មន្ត្រីសិទ្ធិមនុស្សអំពាវនាវឱ្យអាជ្ញាធរបើកការស៊ើបអង្កេតឯករាជ្យ និងបង្ហាញព័ត៌មានឱ្យបានច្បាស់លាស់ករណីស្ត្រីជនជាតិចិនម្នាក់ដែលធ្លាក់ពីលើអគារនៅតំបន់កោះពេជ្រស្លាប់ ដើម្បីបញ្ចៀសការសង្ស័យ និងការព្រួយបារម្ភពីសាធារណជន។ អ្នកជំនាញសិទ្ធិមនុស្សលើកឡើងថា សំណុំរឿងនៃជនបរទេសដែលស្លាប់ដោយសារធ្លាក់ពីលើអគារនាពេលកន្លងមក សមត្ថកិច្ចហាក់មិនបានស្រាវជ្រាវស្វែងរកការពិត ដើម្បីផ្តល់យុត្តិធម៌ដល់ជនរងគ្រោះឡើយ។
មន្ត្រីសិទ្ធិមនុស្សលើកឡើងថា ការព្យាយាមបិទបាំងព័ត៌មានក្នុងសំណុំរឿងជនបរទេសដែលបានស្លាប់ដោយសារតែធ្លាក់ពីលើអគារគ្មានផលចំណេញអ្វីសម្រាប់កម្ពុជាឡើយ ផ្ទុយទៅវិញនឹងធ្វើឱ្យប៉ះពាល់ដល់ប្រព័ន្ធនីតិរដ្ឋ និងទំនុកចិត្តរបស់ភ្ញៀវទេសចរអន្តរជាតិដែលចូលមកកម្សាន្តនៅកម្ពុជា។
នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ (LICAHDO) លោក អំ សំអាត កត់សម្គាល់ថា ការស្លាប់នៃជនបរទេសជាច្រើនករណីដោយការធ្លាក់ពីលើអគារពាណិជ្ជកម្ម និងអគារដែលរងការចោទប្រកាន់ពាក់ព័ន្ធនឹងឧក្រិដ្ឋកម្មឆបោកតាមអនឡាញនាពេលកន្លងមកសមត្ថកិច្ចតែងធ្វើសេចក្ដីសន្និដ្ឋានថា ជាករណីអត្តឃាត ទាំងដែលមិនទាន់មានការស្រាវជ្រាវ និងស៊ើបអង្កេតស៊ីជម្រៅ។ ប្រការនេះ លោកថា មិនត្រឹមតែប៉ះពាល់ដល់ទំនុកចិត្តភ្ញៀវទេសចរជាតិ និងអន្តរជាតិប៉ុណ្ណោះទេ ថែមទាំងធ្វើឱ្យប៉ះពាល់ដល់សាច់ញាតិ និងជនរងគ្រោះក្នុងការទទួលបានយុត្តិធម៌ពិតប្រាកដ។
លោក អំ សំអាត ស្នើឱ្យអាជ្ញាធរស៊ើបអង្កេតករណីស្ត្រីជនជាតិចិនចុងក្រោយដែលស្លាប់ដោយសារធ្លាក់ពីលើអគារនៅរាជធានីភ្នំពេញ ដើម្បីលាងជម្រះមន្ទិលសង្ស័យ និងបញ្ចៀសការរិះគន់ពីសាធារណជន។
លោក អំ សំអាត៖ «សមត្ថកិច្ចយើងមើលទៅប្រឹងប្រែងធ្វើការ ក៏ប៉ុន្តែប្រសិនជាការបកស្រាយណាមួយដែលឆាប់រហ័សពេកវានាំឱ្យមានការមន្ទិលទៅវិញ អ៊ីចឹងត្រូវតែមានការស៊ើបអង្កេតឱ្យបានម៉ត់ចត់ ដើម្បីស្វែងរកការពិតលើរឿងហ្នឹងតើជារឿងអត្តឃាត ឬពាក់ព័ន្ធនឹងរឿងបទល្មើស។ បើបទល្មើសត្រូវចាត់វិធានការតាមផ្លូវច្បាប់ ប្រសិនជាអត្តឃាតក៏ត្រូវតែរកវិធីទប់ស្កាត់មានការធ្វើអត្តឃាតច្រើនតទៅទៀតផងដែរ»។
ការលើកឡើងរបស់មន្ត្រីសិទ្ធិមនុស្សរូបនេះ គឺបន្ទាប់ពីស្ត្រីជនជាតិចិនម្នាក់បានស្លាប់ភ្លាមៗនៅក្នុងថ្លុកឈាម ដោយសារតែធ្លាក់ពីលើអគារក្លឹបកម្សាន្តឈ្មោះ ពេជ្រលើមេឃ នៅតំបន់កោះពេជ្រស្ថិតក្នុងខណ្ឌចំការមន រាជធានីភ្នំពេញ កាលពីយប់ថ្ងៃទី២៣ ខែកុម្ភៈ។ សមត្ថកិច្ចមូលដ្ឋានបានបញ្ជាក់ពីករណីស្លាប់នេះ ប៉ុន្តែមិនទាន់បង្ហាញលទ្ធផលស៊ើបអង្កេតលម្អិតជាសាធារណៈនៅឡើយ។
តំបន់អគារដែលស្ត្រីជនជាតិចិនធ្លាក់ស្លាប់នោះគឺស្ថិតក្នុងតំបន់មជ្ឈមណ្ឌលកម្សាន្តក្នុងតំបន់កោះពេជ្រដែលមានរឿងរ៉ាវអាស្រូវ និងត្រូវបានរាយការណ៍ជាញឹកញាប់ថា ជាកន្លែងជួញដូរគ្រឿងញៀន និងបង្កប់អំពើពេស្យាចារ ដែលភាគច្រើនជនជាតិចិនប្រមូលផ្ដុំគ្នាជួបជុំស៊ីផឹកនាពេលរាត្រី។ ក្រៅពីនេះ អគារពាណិជ្ជកម្មមួយចំនួនទៀតស្ថិតក្នុងតំបន់កោះពេជ្រ កន្លងមកក៏ត្រូវបានសារព័ត៌មានអន្តរជាតិរាយការណ៍ថា ប្រើប្រាស់សម្រាប់ប្រតិបត្តិការឆបោកតាមអនឡាញផងដែរ។
ទាក់ទងនឹងរឿងនេះ អ្នកនាំពាក្យស្នងការដ្ឋាននគរបាលរាជធានីភ្នំពេញលោក សំ វិច្ឆិកា អះអាងប្រាប់ទូរទស្សន៍អាស៊ីសេរីតាមបណ្ដាញសង្គមតេឡេក្រាម (Telegram) យ៉ាងខ្លីថា ស្ត្រីជនជាតិចិននោះបានធ្វើអត្តឃាតដោយខ្លួនឯង នៅចំណុចអគារ ដាយមិន ស្កាយ (Diamond sky)។ ទោះជាយ៉ាងណា លោកមិនបានបង្ហាញពីលទ្ធផលស៊ើបអង្កេតលម្អិត និងមូលហេតុដែលស្ត្រីជនជាតិចិនរូបនោះសម្រេចធ្វើអត្តឃាតខ្លួនឯងនៅតំបន់អគារដែលជាមជ្ឈមណ្ឌលកន្លែងសប្បាយនោះទេ។
កន្លងមក ករណីនៃការស្លាប់ជនបរទេសដែលធ្លាក់ពីលើអគារខ្ពស់ៗនៅរាជធានីភ្នំពេញ និងនៅតាមបណ្ដាខេត្តដែលសម្បូរដោយរឿងរ៉ាវឧក្រិដ្ឋកម្មដូចជាខេត្តព្រះសីហនុ និងខេត្តស្វាយរៀង ជានិច្ចកាលត្រូវបានគេមើលឃើញថា សមត្ថកិច្ចបានបិទសំណុំរឿងស៊ើបអង្កេតយ៉ាងឆាប់រហ័ស និងមិនបានបង្ហាញព័ត៌មាននៃលទ្ធភាពស៊ើបអង្កេតឱ្យបានទូលំទូលាយនោះទេ។ ទោះជាយ៉ាងណា សាក្សីមួយចំនួនដែលធ្វើការលើវិស័យឆបោកតាមអនឡាញធ្លាប់ទម្លាយប្រាប់ទូរទស្សន៍អាស៊ីសេរីថា ការស្លាប់នៃជនបរទេសធ្លាក់ពីលើអគារភាគច្រើន នៅក្រុងព្រះសីហនុនាពេលកន្លងមកមិនមែនជាករណីធ្វើអត្តឃាតដូចសមត្ថកិច្ចតែងតែអះអាងឡើយ ប៉ុន្តែជនរងគ្រោះបង្ខំចិត្ត និងត្រូវបានគេបង្ខំឱ្យលោតសម្លាប់ខ្លួនពីលើអគារដោយសារមិនអាចបំពេញតម្រូវការ ការងារដល់ក្រុមឧក្រិដ្ឋជន ឬមិនអាចទ្រាំទ្រនឹងការធ្វើទារុណកម្មរបស់ក្រុមមេការឆបោកតាមអនឡាញបាន
អ្នកឃ្លាំមើលលើកឡើងថា ករណីដែលជនបរទេសស្លាប់ដោយសារធ្លាក់ពីលើអគារ ហើយអាជ្ញាធរគ្មានការស៊ើបអង្កេតឱ្យបានច្បាស់លាស់នោះគឺជាការបង្កើននូវវប្បធម៌និទ្ទណ្ឌភាព និងជំរុញឱ្យមានការសង្ស័យពីសាធារណជនចំពោះជនរងគ្រោះដែលបានស្លាប់អាចពាក់ព័ន្ធនឹងបណ្ដាញឧក្រិដ្ឋកម្ម៕
