កម្ពុជាឆ្លើយតបទៅភាគីថៃដែលចង់បិទច្រកផ្លូវសមុទ្រកម្ពុជានាំទំនិញចូល ដោយអះអាងថា បានត្រៀមលក្ខណៈរួចរាល់ហើយ នៅចំពោះមុខការវាយប្រហារឈ្លានពានរបស់ថៃមកលើកម្ពុជា។
អ្នកនាំពាក្យក្រសួងសាធារណការ និងដឹកជញ្ជូន លោក ផន រឹម សរសេរលើហ្វេសប៊ុកនៅព្រឹកថ្ងៃទី១៥ ធ្នូ ថា កម្ពុជាមិនមែនក្មេងបៀមដៃ។ កម្ពុជាបានគិតគូររឿងនេះ និងបានត្រៀមលក្ខណៈរួចរាល់ ឆ្លើយតបគ្រប់ទម្រង់ ចំពោះមហិច្ឆតាបង្កសង្គ្រាមពង្រីកទំនាស់របស់ថៃ។
លោកលើកឡើងថា ប៉ុន្មានថ្ងៃមកនេះ ឃើញកាសែតថៃដកស្រង់សំដីមន្ត្រីជាន់ខ្ពស់ថៃពាក់ព័ន្ធការព្រមាន បិទរាំងខ្ទប់ ដំណើរនាវាចរដឹកទំនិញតាមផ្លូវសមុទ្រឆ្លងកាត់ឈូងសមុទ្រថៃចូលមកកាន់ប្រទេសកម្ពុជា ដោយពួកគេយកលេសផ្សេងៗមកសំអាង ក្នុងគោលដៅចិញ្ចឹមមហិច្ឆតាឈ្លានពាន បង្កសង្គ្រាម ពង្រីកជម្លោះជាមួយកម្ពុជា។
លោក ផន រឹម បន្តថា កម្ពុជាមានច្រកដឹកទំនិញសមុទ្រចម្រុះ និងប្រទាក់ក្រឡា ដែលមានសក្ដានុពល និងធានាបាននូវឯករាជ្យភាព និងម្ចាស់ការលើគ្រប់ទម្រង់ ស្របតាមច្បាប់ និងវិធានអន្តរជាតិ។
កាលពីថ្ងៃទី១៤ ធ្នូ យោធាថៃបានចេញបញ្ជាបន្ទាន់មួយ ឱ្យបិទឈូងសមុទ្រថៃ ដើម្បីស្ទាក់ចាប់ការដឹកជញ្ជូនប្រេង និងសម្ភារៈយោធាចូលកម្ពុជា ហើយបានប្រកាសដាក់ដែនទឹកជុំវិញកំពង់ផែកម្ពុជា ថា ជាតំបន់មានហានិភ័យខ្ពស់៕
