អ្នកវិភាគលើកឡើងថា កម្ពុជាមិនចាំបាច់ឆ្លើយឆ្លងជុំវិញការចោទប្រកាន់របស់ភាគីថៃ ពាក់ព័ន្ធនឹងការជ្រៀតជ្រែករឿងនយោបាយរបស់ពួកគេនោះទេ ដោយកម្ពុជាត្រូវទុកឱ្យចរន្តនយោបាយរបស់ថៃ វិវត្តតាមដំណើរ។ ការថ្លែងនេះ គឺបន្ទាប់ពីអ្នកនយោបាយថៃ បានចោទកម្ពុជាថា ជ្រៀតជ្រែកក្នុងរឿងនយោបាយថៃ ក្រោយមេស្ថាប័នសិទ្ធិមនុស្សកម្ពុជានៃរដ្ឋាភិបាលកម្ពុជា លោក កែវ រ៉េមី លើកឡើងថា ប្រសិនបើនាយករដ្ឋមន្ត្រីថៃ លោក អានុទីន ចានវីរៈគុល (Anutin Charnvirakul) ចាញ់ឆ្នោត នោះលទ្ធភាពនៃការផ្ទុះសង្គ្រាមនៅតាមព្រំដែនលើកទី៣ រវាងកម្ពុជា និងថៃ នឹងថយចុះ។
បើទោះបីជាការប្រយុទ្ធគ្នានៅតាមតំបន់ព្រំដែន រវាងកម្ពុជា និងថៃ ត្រូវបានផ្អាកជាបណ្ដោះអាសន្នទៅហើយក្ដី ក៏ភាគីទាំងពីរនៅតែមានភាពរកាំរកូសជាមួយគ្នា ខាងផ្នែកនយោបាយ បន្ទាប់ពីក្រុមអ្នកនយោបាយថៃ នៅតែបន្តចោទប្រកាន់មកលើកម្ពុជា ថាបានជ្រៀតជ្រែករឿងកិច្ចការនយោបាយរបស់ថៃ។ ជាពិសេស ការលើកឡើងរបស់មន្ត្រីជាន់ខ្ពស់កម្ពុជា លោក កែវ រ៉េមី ពាក់ព័ន្ធនឹងការបោះឆ្នោតក្នុងប្រទេសថៃ កំពុងក្លាយជាបញ្ហាធំមួយដែលមានការជជែកវែកញែកច្រើនក្នុងចំណោមអ្នកនយោបាយថៃ។
សមាជិកតំណាងរាស្ត្រ របស់គណបក្សភឿថៃ បានចោទប្រកាន់មកលើមេដឹកនាំកម្ពុជា ថាមានបំណងសម្អុយប្រជាប្រិយភាពរបស់គណបក្សភឿថៃ តាមរយៈការប្រើប្រាស់ឧបាយកល ឧទ្ទេសនាម ឱ្យគណបក្សភឿថៃ ដែលធ្វើឱ្យពលរដ្ឋថៃយល់ច្រឡំថា គណបក្សភឿថៃ គឺជាបក្សពួក ឬជាសម្ព័ន្ធមិត្តជាមួយមេដឹកនាំកម្ពុជា។
ទន្ទឹមគ្នានេះ ក្រុមអ្នកនយោបាយ របស់គណបក្សភឿថៃ បានចោទប្រកាន់លើកម្ពុជា ថាកំពុងជួយស្វែងរកប្រជាប្រិយភាពឱ្យគណបក្សភូមិចៃថៃ របស់លោក អានុទីន ចាន់វីរៈគុល ដែលជានាយករដ្ឋមន្ត្រីចាំផ្ទះ និងបានលួចចងសម្ព័ន្ធភាពដោយប្រយោលជាមួយគ្នា ដើម្បីផលប្រយោជន៍នយោបាយ។
ជាមួយគ្នានេះ តំណាងរាស្ត្រមកពីគណបក្សប្រជាជនថៃ បានរម្លឹកឱ្យមេដឹកនាំគណបក្សភូមិចៃថៃ លោក អានុទីន កុំឆ្លៀតឱកាសយកការអត្ថាធិប្បាយរបស់ភាគីកម្ពុជា ដើម្បីទាក់ទាញប្រជាប្រិយភាព តាមរូបភាពជាតិនិយមរបស់ប្រជាពលរដ្ឋ។
ចំណែកប្រធានគណបក្សភូមិចៃថៃ លោក អានុទីន វិញ លោកបានបញ្ចេញត្រតិកម្មថា លោកមិនចាប់អារម្មណ៍ចំពោះការលើកឡើងពីបញ្ហានយោបាយថៃ របស់មន្ត្រីកម្ពុជានោះទេ ដោយលោកលើកឡើងថា ការវាយប្រហារមកលើរូបលោក ពីសំណាក់មន្ត្រីកម្ពុជានេះ គឺមកពីកម្ពុជាខ្លាចវត្តមានរបស់លោក។
ទំនាស់ពាក្យសម្ដី របស់ក្រុមអ្នកនយោបាយថៃនៃ បានកើតឡើងបន្ទាប់ពី ទេសរដ្ឋមន្ត្រី និងជាប្រធានគណៈកម្មាធិការសិទ្ធិមនុស្សរបស់រដ្ឋាភិបាលកម្ពុជាលោក កែវ រ៉េមី បានសរសេរនៅលើបណ្ដាញសង្គមហ្វេសប៊ុក កាលពីថ្ងៃទី៨ ខែមករា ថា ប្រសិនបើគណបក្សភូមិចៃថៃ របស់លោក អានុទីន ចាញ់ឆ្នោត នោះលទ្ធភាពនៃការផ្ទុះសង្គ្រាមនៅតាមព្រំដែនលើកទី៣ រវាងកម្ពុជា និងថៃ នឹងថយចុះ។
ក្រៅពីវាយប្រហារមកកាន់លោក អានុទីន លោក កែវ រ៉េមី បានឧទ្ទេសនាមដល់គណបក្សប្រជាជនថៃ ឬគណបក្សភឿថៃ ថា ប្រសិនបើគណបក្សណាមួយ ក្នុងចំណោមទាំងពីរនេះ បានឈ្នះឆ្នោត នោះពួកគេនឹងមិនលេងល្បែងសង្គ្រាមនោះទេ ពីព្រោះគណបក្សទាំងពីរ ផ្ដោតទៅលើសេដ្ឋកិច្ច និងទំនាក់ទំនងអន្តរជាតិ ជាជាងធ្វើសង្គ្រាមជាមួយប្រទេសជិតខាង។
ក្រុមអ្នកនយោបាយថៃ បានចោទថា ការលើកឡើងរបស់លោក កែវ រ៉េមី គឺធ្វើឡើង ដោយមានការរៀបចំពីប្រធានព្រឹទ្ធសភា លោក ហ៊ុន សែន ដែលកន្លងមក លោកធ្លាប់មានទំនាក់ទំនង និងទំនាស់លក្ខណៈបុគ្គល ជាមួយគ្រួសារមេដឹកនាំនៃត្រកូលស៊ីណាវ៉ាត់ របស់គណបក្សភឿថៃ។
ទូរទស្សន៍អាស៊ីសេរី មិនអាចទាក់ទង ប្រធានគណៈកម្មាធិការសិទ្ធិមនុស្សកម្ពុជា កែវ រ៉េមី ដើម្បីសុំការបកស្រាយជុំវិញរឿងនេះបានទេ នៅថ្ងៃទី១៦ ខែមករា។
ជុំវិញបញ្ហានេះ អ្នកជំនាញផ្នែកភូមិសាស្ត្រនយោបាយ លោក សេង វណ្ណលី ប្រាប់ទូរទស្សន៍អាស៊ីសេរី នៅថ្ងៃទី១៦ ខែមករា ថា ស្ថានភាពនយោបាយរវាងកម្ពុជា និងថៃ ដែលកំពុងកើតឡើងនេះ ជាសញ្ញាមួយដែលព្រមានឱ្យឃើញថា បញ្ហាជាតិនិយម នៅតែជាអាវុធដ៏មុតស្រួច ដែលអាចបង្កើតជាភ្លើងវិវាទបានគ្រប់ពេលវេលា។ លោកបន្តថា ដើម្បីដោះស្រាយបញ្ហានេះ មន្ត្រីកម្ពុជាមិនចាំបាច់បកស្រាយ ឬឆ្លើយឆ្លងជាសាធារណៈអ្វីនោះទេ ដោយកម្ពុជាត្រូវទុកឱ្យចរន្តនយោបាយរបស់ថៃ វិវត្តតាមដំណើរ ក៏ប៉ុន្តែទន្ទឹមគ្នានេះ កម្ពុជាគួរប្រើប្រាស់យន្តការការទូត ដើម្បីបញ្ជាក់មកកាន់ភាគីថៃ អំពីគោលជំហរមិនជ្រៀតជ្រែក ក្នុងកិច្ចការផ្ទៃក្នុងរបស់ថៃ។
លោក សេង វណ្ណលី៖ «ដូច្នេះហើយ អ្វីដែលយើងមើលឃើញ គឺជាសង្គ្រាមចិត្តសាស្ត្រ និងការប្រើប្រាស់វោហារសាស្ត្រនយោបាយ ដើម្បីទប់ទល់អំណាចគ្នានៅក្នុងស្រុក ច្រើនជាងបំណងចង់បង្កជម្លោះប្រដាប់អាវុធជាមួយប្រទេសជិតខាង។ តែយ៉ាងណាក្ដី អ្នកនយោបាយកម្ពុជា ត្រូវតែប្រយ័ត្នប្រយែងខ្ពស់ នៅក្នុងការនិយាយស្ដីអ្វី ដើម្បីកុំឱ្យក្លាយជាឧបករណ៍នយោបាយណាមួយរបស់ប្រទេសថៃ បើមិនដូច្នេះទេ ជម្លោះទ្វេភាគី និងកាន់តែបង្កឱ្យមានផលប៉ះពាល់ដល់ទំនាក់ទំនងទ្វេភាគី រយៈពេលវែង»។
លោក សេង វណ្ណលី បន្តថា ភាពចម្រូងចម្រាសរឿងនយោបាយ រវាងប្រទេសទាំងពីរនេះ មានភាគរយតិចតួច ដែលអាចបង្កឱ្យមានសង្គ្រាមព្រំដែនសាជាថ្មីម្ដងទៀត ដោយសារតែប្រទេសទាំងពីរ ត្រូវការពឹងពាក់គ្នាទៅវិញទៅមក នៅក្នុងកាលៈទេសៈដែលពិភពលោក កំពុងស្ថិតក្នុងស្ថានភាពលំបាក។
ទោះជាយ៉ាងណា អតីតមេទ័ពភូមិភាគ២ថៃ និងជាទីប្រឹក្សាអគ្គមេបញ្ជាការកងទ័ពជើងគោក លោក ប៊ុនស៊ីន ផាត់ក្លាង បានថ្លែងកាលពីថ្ងៃទី១៣ ខែមករា ថា ឱកាសផ្ទុះសង្គ្រាមតាមព្រំដែន ជាមួយកម្ពុជា ជាលើកទី៣ គឺមានចំនួន ៥០លើ៥០ ដោយអាស្រ័យលើគោលជំហររបស់កម្ពុជា ដែលបានទាមទារទឹកដី ដែលយោធាថៃកំពុងកាន់កាប់ត្រឡប់ទៅវិញ។
លោកព្រមានថា ប្រសិនបើផ្ទុះសង្គ្រាមលើកទី៣ គឺអាចនឹងមានសភាពធ្ងន់ធ្ងរជាងមុន ដោយសារយោធាថៃ បានត្រៀមបំពាក់អាវុធធុនធ្ងន់ច្រើនជាងមុន។
កម្ពុជា និងថៃ បានធ្វើសង្គ្រាមជាមួយគ្នានៅតាមព្រំដែន ចំនួន២ដងមកហើយ កាលពីចុងខែកក្កដា និងដើមខែធ្នូ ឆ្នាំ២០២៥។ អ្នកឃ្លាំមើល យល់ឃើញថា ដើមចមនៃសង្គ្រាមនេះ គឺកើតចេញពីជម្លោះបុគ្គលរបស់អតីតមេដឹកនាំកម្ពុជា លោក ហ៊ុន សែន និងបងធម៌ ដែលជាអតីតមេដឹកនាំថៃ គឺលោក ថាក់ស៊ីន ស៊ីណាវ៉ាត់។ ជម្លោះនេះ បានរាលដាលកាន់តែខ្លាំង បន្ទាប់ពីលោក ហ៊ុន សែន បានបរិហារកេរ្តិ៍ លោក ថាក់ស៊ីន និងលូកដៃកកូរកកាយកិច្ចការផ្ទៃក្នុងរបស់ក្រុមឥស្សរជននយោបាយថៃ រហូតដល់មានការផ្ទុះអាវុធដាក់គ្នា នៅតាមបណ្ដោយព្រំដែន៕
