សហគមន៍រងគ្រោះដីធ្លី និងសង្គមស៊ីវិល រិះគន់អាជ្ញាធរខេត្តព្រះវិហារដែលបានហាមឃាត់សហគមន៍ដីធ្លីមិនឱ្យចូលរួមការប្រារព្ធទិវាអន្តរជាតិនារី៨ មីនា កាលពីថ្ងៃទី១១ ខែមីនា ដោយលើកហេតុផលថា ថ្ងៃទី១១ ខែមីនា មិនមែនជាថ្ងៃប្រារព្ធទិវាអន្តរជាតិនារីនោះទេ។ សង្គមស៊ីវិល ចាត់ទុកការហាមឃាត់ នេះថាជាការ រំលោភបំពានសិទ្ធិជាមូលដ្ឋានរបស់ពលរដ្ឋ ដែលធានាដោយរដ្ឋធម្មនុញ្ញ និងច្បាប់អន្តរជាតិ។
អាជ្ញាធរចំនួន ៤ឃុំ នៅក្នុងស្រុករវៀង ខេត្តព្រះវិហារ កាលពីថ្ងៃទី១១ ខែមីនា បានហាមឃាត់សមាជិកសហគមន៍ដីធ្លីជាង ១០០នាក់ មិនឲ្យទៅចូលរួម ប្រារព្ធទិវាអន្តរជាតិនារី ដែលបានគ្រោងរៀបចំធ្វើរួមគ្នានៅក្នុងខេត្តនេះនោះទេ។
អង្គការការពារសិទ្ធិមនុស្សលីកាដូ បានផ្សាយនូវអត្ថបទខ្លីមួយ នៅថ្ងៃទី១២ ខែមីនា ថាសមាជិកសហគមន៍ដីធ្លី ដែលត្រូវអាជ្ញាធរហាមឃាត់ គឺសហគមន៍ សាមគ្គីរៀបរយប្រមាណ ៨០នាក់ និងសហគមន៍ត្រពាំងកកោះប្រមាណ ៦០នាក់។ លីកាដូថា នគរបាលប៉ុស្តិ៍ រដ្ឋបាលឃុំ បានហាមឃាត់សហគមន៍ទាំងពីរ មិនឲ្យធ្វើដំណើរទៅកាន់ទីតាំងប្រារព្ធទិវាអន្តរជាតិ នៅសហគមន៍ ដីធ្លីឫស្សី ស្រុក ក្នុងស្រុករវៀង ខេត្តព្រះវិហារ ដោយនគរបាលទាំងនោះ បានលើកហេតុផលថា ថ្ងៃទី១១ ខែមីនា មិនមែនជាថ្ងៃប្រារព្ធទិវាអន្តរជាតិនារីឡើយ។
ប្រធានគណៈកម្មការខេត្តរបស់សម្ព័ន្ធសហគមន៍កសិករកម្ពុជា លោក សុខ ខេងលី ដែលជាអ្នករៀបចំកម្មវិធីនេះ សោកស្ដាយចំពោះអាជ្ញាធរដែលរារាំងពលរដ្ឋ មិនឲ្យ មកចូលរួម សូម្បីកម្មវិធីទិវាអន្តរជាតិនារី។
លោក សុខ ខេងលី៖ «មើលទៅគាត់បំបាត់សិទ្ធិសេរីភាពរបស់ប្រជាពលរដ្ឋខ្មែរ នៅក្នុង ស្រុករវៀងហ្នឹង មិនឲ្យមានការជួបជុំគ្នា ក្នុងពិធីប្រារព្ធអីមួយអ៊ីចឹង។ ខ្ញុំមើលទៅ ប្រទេសយើងកាន់របបលទ្ធិប្រជាធិបតេយ្យ តែដូចជាមិនមែនប្រជាធិបតេយ្យម៉េច ទេ ខ្ញុំអត់យល់ហ្នឹងដែរ»។
ជាមួយគ្នានេះដែរ សមាជិកសហគមន៍ការពារដីធ្លីឫស្សីស្រុកលោក លំ សែ សោកស្ដាយដោយការរៀបចំកម្មវិធីនេះ ក្នុងគោលបំណងលើកកម្ពស់សិទ្ធិស្ត្រី និងទប់ស្កាត់កុំឲ្យមានអំពើហិង្សាលើស្ត្រីជាដើម។
លោក លំ សែ៖ «ខ្ញុំចង់ផ្ដាំផ្ញើទៅរដ្ឋាភិបាល សូមផ្ដាំផ្ញើអាជ្ញាធរទាំងអស់ កុំឲ្យមានការគំរាមកំហែងលើប្រជាពលរដ្ឋ កុំឲ្យបិទសិទ្ធិសេរីភាពប្រជាពលរដ្ឋ ពេលប្រជាពលរដ្ឋទៅណាមកណាកុំមហាឃាត់ ត្រូវតែបើកសិទ្ធិសេរីភាពឲ្យពួកគាត់មានសិទ្ធិស្មើៗគ្នា»។
ពលរដ្ឋរងគ្រោះដីធ្លីជាមួយក្រុមហ៊ុន គ្លូប៊ល ហ្គ្រីន (ខេមបូឌា) អេនើជីឌីវេឡុបមេន របស់លោក ទ្រី ដាលុច នៅស្រុករវៀង ខេត្តព្រះវិហារ ថ្លែងប្រាប់ទូរទស្សន៍អាស៊ីសេរី សុំមិនបញ្ចេញឈ្មោះថា អាជ្ញាធរមូលដ្ឋានបានដាក់រាយកម្លាំងរារាំងពលរដ្ឋមិនចូលរួមកម្មវិធីទិវាអន្តរជាតិនារី។ លោកស្រីថា ពួកគាត់ចូលរួមប្រារព្ធ ទិវានេះ ដើម្បីលើកទឹកចិត្តនិងជំរុញស្ត្រី ដែលកំពុងរងគ្រោះដីធ្លីឲ្យក្លាហាន និងរឹងមាំ ខណៈស្ត្រីនៅក្នុងសហគមន៍នីមួយៗ ត្រូវអាជ្ញាធរមូលដ្ឋានគំរាមកំហែងមិនឲ្យបញ្ចេញមតិ និងតវ៉ា ទោះបីពួកគាត់ត្រូវក្រុមហ៊ុនរំលោភយកដីធ្លីអស់ក៏ដោយ។
លោកស្រីបន្តថា អាជ្ញាធរមូលដ្ឋាន មិនបានជួយរកដំណោះស្រាយជូនពួកគាត់ ហើយបែរជាមកគាបសង្កត់ និងដាក់សម្ពាធលើពួកគាត់បន្ថែមទៀត។
ពលរដ្ឋថ្លែងលាក់ឈ្មោះ៖ «ខ្ញុំធ្វើកម្មវិធី ដើម្បីពង្រឹងប្រជាពលរដ្ឋខ្ញុំ កុំឲ្យទន់ខ្សោយ ឲ្យមានភាពតស៊ូទៅមុខទៀត ព្រោះទៅខាងណាក៏គេគំរាមកំហែងទាំងអស់អ៊ីចឹង ទៅរកដី កន្លែងណាធ្វើ បើខ្ញុំអ្នកស្រែចម្ការ។ ភ្លៀងធ្លាក់ដល់រដូវធ្វើស្រែចម្ការហើយ ខ្ញុំមិនដឹងបានអី ខ្ញុំនៅតែផ្ទះនេះ មិនដឹងធ្វើអី ទៅស៊ីឈ្នួលគេចោលកូនតូចតាចអ្នកណាមើល»។
ជុំវិញរឿងនេះ ទូរទស្សន៍អាស៊ីសេរី មិនអាចទាក់ទងអ្នកនាំពាក្យសាលាខេត្តព្រះវិហារ លោក ណុប វុធ្ធី បានទេ នៅថ្ងៃទី១២ ខែមីនា។
ក្រោយពីអាជ្ញាធររារាំង សហគមន៍សាមគ្គីរៀបរយ និងសហគមន៍ត្រពាំងកកោះ បាននាំគ្នាត្រឡប់ទៅផ្ទះវិញ ខណៈសហគមន៍ផ្សេងទៀតបានទៅចូលរួមកម្មវិធី ប្រារព្ធទិវាអន្តរជាតិនារីនេះ រៀបចំដោយសហគមន៍ដីធ្លីឫស្សីស្រុកក្នុងស្រុករវៀង ខេត្តព្រះវិហារ។ ក្នុងកម្មវិធីនោះ អ្នកចូលរួមបានអំពាវនាវឱ្យអាជ្ញាធរ គោរពដល់ សិទ្ធិស្ត្រី និងដោះស្រាយបញ្ហាដីធ្លី ព្រមទាំង ស្នើឲ្យប្រគល់ដីរបស់ពួកគាត់ត្រឡប់ មកវិញ ដែលពួកគាត់ជាជនរងគ្រោះដីធ្លី។
ជុំវិញរឿងនេះ នាយកទទួលបន្ទុកកិច្ចការទូទៅនៃអង្គការការពារសិទ្ធិ មនុស្សលីកាដូ (LICAHDO) លោក អំ សំអាត ចាត់ទុកមូលហេតុរបស់អាជ្ញាធរមូលដ្ឋាន ដែលមហាឃាត់ពលរដ្ឋមិនឲ្យប្រារព្ធទិវាអន្តរជាតិនារី មិនសមរម្យឡើយ។ លោកថា ការហាមឃាត់នេះ បង្ហាញពីការរំលោភបំពានសេរីភាពជាមូលដ្ឋានរបស់ប្រជាពលរដ្ឋ ដែលធានា ដោយរដ្ឋធម្មនុញ្ញ និងច្បាប់អន្តរជាតិ ខណៈការប្រារព្ធទិវានេះ មិនមែនតែពលរដ្ឋនោះទេ រដ្ឋាភិបាលក៏បានប្រារព្ធដែរ។ លោក អំ សំអាត សោកស្ដាយ ដែលអាជ្ញាធរមួយចំនួន មិនយល់អំពីសិទ្ធិជាមូលដ្ឋាន របស់ប្រជាពលរដ្ឋ។
លោក អំ សំអាត៖ «អាជ្ញាធរមួយចំនួន មិនយល់អំពីទិវានៃអន្តរជាតិនារីនេះ ហើយទៅធ្វើការហាមឃាត់ ពលរដ្ឋដែលជាសហគមន៍ដីធ្លី មិនឲ្យចូលរួមទៅវិញ។ វាជា រឿងមួយសោកស្ដាយ ហើយបង្ហាញអំពីការរំលោភបំពានទៅសេរីភាពជាមូលដ្ឋាន របស់ពលរដ្ឋទៅវិញ ដែលរឿងទាំងអស់នេះ វាមិនគួរកើតមានទេ ពីព្រោះយើងមើលថា អភិបាលស្រុកលោកចូលរួម អាជ្ញាធរផ្សេងៗចូលរួម ប៉ុន្តែអាជ្ញាធរមូលដ្ឋានមួយចំនួន បែរជាទៅហាមឃាត់ប្រជាពលរដ្ឋទៅវិញ ដែលទង្វើនេះ វាផ្ទុយ គ្នារវាងថ្នាក់លើ និងថ្នាក់ក្រោមទៅទៀត»។
លីកាដូឲ្យដឹងថា សហគមន៍ដីធ្លីឫស្សីស្រុកមានបញ្ហាជម្លោះដីធ្លីជាមួយក្រុមហ៊ុន គ្លូប៊ល ហ្គ្រីន (ខេមបូឌា) អេនើជី ឌីវេឡុបមេន ដែលប្រជាពលរដ្ឋបាន រាយការណ៍ ថាក្រុមហ៊ុននេះបានចាប់ផ្តើមឈូសឆាយដី និងដំណាំរបស់ពួកគាត់ក្នុងខែកញ្ញា ឆ្នាំ២០២៥។ ក្រុមហ៊ុននេះ ទទួលបានអាជ្ញាប័ណ្ណរុករករ៉ែមួយចំនួនក្នុងខេត្តព្រះវិហារ ជាក្រុមហ៊ុនដែលមានទំនាក់ទំនងជាមួយកូនរបស់លោក ទ្រី ភាព គឺ លោកស្រី ទ្រី ដាលីន លោក ទ្រី ដាលុច និង លោក ទ្រី ដាភ័ស្ត។ ប្រជាពលរដ្ឋមួយចំនួនរាយការណ៍ថា ក្រុមហ៊ុនបានផ្តល់ជម្រើសឱ្យទទួលយកនូវសំណងបន្តិចបន្តួច បន្ទាប់ពី ដំណាំរបស់ពួកគេត្រូវបានឈូសឆាយ និងគំរាមកំហែងមិនឱ្យពលរដ្ឋចូលទៅកាន់ដីចម្ការរបស់ពួកគេផងដែរ៕
