កងទ័ពជើងទឹកថៃបានប្រកាសនៅថ្ងៃទី៩ ខែធ្នូ ថា មានការប្រយុទ្ធគ្នារវាងទាហានកម្ពុជា ជាមួយនឹងទាហានម៉ារីនថៃ នៅព្រំប្រទល់តំបន់អូរភ្លុកដំរី ឃុំថ្មដា ស្រុកវាលវែង ខេត្តពោធិ៍សាត់ និងភូមិចំរេះ (Ban Cham Rak) ដែលស្ថិតនៅជាប់ខេត្តត្រាត (Trat)។
យោធាថៃអះអាងថា ក្រោយការច្បាំងគ្នានេះ ពួកគេបានចូលកាន់កាប់ផ្ទះចំនួន៣ខ្នង ដែលពួកគេអះអាងថា ជាមូលដ្ឋានរបស់យោធាកម្ពុជា បន្ទាប់ពីមានការប្រយុទ្ធគ្នា នៅវេលាម៉ោង ៥ទៀបភ្លឺ ដោយកងម៉ារីនថៃ បានបាញ់គ្រាប់ភ្លើងបំភ្លឺនៅលើអាកាស ធ្វើជាសញ្ញាដើម្បីឱ្យកងកាំភ្លើងធំ បាញ់ចំទីតាំងឈរជើងរបស់ទាហានខ្មែរ។
ទោះជាយ៉ាងណា នៅមុនការផ្ទុះអាវុធនេះ ថៃបានធ្វើផ្លូវទៅកាន់ផ្ទះបីខ្នងនេះ នៅក្បែរតំបន់អូរភ្លុកដំរី ឃុំថ្មដា ស្រុកវាលវែង ខេត្តពោធិ៍សាត់ រួចហើយ និងបានបើកប្រតិបត្តិការរាវមីននៅតំបន់នោះ ដោយរកឃើញគ្រឿងផ្ទុះចាស់ៗ ដែលបន្សល់ទុកតាំងពីសម័យសង្គ្រាមស៊ីវិលរបស់ខ្មែរ។ កន្លងមក ថៃធ្លាប់បានទាមទារកាន់កាប់ទីតាំងផ្ទះទាំងបីខ្នងនេះ ជាច្រើនដងមកហើយ ខណៈដែលតំបន់នេះ គឺជាទីតាំងឈរជើងរបស់យោធាខ្មែរ តាំងពីទសវត្សឆ្នាំ៨០ មកម្ល៉េះ។
តាមសេចក្ដីរាយការណ៍ពីទីតាំងផ្ទាល់របស់កាសែតក្នុងស្រុកនៅតំបន់ថ្មដា ខេត្តពោធិ៍សាត់ បានឱ្យដឹងថា យោធាថៃបានបាញ់ស្រោចដោយកាំភ្លើងធំលើគ្រប់ទីតាំងដោយមិនគិតពីគោលដៅឡើយ។ ចំណែកភាគីកម្ពុជាក៏បានបាញ់តបតវិញ ដើម្បីការពារដែនអធិបតេយ្យ ក្រោយមានបញ្ជារបស់ប្រធានព្រឹទ្ធសភា លោក ហ៊ុន សែន៕
