អ្នកឃ្លាំមើលលើកឡើងថា ប្រទេសកម្ពុជា រដ្ឋាភិបាលរបស់លោក ហ៊ុន ម៉ាណែត បានបរាជ័យ ក្នុងការដោះស្រាយ បញ្ហាជាតិជាច្រើន ក្នុងឆ្នាំ២០២៥ ដូចជាបញ្ហាអំពើពុករលួយ ពលរដ្ឋ គ្មានការធ្វើសមរម្យ ឧក្រិដ្ឋកម្ម អនឡាញ (Scam Online) ការរំលោភសិទ្ធិមនុស្ស ការធ្លាក់ចុះនៃប្រព័ន្ធប្រជាធិបតេយ្យ ការបែកបាក់ផ្ទៃជាតិ និងអសមត្ថភាពក្នុងការការពារទឹកដីពីការឈ្លានពានរបស់យោធាថៃ។
អ្នកឃ្លាំមើលកត់សម្គាល់ឃើញថា ចាប់តាំងពី លោក ហ៊ុន ម៉ាណែត ឡើងកាន់តំណែងជានាយករដ្ឋមន្ត្រី បន្តតំណែង ពីឪពុក គឺប្រធានព្រឹទ្ធសភា លោក ហ៊ុន សែន ជិត២ឆ្នាំមកនេះ លោកហាក់ពុំសូវមានស្នាដៃ អ្វីជាដុំកំភួន សម្រាប់ប្រទេសជាតិនោះទេ។ អ្នកឃ្លាំលើបញ្ហាសង្គម និងនយោបាយ លើកឡើងថា ក្នុងឆ្នាំ២០២៥នេះ មុខមាត់ប្រទេសកម្ពុជាកាន់តែមិនសូវល្អ ជុំវិញបញ្ហាឧក្រិដ្ឋកម្មអនឡាញ បញ្ហាអំពើពុករលួយ ចាក់ស្រេះ ការរំលោភសិទ្ធិមនុស្ស ជាពិសេសនោះ លោក ហ៊ុន ម៉ាណែត អសមត្ថភាព ដោះស្រាយបញ្ហាពលរដ្ឋអត់ការងារ ទើបធ្វើឱ្យពួកគាត់ កាន់តែធ្លាក់ក្នុងបំណុលវ័ណ្ឌក អសមត្ថភាពក្នុងការការពារទឹកដីពីការឈ្លានពានរបស់យោធាថៃ។
អ្នកឃ្លាំមើលបញ្ហាសង្គម និងនយោបាយ លោក ម៉ែន ណាត ប្រាប់អាស៊ីសេរី នៅថ្ងៃទី១ មករា ថា ក្នុងឆ្នាំ២០២៥កន្លងមកនេះ លោក ហ៊ុន ម៉ាណែត ពុំបានកសាងស្នាដៃអ្វីជាដុំកំភួន សម្រាប់ប្រទេស ជាតិនោះទេ ក្រៅតែពីសមិទ្ធផលបន្តិចបន្តួច ផ្នែកហេដ្ឋារចនាសម្ព័ន្ធ ផ្លូវ ថ្នល់ សាលារៀន និងការកសាង ព្រលានយន្តហោះអន្តរជាតិថ្មី «តេជោ» ស្ថិតនៅស្រុកកណ្ដាលស្ទឹង ខេត្តកណ្ដាល ដែលជាគម្រោងសាងសង់ សល់តាំងពីលោក ហ៊ុន សែន នៅជានាយករដ្ឋមន្ត្រី។
ទន្ទឹមគ្នានោះ លោក ម៉ែន ណាត ថា មានរឿងជាច្រើនដែល លោក ហ៊ុន ម៉ាណែត សន្យាហើយធ្វើមិនបាន ដូចជា ការកាត់បន្ថយអំពើពុករលួយ និងការលុបបំបាត់ឧក្រិដ្ឋកម្មអនឡាញ ខណៈដែលលោក ហ៊ុន ម៉ាណែត ធ្វើជាប្រធានគណៈកម្មាធិការ ប្រយុទ្ធប្រឆាំងឧក្រិដ្ឋកម្មអនឡាញ ប៉ុន្តែទីប្រឹក្សាផ្ទាល់របស់លោក ត្រូវបានស្ថាប័នអន្តរជាតិរកឃើញថា ជាមេឧក្រិដ្ឋជន ឆបោកលំដាប់អន្តរជាតិ នោះគឺ លោក ចេន ហ្ស៊ី។ ជាមួយគ្នានោះលោកថា លោក ហ៊ុន ម៉ាណែត ក៏បន្តប្រើប្រាស់ប្រព័ន្ធតុលាការចាប់ខ្លួនអ្នកនយោបាយបក្សប្រឆាំង សកម្មជនបរិស្ថាន និងសកម្មជនសង្គមជាច្រើន ដាក់ពន្ធនាគារ ដោយអយុត្តិធម៌ដែលធ្វើឱ្យប្រទេសជាតិ មានការបែកបាក់ផ្ទៃក្នុងកាន់តែខ្លាំង។
លោក ម៉ែន ណាត៖ «ឧបសគ្គធំជាងគេគឺអំពើពុករលួយ។ អំពើពុករលួយវាស៊ីរូងខាងក្នុងទាំងការអភិវឌ្ឍជាតិ ទាំងទេសចរណ៍ ទាំងការវិនិយោគ ទាំងតុលាការ ទាំងការអនុវត្តច្បាប់ ទាំងវិស័យផ្សេងៗ។ ពុករលួយនេះវាធំពេក បក្ខពួកនិយមនេះវាធំពេក»។
គិតត្រឹមថ្ងៃទី១ មករា អង្គការលីកាដូ បានកត់សម្គាល់ឃើញថា អ្នកនយោបាយអ្នកការពារសិទ្ធិមនុស្ស សកម្មជនដីធ្លី សហជីព អ្នកសារព័ត៌មាន និងអ្នកប្រើប្រាស់បណ្ដាញសង្គម មានចំនួនជិត១០០ (៩១)នាក់ហើយដែលត្រូវបានចាប់ឃុំខ្លួនដាក់ក្នុងពន្ធនាគារ ដោយសារតែការអនុវត្តសិទ្ធិរបស់ខ្លួនស្របច្បាប់។
លោក ម៉ែន ណាត លើកឡើងបន្ថែមថា បញ្ហាមួយចំនួន ដែលលោក ហ៊ុន ម៉ាណែត ពុំបានដោះស្រាយឱ្យមានប្រសិទ្ធភាព និងទាន់ពេលវេលាទៀតនោះ គឺបញ្ហាពលរដ្ឋពិបាករកការងារធ្វើបានទៀងទាត់ និងមានប្រាក់ខែសមរម្យ។
លោក ម៉ែន ណាត៖ «គឺវាពាក់ព័ន្ធនឹងឪពុកគាត់ជាអ្នកបញ្ជា បញ្ញាទាំងអស់នេះ។ នាយករដ្ឋមន្ត្រី ក៏លោក ហ៊ុន សែន បញ្ជា។ បញ្ហាព្រះមហាក្សត្រ ក៏លោក ហ៊ុន សែន បញ្ជា។ និយាយរួមទៅ បញ្ហារួមរបស់ជាតិ គឺ លោក ហ៊ុន សែន អ្នកបញ្ជាទាំងអស់ ហើយលោក ហ៊ុន សែន ជាមនុស្សជំពាក់ជំពិន រឿងអាស្រូវច្រើនណាស់បញ្ហាជាតិហ្នឹង។ អ៊ីចឹងហើយ ពួកមន្ត្រីរដ្ឋាភិបាល លោក ហ៊ុន ម៉ាណែត នឹងចង់ធ្វើស្អីខ្លួនឯងដោយម្ចាស់ការអត់បាន»។
អង្គការឃ្លាំមើលសិទ្ធិមនុស្សអន្តរជាតិ (Human Rights Watch) កាលពីថ្ងៃទី២៥ ខែវិច្ឆិកា បានលើកឡើងថា រដ្ឋាភិបាលកម្ពុជា បានបរាជ័យ ក្នុងការធានានូវកម្រិតជីវភាពសមរម្យ ការអប់រំ និងការថែទាំសុខភាព ចំពោះពលករ និងប្រជាពលរដ្ឋ ទើបធ្វើឱ្យពួកគាត់កាន់តែជំពាក់បំណុលធនាគារ និងមីក្រូហិរញ្ញវត្ថុ។ ទន្ទឹមគ្នានោះ ពលករខ្មែររាប់សិបម៉ឺននាក់ ដែលវិលត្រឡប់ពីប្រទេសថៃវិញ ដោយសារជម្លោះព្រំដែន ពិបាករកការងារធ្វើមានប្រាក់ចំណូលសមរម្យ។
បន្ថែមពីនោះ គេសង្កេតឃើញថា រដ្ឋាភិបាល លោក ហ៊ុន ម៉ាណែត ក៏បានបរាជ័យ ក្នុងដោះស្រាយ បញ្ហាអយុត្តិធម៌ សង្គមជាច្រើនទៀត ដូចជាករណីមន្ត្រីរដ្ឋាភិបាល និងក្រុមឧកញ៉ាដែលមានទំនាក់ទំនងជាមួយគ្រួសាររបស់លោក ហ៊ុន ម៉ាណែត ផ្ទាល់ រួមមាន លោក ឡេង ណាវ៉ាត្រា អ្នកស្រី ឡេង ចាន់ណា និងលោក ជា សារ៉ន ជាដើម ដែលរកស៊ីឆបោកប្រាក់រាប់លានពីប្រជាពលរដ្ឋស្ទើរទូទាំងប្រទេសនោះ ក៏មិនទាន់បានផ្ដល់ដំណោះស្រាយអ្វីដល់ពលរដ្ឋដែរ។
ចំណែក អ្នកស្រាវជ្រាវការអភិវឌ្ឍន៍សង្គម បណ្ឌិត មាស នី សរសេរថា បញ្ហាដែលរដ្ឋាភិបាល ពុំបានដោះស្រាយ ហើយ គួរតែ ដោះស្រាយជាបន្ទាន់នោះ ការធ្វើទំនើបកម្មយោធាឱ្យបានត្រឹមត្រូវ និងលុប បំបាត់អំពើពុករលួយផ្នែកយោធា។ ជាមួយគ្នានោះលោកថា ទាំង អ្នកនយោបាយ និងពលរដ្ឋ គួរតែចាប់ផ្ដើមឈរដោយខ្លួនឯង ពឹងលើសមត្ថភាពខ្លួនឯង និងរៀបចំប្រទេសជាតិឲ្យខ្លាំង តាមរយៈការពង្រឹងការឯកភាពជាតិ ធ្វើទំនើបកម្ម យោធាឡើងវិញ និងរស់នៅប្រកបដោយយុត្តិធម៌ ដោយអនុវត្តន៍ នូវពាក្យថា «បើខ្មែរមិនខ្លាំង នឹងមិនអាចរស់នៅ ចន្លោះក្រពើ និងខ្លា បានទេនៅពេលអនាគត»។
ទាក់ទិនបញ្ហានេះ អ្នកនាំពាក្យគណបក្ស ប្រជាជនកម្ពុជា លោក ជា ធី រិទ្ធ លើកឡើងថា មកទល់ពេលនេះរដ្ឋាភិបាលបានប្រឹងប្រែងអភិវឌ្ឍន៍ជាតិ ដោះស្រាយបញ្ហាជាច្រើន និងការពារទឹកដីគ្រប់បែបយ៉ាង មិនដែលបន្ធូរបន្ថយម្ដងឡើង។
លោក ជា ធី រិទ្ធ៖ «ការលើកឡើងដែលគ្មានទឡ្ហីករណ៍ ការលើកឡើងដែលបរិហារ ចោទប្រកាន់ដើម្បីបំពេញមហិច្ឆតាតាមនិន្នាការនយោបាយជ្រុលនិយមរបស់ខ្លួននោះគឺ វាអត់បានអីជាចំណេញជាប្រយោជន៍ដល់ប្រទេសជាតិទេ។ អ្វីដែលយើងត្រូវធ្វើគឺ មកដល់ពេលនេះ យើងបានខិតខំប្រឹងប្រែងការពារ បូរណភាពទឹកដី។ យើងខិតខំប្រឹងប្រែងអភិវឌ្ឍន៍ប្រទេសជាតិ សេដ្ឋកិច្ចប្រជាជន គ្រប់បែបយ៉ាងជាជំហានៗ។ យើងអត់មានពេលទៅចាប់អារម្មណ៍ទៅការបរិហារអត់ប្រយោជន៍ អ្វីដែលយើងត្រូវធ្វើគឺដោះស្រាយបញ្ហា»។
ទោះជាយ៉ាងណា អ្នកនាំពាក្យគណបក្សប្រជាធិបតេយ្យជឿនលឿន និងជាអ្នកវិភាគ លោក ប៉ោ មករា លើកឡើងថា បញ្ហាជាច្រើន ដែលរដ្ឋាភិបាល បរាជ័យក្នុងការដោះស្រាយនៅក្នុង២០២៥នេះ គឺបណ្ដាលមកពីមន្ត្រីនយោបាយ និងអ្នកធ្វើការនៅតាមក្រសួងនីមួយៗ គឺច្រើនតែចំនួនមនុស្ស ចំណែកការងារពុំមានប្រសិទ្ធភាព។ លោកថា រដ្ឋាភិបាលត្រូវតែហ៊ានវះកាត់មន្ត្រីអសមត្ថភាព និងជនពុករលួយនិយមចេញឱ្យអស់ជាបន្ទាន់ បើពុំដូច្នោះទេ ពលរដ្ឋ និងប្រទេសជាតិមួយនេះ នឹងបន្តរងគ្រោះ។
លោក ប៉ោ មករា៖ «អ៊ីចឹងដើម្បីឱ្យមានប្រសិទ្ធភាពលើការងារក្នុងការអភិវឌ្ឍនេះយើងគួរតែកាត់បន្ថយចំនួនក្រសួង ចំនួនបុគ្គលិករដ្ឋមួយចំនួន ឬក៏មន្ត្រីនយោបាយមួយចំនួនទៅ ស្កេះស្កះនៅក្រសួងមួយចំនួន ព្រោះ បើធ្វើបែបនេះ ពេលខ្លះ វាអាចធ្វើឱ្យមានប្រសិទ្ធភាពខ្ពស់ក្នុងការដោះស្រាយបញ្ហា»។
អ្នកឃ្លាំមើល និងពលរដ្ឋសង្ឃឹមថា នៅក្នុងឆ្នាំ២០២៦ នេះ នាយករដ្ឋមន្ត្រី លោក ហ៊ុន ម៉ាណែត នឹងកែខ្លួន ហើយភ្ញាក់រលឹកឡើង ក្នុងការស្ដារការប្រព័ន្ធប្រជាធិបតេយ្យ ការគោរពសិទ្ធិមនុស្ស មាន ការបង្រួបបង្រួមជាតិ និងរៀបចំឱ្យមានតុលាការឯករាជ្យ ពិតប្រាកដ។ ជាមួយគ្នានោះ ពលរដ្ឋ ក៏ចង់ឃើញឱ្យមានការអភិវឌ្ឍទាំងផ្នែកសេដ្ឋកិច្ច និង យោធាឱ្យបានខ្លាំងជាងមុន។ ពួកគាត់បារម្ភថា ប្រសិនបើ លោក ហ៊ុន ម៉ាណែត ដឹកនាំប្រទេស ដូចលំនាំបច្ចុប្បន្ននេះ ប្រទេសជាតិ នឹងអន្តរាយ ខណៈប្រទេសជិតខាង គេកាន់តែបន្តមើលងាយ និងឈ្លានពាន ទឹកដី តាមអំពើចិត្ត៕
