អ្នកជំនាញសារព័ត៌មានលើកឡើងថា ការដែលអាជ្ញាធរ រឹតត្បិត អ្នកសារព័ត៌មានមិនឱ្យរាយការណ៍ ឱ្យបានទូលំទូលាយ និងឯករាជ្យ ជុំវិញផលប៉ះពាល់ ពីការផ្ទុះសង្គ្រាមឈ្លានពានទឹកដីរបស់យោធាថៃ មកលើកម្ពុជា ជាលើកទី២នេះ ពុំធ្វើឱ្យចំណេញដល់ប្រទេសជាតិនោះទេ។
អ្នកជំនាញផ្នែកប្រព័ន្ធផ្សព្វផ្សាយ និងអ្នកវិភាគលើកឡើងថា កម្ពុជាគួរតែបើកលំហ សេរីភាពសារព័ត៌មាន និង សេរីភាពបញ្ចេញមតិ ដោយគ្មានការរឹតត្បិត ព្រោះថាការរាយការណ៍ព័ត៌មានពិត នឹងជួយឱ្យ រដ្ឋាភិបាល ឆាប់ទទួលបានព័ត៌មាន និង ឆាប់បានជួយដល់ពលរដ្ឋដែលជួបទុក្ខលំបាក បានទាន់ពេលវេលា។
នាយកប្រតិបត្តិនៃសម្ព័ន្ធអ្នកសារព័ត៌មានកម្ពុជា ហៅកាត់ថា ខេមបូចា លោក ណុប វី ប្រាប់ទូរទស្សន៍អាស៊ីសេរី នៅថ្ងៃទី២៥ ខែធ្នូថា ចាប់តាំងពីយោធាថៃបានបើកការបាញ់ប្រហារមកលើកម្ពុជាជាលើកទី២ ឃើញថាអាជ្ញាធរកម្ពុជាបានសម្រួលឱ្យអ្នកសារព័ត៌មានទាំងក្នុងស្រុក និងអន្តរជាតិ ចុះរាយការណ៍ ពីផលប៉ះពាល់ និង ស្ថានភាពជនភៀសសឹក បានខ្លះដែរ។ ប៉ុន្តែលោកថា ការរាយការណ៍ ជុំវិញជម្លោះព្រំដែននេះ ពុំសូវបានទូលំទូលាយនោះទេ ខណៈអ្នកសារព័ត៌មានខ្លះ ត្អូញត្អែរថា ពិបាក ក្នុងការចុះយកព័ត៌មាន ព្រោះមានការរឹតត្បិតពីអាជ្ញាធរ។
លោកបន្តថាការរឹតត្បិត សេរីភាពសារព័ត៌មាន ទាំងស្ថាប័នអន្តរជាតិ និងស្ថាប័នព័ត៌មានឯករាជ្យកន្លងមក កម្ពុជាពុំទទួលបានផលចំណេញដល់ប្រទេសជាតិនោះទេ។ ជាក់ស្ដែងលោកថា ស្របពេលកម្ពុជា ត្រូវបានយោធាថៃ ឈ្លានពានទឹកដី គឺ ពុំសូវ មានសារព័ត៌មានជាតិ និងអន្តរជាតិរាយការណ៍ បានទាន់ពេលវេលា និង ស៊ីជម្រៅនោះឡើយ ខណៈភាគីជាសត្រូវមានប្រៀបជាង លើបណ្ដាញសារព័ត៌មាន។ លោកបន្តថា រដ្ឋាភិបាលគួរតែគិតពិចារណាឡើងវិញ ហើយត្រូវបើកលំហ ដល់អ្នកសារព័ត៌មាន អាចរាយការណ៍ដោយឯករាជ្យ និង គ្មានការរឹតត្បិត។
អាជ្ញាធរ ក៏ដូចជារដ្ឋាភិបាលលោកគួរតែសម្រប ដើម្បីឱ្យអ្នកសារព័ត៌មាន គាត់អាចធ្វើកិច្ចការហ្នឹងបាន។ ពីព្រោះកាលណាដែលអ្នកសារព័ត៌មានគាត់អាចធ្វើកិច្ចការហ្នឹងបាន គាត់អាចបង្ហាញពិភពលោកទាំងមូលអំពីអ្វីដែល វាពិតជាកើតមានឡើងជាក់ស្ដែងនៅក្នុងប្រទេសកម្ពុជាយើង ជាជាងការរឹតត្បិតនឹង ធ្វើឱ្យមានការសង្ស័យ ហើយមានចម្ងល់ពីសាធារណជនទូទៅ។
ទូរទស្សន៍អាស៊ីសេរី ពុំអាចទាក់ទងអ្នកនាំពាក្យក្រសួងព័ត៌មាន លោក ទេព អស្នារិទ្ធ ដើម្បីឆ្លើយតបជុំវិញរឿងនេះបានទេនៅថ្ងៃទី២៥ ខែធ្នូ ។
ទោះជាយ៉ាងណា លោក ទេព អស្នារិទ្ធ ធ្លាប់ប្រាប់សារព័ត៌មាន ក្នុងស្រុកថា មិនថាអ្នកសារព័ត៌មាន និង អ្នកបង្កើតមាតិកានោះទេ នៅពេល ចុះយកព័ត៌មានដោយផ្ទាល់ ពាក់ព័ន្ធជម្លោះកម្ពុជា-ថៃ តាមព្រំដែន គឺត្រូវតែ គោរពនូវ ក្រមសីលធម៌វិជ្ជាជីវៈសារព័ត៌មាន ឱ្យបានត្រឹមត្រូវ។ ទន្ទឹមគ្នានោះ លោកថា អ្នកសារព័ត៌មាន ត្រូវសហការជាមួយអាជ្ញាធរមូលដ្ឋាន និងដាក់ពាក្យស្នើសុំចុះយកព័ត៌មានជាមុនដើម្បីការពារសន្តិសុខជាតិ និង សុវត្ថិភាព ក្នុងសហគមន៍។
ជុំវិញរឿងនេះ អ្នកសារព័ត៌មានឯករាជ្យមួយចំនួននៅក្នុងស្រុកបានប្រាប់ទូរទស្សន៍អាស៊ីសេរី ក្នុងលក្ខខណ្ឌ មិនបញ្ចេញឈ្មោះ និងសំឡេងថា ចាប់តាំងពីកម្ពុជា និងថៃបានផ្ទុះអាវុធ ជាលើកទី១ រហូតដល់លើកទី២នេះ អាជ្ញាធរមូលដ្ឋាន បានហាមឃាត អ្នកសារព័ត៌មាន យ៉ាងតឹងរ៉ឹង មិនឱ្យរាយការណ៍ តាមតំបន់រងផលប៉ះពាល់ពីការទម្លាប់គ្រាប់ របស់យោធាថៃដោយសេរីនោះទេ។ ជាមួយគ្នានោះ នៅតាមជំរំជនភៀសសឹក អាជ្ញាធរតែងតែសួរនាំពីគោលបំណង ឈ្មោះស្ថាប័នព័ត៌មាន អត្តសញ្ញាណប័ណ្ណ កាតអ្នកសារព័ត៌មាន និងសួរណែនាំពាក់ព័ន្ធអាជ្ញាប័ណ្ណព័ត៌មាន ដែលទទួលស្គាល់ពីក្រសួងព័ត៌មាន។
អ្នកសារព័ត៌មានខ្លះទៀត ដែលពុំបាន ឆ្លើយតប និងបង្ហាញពីគោលបំណងជាទីពេញចិត្តដែលអាជ្ញាធរត្រូវការនោះ ពួកគេពុំត្រូវបានអនុញ្ញាតឱ្យ ចុះផ្ដិតរូបភាព និងប្រមូលព័ត៌មាននៅទីនោះឡើយ បើទោះជាកន្លែងទាំងនោះ គឺជាតំបន់ ជនស៊ីវិល និងជាជំរំជនភៀសសឹកក្ដី។ រីឯតំបន់ខ្លះទៀត អាជ្ញាធរតម្រូវឱ្យអ្នកសារព័ត៌មាន ត្រូវដាក់ពាក្យស្នើសុំពីក្រសួងព័ត៌មាន ជាមុនសិន។ ករណីនេះធ្វើឱ្យអ្នកសារព័ត៌មានខ្លះ ពុំចង់ ចុះយកព័ត៌មាន ដោយផ្ទាល់នោះឡើយ។
ទាក់ទិនរឿងនេះ អ្នកស្រាវជ្រាវការអភិវឌ្ឍន៍សង្គម បណ្ឌិត មាស នី លើកឡើងថា នៅក្នុងប្រទេសលោកសេរី នៅពេលមានសង្គ្រាម គេតែងតែឱ្យអ្នកសារព័ត៌មាន មានលទ្ធភាពគ្រប់គ្រាន់ អាចប្រមូលព័ត៌មានដោយសេរី និង គ្មានការរឹតត្បិត។ ចំណែកប្រទេសកុម្មុយនិស្ត គេតែងលាក់បាំងព័ត៌មាន និង ហាមមិនឱ្យ មានអ្នកសារព័ត៌មាន ផ្សាយពីសកម្មភាព សមរភូមិសង្គ្រាមនោះទេ ព្រោះពួកគេ ចូលចិត្តបោកប្រាស់ កុហក និង សម្លាប់មនុស្ស ឃោរឃៅ។
បណ្ឌិត មាស នី បន្តថា ក្នុងសង្គ្រាមកម្ពុជា-ថៃនេះអាជ្ញាធរ មិនគួររឹតត្បិតអ្នកសារព័ត៌មានពេកនោះទេ ត្រូវលើកទឹកចិត្តឱ្យមានការផ្សាយឱ្យបានទូលំទូលាយ ទាំងវិជ្ជមាន និងអវិជ្ជមាន ក្នុងគោលដៅដើម្បីផលប្រយោជន៍។
កន្លែងខ្លះក៏ត្រូវគិតដែរថា ដំរីងាប់មិនអាចយកចង្អេរទៅបាំងបានទេ។ កន្លែងណាដែលមិនសមបាំង ក៏ជួយឱ្យគេឯងដឹងទៅ ក៏ល្អម្យ៉ាង។ កុំឱ្យថា ខំបាំងទៅ ពេលនោះវាមិនល្អ វានៅតែ ជះក្លិនមិនល្អ នៅថ្ងៃក្រោយវិញដដែល។ អ៊ីចឹង វាជះផលត្រឡប់មករកអ្នកទទួលខុសត្រូវវិញ។ វាអត់ទៅណាឆ្ងាយទេ។
ទន្ទឹមនឹង ការរឹតត្បិតផ្នែកសារព័ត៌មាននេះ ពលរដ្ឋ និងអ្នកតាមដានបញ្ហាសង្គម នៅតែមានចម្ងល់ជុំវិញសង្គ្រាមកម្ពុជា-ថៃ ខណៈមកទល់ពេលនេះ អាជ្ញាធរកម្ពុជា ពុំទាន់បានបង្ហាញនៅឡើយថាតើ មានតំបន់ណាខ្លះ ត្រូវបានយោធាថៃ គ្រប់គ្រង និងតំបន់ណាខ្លះ ដែលកម្ពុជា បានដណ្ដើម យកមកវិញ។ ជាមួយគ្នានោះ គេសង្កេតឃើញថា អាជ្ញាធរថៃតែងប្រកាសពីចំនួនទាហានថៃស្លាប់ ប៉ុន្តែ កម្ពុជា ពុំមានការប្រកាសនៅឡើយ ដែលធ្វើឱ្យគ្រួសារកងទ័ពខ្លះមិនស្ងប់ចិត្ត ខណៈថៃបន្តបាញ់ប្រហារកម្ពុជាកាន់តែខ្លាំង ទាំងជើងអាកាសនិងជើងគោក។
ម្យ៉ាងវិញទៀត ក្នុងពេលដែលថៃកំពុងឈ្លានពានកម្ពុជានេះ គេបែរជាឃើញសារបែកធ្លាយមួយរបស់លោក ហ៊ុន សែន និយាយពីការគំរាមកំហែងចាប់ពលរដ្ឋដាក់គុក ប្រសិនបើហ៊ានរិះគន់ ពីចំណុច អវិជ្ជមាននៃការដឹកនាំរបស់លោក និងនាយករដ្ឋមន្ត្រី ហ៊ុន ម៉ាណែត ដោយគ្មានការលើកលែង។ ជាមួយគ្នានោះ លោក ហ៊ុន សែន ហាក់ពុំខ្វល់ នឹងការអំពាវនាវ របស់ពលរដ្ឋ ដែលឱ្យ បង្រួបបង្រួមជាតិឡើងវិញ តាមរយៈការដោះលែងអ្នកទោសនយោបាយ សកម្មជនសង្គម បរិស្ថាន និងសិទ្ធិមនុស្ស ដើម្បីសាមគ្គីជាតិ ក្នុង ការការពារ និងទប់ទល់សត្រូវឈ្លានពានទឹកដី នៅចំពោះមុខនៅឡើយទេ៕
