ទីភ្នាក់ងារសារព័ត៌មានអន្តរជាតិ AFP បានកត់សម្គាល់ឃើញថា ក្នុងពេលប៉ះទង្គិចគ្នាតាមព្រំដែនរវាងយោធាថៃ និងកម្ពុជា ឃ្លិបវីដេអូជាច្រើនដែលបង្កើតឡើងដោយ AI ចេញពីប្រទេសថៃ ត្រូវបានអ្នកប្រើប្រាស់បណ្ដាញសង្គមជនជាតិថៃជាច្រើនយកទៅផ្សព្វផ្សាយ បើទោះបីជារូបភាពទាំងនោះ ត្រូវបានគេរកឃើញរួចមកហើយថា បង្កើតចេញពី AI ក្ដី។
ជាក់ស្ដែង នៅក្នុងវីដេអូបង្កើតដោយ AI ទាំងនោះ បង្ហាញដូចជាទាហានខ្មែរកំពុងហូបបាយនៅក្នុងលេណដ្ឋាន ហើយនៅចុងបញ្ចប់នៃវីដេអូនោះ គ្រាប់ផ្លោងមួយគ្រាប់បានបាញ់ចំលេណដ្ឋានរបស់ពួកគេ។ ចំណែកវីដេអូខ្លះទៀត បង្ហាញពីសកម្មភាពទាហានខ្មែរកំពុងតែកាន់កាំភ្លើងបាញ់ផង និងរត់ចូលលេណដ្ឋានផង ហើយក្រោយមកត្រូវគ្រាប់ផ្លោងរបស់ទាហានថៃបាញ់ចំបណ្ដាលឱ្យស្លាប់ជាដើម។ ករណីទាំងនេះ ទីភ្នាក់ងារសារព័ត៌មានអន្តរជាតិ AFP បានអះអាងថា ជនជាតិថៃបានយកវីដេអូក្លែងក្លាយទាំងអស់នោះ ទៅបង្ហោះនៅលើបណ្ដាញសង្គមហ្វេសប៊ុក ដោយសរសេរចំណងបែបឌឺដង និងចាត់ទុកជាការលេងសើចសប្បាយជាដើម។
ទន្ទឹមគ្នានោះ AFP បានអះអាងថា ពួកគេបានស្រង់យកវីដេអូជាច្រើន ដែលជនជាតិថៃបានបង្កើតនិយាយពីទាហានខ្មែរ ត្រូវបានទាហានថៃបាញ់ប្រហារ យកទៅពិនិត្យមើលជាមួយកម្មវិធីចាប់វីដេអូ AI របស់ក្រុមហ៊ុន Hive Moderation បង្ហាញថា ៩៩% ជាវីដេអូបង្កើតដោយAI ឬ deepfake។ ខណៈដែលវីដេអូជាច្រើន បង្ហាញពីទាហានខ្មែរ មានឯកសណ្ឋានក្នុងវីដេអូប្រឌិតក៏ខុសពីទាហានខ្មែរ នៅតាមព្រំដែន។ ជាមួយគ្នានោះ AFP បានលុបចោលព័ត៌មានមិនពិតផ្សេងទៀតទាក់ទងនឹងការប៉ះទង្គិចគ្នាតាមព្រំដែនកម្ពុជា-ថៃ ដែលធ្លាប់បានដកស្រង់ចេញពីអ្នកប្រើប្រាស់បណ្ដាញសង្គមដែលមានប្រភពពីជនជាតិថៃ។
ប្រធានអង្គភាពអ្នកនាំពាក្យរដ្ឋាភិបាលលោក ប៉ែន បូណា ថ្លែងក្នុងសន្និសីទកាសែតនៅព្រឹកថ្ងៃទី១៦ ធ្នូ ថា លើសពីសង្គ្រាមប្រដាប់អាវុធឈ្លានពានទឹកដីកម្ពុជា ថៃក៏កំពុងប្រើប្រាស់សង្គ្រាមចិត្តសាស្ត្រនៅលើបណ្ដាញសង្គម ដើម្បីបំបាក់ស្មារតី បំបាក់ទឹកចិត្តកងទ័ព និងពលរដ្ឋ ជាមួយថ្នាក់ដឹកនាំ៕
