ក្រសួងវប្បធម៌ និងវិចិត្រសិល្បៈកម្ពុជានៅថ្ងៃទី៩ ធ្នូ ចេញសេចក្តីថ្លែងការណ៍ថ្កោលទោសយ៉ាងដាច់អហង្ការចំពោះយោធាថៃ ដែលបានបាញ់បំផ្លាញប្រាសាទបុរាណខ្មែរតាក្របីជាទីគោរពសក្ការៈរបស់កម្ពុជា។
ក្រសួងចាត់ទុកការបាញ់បំផ្លាញនេះ ជាទង្វើសាហាវបង្ហាញពីភាពអសីលធម៌ ការប្រមាថមាក់ងាយដល់វប្បធម៌ អរិយធម៌ និងទីសក្ការៈដែលជាមរតកមនុស្សជាតិ ជាពិសេសមរតកវប្បធម៌ដែលដូនតាខ្មែរបានកសាងបន្សល់ទុក មានតម្លៃមិនអាចកាត់ថ្លៃបាន។
ក្រសួងវប្បធម៌អះអាងថា យោធាថៃកំពុងបន្តបាញ់ប្រហារដោយគ្មានញញើតមកលើគ្រប់ទីតាំង មិនថា ជាទីតាំងជនស៊ីវិល ឬទីតាំងបេតិកភណ្ឌនោះទេ ក្នុងនោះក៏មានប្រាសាទព្រះវិហារ ដែលរងការបំផ្លាញ ធ្វើឱ្យអគារអភិរក្សក្រោមកិច្ចសហប្រតិបត្តិការអភិរក្សកម្ពុជា-ឥណ្ឌា ខូចខាតទាំងស្រុង រួមទាំងរចនាសម្ព័ន្ធផ្សេងៗទៀតរបស់ប្រាសាទ។
ក្រសួងវប្បធម៌អំពាវនាវឱ្យមជ្ឈដ្ឋានជាតិ អន្តរជាតិ ជាពិសេសអង្គការយូណេស្កូ (UNESCO) ចូលរួមថ្កោលទោស និងជំរុញឱ្យយោធាថៃបញ្ឈប់ជាបន្ទាន់ នូវសកម្មភាពបំផ្លិចបំផ្លាញទាំងអស់នេះ៕
