សង្គមស៊ីវិល និងអ្នកវិភាគលើកឡើងថា ធនាគារជាតិនៃកម្ពុជា ត្រូវបង្កើតក្រុមការងារចុះដោះស្រាយបំណុលកងទ័ពជួរមុខ និងពលរដ្ឋរងគ្រោះពីការឈ្លានពានរបស់យោធាថៃ ទៅដល់មូលដ្ឋាន ទើបមានប្រសិទ្ធភាព។ ការទទូចនេះ ក្រោយពីពួកគេសង្កេតឃើញថា ធនាគារ និងគ្រឹះស្ថានមីក្រូហិរញ្ញវត្ថុ នៅតាមតំបន់មួយចំនួន មិនស្ដាប់តាមការណែនាំរបស់ ធនាគារជាតិនៃកម្ពុជាឡើយ ខណៈគ្រួសារទាហានជួរមុខ និងពលរដ្ឋរងគ្រោះបន្តរងការគំរាមឱ្យបង់ប្រាក់ជំពាក់ធនាគារ។
សង្គមស៊ីវិល និងអ្នកវិភាគ អះអាងថា គ្រួសារទាហានជួរមុខ និងជនភៀសសឹកដោយសារសង្គ្រាមឈ្លានពានអាចរងគ្រោះទ្វេដង ប្រសិនបើ ធនាគារជាតិ នៃកម្ពុជា មិនជួយស្វែងរកដំណោះស្រាយ ឲ្យពួកគាត់ច្បាស់លាស់ និងទាន់ពេលវេលា ពាក់ព័ន្ធប្រាក់កម្ចីពីធនាគារឯកជន និងគ្រឹះស្ថានមីក្រូហិរញ្ញវត្ថុ។
កាលពីថ្ងៃទី១ ខែមករា ធនាគារជាតិ នៃកម្ពុជា បានចេញសេចក្ដីប្រកាស ដោយអះអាងថា ធនាគារជាតិ នៃកម្ពុជា ពិតជាមានភាពយឺតយ៉ាវ ក្នុងការជួយស្វែងរកដំណោះស្រាយរៀបចំឥណទានទ្បើងវិញ ដល់អតិថិជនជាយោធិន និងពលរដ្ឋដែលរងផលប៉ះពាល់ពីជម្លោះព្រំដែនកម្ពុជា-ថៃ ដោយសារតែមានសំណើរៀបចំឥណទានទ្បើងវិញចំនួនច្រើន និងត្រូវរៀបចំឲ្យទៅកងទ័ពជួរមុខ ជាមុនសិន។
ជុំវិញបញ្ហានេះ ប្រធានអង្គការប្រជាធិបតេយ្យខ្មែរដែលមានមូលដ្ឋាននៅប្រទេសអូស្ត្រាលី លោក ស៊ឹង សែនករុណា ប្រាប់ទូរទស្សន៍អាស៊ីសេរី នៅថ្ងៃទី២ ខែមករាថា រដ្ឋាភិបាល និងធនាគារជាតិ នៃកម្ពុជា គួរមានគណៈកម្មការច្បាស់លាស់មួយ ដើម្បីពន្លឿនការដោះស្រាយបញ្ហានេះឲ្យបានឆាប់។ លើសពីនោះ លោកថា ក្រៅពីពន្យារពេលសងប្រាក់ និងលុបបំណុលធនាគាររបស់ពួកគាត់ រដ្ឋាភិបាលត្រូវតែដំឡើងប្រាក់បៀវត្សដល់កងទ័ពឲ្យមានជីវភាពសមរម្យ និងជួយរកការងារឲ្យពលរដ្ឋភៀសសឹក អាចចិញ្ចឹមជីវិតទៅមុខបន្តទៀត។
លោក ស៊ឹង សែនករុណា៖ «បើមិនដូច្នោះទេ ទោះបីក្នុងកាលៈទេសៈនេះ យើងគ្រាន់តែផ្អាកបណ្ដោះអាសន្ន ក្នុងការមិនឲ្យគាត់ទូទាត់សងនូវបំណុលនឹងក៏ដោយ ប៉ុន្តែពេលទៅខាងមុខ ប្រសិនបើពួកគាត់មិនមានមុខរបរ មិនមានការងារធ្វើប្រាក់ចំណូលច្បាស់លាស់ នៅតែជួបការលំបាកក្នុងការទូទាត់ទៅខាងឥណទាន ទៅខាងធនាគារដដែលទេ អ៊ីចឹងគប្បីធ្វើយ៉ាងម៉េច បង្កើនជីវភាពរបស់ប្រជាពលរដ្ឋជនភៀសសឹកឲ្យកាត់តែល្អប្រសើរ»។
រីឯអ្នកនាំពាក្យគណបក្សប្រជាធិបតេយ្យជឿនលឿន និងជាអ្នកវិភាគ លោក ប៉ោ មករា លើកឡើងថា ដើម្បីឲ្យការងារ និងសេចក្ដីណែនាំរបស់ធនាគារជាតិ នៃកម្ពុជាមានប្រសិទ្ធភាព ធនាគារជាតិត្រូវតែបញ្ជូនក្រុមការងារចុះទៅសហការជាមួយអាជ្ញាធរមូលដ្ឋាន និងជជែកជាមួយធនាគារ ឬគ្រឹះស្ថានមីក្រូហិរញ្ញវត្ថុ នៅតាមតំបន់ ធ្វើយ៉ាងណាកុំឲ្យធនាគារទាំងនោះ ដាក់សម្ពាធទៅលើគ្រួសារកងទ័ព និងពលរដ្ឋភៀសសឹក។
លោក ប៉ោ មករា៖ «ដើម្បីការងារមានប្រសិទ្ធភាព ធនាគារជាតិ នៃកម្ពុជា គួរតែមានភ្នាក់ងារ ក៏ដូចជាអ្នកចាំទទួលពាក្យ និងអ្នកចាំសម្របសម្រួលក្នុងការទទួល ពាក្យស្នើសុំរបស់ពួកគាត់ ដូចយើងដឹងស្រាប់ហើយ ពួកគាត់កំពុងតែនៅកន្លែងដែលមានបញ្ហាពាក់ព័ន្ធ បញ្ហាទូរស័ព្ទវាអាចមិនមានសេវា ក្នុងការទំនាក់ទំនងមក ខ្វះខាតបច្ចេកទេសទំនាក់ទំនង ដូច្នេះពួកគាត់ពិបាកក្នុងស្វែងរក»។
ទាក់ទិននឹងបញ្ហានេះ នាយកទំនាក់ទំនងសាធារណៈ សមាគមធនាគារនៅកម្ពុជា លោក សុខ ចាន់ ឲ្យដឹងថា គ្រឹះស្ថានធនាគារកំពុងផ្តល់អាទិភាពសម្របសម្រួលសំណើដល់យោធិនជួរមុខ ចំណែកការរៀបចំឥណទានទ្បើងវិញរបស់ពលរដ្ឋភៀសសឹកមានភាពយឺតយ៉ាវ ដោយខ្វះបុគ្គលិកនៅតាមសាខាគ្រឹះស្ថានធនាគារ។
លោក សុខ ចាន់៖ «ខ្ញុំសូមជម្រាបជូនថា ការងារទាំងអស់នេះគឺយើងធ្វើទន្ទឹមគ្នាទេ គ្រាន់តែយើងផ្ដល់អាទិភាពទៅដល់យោធិនជួរមុខ ហើយបានយើងចាប់ផ្ដើមធ្វើទៅដល់បងប្អូនរបស់យើងភៀសសឹកបន្តបន្ទាប់»។
កាលពីថ្ងៃទី១០ ខែធ្នូ ធនាគារជាតិនៃកម្ពុជា បានចេញសេចក្ដីណែនាំ តម្រូវឲ្យធនាគារ ឬគ្រឹះស្ថានមីក្រូហិរញ្ញវត្ថុ លុបចោលបំណុលរបស់យោធិនពិការ ដែលមានចំនួនរហូតដល់ ១០ (ដប់) លានរៀល និងយោធិនដែលបានពលីនៅសមរភូមិមុខ ដែលមានចំនួនរហូតដល់ ៨០ (ប៉ែតសិប) លានរៀល។ លើកពីនោះ ក៏ត្រូវជួយសម្រាលបន្ទុកដល់ យោធិនសមរភូមិប្រយុទ្ធ និងប្រជាពលរដ្ឋដែលរងផលប៉ះពាល់ពីជម្លោះព្រំដែនកម្ពុជា-ថៃ ដោយពន្យារពេលបង់ប្រាក់ទៅធនាគារ ឬគ្រឹះស្ថានមីក្រូហិរញ្ញវត្ថុ ចាប់ពីខែធ្នូឆ្នាំ២០២៥ រហូតដល់ ថ្ងៃទី៣១ ខែឧសភា ឆ្នាំ២០២៦។
ទោះជាបែបនេះក្ដី កន្លងទៅថ្មីៗនេះ មានបុគ្គលិកធនាគារ ឬគ្រឹះស្ថានមីក្រូហិរញ្ញវត្ថុមួយចំនួន មិនបានស្ដាប់តាមការណែនាំរបស់ធនាគារជាតិ នៃកម្ពុជានោះទេ ដោយនៅតែបង្ខិតបង្ខំឲ្យអតិថិជនជាកងទ័ពជួរមុខ និងពលរដ្ឋភៀសសឹក សងប្រាក់ត្រឡប់ទៅធនាគារវិញឲ្យបានទៀងទាត់ ខណៈពួកគាត់កំពុងតែរងគ្រោះពីការឈ្លានពានពីសំណាក់យោធាថៃ និងអ្នកខ្លះត្រូវបាត់បង់ផ្ទះសម្បែងថែមទៀត។
សង្គមស៊ីវិល និងអ្នកវិភាគ អះអាងទៀតថា ប្រសិនបើរដ្ឋាភិបាលមិនបានគិតគូរអំពីជីវភាព និងដោះស្រាយបញ្ហាបំណុលរបស់កងទ័ពជួរមុខ និងពលរដ្ឋភៀសសឹក ឲ្យបានគ្រប់ជ្រុងជ្រោយនោះទេ កងទ័ព និងពលរដ្ឋទាំងនោះ បន្តរងសម្ពាធ ហើយកងទ័ពអាចបាក់ទឹកចិត្តបាត់បង់ស្មារតីប្រយុទ្ធការពារបូរណភាពទឹកដីផងដែរ៕
