ប្រជាពលរដ្ឋខ្មែររស់នៅក្រៅប្រទេស បារម្ភខ្លាចរដ្ឋាភិបាល លោក ហ៊ុន ម៉ាណែត មិនអាចទាមទារទឹកដី និងប្រាសាទរបស់កម្ពុជា ដែលទាហានថៃបានឈ្លានពាន និងព័ទ្ធបន្លាលួស ត្រឡប់មកវិញ។ ការលើកឡើងនេះ បន្ទាប់ពីទាហានថៃបានរាយបន្លាលួសព័ទ្ធយកទឹកដី និងប្រាសាទខ្មែរ ជាច្រើនកន្លែងនៅតាមបណ្ដោយព្រំដែន។
ប្រជាពលរដ្ឋខ្មែររស់នៅក្រៅប្រទេសជំរុញឲ្យរដ្ឋាភិបាល លោក ហ៊ុន ម៉ាណែត ត្រូវប្ដឹងភាគីថៃ ទៅតុលាការអន្តរជាតិ(ICJ) ដើម្បីទាមទារទឹកដី និងប្រាសាទខ្មែរ និងត្រូវបោះបង្គោលព្រំដែនឲ្យបានច្បាស់លាស់ ផ្អែកតាមផែនទីបារាំង-សៀម ដើម្បីការពារបូរណភាពទឹកដី។
ពលករនៅប្រទេសកូរ៉េខាងត្បូង(South Korea) លោក ឃឹម វិជ្ជាធន ប្រាប់ទូរទស្សន៍អាស៊ីសេរី នៅថ្ងៃទី៣០ ខែធ្នូ ថា រដ្ឋាភិបាលរបស់លោក ហ៊ុន ម៉ាណែត ត្រូវតែទទួលស្គាល់នូវការពិត និងត្រូវប្ដឹងថៃទៅតុលាការអន្តរជាតិICJ ពាក់ព័ន្ធទាហានថៃ បើកការវាយប្រហារឈ្លានពាន និងរាយបន្លាលួសព័ទ្ធយកទឹកដី ប្រាសាទខ្មែរជាច្រើនកន្លែង ត្រឡប់មកវិញឡើយ។ លើសពីនោះ លោកថា ដើមហេតុបង្កឲ្យមានសង្គ្រាមកើតឡើង ដោយសារតែទំនាស់ផលប្រយោជន៍ និងលោក ហ៊ុន សែន ទៅប៉ះពាល់កិច្ចការផ្ទៃក្នុងរបស់ប្រទេសថៃ។ លោកអំពាវនាវឲ្យរដ្ឋាភិបាល និងអ្នកនយោបាយ ទាំងអស់រួបរួមគ្នា ដើម្បីជួយការពារប្រយោជន៍ជាតិ។
លោក ឃឹម វិជ្ជាធន៖ «ខ្ញុំសង្ឃឹមថា អ្នកនយោបាយនៅក្នុងប្រទេសកម្ពុជារបស់យើងទាំងអស់ ចេះរួបរួមសាមគ្គីគ្នាជាធ្លុងមួយ ដើម្បីប្រទេសជាតិរបស់យើងរឹងមាំទៅថ្ងៃអនាគត ហើយការបង្រួបបង្រួមនេះដែរ ខ្ញុំគិតថាទាល់តែមានការផ្ដើមចេញពីមេដឹកនាំរបស់ប្រទេសកម្ពុជាពិតប្រាកដ ជាពិសេសលោក ហ៊ុន ម៉ាណែត។ ហើយលោក ហ៊ុន ម៉ាណែត គួរតែដោះលែងអ្នកទោសនយោបាយ និងអ្នកទោសមនសិការ»។
ស្រដៀងគ្នានេះដែរ ពលរដ្ឋរស់នៅប្រទេសជប៉ុន លោក មួន យន លើកឡើងថា ដោយសារតែមេដឹកនាំអសមត្ថភាព ទើបធ្វើឲ្យបាត់បង់ទឹកដី និងធ្វើឲ្យពលរដ្ឋរងគ្រោះ។ លោកថា គ្រួសារ លោក ហ៊ុន សែន គួរតែចុះចេញពីតំណែង ខណៈក្រោមការដឹកនាំរបស់ លោក ហ៊ុន ម៉ាណែត និងលោក ហ៊ុន សែន តែងតែបង្កើតរឿងស្មុកស្មាញដល់ប្រទេសជាតិ និងធ្វើឲ្យពិភពលោកស្អប់ខ្ពើមកម្ពុជា។
លោក មួន យន៖ «បើបន្តឲ្យត្រកូលនេះដឹកនាំបន្តទៀត យើងនឹងបាត់បង់ប្រទេសខ្មែរទាំងស្រុងតែម្ដង អញ្ចឹងមានន័យថា យើងកុំឲ្យបាត់ទាំងស្រុង មិនអាចការពារទឹកដីបាន បើសិនជាមិនផ្ដាស់ប្ដូរ និងចុះចេញពីតំណែងទេ យើងនឹងបាត់បង់ប្រទេសខ្មែរទាំងស្រុងតែម្ដង»។
ទូរទស្សន៍អាស៊ីសេរី ពុំអាចទាក់ទង ប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា និងអ្នកនាំពាក្យនាយករដ្ឋមន្ត្រី លោក មាស សោភ័ណ្ឌ ដើម្បីឆ្លើយតបជុំវិញបញ្ហានេះ បានទេនៅថ្ងៃទី៣០ ខែធ្នូ ដោយហៅទូរស័ព្ទចូលតែគ្មានអ្នកទទួល។
ទាក់ទិននឹងបញ្ហានេះ ប្រធានអង្គការសម្ធ័ន្ធខ្មែរដើម្បីកិច្ចព្រមព្រៀងសន្តិភាពទីក្រុងប៉ារីស និងដើម្បីកម្ពុជា នៅប្រទេសអូស្ត្រាលី (Australia ) លោក អ៊ិន ណាត យល់ឃើញថា រដ្ឋាភិបាលកម្ពុជា គួរតែប្រញាប់ប្ដឹងភាគីថៃទៅតុលាការយុត្តិធម៌អន្តរជាតិICJ និងសហប្រធាន កិច្ចព្រមព្រៀងសន្តិភាពទីក្រុងប៉ារីស ដើម្បីឆាប់បញ្ចប់ជម្លោះ និងការពារដែនអធិបតេយ្យភាព និងបូរណភាពទឹកដីកម្ពុជាឲ្យបានគង់វង្ស។
លោក អ៊ិន ណាត៖ «ការរំលោភបំពានរបស់ថៃនេះ គឺជាទង្វើខុសច្បាប់ ដែលយើងត្រូវតែប្ដឹង កាលណាយើងអត់ប្ដឹង យើងនឹងបាត់បង់ហើយ គេនឹងយកហើយ ពីព្រោះថៃតែងតែងចង់ពង្រីកទឹកដីតាំងពីដើមមក»។
គណៈកម្មាធិការចម្រុះព្រំដែនកម្ពុជា (JBC) កាលពីថ្ងៃទី២៩ ខែធ្នូ បានចេញសេចក្ដីប្រកាសមួយ ដោយមិនទទួលស្គាល់នូវការកែប្រែខ្សែបន្ទាត់ព្រំដែនណាមួយ ដែលកើតចេញពីការប្រើប្រាស់កម្លាំងនោះឡើយ។ លើសពីនោះ គណៈកម្មាធិការចម្រុះព្រំដែនកម្ពុជាអះអាងថា កម្ពុជាប្រកាន់ជំហរម៉ឺងម៉ាត់ការពារខ្សែព្រំដែនអន្តរជាតិកម្ពុជា-ថៃ ដែលបន្សល់ទុកដោយគណៈកម្មការព្រំដែនឥណ្ឌូចិន-សៀម ដោយគោរពគោលការណ៍ច្បាប់អន្តរជាតិ គោលការណ៍ខ្សែព្រំដែនមិនកែប្រែ (Uti Possidetis Juris) និងអនុសញ្ញា សន្ធិសញ្ញាបារាំងសៀម និងកំណត់ហេតុបោះបង្គោលព្រំដែនរបស់ គណៈកម្មការបោះបង្គោលព្រំដែន ឥណ្ឌូចិន-សៀម ព្រមទាំងកិច្ចព្រមព្រៀង និងឯកសារពាក់ព័ន្ធនានាដែលភាគីទាំងពីរបានឯកភាពគ្នាពេលកន្លងទៅ។
បើទោះជាបែបនេះក្ដី ក្រោយមានបទឈប់បាញ់ ភាគីថៃអះអាងថា តំបន់ដែលយោធាថៃដណ្ដើមបានពីកម្ពុជា ភាគីថៃនឹងមិនប្រគល់ឱ្យទៅកម្ពុជាវិញនោះទេ ហើយទីតាំងដែលមានផ្ទះប្រជាពលរដ្ឋខ្មែរ ដូចជាភូមិជោគជ័យ និងភូមិព្រៃចាន់ មិនឱ្យពលរដ្ឋខ្មែរចូលទៅរស់នៅវិញឡើយ។
ក្រៅពីប្រជាពលរដ្ឋរស់នៅខាងក្រៅប្រទេស ប្រជាពលរដ្ឋខ្មែរនៅក្នុងស្រុក ក៏បញ្ហាការព្រួយបារម្ភ នៅលើបណ្ដាញសង្គម ដោយខ្លាចភាគីថៃ មិនប្រគល់ទឹកដី និងប្រាសាទ ដែលពួកគេបានវាយកាន់កាប់ ត្រឡប់មកកម្ពុជាវិញ អាចធ្វើឲ្យបញ្ហាព្រំដែនកម្ពុជា-ថៃ អូសបន្លាយយូរអង្វែងទៅមុខបន្តទៀត៕
