ថ្លែងប្រាប់អ្នកសារព័ត៌មាន នៅមុខវិមានរដ្ឋាភិបាល នៅថ្ងៃទី៩ ខែធ្នូ នេះ នាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ លោក អានុទីន ចាន់វីរៈគុល (Anutin Charnvirakul) បានលើកឡើងថា សង្គ្រាមនៅតំបន់ព្រំដែន រវាងកម្ពុជា និងថៃ នៅពេលនេះ បញ្ឈប់លែងបានហើយ ដោយរដ្ឋាភិបាលស៊ីវិលរបស់លោក នឹងគាំទ្រប្រតិបត្តិការរបស់យោធាថៃ ១០០ភាគរយ ដើម្បីកម្ទេចកម្ពុជា ឱ្យតដៃលែងកើត និងអស់លទ្ធភាព។
លោក អានុទីន បានអះអាងថា លោកបានផ្ដល់ភ្លើងខៀវឱ្យកងទ័ពថៃរួចហើយ ថានឹងអនុវត្តឱ្យបានពេញលេញនូវផែនការ ដែលរដ្ឋាភិបាលស៊ីវិល និងក្រុមយោធាថៃបានរៀបចំ ដោយរដ្ឋាភិបាលស៊ីវិល កំពុងផ្តល់ការគាំទ្រគ្រប់បែបយ៉ាង ដើម្បីជំរុញប្រតិបត្តិការរបស់ក្រុមយោធាថៃ។
ទោះជាយ៉ាងណា ប្រធានព្រឹទ្ធសភាកម្ពុជាលោក ហ៊ុន សែន អះអាងថា កងកម្លាំងប្រដាប់អាវុធគ្រប់ប្រភេទត្រូវបានដាក់ពង្រាយដើម្បីវាយបកលើគ្រប់ចំណុចដែលទ័ពថៃវាយឈ្លានពាន៕
