មន្ត្រីគណបក្សប្រឆាំងលើកឡើងថា កម្ពុជាអាចនឹងបាត់បង់ទឹកដី នៅតំបន់ព្រំដែនទៅកាន់ភាគីថៃជាអចិន្ត្រៃយ៍ ប្រសិនបើរដ្ឋាភិបាលកម្ពុជា នៅតែប្រើវោហារសាស្ត្រការពារទឹកដី ខណៈភាគីថៃ បានពន្លឿនការកសាងហេដ្ឋារចនាសម្ព័ន្ធ និងបើកឱ្យប្រជាពលរដ្ឋមកទស្សនានៅតំបន់ដែលយោធាថៃ វាយដណ្ដើមបានពីកម្ពុជា។
ក្រោយការចុះកិច្ចព្រមព្រៀងបទឈប់បាញ់បណ្ដោះអាសន្ន ស្ថានការណ៍នៅតាមព្រំដែនកម្ពុជា ថៃ មានភាពខុសគ្នាដាច់ស្រឡះ ដោយនៅខាងកម្ពុជា មានប្រជាពលរដ្ឋភៀសសឹងរាប់ពាន់គ្រួសារ មិនអាចវិលត្រឡប់ទៅផ្ទះវិញបាន និងរស់នៅក្នុងតង់កៅស៊ូដោយក្ដីសោកសៅ ខណៈនៅខាងភាគីថៃបានអភិវឌ្ឍតំបន់សមរភូមិ ដែលដណ្ដើមបានពីកម្ពុជា ស្ទើរតែក្លាយទៅជាតំបន់រមណីយដ្ឋានទៅហើយ។
នៅតំបន់អានសេះ ខេត្តព្រះវិហារ សំឡេងគ្រឿងចក្របានលាន់ឮរាល់ថ្ងៃ ដោយព្រះសង្ឃ យាយជី តាជី និងប្រជាពលរដ្ឋថៃ ទាំងចាស់ទាំងក្មេង បានចាក់ផ្លូវបេតុងទៅកាន់កន្លែងតម្កល់រូបព្រះពុទ្ធបដិមា និងសាងសង់សំណង់ជាច្រើនទៀត នៅរង្វង់មូលតាអ៊ំ ដែលកងទ័ពថៃបានកម្ទេចចោល។
ចំណែកនៅកន្លែងរូបសំណាកព្រះនារាយណ៍ ជិតកាស៊ីណូអានសេះ ដែលយោធាថៃបានផ្ដួលចោលនោះវិញ ពួកគេបានស្ទូចព្រះពុទ្ធបដិមា យកមកតម្កល់នៅលើគ្រឹះរូបសំណាកព្រះនារាយណ៍ ដែលបានដួលផ្កាប់មុខនៅលើដី។ ក្រៅពីនេះ នៅទីតាំងមួយចំនួនទៀត យោធាថៃបានធ្វើទីកន្លែងតាំងរូបទាហាន ដែលបានពលី ដើម្បីឱ្យប្រជាពលរដ្ឋរបស់ពួកគេមកទស្សនា និងគោរពវិញ្ញាណក្ខន្ធ។
រីឯនៅប្រាសាទតាក្របី វិញ កាន់តែមានភាពអធិកអធម ដោយប្រជាពលរដ្ឋថៃ បានសម្រុកមកទស្សនា និងធ្វើពិធីសាសនានៅទីនោះ។ ព្រះសង្ឃ ប្រជាពលរដ្ឋ និងយោធាថៃ នៅតែបន្តសាងសង់ផ្លូវបេតុង កាំជណ្ដើរ ព្រះពុទ្ធបដិមា និងរូបសំណាកផ្សេងទៀត ចំណែកតួប្រាសាទ យោធាថៃបានរាយបន្លាលួសបិទជិត ដោយរង់ចាំឱ្យក្រុមបច្ចេកទេសធ្វើការជួសជុលឡើងវិញ។
ចំណែកនៅតំបន់ប្រាសាទព្រះវិហារ យោធាថៃ បានសាងសង់លេណដ្ឋានរឹងមាំ និងដាក់តម្រៀបទូកុងទឺន័រ ក្បែរទីតាំងប្រាសាទ ទាំងសងខាង។
ទាក់ទិនរឿងនេះ ប្រមុខដឹកនាំស្ថាប័នអធិបតេយ្យជាតិ ព្រំដែន និងអន្តោប្រវេសន៍នៃរដ្ឋាភិបាលកម្ពុជាឯករាជ្យ ២៣ តុលា លោក អ៊ុំ សំអាន ប្រាប់ទូរទស្សន៍អាស៊ីសេរី នៅថ្ងៃទី១៩ ខែមករា ថា ប្រសិនបើរដ្ឋាភិបាលកម្ពុជា មិនប្រញាប់ប្ដឹងប្រទេសថៃ តាមរយៈយន្តការច្បាប់អន្តរជាតិនោះទេ នោះទឹកដីកម្ពុជា ដែលយោធាថៃដណ្ដើមបាន នឹងបាត់បង់ទៅកាន់ភាគីថៃជាអចិន្ត្រៃយ៍ ដោយថៃអាចនឹងប្រើប្រាស់គោលការណ៍ ឌឹ ហ្វាក់តូ (De facto recognition) ដែលជាគោលការណ៍ទទួលស្គាល់តាមព្រឹត្តិការណ៍ពិត ចំពោះរដ្ឋណាមួយ ដែលគ្រប់គ្រងជាក់ស្ដែង។
លោក អ៊ុំ សំអាន៖ «អ៊ីចឹងហើយបានជាខ្ញុំ ស្នើឱ្យលោក ហ៊ុន សែន និងលោក ហ៊ុន ម៉ាណែត ឱ្យចុះចេញពីតំណែង ដើម្បីបើកផ្លូវឱ្យមានរដ្ឋាភិបាលថ្មី មេដឹកនាំថ្មី ឱ្យគេដឹកនាំទៅ ដើម្បីការពារទឹកដីចំនួន ជាង ៤០ទីតាំង ដែលថៃកំពុងគ្រប់គ្រងត្រឡប់មកវិញ។ បើសិនជាអត់មានមេដឹកនាំថ្មីទេ ត្រកូលហ៊ុន ដឹកនាំទៅមុខទៀត ទឹកដីហ្នឹង ប្រាកដជា១០០ភាគរយ នឹងបាត់បង់ មិនអាចទាមទារមកវិញបានទេ»។
លោក អ៊ុំ សំអាន អះអាងថា ក្រោយសង្គ្រាមនៅតាមព្រំដែន កម្ពុជាបានបាត់បង់ទឹកដីចំនួន ៤១ទីតាំង ទៅកាន់ភាគីថៃ និងការពារបានចំនួន ១៣ទីតាំង។ លោកបន្តថា ទីតាំងដែលទាហានថៃកំពុងគ្រប់គ្រង គឺមានទំហំរាប់រយ រហូតដល់រាប់ពាន់គីឡូម៉ែត្រការ៉េ ហើយដែលទំហំនេះ គឺហួសពីផែនទីខ្នាត ១លើ ៥០ពាន់ (១/៥០ ០០០) ដែលភាគីថៃបានគូសជាឯកតោភាគីទៅទៀត។
ជុំវិញរឿងនេះ ក្រសួងការបរទេសកម្ពុជា បានចេញសេចក្ដីប្រកាសព័ត៌មានកាលពីយប់ថ្ងៃទី១៧ ខែមករា ដោយបានប្រឆាំងតវ៉ា ចំពោះសកម្មភាពរបស់យោធាថៃ ដែលនៅតែបន្តគ្រប់គ្រងលើបូរណភាពទឹកដីកម្ពុជា តាមបណ្ដោយព្រំដែន បានបណ្ដាលឱ្យខូចដល់កិច្ចខិតខំប្រឹងប្រែង ដើម្បីកាត់បន្ថយភាពតានតឹងរវាងប្រទេសទាំងពីរ និងរារាំងដល់ការវិលត្រឡប់ របស់ជនស៊ីវិលទៅកាន់ផ្ទះសម្បែង និងទ្រព្យសម្បត្តិរបស់ពួកគេដោយសុវត្ថិភាព និងសេចក្ដីថ្លៃថ្នូរ។
ទោះជាយ៉ាងនេះក្ដី អ្នកនាំពាក្យយោធាថៃ បានថ្លែងកាលពីថ្ងៃទី១៨ ខែមករា ដោយប្រតិកម្មចំពោះប្រព័ន្ធផ្សព្វផ្សាយបរទេស ដែលចុះផ្សាយអំពីការឈ្លានពានរបស់ថៃ មកលើបូរណភាពទឹកដីកម្ពុជា ដោយអះអាងថា តំបន់ដែលយោធាថៃដណ្ដើមបានពីកម្ពុជានោះ គឺស្ថិតនៅក្រោមអធិបតេយ្យភាពរបស់ថៃ និងចោទទៀតថា ត្រូវកម្ពុជាដណ្ដើមយក។ ទន្ទឹមគ្នានេះ យោធាថៃ បានព្រមានមកកាន់ប្រព័ន្ធផ្សព្វផ្សាយ និងស្ថាប័នរបស់កម្ពុជា ឱ្យបញ្ឈប់ការប្រើពាក្យ «ថៃឈ្លានពានកម្ពុជា» ទៀត ដោយយោធាថៃចោទថា ជាពាក្យញុះញង់ ដែលធ្វើឱ្យខូចដល់កិច្ចខិតខំប្រឹងប្រែង ដើម្បីបន្ថយភាពតានតឹង។
ទោះជាយ៉ាងណាមន្ត្រីបក្សប្រឆាំង លើកឡើងថា ការអះអាងរបស់យោធាថៃនេះ គឺជាការគំរាមឱ្យកម្ពុជាកែប្រែប្រវត្តិសាស្ត្រ ដើម្បីរួចផុតពីការប្រឈមមុខលើផ្លូវច្បាប់នៅពេលអនាគត។
មន្ត្រីបក្សប្រឆាំងថា ប្រសិនបើរដ្ឋាភិបាលកម្ពុជា នៅតែអែអង់ក្នុងការប្ដឹងថៃទៅកាន់តុលាការយុត្តិធម៌អន្តរជាតិ នោះអង្ករនឹងក្លាយជាបាយ ហើយមេដឹកនាំកម្ពុជា នឹងត្រូវមនុស្សជំនាន់ក្រោយចោទថា ជាជនក្បត់ជាតិ បានកាត់ទឹកដីឱ្យបរទេស ដើម្បីដូរយកសន្តិភាពក្លែងក្លាយ៕
