កងទ័ពជើងទឹកថៃបានចាប់ខ្លួនក្រុមពលករចំណាកស្រុកកម្ពុជាចំនួន ៧១ នាក់ទៀត ដោយចោទថា បានចូលប្រទេសថៃដោយខុសច្បាប់។
អ្នកនាំពាក្យកងទ័ពជើងទឹកថៃ លោក ប៉ារ៉ាច រតនាឆៃយ៉ាផាន់ (Parach Rattanachaiyapan) ឱ្យដឹងកាលពីថ្ងៃទី១៣ ខែមករា ថា កងកម្លាំងការពារព្រំដែនខេត្តចន្ទបុរី (Chanthaburi) និងត្រាត (Trat) បានចាប់ខ្លួនពលករចំណាកស្រុកកម្ពុជាចំនួន ៧១នាក់ ក្នុងនោះមានទាំងបុរស ស្ត្រី និងកុមារ ដែលបានឆ្លងដែនចូលប្រទេសថៃ ដោយខុសច្បាប់តាមច្រករបៀងនៅពេលយប់ តាមបណ្តោយព្រំដែនក្នុងស្រុកពោងណាមរ៉ន (Pong Nam Ron) ខេត្តចន្ទបុរី (Chanthaburi)។
យោធាថៃ អះអាងថា បន្ទាប់ពីធ្វើការសាកសួរ ក្រុមពលករខ្មែរ បានប្រាប់ថា ពួកគាត់កំពុងរងទុក្ខហើយមូលហេតុពួកគាត់លួចឆ្លងដែនខុសច្បាប់បែបនេះ គឺដោយសារកត្តាជីវភាពខ្វះខាត ក្នុងការរស់នៅ នៅឯស្រុកកំណើត ដែលបណ្ដាលមកពីបញ្ហាសេដ្ឋកិច្ចធ្លាក់ចុះ និងឱកាសការងារមានភាពចង្អៀត។ ក្រោយពីការសាកសួររួច កងទ័ពជើងទឹកថៃ បានផ្តល់ថ្នាំពេទ្យ អាហារ និងទឹកដល់ពលករខ្មែរ មុននឹងប្រគល់ពួកគេទៅឱ្យមន្ត្រីស៊ើបអង្កេត និងអន្តោប្រវេសន៍សម្រាប់អនុវត្តនីតិវិធីបន្ត។
កាលពីថ្ងៃទី១១ ខែមករា ទាហានជើងទឹកថៃរបស់ខេត្តចន្ទបុរី បានចាប់ខ្លួនពលករខ្មែរ ដែលមានទាំងមនុស្សចាស់ និងកុមារ ចំនួន៣០នាក់ ម្ដងរួចមកហើយ។ អាជ្ញាធរថៃអះអាងថា ពួកគេបានលួចឆ្លងដែនចូលប្រទេសថៃ ដើម្បីរកការងារធ្វើ ដោយសារជួបការលំបាក នៅឯស្រុកកំណើត៕
