រដ្ឋាភិបាលកម្ពុជាឯករាជ្យ ២៣តុលា ដឹកនាំដោយ លោក សម រង្សី បានពឹងពាក់មេធាវីអន្តរជាតិ ដាក់ពាក្យបណ្ដឹងទៅកាន់តុលាការព្រហ្មទណ្ឌអន្តរជាតិ (ICC) ពីបទឧក្រិដ្ឋកម្មសង្គ្រាម ដែលប្រព្រឹត្តដោយមេដឹកនាំនិងយោធាថៃ ដូចជាប្រើប្រាស់គ្រាប់បែកចង្កោមនិងផ្សែងពុល ការសម្លាប់ជនសុវិលកម្ពុជារួមទាំងកុមារ និងការទម្លាក់គ្រាប់បែកបំផ្លាញ វត្តអារាម សាលារៀន មន្ទីរពេទ្យ ផ្ទះសម្បែងរបស់ពលរដ្ឋខ្មែរ ព្រមទាំងប្រាសាទព្រះវិហារ និងប្រាសាទតាក្របីជាដើម។ រដ្ឋាភិបាលនេះ ក៏អំពាវនាវឱ្យរដ្ឋអាជ្ញានៃតុលាការព្រហ្មទណ្ឌអន្តរជាតិ ICC បើកការត្រួតពិនិត្យបឋម ដើម្បីធានាថាការទទួលខុសត្រូវនឹងត្រូវអនុវត្ត ខណៈរដ្ឋាភិបាលកម្ពុជា ដែលដឹកនាំដោយ លោក ហ៊ុន ម៉ាណែត ពុំបានយកករណីព្រំដែនកម្ពុជា-ថៃ ប្ដឹងទៅកាន់ស្ថាប័នអន្តរជាតិនៅឡើយទេ។
សេចក្ដីថ្លែងការណ៍របស់រដ្ឋាភិបាលកម្ពុជាឯករាជ្យ២៣ តុលា ចុះថ្ងៃទី២៩ ខែធ្នូ បានលើកឡើង ថា រដ្ឋាភិបាលកម្ពុជាឯករាជ្យ ២៣តុលា បានពឹងពាក់មេធាវីអន្តរជាតិ ដើម្បីដាក់ពាក្យបណ្ដឹងទៅកាន់តុលាការព្រហ្មទណ្ឌអន្តរជាតិ (ICC) លើបទឧក្រិដ្ឋកម្មសង្គ្រាម ដែលបានប្រព្រឹត្តដោយកងកម្លាំងថៃ និង ការទទួលខុសត្រូវផ្នែកឧក្រិដ្ឋកម្មយ៉ាងធ្ងន់ធ្ងររបស់ថ្នាក់ដឹកនាំកម្ពុជា បន្ទាប់ពីជនស៊ីវិល ដែលត្រូវបានជួញដូរ និងឃុំខ្លួននៅក្នុងមជ្ឈមណ្ឌលឆបោកក្រោមការការពារដោយរដ្ឋ ត្រូវបានទុកឱ្យប្រឈមនឹងការបំផ្ទុះគ្រាប់បែកខុសច្បាប់ ។ បណ្ដឹងនេះ ដាក់ការទទួលខុសត្រូវលើឈ្មោះភាគីទាំងពីរ សម្រាប់ឧក្រិដ្ឋកម្មដែលបានប្រព្រឹត្តលើដែនដីប្រទេសកម្ពុជា។
សេចក្ដីថ្លែងការណ៍ដដែលបញ្ជាក់ថា៖ «រដ្ឋាភិបាលកម្ពុជាឯករាជ្យ ២៣តុលា អំពាវនាវឱ្យរដ្ឋអាជ្ញានៃតុលាការព្រហ្មទណ្ឌអន្តរជាតិ ICC បើកការត្រួតពិនិត្យបឋម និង ដើម្បីធានាថា ការទទួលខុសត្រូវនឹងត្រូវអនុវត្ត ទាំងចំពោះអ្នកដែលទម្លាក់គ្រាប់បែក និង ទាំងអ្នកដែលបានដាក់ជនស៊ីវិល ឱ្យស្ថិតនៅក្នុងផ្លូវគ្រោះថ្នាក់»។
សេចក្ដីថ្លែងការណ៍នេះ បានអះអាងថា ព័ត៌មាននៃបណ្ដឹងនេះ ដាក់ការទទួលខុសត្រូវករណីឧក្រិដ្ឋកម្មដោយចំពោះ ទៅលើថ្នាក់ដឹកនាំនយោបាយរបស់ប្រទេសកម្ពុជា ក្នុងបណ្ដាញឧក្រិដ្ឋកម្មភ្ជាប់នឹងរដ្ឋ ដែលគ្រប់គ្រង និងទទួលបានផលចំណេញពីមជ្ឈមណ្ឌលឆបោកទាំងនោះ។
អ្នកនាំពាក្យរដ្ឋាភិបាលកម្ពុជាឯករាជ្យ ២៣តុលា លោក គឹម សុខ បានមានប្រសាសន៍ថា ករណីនេះគឺជារឿងអំណាច អំពើពុករលួយ និងការមិនទទួលខុសត្រូវ ទុកឱ្យពលរដ្ឋក្លាយជាជនរងគ្រោះនៃឧក្រិដ្ឋកម្មសង្គ្រាម។ លោកថា នេះមិនមែនជាការខូចខាតដោយចៃដន្យទេ គឺជាអំពើឧក្រិដ្ឋកម្ម ដែលប្រព្រឹត្តដោយភាគីទាំងពីរ។
លោក គឹម សុខ៖ «យើងជារដ្ឋាភិបាលតំណាងផលប្រយោជន៍ប្រជាពលរដ្ឋខ្មែរនិងការពារទឹកដីនៃប្រទេសកម្ពុជា ដូច្នេះយើងត្រូវតែចេញមុខ ប្តឹងដើម្បីការពារទឹកដីនៃប្រទេសកម្ពុជាហើយនៅពេលដែលមានការបំពានពីបរទេសនេះគឺជាកាតព្វកិច្ចរបស់យើងក្នុងនាមជារដ្ឋាភិបាលនៃប្រទេសជាតិកម្ពុជា»។
បន្ថែមពីលើនេះ ប្រមុខដឹកនាំស្ថាប័ន អធិបតេយ្យជាតិ ព្រំដែន និងអន្តោប្រវេសន៍ នៃរដ្ឋាភិបាលកម្ពុជាឯករាជ្យ ២៣តុលា លោក អ៊ុំ សំអាន បានសរសេរនៅលើហ្វេសប៊ុករបស់លោកថា រដ្ឋាភិបាលកម្ពុជាឯករាជ្យ២៣តុលា នឹងពឹងពាក់មេធាវីអន្តរជាតិ ដើម្បីដាក់ពាក្យបណ្ដឹងទៅកាន់តុលាការយុត្តិធម៌អន្តរជាតិ (ICJ) បន្ទាប់ពីការដាក់បណ្តឹងទៅ ICC រួចរាល់។ លោកនិងក្រុមការងារកំពុងមមារញឹកក្នុងការពិនិត្យមើលផែនទីខ្នាត ១/២០០ ០០០ និងឯកសារនានាដើម្បីត្រៀមនឹងប្តឹងទៅ ICJ បន្ទាប់ពីទៅប្តឹង ICC រួចរាល់។
លោក អ៊ុំ សំអាន សរសេរបញ្ជាក់បន្ថែមថា៖ «សង្ឃឹមថា ពលរដ្ឋខ្មែរនឹងទទួលបានយុត្តិធម៌ហើយសង្ឃឹមថា តុលាការព្រហ្មទណ្ឌអន្តរជាតិ (ICC) នឹងចេញដីកាចាប់ខ្លួនមេដឹកនាំថៃនិងយោធាថៃ»។
ទាក់ទងនឹងបណ្តឹងទៅកាន់តុលាការ ICC នេះដែរ នៅថ្ងៃទី២៣ ខែធ្នូ យុវជនខ្មែរបញ្ចប់ការសិក្សាផ្នែកយោធានៅសហរដ្ឋអាមេរិក លោក មូន ពេជ្រ បានសរសេរនៅលើហ្វេសប៊ុករបស់លោក ថា ការិយាល័យរដ្ឋអាជ្ញានៃតុលាការព្រហ្មទណ្ឌអន្តរជាតិ ICC បានទទួលយកបណ្ដឹងរបស់ពលរដ្ឋខ្មែរ ជាផ្លូវការហើយ។ លោកថា នេះមានន័យថា បណ្ដឹងនេះនឹងត្រូវ ICC យកទៅពិនិត្យ ដើម្បីពិចារណាដោយផ្អែកលើលក្ខន្តិកៈទីក្រុងរ៉ូម។
កាលពីថ្ងៃទី១៩ ខែវិច្ឆិកា រដ្ឋាភិបាលកម្ពុជាឯករាជ្យ២៣តុលា បានប្រកាសពីការប្តឹងភាគីថៃទៅកាន់តុលាការយុត្តិធម៌អន្តរជាតិ (ICJ) ចំពោះការឈ្លានពានរបស់ភាគីថៃមកលើពលរដ្ឋខ្មែរ និងប្រទេសកម្ពុជា ដោយសារតែរដ្ឋាភិបាលកម្ពុជាមិនបានយកសំណុំរឿងព្រំដែនកម្ពុជា-ថៃ ប្តឹងទៅកាន់តុលាការអន្តរជាតិ។
អ្នកឃ្លាំមើលបញ្ហាសង្គមលើកឡើងថា រដ្ឋាភិបាលកម្ពុជា គួរតែយកសំណុំរឿងជម្លោះព្រំដែនជាមួយថៃ ប្ដឹងទៅតុលាការយុត្តិធម៌អន្តរជាតិនោះទើបជារឿងដ៏ប្រសើរ ក៏ប៉ុន្តែ ប្រសិនបើរដ្ឋាភិបាលកម្ពុជា នៅតែបន្តចរចា ជម្លោះព្រំដែនលក្ខណៈទ្វេភាគីជាមួយថៃ កម្ពុជាមានតែខាតបង់ ហើយថៃជាអ្នកទទួលផលចំណេញ៕
