ជនភៀសសឹកដែលកំពុងរបស់នៅក្រោមតង់កៅស៊ូ ហាលភ្លៀង ហាលថ្ងៃ អស់ជាង២ខែ កំពុងជួបការលំបាកជាខ្លាំង ព្រោះ តែបញ្ហាអាកាសធាតុក្ដៅហួតហែង អនាម័យ និងកង្វះទឹកប្រើប្រាស់ប្រចាំថ្ងៃ ពុំបានគ្រប់គ្រាន់។ បន្ថែមពីលើនោះ ពួកគាត់ថា នៅពេលមេឃភ្លៀង រួមដោយខ្យល់កន្ត្រាក់ម្ដងៗ តង់កៅស៊ូ រាប់សិបខ្នង របស់ពួកគាត់ ត្រូវរសាត់អណ្ដែតតាមខ្យល់ និងលិចលង ក្នុងទឹក ដែលធ្វើឱ្យជនភៀសសឹក ពុំអាច ដេកពួនបាននោះឡើយ។
បើទោះជាអាជ្ញាធរ កំពុងតែ រៀបចំទីតាំងថ្មី ឱ្យជនភៀសសឹកត្រៀមទៅរស់នៅជំនួសឱ្យការរស់នៅក្រោម តង់កៅស៊ូក្ដី ជនភៀសសឹក នៅតែ មិនដឹងពេលណាបាន អាចទៅរស់នៅទីតាំងថ្មីនោះឡើយ។ សព្វថ្ងៃនេះ ពួកគាត់ កំពុងតែជួបការលំបាកសព្វបែបយ៉ាង ទាំងកង្វះអាហារហូបចុក ទឹកប្រើប្រាស់ អាកាសធាតុក្ដៅខ្លាំង ហើយពេលមានភ្លៀងត្រូវលិចទឹក និងបញ្ហាអនាម័យ ប្រឈមនឹងជំងឺឆ្លងជាច្រើន។
ជនភៀសសឹក មកពីតំបន់បឹងត្រកួន ស្រុកថ្មពួក ខេត្តបន្ទាយមានជ័យ កញ្ញា ល សុខប៉ាវ ប្រាប់ទូរទស្សន៍ អាស៊ីសេរីនៅថ្ងៃទី២៧ ខែកុម្ភៈ ថា នារដូវប្រាំងនេះ ជនភៀសសឹកពិបាក ក្នុងការរស់នៅ ព្រោះតែបញ្ហាអាកាសធាតុក្ដៅខ្លាំង ស្ទើរតែមិនអាចស្នាក់នៅបានពេលថ្ងៃៗ។ រឹតតែពិបាកជាងនេះទៀតនោះ កញ្ញាថា គឺ កង្វះទឹកប្រើប្រាស់ សម្រាប់ងូត និងចូលបន្ទប់ទឹក ទើបធ្វើឱ្យបន្ទប់ខ្លះឡើងកខ្វក់ដែលពោរពេញទៅដោយ មេរោគ។
កញ្ញា ល សុខប៉ាវ៖ «ឥឡូវសូម្បីតែទឹកងូតក៏សឹងតែអត់មានដែរ គឺមានដោយពេល ដូចជាយប់ម៉ោង២-៣យប់បានមាន។ អ្នកខ្លះ ដូចជាម៉ាក់ប៉ា ខ្ញុំគាត់ត្រូវទៅត្រងពីម៉ោង៣កន្លះអ៊ីចឹង។ បើយើងមិនទៅដងម៉ោងនោះទេ ដល់ពេលថ្ងៃអត់មានទឹកទេ។ គ្រប់គ្នាសុទ្ធតែទៅចាំត្រងយក។ មិនថា តែទឹកងូតទេ សូម្បីតែទឹកចាក់បន្ទប់ទឹកក៏សឹងតែមិនមានផង»។
បន្ថែមពីនោះ កញ្ញាថា កាលពីថ្មីៗនេះ នៅពេលមានភ្លៀង រួមដោយខ្យល់កន្ត្រាក់ផងនោះ ជនភៀសសឹក ពុំបានដេកពួននោះទេពេញមួយយប់ ព្រោះសម្ភារៈ និង ខោអាវស្លៀកពាក់ ត្រូវភ្លៀងសាចទទឹកអស់ និង ហូរចូលទៅដល់ក្នុងតង់ថែមទៀត។ ការជួបទុក្ខជាន់លើទុក្ខនេះ កញ្ញាតែងតែប្រើប្រាស់ បណ្ដាញសង្គម ដើម្បីនិយាយ ពីទុក្ខលំបាកប្រាប់ដល់សាធារណជន និងរំពឹងថា រដ្ឋាភិបាលលោក ហ៊ុន ម៉ាណែត នឹងបានដឹង ហើយជួយពន្លឿន រកដោះស្រាយបញ្ហាជនភៀសសឹក ឱ្យបានឆាប់។ ជាក់ស្ដែងនៅថ្ងៃទី២៦ ខែកុម្ភៈ កញ្ញាបានបង្ហោះវីដេអូ ត្អូញត្អែរពីទុក្ខលំបាក ហើយត្រូវជួបប្រទះបញ្ហាព្យុះភ្លៀង និងកង្វះខាត សព្វបែបយ៉ាង។
កញ្ញា ល សុខប៉ាវ៖ «សូម្បីតែកន្ទេលដេកយកទៅដេកក៏អត់មានដែរ។ វាមិនដឹងថានិយាយយ៉ាងម៉េច វាណែនអស់។ ទុក្ខជាន់លើទុក្ខបណ្ដោយនេះ។ អស់ដីអស់ផ្ទះហើយ ថា មកគេងនៅក្រោមតង់ហើយ ភ្លៀងព្យុះមក លិចតង់ដេកនោះទៀត»។
ទូរទស្សន៍អាស៊ីសេរីពុំអាចទាក់ទងអភិបាលខេត្តបន្ទាយមានជ័យ លោក អ៊ុំ រាត្រី ដើម្បីឆ្លើយតបជុំវិញរឿងនេះបានទេនៅថ្ងៃទី២៧ ខែកុម្ភៈ ដោយហៅទូរស័ព្ទចូលតែគ្មានអ្នកទទួល។ ចំណែក សមាជិកគណៈកម្មការទទួលខុសត្រូវ ក្នុងជំរុំជនភៀសសឹក ក្នុងតំបន់បឹងត្រកួន និងជាមេភូមិត្រពាំងសំរោង លោក រ៉ង សារឿត បានបដិសេធមិនឆ្លើយតប ជុំវិញរឿងនេះ។
អ្នកនាំពាក្យគណបក្ស ប្រជាធិបតេយ្យជឿនលឿន លោក ប៉ោ មករា យល់ឃើញថា ជារឿងគួរឱ្យសោកស្ដាយ ដែលមកដល់ពេលនេះហើយ ជនភៀសសឹក នៅតែត្អូញត្អែររឿងខ្វះខាតទឹកប្រើប្រាស់ និង បញ្ហាខ្យល់កន្ត្រាក់។ លោកថា បញ្ហានេះ អាជ្ញាធរពាក់ព័ន្ធ គួរតែរកដំណោះស្រាយ ជូនពលរដ្ឋឱ្យបានទាន់ពេលវេលា និងមានប្រសិទ្ធភាព។ លោកបន្តថា ការដោះស្រាយបញ្ហាជនភៀសសឹក អាជ្ញាធរត្រូវតែ ប្រយ័ត្នខ្ពស់ ចំពោះអំពើពុករលួយ ដើម្បីកុំឱ្យកើតមានឡើង បើពុំដូច្នោះទេ ដំណោះស្រាយសម្រាប់ ជនភៀសសឹក នឹងគ្មានប្រសិទ្ធភាពនោះទេ។
លោក ប៉ោ មករា៖ «បានជាខ្ញុំលើពីបញ្ហាអំពើពុករលួយ បក្ខពួកនិយម ពីព្រោះយើងដឹងហើយថា ទិដ្ឋភាពអ្វីដែលជារបាយការណ៍អន្តរជាតិមួយចំនួនថា កម្ពុជា នឹងមានអំពើពុករលួយកម្រិតខ្ពស់។ ដូច្នេះការដោះស្រាយបញ្ហាជាមួយជនភៀសសឹកប្រុងប្រយ័ត្ន លុបបំបាត់អំពើពុករលួយ ខ្ញុំគិតថា វានឹងផ្ដល់នូវដំណោះស្រាយដ៏សមស្រប ហើយនឹងមានប្រសិទ្ធភាព»។
គេសង្កេតឃើញថា ជិត១ខែ ចុងក្រោយនេះស្ថានភាពនៅតាមជំរំជនភៀសសឹក ហាក់មានការខ្វះខាតស្បៀងអាហារ និងទឹកប្រើប្រាស់ជាខ្លាំង ក៏ព្រោះតែ ពុំសូវមានសប្បុរសជន យកអំណោយ មកចែកចាយដូចមុន។ ជាមួយគ្នានោះ នៅថ្ងៃទី២៦ ខែកុម្ភៈ នៅតាមជំរំក៏រងការលិចទឹក ក្រោយពីភ្លៀងធ្លាក់១មេធំ។ ករណីនេះ កុមារ និងមនុស្សចាស់ប្រឈមកើតជំងឺឆ្លងតាមរយៈទឹកមិនល្អ ដែលហូរអណ្ដែត នាំមកជាមួយសំរាម និងកម្ទេចកំទី លាមកដ៏កខ្វក់ ក្រោយពីជនភៀសសឹក ខ្លះបានបន្ទោរបង់លាមក នៅតាមវាលស្រែក្បែរៗជំរំ ព្រោះតែបញ្ហាបន្ទប់ទឹកមានតិចពេក ហើយពុំសូវមានទឹកប្រើប្រាស់ថែមទៀត៕
