ ប្រមាណ ជិតមួយម៉ោងដើម្បីស្នើសុំជួបតំណាងមន្ត្រីក្រសួងយុត្តិធម៌ ប៉ុន្តែរហូតដល់ម៉ោង ប្រមាណ ៥:៤០ នាទីរសៀលដែលជាម៉ោងឈប់ សម្រាកធ្វើការ ទើបមន្ត្រីក្រសួង យុត្តិធម៌បានចេញមកហៅពលរដ្ឋរងគ្រោះចំនួន ៤ នាក់ចូលទៅខាងក្នុងក្រសួង។
ទោះជាយ៉ាងណា នៅមុនពេលមានមន្ត្រីចេញមក ពលរដ្ឋរងគ្រោះបានបិទផ្លូវខាងមុខក្រសួង ហើយក្រុមមន្ត្រីក្រសួងនាំគ្នាចេញពីធ្វើការតាមច្រកម្ខាងទៀត នៅក្បែរមាត់ទន្លេផ្នែកខាងក្រោយអគារក្រសួង ដើម្បីគេចមុខពីប្រជាពលរដ្ឋ ដែលកំពុងតវ៉ា។ ក្រុមមន្ត្រីបានចេញតាមផ្លូវក្រោយនេះ ម្តងម្នាក់ៗ ស្ទើរស្ងាត់ក្រសួងទាំងមូល។
តំណាងពលរដ្ឋរងគ្រោះ លោកស្រី ហាប ហៀម ប្រាប់អ្នកសារព័ត៌មានថា ពួកគាត់ឡើងមករកកិច្ចអន្តរាគមន៍ពីក្រសួងយុត្តិធម៌ ដោយសារតែពួកគាត់អស់ការអត់ធ្មត់ ក្នុងការរង់ចាំ និងការសន្យាដដែលៗ ពីក្រុមមេធាវីរបស់រដ្ឋាភិបាល និងតុលាការ អស់រយៈពេលជិត ៣ឆ្នាំមកហើយ ប៉ុន្តែគ្មានដំណោះស្រាយអ្វីសោះ។ លោកស្រីថា បច្ចុប្បន្នគ្រួសារលោកស្រី និងពលរដ្ឋដទៃទៀត កំពុងប្រឈមនឹងបំណុលធនាគារធ្ងន់ធ្ងរ ជួបវិបត្តិខ្វះខាតក្នុងជីវភាព និងកូនចៅឈឺអត់មានលុយព្យាបាល ឪពុកម្ដាយឈឺអត់មានលុយយកទៅពេទ្យ។
លោកស្រី ហាប ហៀម៖ «អ៊ីចឹងហើយធ្វើយ៉ាងណា គិតគួរតែខាងធនាគារទេសព្វថ្ងៃហ្នឹង ហើយឲ្យពួកខ្ញុំគិតគួរធនាគារប៉ុន្មានខែប៉ុន្មានឆ្នាំទៀត ទើបបានមានដំណោះស្រាយឲ្យពួកខ្ញុំ បើពួកខ្ញុំលំបាកវេទនាយ៉ាងនេះ។ បើឲ្យពួកខ្ញុំទាំងអស់ ស្លាប់ដោយសារការពារទឹកដី ពួកខ្ញុំមានមោទនភាព តែបើឲ្យពួកខ្ញុំស្លាប់ដោយសារ តែបំណុលធនាគារ ដោយសារតែការចាញ់បោកឧកញ៉ា ឡេង ចាន់ណា គឺពួកខ្ញុំស្លាប់ទាំងបិទភ្នែកអត់ជិតទេ»។
ក្រៅពីស្នើឲ្យពន្លឿនដំណោះស្រាយ ពលរដ្ឋរងគ្រោះបានទាមទារឲ្យតុលាការខេត្តសៀមរាប ដោះលែងតំណាងរបស់ពួកគាត់ឈ្មោះ រ៉េត សុធី ឲ្យមានសេរីភាពវិញ ដោយថា លោកស្រី រ៉េត សុធី បានសម្រាលកូននៅក្នុងពន្ធនាគារ អំឡុងពេលតុលាការបានឃុំខ្លួន ២ឆ្នាំទាំងអយុត្តិធម៌។
ទូរទស្សន៍អាស៊ីសេរីមិនអាចសុំការអត្ថាធិប្បាយ ពីអ្នកនាំពាក្យក្រសួងយុត្តិធម៌ លោក ជិន ម៉ាលីន បានទេ នៅថ្ងៃទី១៣ ខែមករា។
សំណុំរឿងរកស៊ីឆបោកដ៏កក្រើកប្រទេសកម្ពុជា របស់ក្រុមហ៊ុន ប្រ៊ីលានស៊ីធី រយៈ ពេលជិត ៣ឆ្នាំមកនេះ តុលាការបានត្រឹមតែចាប់ឃុំខ្លួននាយិកា ក្រុមហ៊ុន អ្នកស្រី ឡេង ចាន់ណា និងបក្ខពួកប្រមាណ ១០នាក់ដាក់ក្នុងពន្ធនាគារ។ បន្ថែមពីលើនេះ កាលពីខែសីហាកន្លងទៅ អង្គភាពប្រឆាំងអំពើពុករលួយ (ACU) សម្រេចព្យួរតំណែងអនុប្រធានអង្គភាពរបស់ខ្លួន និងជារដ្ឋលេខាធិការក្រសួងអប់រំ គឺ លោក ស៊ាន បូរ៉ាត់ ព្រមទាំងព្យួរតំណែងអនុរដ្ឋលេខាធិការក្រសួងការពារជាតិឧត្តមសេនីយ៍ ស ថាវី ដោយសារជាប់ពាក់ព័ន្ធករណីឆបោកលុយរាប់លានដុល្លារ ជាមួយអ្នកស្រី ឡេង ចាន់ណា។
លោក ស៊ាន បូរ៉ាត់ គឺជាមនុស្សជំនិតរបស់លោក ហ៊ុន ម៉ាណែត ព្រោះលោកក៏មានតួនាទីជាអនុប្រធានយុវជនគណបក្សប្រជាជនកម្ពុជា ដែលមានលោកនាយករដ្ឋមន្ត្រី ហ៊ុន ម៉ាណែត ជាប្រធាន។ មកដល់ពេលនេះ តុលាការមិនទាន់ចាប់ខ្លួនមនុស្សជំនិតរបស់លោក ហ៊ុន ម៉ាណែត ទាំងនេះនៅឡើយទេ ហើយពលរដ្ឋរងគ្រោះជាង ១ម៉ឺន ២ពាន់គ្រួសារ បានត្រឹមតែទន្ទឹងរង់ចាំ ដំណោះស្រាយទាំងខកចិត្ត និងឈឺចាប់។
ពលរដ្ឋមកពីខេត្តកំពង់ធំ ដែលដាក់វិនិយោគជាមួយ ក្រុមហ៊ុន ប្រ៊ីលានស៊ីធី ចំនួន ៥ម៉ឺន ៦ពាន់ដុល្លារ គឺលោកស្រី អ៊ុក វលក្ខណ៍ លើកឡើងថា ពួកគាត់បានទុកពេលឲ្យក្រុមហ៊ុន និងតុលាការដោះស្រាយជាង ២ឆ្នាំហើយ ប៉ុន្តែនៅតែមិនទាន់ឃើញដំណោះស្រាយអ្វីទាំងអស់។ លោកស្រីរៀបរាប់ថា ក្នុងមួយខែៗ គ្រួសាររបស់លោកស្រី ប្រឈមបញ្ហាជីវភាពខ្លាំង ជាពិសេសគឺការរកប្រាក់បង់សងធនាគារ។
លោកស្រី អ៊ុក វលក្ខណ៍៖ «ពួកខ្ញុំទុកពេលឲ្យខាងគាត់ដោះស្រាយឲ្យវាជាង ២ ឆ្នាំហើយ ។ អ៊ីចឹងបងប្អូនគិតមើលសម្រាប់ការបង់ការប្រាក់ទៅខាងធនាគារ ២ ឆ្នាំជាងគឺវាច្រើនណាស់ហើយអ្នកខ្លះមិនមែនតែលុយធនាគារទេ បងប្អូនមានចងការលុយឯកជនទៀត។ អ៊ីចឹងម្នាក់ៗ អ្នកខ្លះរត់ចោលស្រុកក៏មានដែរ។ ឥឡូវនៅតាមភូមិជាក់ស្ដែង រាល់ថ្ងៃនេះ ចង់ស្ងាត់ភូមិអស់ហើយ ដោយសាររត់ចោលផ្ទះ រត់សម្បែង ដើម្បីរកលុយបង់ធនាគារ។ អ្នកខ្លះជំពាក់លុយឯកជន ដែលមានការប្រាក់ថ្លៃទៀត។ អ៊ីចឹង ពួកខ្ញុំមកថ្ងៃនេះ គឺសុំសំណូមពរឲ្យក្រសួងយុត្តិធម៌ជួយដោះស្រាយជួយពន្លឿនរឿងនេះដល់ពួកខ្ញុំផង»។
អតីតឧកញ៉ា ឡេង ចាន់ណា នាយិកា ក្រុមហ៊ុន ប្រ៊ីលានស៊ីធី ត្រូវបានតុលាការចោទប្រកាន់ចំនួនបីបទល្មើស រួមមានបទឆបោកមានស្ថានទម្ងន់ទោស បទមិនបំពេញកាតព្វកិច្ចឧបករណ៍ដែលអាចជួញដូរបាននិងបទសម្អាតប្រាក់ កាលពីខែមីនា ឆ្នាំ២០២៤ និងត្រូវបានបញ្ចប់គោរមងារ «ឧកញ៉ា» ភ្លាមៗ នៅពេលនោះ នៅក្រោយការផ្ទុះបញ្ហាឆបោកនេះ ប្រមាណមួយឆ្នាំ។ ប្រជាពលរដ្ឋជាង ១ម៉ឺន២ ពាន់នាក់ ទាំងក្នុងប្រទេស និងទាំងពលករនៅក្រៅប្រទេសចាញ់បោកក្រុមហ៊ុននេះ អស់ប្រាក់ជាង ៣០០លានដុល្លារ។
អ្នកស្រី ឡេង ចាន់ណា កាលនៅមានសេរីភាពធ្លាប់បាននិយាយថា ការចាត់ការណាមួយលើក្រុមហ៊ុន ប្រ៊ីលានស៊ីធី របស់អ្នកស្រីស្មើនឹងប៉ះពាល់លោក ហ៊ុន ម៉ាណែត រហូតដល់អ្នកស្រីហ៊ានប្រកាសប្រាប់សមាជិកក្រុមហ៊ុនថា ប្រ៊ីលានស៊ីធី គឺជាក្រុមហ៊ុនរបស់លោក ហ៊ុន ម៉ាណែត។
តំណាងពលរដ្ឋទាំង ៤ នាក់ដែលបានចូលទៅក្នុងក្រសួងយុត្តិធម៌នោះ បានចេញមកវិញនៅវេលាម៉ោងជិត ៧យប់ថ្ងៃដដែល ក្នុងទឹកមុខញញឹមញញែម។ តំណាងពលរដ្ឋអះអាងថា ពួកគាត់មានសង្ឃឹម ៥០ ភាគរយ ថា នឹងអាចមានដំណោះស្រាយក្រោយពីបានជួបពិភាក្សាជាច្រើនជាមួយមន្ត្រីក្រសួងយុត្តិធម៌ ដោយក្រសួងសន្យាថា នឹងឆ្លើយតបជាមួយពលរដ្ឋក្នុងរយៈពេលមួយសប្តាហ៍ក្រោយពីក្រសួងធ្វើការជាមួយតុលាការខេត្តសៀមរាប។ ទោះជាយ៉ាងណា តំណាងពលរដ្ឋអះអាងថា ចំពោះពលរដ្ឋដែលមិនមានវត្តមានចូលរួមតវ៉ា ឬមិនមានឈ្មោះក្នុងបញ្ជីដាក់ជូនក្រសួងនៅថ្ងៃនេះ ក្រសួងនឹងមិនបានដោះស្រាយជូននោះទេ៕
