អង្គការទស្សនៈពិភពលោកអន្តរជាតិប្រចាំកម្ពុជា (Would Vision) ព្រួយបារម្ភផលប៉ះពាល់ធ្ងន់ធ្ងរដល់កុមារ ទាំងផ្នែកសុខភាពផ្លូវចិត្ត និងផ្លូវកាយ ស្របពេលការផ្ទុះសង្គ្រាមរវាងកម្ពុជា-ថៃ បានកើតឡើងជាថ្មី។ ពួកគាត់ថា កុមារភៀសសឹកកម្ពុជាជាច្រើនខ្វះខាតអាហារ និងទីជម្រកសមរម្យ ដែលបានបង្កការប៉ះទង្គិច ផ្លូវចិត្ត ការរំខានការសិក្សា និងសុវត្ថិភាពក្នុងការរស់នៅ។
អង្គការទស្សនៈពិភពលោកអន្តរជាតិ ប្រចាំនៅកម្ពុជាបានចេញសេចក្ដីប្រកាសព័ត៌មានចុះថ្ងៃទី១៥ ខែធ្នូ ថា ជម្លោះព្រំដែនកម្ពុជា-ថៃ កំពុងធ្វើឱ្យកុមារស្ថិតក្នុងចំណោមអ្នករងគ្រោះបំផុត ព្រោះពួកគេប្រឈម កង្វះអាហារូបត្ថម្ភ គ្មានទីជម្រកសមរម្យ ខ្វះទឹកអនាម័យ និងសេវាថែទាំសុខភាព ទើបធ្វើឱ្យប៉ះទង្គិចផ្លូវចិត្តធ្ងន់ធ្ងរ។
នាយកអង្គការទស្សនៈពិភពលោកអន្តរជាតិប្រចាំនៅកម្ពុជា លោក ជេនេស អ៊ីម៉ានូអ៊ែល (Janusz Emanuel) បានលើកឡើងនៅក្នុងសេចក្ដីប្រកាសព័ត៌មានថា គ្រួសារជនភៀសសឹក នៅតាមបណ្ដាខេត្តជាប់ព្រំដែនថៃ បានកើនឡើងច្រើន ខណៈតម្រូវការអាហារ ទីជម្រក និងសេវាថែទាំសុខភាព កំពុងតែត្រូវការជាបន្ទាន់។ លោកបន្តថា ការគាំទ្រផ្នែកស្បៀង និងសម្ភារៈឱ្យទាន់ពេលវេលា ពិតជាសំខាន់ ក្នុងការការពារនិង ជួយសង្គ្រោះជីវិតកុមារ។
ជាមួយគ្នានេះ អង្គការទស្សនៈពិភពលោក បានអំពាវនាវដល់សាធារណជន និងអាជ្ញាធរពាក់ព័ន្ធ ឱ្យចូលរួមផ្ដល់មូលនិធិជាបន្ទាន់ដើម្បីឱ្យភ្នាក់ងារមនុស្សធម៌អាចបង្កើនជំនួយសង្គ្រោះជីវិត រួមទាំងអាហារ ទឹកស្អាត អនាម័យ ជម្រកសង្គ្រោះបន្ទាន់ សេវាសុខភាពជាដើម។ មួយវិញទៀត លោកក៏ទទូចឱ្យផ្ដល់អាទិភាព ក្នុងការការពារកុមារ ដូចជាសេវាផ្នែកចិត្តសាស្ត្រ និង ការអប់រំ ក្នុងគ្រាមានអាសន្ន ដើម្បីធានាសុវត្ថិភាពនិងសុខុមាលភាពរយៈពេលវែង របស់កុមារ។ ចុងក្រោយ ទទូចឱ្យជួយជាបន្ទាន់ ដល់សហគមន៍រងផលប៉ះពាល់ខ្លាំងបំផុត ឱ្យបានឆាប់រហ័ស ដោយសុវត្ថិភាព និងសមធម៌។
ស្របគ្នានេះ ក្រសួងអប់រំ យុវជន និងកីឡា នៅថ្ងៃទី១៥ ខែធ្នូ បានចេញរបាយការណ៍ ដោយបង្ហាញថា ចាប់តាំងពីយោធាថៃបើកការឈ្លានពានកម្ពុជាដោយកម្លាំងយោធាជាច្រើនថ្ងៃជាប់ៗគ្នាមកនេះ សាលារៀន ជាង១ពាន់ ( ១.០៣៩) កន្លែងត្រូវបានបិទ ខណៈសិស្សជាង២សែន៤ម៉ឺន (២៤២.៨៨១)នាក់ បានផ្អាកការសិក្សាបណ្ដោះអាសន្ន។ ដូច្នេះ ក្រសួងបានលើកឡើងថា សេវាគាំទ្រផ្នែកចិត្តសាស្ត្រ ដល់កុមារ រាប់សែននាក់ កំពុងភៀសសឹក គឺជារឿងចាំបាច់បំផុតត្រូវតែមាន ដើម្បីឱ្យពួកគេបន្តសិក្សា និងការថែទាំសុខភាពផ្លូវចិត្ត។
ទូរទស្សន៍អាស៊ីសេរីពុំអាចទាក់ទងអ្នកនាំពាក្យក្រសួងអប់រំយុវជន និងកីឡា អ្នកស្រី ឃួន វិច្ឆិកា ដើម្បីបញ្ជាក់បន្ថែមជុំវិញរឿងនេះបានទេ នៅថ្ងៃទី១៧ ខែធ្នូ ដោយហៅទូរស័ព្ទចូល គ្មានអ្នកទទួល។
ទោះជាយ៉ាងណា ដើម្បីឆ្លើយទៅនឹងស្ថានភាពដ៏លំបាករបស់កុមារដែលកំពុងតែភៀសសឹកនៅតាមបណ្ដាខេត្តមួយចំនួន ពុំទាន់ទទួលបានការសិក្សាឡើងវិញនោះ ក្រសួងអប់រំ យុវជន និងកីឡា កំពុងតែរៀបចំតង់កៅស៊ូជាច្រើន ដែលមានកម្ពស់ជាង ៣ម៉ែត្រ ទំហំធំទូលាយ ដែលអាចបើកជាថ្នាក់រៀន បណ្ដោះអាសន្ន ទៅកាន់កុមារនៅតាមជំរំភៀសសឹក។ ការរៀបចំថ្នាក់រៀន ធ្វើពីតង់កៅស៊ូនេះ ក្រសួងរំពឹងថា នឹងជួយកុមារបានខ្លះ ដើម្បីឱ្យពួកគាត់បានរៀនសូត្រឡើងវិញ។
ជុំវិញរឿងនេះ ប្រធានអង្គការសម្ព័ន្ធភាពការពារសិទ្ធិមនុស្សកម្ពុជា ហៅកាត់ CHRAC លោក រស់ សុដ្ឋា ប្រាប់ទូរទស្សន៍អាស៊ីសេរីថា ការព្រួយបារម្ភ អំពីស្ថានភាពជនភៀសសឹក ខ្វះខាតស្បៀងទីជម្រកសមរម្យ និងការបាត់បង់ការសិក្សា របស់កុមារក្នុងស្ថានភាពសង្គ្រាមនេះ ជារឿងត្រឹមត្រូវ ព្រោះថា កុមារជាជនងាយរងគ្រោះ ក្នុងចំណោមជនដទៃទៀត ដូចជា មនុស្សចាស់ជរា និងស្ត្រីមានផ្ទៃពោះ។ ទន្ទឹមគ្នានោះលោកថា ផលប៉ះពាល់ការសិក្សារបស់កុមារនឹងក្លាយជាបន្ទុកធ្ងន់នៅពេលអនាគត ដូច្នេះតម្រូវឱ្យអាជ្ញាធរ និងស្ថាប័នពាក់ព័ន្ធ គួរតែរៀបចំឱ្យមានវគ្គបង្រៀនបណ្ដោះអាសន្ន នៅតាមជំរំ និងត្រូវផ្ដល់នូវសេវាថែទាំសុខភាពផ្លូវកាយ និងផ្លូវចិត្ត។
លោក រស់ សុដ្ឋា៖ «ករណីនេះពាក់ព័ន្ធថវិកាជាតិដែរ ធ្វើម៉េច ឱ្យមានថវិកា និងកៀរគរយ៉ាងណា ដើម្បីឱ្យគាត់បានថវិកា អាចបានសិក្សាក្នុងអន្តរកាលសង្គ្រាមនេះ។ ហើយ ការស្នាក់នៅទីនោះ អាចមានការខ្វះខាតសម្ភារៈមួយចំនួន ក៏ដូចជាការ ថែរក្សាសុខភាព ថ្នាំការពារមូស ម៉ុងភួយ សំលៀកបំពាក់ ថ្នាំបង្ការ ពីជំងឺផ្សេងៗ។ ជាការចាំបាច់ដែលត្រូវផ្ដល់ជំនួយឱ្យបានគ្រប់ទិសទី គ្រប់ទីកន្លែង»។
បើទោះជាបែបនេះ អ្នកឃ្លាំមើលថា អំឡុងស្ថានភាពលំបាកនេះ អាជ្ញាធរគួរតែរៀបចំឱ្យបានគ្រប់ជ្រុងជ្រោយ មិនថាការសិក្សារបស់កុមារ ទីជម្រក អនាម័យ និងទឹក ត្រូវតែមានឱ្យបានគ្រប់គ្រាន់។ ជាមួយគ្នានោះ គួរតែប្រមូលពលរដ្ឋភៀសសឹក ដែលស្នាក់នៅ តាមវាលស្រែ និងតាមព្រៃ ឱ្យពួកគាត់ទៅរស់នៅជំរំភៀសសឹកជុំគ្នា ដើម្បីជួយ ការពារសុវត្ថិភាព។ បន្ថែមពីនោះ ពួកគាត់ថា មកទល់ពេលនេះ ជនភៀសសឹកខ្លះ នៅតែត្អូញត្អែរ ពិបាករកទីកន្លែងសម្រាប់ស្នាក់នៅ ខណៈនៅតំបន់ភៀសសឹកខ្លះ ដាក់ចំនួន មនុស្សមានកំណត់ ហើយបើពលរដ្ឋណា ចង់រស់នៅជំរំដែលមានចំនួនមនុស្សពេញហើយនោះ អាជ្ញាធរប្រាប់ពួកគាត់ថា អាចស្នាក់នៅបាន ប៉ុន្តែមិនទទួលបានអំណោយណាមួយ ពីសប្បុរសជននោះឡើយ។
កាលពីផ្ទុះអាវុធលើកទី១ រវាងកម្ពុជា-ថៃ ចំនួន៥ថ្ងៃ ចាប់ពីថ្ងៃទី២៤ ដល់២៨ខែកក្កដា បានបង្ខំឱ្យពលរដ្ឋ រាប់ម៉ឺនគ្រួសារ ចាក់ចេញពីលំនៅឋាន ទៅរស់នៅជំរំជនភៀសសឹក។ កាលពីថ្ងៃទី១២ ខែសីហា អង្គការទស្សនៈពិភពលោកប្រចាំកម្ពុជា (World Vision) រកឃើញថា ជនភៀសសឹកជាង ៦០% មានវិបត្តិផ្លូវចិត្តធ្ងន់ធ្ងរ ក្រោយពីជម្លៀសចេញពីផ្ទះសម្បែង ហើយកុមារជាច្រើនបានផ្អាកការសិក្សា និងមានអារម្មណ៍បាក់ទឹកចិត្ត ខណៈអាហារូបត្ថម្ភ ទឹកប្រើប្រាស់ និងអនាម័យ ពុំសូវមាន ធ្វើឱ្យពួកគាត់ពិបាករស់នៅប្រកបដោយផាសុកភាព៕
