ក្រុមមេខ្លោងដែលមានឥទ្ធិពលមានងារជាឧកញ៉ា និងជាមន្ត្រីកំពូលៗក្នុងជួរបក្សកាន់អំណាចមួយចំនួនដែលរងការចោទប្រកាន់ពាក់ព័ន្ធនឹងឧក្រិដ្ឋកម្មឆបោកតាមអនឡាញនៅតែរស់នៅក្រៅសំណាញ់ច្បាប់ និងគ្មានវិធានការស៊ើបអង្កេតណាមួយលើពួកគេឡើយ។ អ្នកឃ្លាំមើលថា ក្រុមឧកញ៉ាខិលខូចទាំងនេះជាអ្នកចិញ្ចឹមសេដ្ឋកិច្ចគណបក្សប្រជាជនកម្ពុជាទើបគ្មាននរណាហ៊ានចាត់វិធានការច្បាប់លើពួកគេ។
បញ្ហាឧក្រិដ្ឋកម្មឆបោកតាមអនឡាញនៅកម្ពុជាបានឈានដល់កម្រិតមួយធ្ងន់ធ្ងរ ដោយបណ្ដាញឧក្រិដ្ឋជនបានពង្រីកឧស្សាហកម្មឆបោកតាមអនឡាញឱ្យរីកលូតលាស់យ៉ាងឆាប់រហ័សហើយជនរងគ្រោះដែលជាជនបរទេសចម្រុះជាតិសាសន៍នៅជុំវិញពិភពលោកត្រូវបានឧក្រិដ្ឋជនល្បួងបញ្ឆោត និងបង្ខាំងធ្វើទារុណកម្មក្នុងអគារដើម្បីបង្ខំឱ្យពួកគេធ្វើការខុសច្បាប់។
ប្រធានចលនាខ្មែរដើម្បីប្រជាធិបតេយ្យ (KMD) អ្នកស្រី មូរ សុខហួរ ប្រាប់ទូរទស្សន៍អាស៊ីសេរីនៅថ្ងៃទី១៦ ខែកុម្ភៈថា ក្រុមឧក្រិដ្ឋជនម៉ាហ្វីយ៉ា (Mafia) ចិនមួយចំនួនអាចនាំបណ្ដាញចូលពង្រីកឧក្រិដ្ឋកម្មជួញដូរមនុស្ស និងធ្វើមជ្ឈមណ្ឌលតាមអនឡាញនៅកម្ពុជាបាន គឺដោយសារតែមានរដ្ឋាភិបាលត្រកូល ហ៊ុន ជាអ្នកឃុបឃិត និងកាងការពារ។ អ្នកស្រីថា ប្រព័ន្ធដឹកនាំបែបគ្រួសារបក្ខពួកនិយម និងអំពើពុករលួយក៏បានផ្ដល់ឱកាសឱ្យក្រុមឧក្រិដ្ឋជនអាចពង្រីកបណ្ដាញឆបោកតាមអនឡាញនៅកម្ពុជាបានយ៉ាងឆាប់រហ័ស។
អ្នកស្រី មូរ សុខហួរ យល់ថា រដ្ឋាភិបាលត្រកូល ហ៊ុន មិនមែនកំពុងធ្វើយុទ្ធនាការបង្ក្រាបឧក្រិដ្ឋកម្មអនឡាញឡើយ ប៉ុន្តែកំពុងបង្ហាញសកម្មភាពបង្ក្រាបទីតាំង និងចាប់ខ្លួនជនល្មើសតូចតាច ដើម្បីបិទបាំង និងការពារឧក្រិដ្ឋជនដែលជាមេខ្លោងធំៗឱ្យបន្តរកស៊ីរបរខ្មៅងងឹតជួយគណបក្សប្រជាជនកម្ពុជា។
អ្នកស្រី មូរ សុខហួរ៖ «មេខ្លោងទាំងអស់នោះមិនត្រឹមតែធំទេ គឺជាមេខ្លោងដែលពាក់ព័ន្ធនៅក្នុងគ្រួសាររបស់ត្រកូល ហ៊ុន។ លោក ហ៊ុន តូ គឺជាអ្នកផ្ដល់ថវិកាប្រចាំខែ ប្រចាំឆ្នាំសម្រាប់គណបក្សប្រជាជនកម្ពុជាទៅហើយនោះ។ យើងឃើញ លី យ៉ុងផាត់។ លោក លី យ៉ុងផាត់ គឺជាប្រធានគណៈកម្មការហិរញ្ញវត្ថុនៃគណបក្សប្រជាជនកម្ពុជា ដូច្នេះរឿងដែលគណបក្សប្រជាជនកម្ពុជាមិនហ៊ានចាត់វិធានការឱ្យធ្ងន់ធ្ងរនោះដោយសារតែសេដ្ឋកិច្ចនៃគណបក្សប្រជាជនកម្ពុជានឹងដួលរលំ»។
ការលើកឡើងនេះគឺស្របពេលអាជ្ញាធរនៃរដ្ឋាភិបាលត្រកូល ហ៊ុន បន្តចុះបង្ក្រាបទីតាំងអគារអនឡាញជាបន្តបន្ទាប់ដោយអះអាងថា នឹងកម្ចាត់ឧក្រិដ្ឋកម្មនេះឱ្យអស់នៅក្នុងរយៈពេលដ៏ខ្លី។ ថ្វីត្បិតមានការចុះបង្ក្រាប និងចាប់ខ្លួនជនសង្ស័យជាជនបរទេសមួយចំនួន ប៉ុន្តែអាជ្ញាធររដ្ឋាភិបាលកម្ពុជាបានព្យាយាមបិទបាំងព័ត៌មានជាច្រើនជាពិសេសការបង្ហាញមុខជនសង្ស័យជាសាធារណៈ និងនីតិវិធីក្នុងដំណើរការផ្លូវច្បាប់ផ្ដន្ទាទោសលើអ្នកពាក់ព័ន្ធ។
លើសពីនេះទៀត ទោះបីអាជ្ញាធររដ្ឋាភិបាលត្រកូល ហ៊ុន អះអាងចំពោះការបិទទីតាំងនៃមជ្ឈមណ្ឌលឆបោកតាមអនឡាញជិត ២រយទីតាំង ក៏សមត្ថកិច្ចមិនបានបង្ហាញលទ្ធផលជាសាធារណៈ និងស៊ើបអង្កេតស៊ីជម្រៅ ដើម្បីវែកមុខរកម្ចាស់កម្មសិទ្ធិនៃអគារដែលជួលឱ្យក្រុមឧក្រិដ្ឋជនបង្ខាំងមនុស្សរាប់រយនាក់យកមកអនុវត្តទោសតាមផ្លូវច្បាប់ឡើយ។
ទូរទស្សន៍អាស៊ីសេរីមិនអាចទាក់ទងអ្នកនាំពាក្យរងនៃក្រសួងមហាផ្ទៃលោក ទូច សុឃៈ ដើម្បីសាកសួរជុំវិញរឿងនេះបានទេនៅថ្ងៃទី១៦ ខែកុម្ភៈ។
មកដល់ពេលនេះ មានអតីតអ្នកឧកញ៉ាតែម្នាក់ប៉ុណ្ណោះគឺលោក លី គួង ត្រូវបានចាប់ខ្លួន និងកំពុងជាប់ឃុំក្នុងពន្ធនាគារបន្ទាប់ពីសមត្ថកិច្ចបានចុះបង្ក្រាបអគារអនឡាញនៅក្នុងបរិវេណកាស៊ីណូនៅតំបន់ព្រែកចាកខេត្តកំពតដែលគេដឹងថា ជាកម្មសិទ្ធិរបស់លោក លី គួង ដែលធ្លាប់មានទំនាក់ទំនងជិតស្និទ្ធជាមួយក្រុមគ្រួសារត្រកូល ហ៊ុន។
ទោះជាយ៉ាងណា ក្រុមឧកញ៉ាមួយចំនួនទៀតដែលមានអគារកាស៊ីណូ និងអគារពាណិជ្ជកម្មជួល ឬបម្រើឱ្យក្រុមឧក្រិដ្ឋជនរកស៊ីឆបោកតាមអនឡាញជាច្រើនទៀតនៅតែរស់នៅក្រៅសំណាញ់ច្បាប់នៅឡើយ។ ជាក់ស្ដែងម្ចាស់កាស៊ីណូឋានសួគ៌បូកគោគឺលោក សុខ គង់ និងម្ចាស់កាស៊ីណូក្រោនគឺលោក កុក អាន ជាដើមបានរងការចោទប្រកាន់ពាក់ព័ន្ធនឹងឧក្រិដ្ឋកម្មឆបោកតាមអនឡាញជាយូរមកហើយពិសេសតាមរយៈការជួលអគារកាស៊ីណូឱ្យក្រុមឧក្រិដ្ឋជនសម្រាប់បង្ខាំងជនរងគ្រោះរាប់សិបនាក់។ ក្រៅពីនេះ ទីតាំងសំខាន់ៗផ្សេងទៀតដូចជា អគារក្នុងតំបន់អូរស្មាច់របស់សមាជិកព្រឹទ្ធសភាបក្សកាន់អំណាចគឺលោក លី យ៉ុងផាត់ ក៏ត្រូវបានពិភពលោកស្គាល់ថា ជាសម្បុកនៃក្រុមឧក្រិដ្ឋជនអនឡាញ ប៉ុន្តែគ្មានសមត្ថកិច្ចចុះបង្ក្រាប ស៊ើបអង្កេតដើម្បីរកអ្នកទទួលខុសត្រូវតាមផ្លូវច្បាប់ឡើយ។
ទន្ទឹមនឹងគ្មានចំណាត់ការលើអ្នកមានអំណាចដែលជាប់ពាក់ព័ន្ធនឹងឧក្រិដ្ឋកម្មឆបោកតាមអនឡាញក្រុមហ៊ុន ហួយវ័ន ផេ (Huione Pay) របស់ក្មួយបង្កើតប្រធានព្រឹទ្ធសភាលោក ហ៊ុន សែន និងត្រូវជាបងជីដូនមួយលោកនាយករដ្ឋមន្ត្រី ហ៊ុន ម៉ាណែត គឺលោក ហ៊ុន តូ ក៏នៅតែបន្តដំណើរការដោយសេរីក្នុងការលាងលុយកខ្វក់ឱ្យក្រុមឧក្រិដ្ឋជនដែលរកស៊ីឆបោកតាមអនឡាញ។ ក្រុមហ៊ុន ហួយវ័ន ផេ របស់លោក ហ៊ុន តូ ត្រូវបានអាមេរិកដាក់ទណ្ឌកម្មដោយសារតែរកឃើញថា បាន ជួយលាងលុយកខ្វក់ឱ្យឧក្រិដ្ឋជនអនឡាញក្នុងទំហំទឹកប្រាក់រាប់ពាន់លានដុល្លារក្នុងមួយឆ្នាំៗ។ ទោះបីជាក្រុមហ៊ុន ហួយវ័ន ផេ របស់លោក ហ៊ុន តូ ត្រូវបានដកអាជ្ញាប័ណ្ណហើយធនាគារជាតិកម្ពុជាអះអាងថា ការដកអាជ្ញាប័ណ្ណក្រុមហ៊ុននេះគឺដោយសារតែដំណើរការមិនស្របតាមច្បាប់ក្ដី ប៉ុន្តែមកដល់ពេលនេះ ក្រុមហ៊ុនលោក ហ៊ុន តូ នៅតែបន្តដំណើរការដោយគ្មានអាជ្ញាធររារាំង និងថែមទាំងបង្កកលុយរបស់អតិថិជនដែលមានក្នុងគណនីទៀតផង។
អ្នកស្រី មូរ សុខហួរ ព្រមានថា ឧក្រិដ្ឋកម្មឆបោកតាមអនឡាញនៅកម្ពុជានឹងបន្តរីករាលដាលកាន់តែខ្លាំងដោយសារតែនយោបាយដឹកនាំបែបគ្រួសារបក្ខពួកនិយម ការប្រព្រឹត្តអំពើពុករលួយ និងអំពើកាងការពារឧក្រិដ្ឋជនដោយរដ្ឋាភិបាលត្រកូល ហ៊ុន។ អ្នកស្រីបន្តថា ការណ៍ដែលប្រព័ន្ធច្បាប់ត្រូវបានអ្នកមានអំណាចជាន់ឈ្លីនោះបណ្ដាញឧក្រិដ្ឋជននឹងកាន់តែងាយស្រួលចូលកម្ពុជាកាន់តែច្រើនដែលមិនត្រឹមតែបំផ្លាញដល់សុវត្ថិភាពសង្គមប៉ុណ្ណោះទេ ថែមទាំងធ្វើឱ្យសេដ្ឋកិច្ចជាតិទទួលរងផលប៉ះពាល់ធ្ងន់ធ្ងរ ដោយសារបាត់បង់ទំនុកចិត្តពីវិនិយោគិន និងដៃគូអន្តរជាតិ៕
