លោកនាយករដ្ឋមន្ត្រី ហ៊ុន ម៉ាណែត អះអាងថា រដ្ឋាភិបាលរបស់លោកមិនបានចុះចាញ់ ឬកាត់ដីឱ្យប្រទេសថៃទេ ទោះកម្ពុជាព្រមទទួលបទឈប់បាញ់បណ្ដោះអាសន្ន ៧២ម៉ោងនេះ យ៉ាងណាក្ដី។
លោក ហ៊ុន ម៉ាណែត អះអាងដូច្នេះតាមរយៈហ្វេសប៊ុករបស់លោក នៅព្រឹកថ្ងៃទី២៩ ធ្នូ។ លោកសរសេររៀបរាប់ថា ការជ្រើសរើសយកការអនុវត្តបទឈប់បាញ់នេះ មិនមែនមានន័យថា កម្ពុជា ចុះចាញ់ ឬ សុខចិត្តយកបូរណភាពទឹកដី ទៅដូរយកសន្តិភាពឡើយ ហើយរឹតតែមិនមែនមានន័យថា កម្ពុជាអស់សមត្ថភាព ឬ បោះបង់សិទ្ធិស្វ័យការពារខ្លួននោះដែរ ។ ផ្ទុយទៅវិញ ការសម្រេចចិត្តនេះ បង្ហាញថា កម្ពុជាបានសម្រេចប្រកាន់យកមាគ៌ាសន្តិភាព និងការតម្កល់អាយុជីវិត និងសុខទុក្ខរបស់ប្រជាជន ជាអាទិភាពចម្បងបំផុត និងខ្ពស់បំផុតមួយរបស់ខ្លួន បើទោះជាត្រូវប្រឈមមុខនឹងសម្ពាធ ឬ ការលំបាកយ៉ាងណាក៏ដោយ ។
សំណេរយ៉ាងវែងអន្លាយរបស់លោក ហ៊ុន ម៉ាណែត បានរៀបរាប់យ៉ាងច្រើន ដូចជា លើកពីសោកនាដកម្មនៃសង្គ្រាមឈ្លានពាន និងលើកពីបំណងដែលលោកអះអាងថា កម្ពុជាគ្មានប្រាថ្នាអ្វីផ្សេងឡើយ ក្រៅពីសុខសន្តិភាព និងលទ្ធភាព ក្នុងការអភិវឌ្ឍប្រទេសឱ្យមានការរីកចម្រើន។
តែយ៉ាងណា ការអះអាងរបស់លោក ហ៊ុន ម៉ាណែត ហាក់ផ្ទុយនឹងស្ថានភាពជាក់ស្ដែង ដែលកម្ពុជាហាក់ទន់ខ្សោយយ៉ាងខ្លាំង និងពុំអាចទប់ស្កាត់ការឈ្លានពាន ពិសេសការពារដែនអាកាសរបស់ខ្លួនឡើយពីសំណាក់កងទ័ពអាកាសថៃ ដែលប្រើយន្តហោះចម្បាំងទម្លាក់គ្រាប់បែកដោយគ្មានការរារាំងលើអធិបតេយ្យភាពកម្ពុជា និងបំផ្លាញហេដ្ឋារចនាសម្ព័ន្ធជាច្រើនដែលចូលជ្រៅក្នុងដីខ្មែរ។
សូមរង់ចាំអានសេចក្ដីរាយការណ៍ពិស្ដារក្នុងកម្មវិធីផ្សាយនារាត្រីនេះ…
