ទាហានថៃបានចាប់ពលរដ្ឋខ្មែរ ៣នាក់ចង់ស្លាបសេកវាយដំធ្វើទារុណកម្មសួររកទីតាំងយោធាកម្ពុជា និងបានបាញ់សម្លាប់មន្ត្រីនគរបាលម្នាក់ពេលចុះល្បាតនៅតំបន់រមណីយដ្ឋានអូរស្មាច់ខេត្តឧត្តរមានជ័យ។ ជនរងគ្រោះ និងមន្ត្រីសិទ្ធិមនុស្សចាត់ទុកទង្វើរបស់ទាហានថៃថា ឃោរឃៅអមនុស្សធម៌ និងប្រព្រឹត្តឧក្រិដ្ឋកម្មសង្គ្រាមប្រឆាំងមនុស្សជាតិ។ ពួកគាត់អំពាវនាវឱ្យសហគមន៍អន្តរជាតិថ្កោលទោស និងមានវិធានការទប់ស្កាត់ការវាយប្រហារឈ្លានពានយោធាថៃមកលើទឹកដីកម្ពុជា។
ពលរដ្ឋខ្មែរ ៣នាក់ដែលរងការធ្វើទារុណកម្មដោយក្រុមទាហានថៃកំពុងតាមដានសុខភាពពីសំណាក់គ្រូពេទ្យក្រោយក្រុមទាហានថៃបានដោះលែងពួកគាត់វិញកាលពីថ្ងៃទី២៣ ខែធ្នូ។ ចំណែក មន្ត្រីនគរបាលម្នាក់ដែលទាហានថៃបានបាញ់សម្លាប់ពេលចុះល្បាតសាច់ញាតិបានរៀបចំពិធីបុណ្យសពនៅខេត្តឧត្តរមានជ័យនៅថ្ងៃទី២៥ ខែធ្នូ។
ទោះជាយ៉ាងណា ជនស៊ីវិលខ្មែរ ៣នាក់ដោយអ្នកខ្លះនៅមានអារម្មណ៍ភ័យតក់ស្លុតនៅឡើយ ហើយទ្រព្យសម្ភារៈមានតម្លៃមួយចំនួនធំត្រូវបានក្រុមទាហានថៃប្លន់យកក្រោយពេលដោះលែងមកវិញ។
ពលរដ្ឋម្នាក់ក្នុងចំណោម ៣នាក់ដែលក្រុមទាហានថៃចាប់វាយដោយហិង្សាគឺលោក រ៉ុន សុខហេង រៀបរាប់ប្រាប់ទូរទស្សន៍អាស៊ីសេរីនៅថ្ងៃទី២៥ ខែធ្នូថា ក្រុមទាហានថៃបានចាប់លោក និងពលរដ្ឋ ២នាក់ទៀតកាលពីល្ងាចថ្ងៃទី២៣ ខែធ្នូ ស្ថិតនៅតំបន់អូរស្មាច់។ លោក រ៉ុន សុខហេង ចាកចេញពីកន្លែងមានសុវត្ថិភាពហើយត្រូវបានទាហានថៃចាប់ចងដោយសារតែចង់ទៅយកទ្រព្យសម្បត្តិមានតម្លៃមួយចំនួន និងមើលផ្ទះសម្បែងផងនៅតំបន់អូរស្មាច់។
លោក រ៉ុន សុខហេង បញ្ជាក់ថា ក្រុមទាហានថៃមានគ្នាប្រហែល ៣០នាក់។ លោកថា ភ្លាមៗក្រោយទាហានឃើញរូបលោក និងពលរដ្ឋ ២នាក់ផ្សេងទៀតក្រុមទាហានថៃបានដកកាំភ្លើងភ្ជង់ក្បាលយកក្រណាត់ខ្មៅរុំភ្នែក និងចង់ស្លាបសេកទាំង ៣នាក់ឱ្យដេកក្រាបនឹងគ្រួស។ បន្ទាប់មកក្រុមទាហានថៃបានយកកាណុងកាំភ្លើងវាយក្បាលលោក និងវាយដំទាត់ធាត់ពលរដ្ឋ ២នាក់ផ្សេងទៀត និងស្រែកសម្លុត រួមទាំងបាញ់គំរាម ដើម្បីបង្ខំឱ្យប្រាប់ពីទីតាំងឈរជើងរបស់យោធាកម្ពុជា។
វាចាប់យើងបានវាអត់និយាយអីច្រើនទេ វាភ្ជង់យើងជាប់ហើយចង់ដៃយើងព័ទ្ធស្លាបសេកទៅក្រោយ ហើយចងភ្នែកយើងមិនអាចមើលឃើញអីទាំងអស់។ តែឮវានិយាយ វាសួរចម្លើយយើងសួរថា យើងទាហានមែន? ខ្ញុំថា មិនមែនទាហានទេ។ វាសួរចុះសួរឡើងសួរពីទីតាំងរបស់ទាហានខ្មែរយើង។ ខ្ញុំប្រាប់ថា ខ្ញុំជាប្រជាជនធម្មតាទេ ទាហានមិនឱ្យខ្ញុំនៅជិតគេទេ ខ្ញុំមិនដឹងទេគេធ្វើអីខ្ញុំមិនដឹងទេ ខ្ញុំមកនេះមកអើតផ្ទះសម្បែងទេ។ ខ្ញុំត្រូវមួយកាណុងកាំភ្លើងចំក្បាលត្រូវទាំងអស់គ្នាអត់មានអ្នកណាអត់ត្រូវទេ បងម្នាក់ទៀតត្រូវធ្ងន់គាត់អត់មានអាវ វាឱ្យយើងដេកនឹងថ្នល់គ្រួសក្រហម ខ្ញុំត្រូវតិចតួចតែគេទាត់មកឆ្អល់ៗ
ទាហានថៃបានចាប់ចងពលរដ្ឋខ្មែរ ៣នាក់ជាង ៣ម៉ោងទើបដោះលែងវិញនៅម៉ោងជាង ៥ល្ងាចថ្ងៃទី២៣ ខែធ្នូ។ ជនរងគ្រោះលោក រ៉ុន សុខហេង ឱ្យដឹងថា ក្រោយពេលក្រុមទាហានថៃដោះលែងពលរដ្ឋខ្មែរ គឺដោយសារតែពួកគេបានឃើញរថយន្តមួយគ្រឿងបើកមើលចូលច្រកអូរស្មាច់ ហើយក្រុមទាហានថៃចែកកម្លាំងទៅបាញ់រថយន្តនោះ។ លោក រ៉ុន សុខហេង បញ្ជាក់ថា ក្រុមទាហានថៃបានប្លន់ម៉ូតូលោក ខ្សែក និងទូរស័ព្ទពលរដ្ឋរងគ្រោះ ២នាក់ផ្សេងទៀតក្រោយពេលដោះលែង។
ចុងក្រោយវាព្រមប្រលែងយើងហើយ វាស្រាយតែចំណងភ្នែកឱ្យយើងហើយវាបាញ់គំរាមឱ្យយើងរត់។ យើងរត់មកស្រាយចំណងខ្លួនឯង ជាមួយគ្នាឯង។ វាភ្ជង់យើងហើយវាគំរាមយើងហើយថា ដីនេះគឺជាដីរបស់វា ទាំងដែលដីស្រុកភូមិខ្ញុំនៅហ្នឹងសោះ។ វាសួរយើងទៀតថា ដីហ្នឹងជាដីរបស់អ្នកណា? ខ្ញុំថា ដីខ្មែរ។ វាថាមិនមែនទេ ដីហ្នឹងដីថៃ ឱ្យយល់ឱ្យដឹងច្បាស់។ ខ្ញុំឆ្លើយបាទៗតាមវា ដើម្បីរួចខ្លួន។ ដល់ពេលវាប្រលែងខ្ញុំមកផុតហើយ បានដឹងជាអកុសលបងប៉ូលិសត្រូវបានស្លាប់
ឪពុករបស់មន្ត្រីនគរបាលដែលយោធាថៃបានបាញ់សម្លាប់ពេលចុះល្បាតគឺលោក សែម ចាន់មុន្នី ប្រាប់ទូរទស្សន៍អាស៊ីសេរីថា កាលពីល្ងាចថ្ងៃទី២៣ ខែធ្នូនោះ កូនប្រុសបង្កើតរបស់លោកទាំងពីរនាក់ដែលជាមន្ត្រីនគរបាលបានស្លៀកពាក់ស៊ីវិលបើកឡានចុះល្បាតក្រោយសភាពការស្ងប់ស្ងាត់ ប៉ុន្តែ ពេលដល់ច្រកចូលអូរស្មាច់ ត្រូវបានទាហានថៃបាញ់កូនប្រុសច្បងចំក្បាលបណ្ដាលឱ្យហូរឈាមស្រោចពេញរថយន្ត ហើយប្អូនប្រុសរបស់ជនរងគ្រោះក៏បានបើកឡានរត់គេចភ្លាមៗ។ មន្ត្រីនគរបាលដែលបានទាហានថៃបាញ់បណ្ដាលឱ្យស្លាប់ឈ្មោះ រ័ត្ន មុន្នី ជាមន្ត្រីប៉ុស្តិ៍នគរបាលរដ្ឋបាលសង្កាត់អូរស្មាច់។ ឪពុកជនរងគ្រោះបន្តថា កម្ពុជាមិនបានរំលោភបំពានដីថៃឡើយ ហើយចាត់ទុកទង្វើទាហានថៃថា កំពុងប្រព្រឹត្តឧក្រិដ្ឋកម្មសង្គ្រាមប្រឆាំងមនុស្សជាតិ និងអំពាវនាវឱ្យអន្តជាតិថ្កោលទោសអំពើឃោរឃៅរបស់ទាហានថៃ។
ទាហាន [ថៃ] ហ្នឹងវាជិះម៉ូតូមក ២គ្រឿងគ្នាវា ៥នាក់ចុះមកភ្ជង់ឡានយើងដែលកំពុងបើកលើផ្លូវលំហ្នឹង នៅក្នុងឡានទាំង ២នាក់យើងអត់ទាន់បានចុះផងឡានកំពុងបរកើកៗ វាស្ទាក់មកវាបាញ់មកដល់ពេលបាញ់ត្រូវអាបង អាប្អូនអ្នកបើកហ្នឹងបើកឡានរត់ចេញមកវិញមក។ យើងមានការឈឺចាប់រកអ្វីមកនិយាយមិនបានទេ ដល់ឃោរឃៅសម្រាប់យើងពេក យើងអត់បានធ្វើអីគេ អត់បានចូលទឹកដីគេផង យើងនៅតែក្នុងផ្ទះយើងហើយគេមកបាញ់យើងដល់ផ្ទះ។ សំណូមពរឱ្យអន្តរជាតិជួយមើលប្រជាពលរដ្ឋ ក៏ដូចជាបងប្អូនខ្មែរយើងដែលជាជនរងគ្រោះដែលត្រូវបានសៀមរំលោភបំពានយ៉ាងធ្ងន់ធ្ងរទាំងដែលខ្មែរមិនបានធ្វើអ្វីសោះ ឬមិនបានយកដីសូម្បីតែមួយម៉ែត្រពីខាងភាគីថៃផង គាត់មកបំផ្លិចបំផ្លាញទ្រព្យសម្បត្តិផ្ទះសម្បែងមិនគិតថា ជាសាលារៀនវត្តអារាម មន្ទីរពេទ្យអីទេ គឺគាត់បាញ់ទាំងអស់
ប្រធានអង្គការសម្ពន្ធភាពការពារសិទ្ធិមនុស្សកម្ពុជា ហៅកាត់ច្រាក់ (CHRAC) លោក រស់ សុដ្ឋា ហៅទង្វើទាហានថៃថា ឃោរឃៅអមនុស្សធម៌។ លោកបន្ថែមថា ច្បាប់ក្នុងសង្គ្រាមពលរដ្ឋស៊ីវិលត្រូវបានការពារពីការបាញ់ប្រហារដោយកម្លាំងយោធា ហើយការចាប់ចង់ពលរដ្ឋស៊ីវិលខ្មែរវាយដំបង្ខំឱ្យសារភាព គឺប្រទេសថៃបានរំលោភបំពានច្បាប់អន្តរជាតិទាំងស្រុង។ លោកអំពាវនាវឱ្យសហគមន៍អន្តរជាតិថ្កោលទោសទាហានថៃដែលវាយប្រហារ និងចាប់ចង់ជនស៊ីវិល ដើម្បីទប់ស្កាត់ការឈឺចាប់ និងការស្លាប់ប្រជាជនស្លូតត្រង់ និងបញ្ឈប់មហិច្ឆតាថៃដែលកំពុងវាយប្រហារឈ្លានពានទឹកដីកម្ពុជា។
ទង្វើដែលថៃបានប្រព្រឹត្តចំពោះប្រជាពលរដ្ឋខ្មែរដែលបានរាយការណ៍នេះ គឺបន្ថែមបទល្មើសឧក្រិដ្ឋរបស់ទាហានថៃមកលើប្រទេសកម្ពុជា និងប្រជាពលរដ្ឋកម្ពុជា ដែលជាបទឧក្រិដ្ឋសង្គ្រាមអមនុស្សធម៌ និងពោរពេញដោយភាពឃោរឃៅដែលមិនអាចទទួលយកបាន។ ខ្ញុំសូមអំពាវនាវយ៉ាងខ្លាំងក្លាចំពោះស្ថាប័នសិទ្ធិមនុស្ស ស្ថាប័នច្បាប់ និងយុត្តិធម៌អន្តរជាតិរួមទាំងដៃគូ និងសហគមន៍អន្តរជាតិសូមចាត់វិធានការឱ្យបានម៉ឺងម៉ាត់ និងយ៉ាងខ្លាំងក្លា ដើម្បីឆ្លើយតបទៅលើអំពើខុសច្បាប់អមនុស្សធម៌ ដែលទាហានថៃកំពុងប្រព្រឹត្តចំពោះប្រទេសកម្ពុជា និងពលរដ្ឋកម្ពុជា
គិតត្រឹមថ្ងៃទី២៥ ខែធ្នូ មានពលរដ្ឋស៊ីវិលស្លូតត្រង់កម្ពុជាបាត់បង់ជីវិតចំនួន ៣១នាក់ និងរងរបួសជិត ១០០នាក់ ដោយសារតែសង្គ្រាមថៃវាយប្រហារឈ្លានពានលើកម្ពុជា។ ក្រៅពីនេះ ក៏មានជនជាតិចិនម្នាក់បានស្លាប់ដោយសារត្រូវគ្រាប់ថៃទម្លាក់នៅតំបន់អូរស្មាច់ និងជនជាតិចិនម្នាក់ទៀតរងរបួសដោយសារតែត្រូវអំបែងគ្រាប់នៅខេត្តបាត់ដំបង៕
