ពលរដ្ឋអះអាងថា ក្រុមទាហានឈុតខ្មៅថៃបានប្រើកាំភ្លើងម៉ាក់អឹមសី (M16) ដេញបាញ់គំរាមពលរដ្ឋខ្មែរ ២នាក់រស់នៅតំបន់អូរស្មាច់ ខេត្តឧត្តរមានជ័យ ដើម្បីប្លន់យកម៉ូតូ។ ជាមួយគ្នានេះ ក្រុមទាហានថៃក៏បន្តសម្រុកចូលបំផ្លាញ និងរុះរើផ្ទះសម្បែងរបស់ក្រុមអាជីវករខ្មែរជាច្រើនគ្រួសារនៅអគារអូរបីជាន់ ដើម្បីចូលប្លន់យកទ្រព្យសម្បត្តិមានតម្លៃដែរ។
ក្រុមទាហានថៃជិត ១០នាក់ កាលពីថ្ងៃទី៣១ ខែធ្នូ ឆ្នាំ២០២៥ បានជិះម៉ូតូ ៣គ្រឿង និងរថយន្តកង់១០មួយគ្រឿងចូលល្បាតនៅតំបន់អូរស្មាច់ និងបានប្រើកាំភ្លើងអឹមសី (M16) ដេញបាញ់រះជាច្រើនគ្រាប់លើពលរដ្ឋខ្មែរ ២នាក់គឺលោក លឹម ហៃ និងលោក ស្រ៊ុន សុភាព ដើម្បីប្លន់យកម៉ូតូ គ្រឿងសង្ហារិម និងទ្រព្យសម្បត្តិមានតម្លៃនៅខាងក្នុងផ្ទះជាច្រើនទៀត។
ជនរងគ្រោះដែលត្រូវបានទាហានថៃដេញបាញ់គំរាមប្លន់គឺលោក លឹម ហៃ មានវ័យជាង ៦០ឆ្នាំរៀបរាប់ប្រាប់ទូរទស្សន៍អាស៊ីសេរីនៅថ្ងៃទី០១ ខែមករាថា មុនហេតុការណ៍ដែលទាហានថៃចុះមកប្លន់ម៉ូតូ និងទ្រព្យសម្បត្តិលោកនោះ ទាហានថៃបានភ្ជង់មិត្តភ័ក្ដិលោកឈ្មោះ ស្រ៊ុន សុភាព ដែលកំពុងធ្វើដំណើរជិតមកដល់ផ្ទះលោកស្ថិតនៅចុងភូមិអូរស្មាច់ ហើយទាហានថៃទាំងនោះបានបាញ់រះគំរាមជាច្រើនគ្រាប់។ ក្រោយមកលោកបានឮសំឡេងមិត្តភ័ក្ដិស្រែកប្រាប់ពីក្រុមទាហានថៃសំដៅមកដល់ផ្ទះលោក ហើយលោកព្យាយាមរត់គេចខ្លួនចូលក្នុងព្រៃសំងំលាក់ខ្លួនមួយសន្ទុះធំ ដោយសារតែក្រុមទាហានថៃបន្តដេញបាញ់គំរាម។ លោកថា ក្នុងពេលរត់ចូលព្រៃលាក់ខ្លួននោះ ទាហានថៃបានចូលផ្ទះប្លន់ម៉ូតូ ៥គ្រឿង គ្រឿងសង្ហារិម និងសម្ភារៈជាច្រើនទៀត។
ចំណែក ជនរងគ្រោះម្នាក់ទៀតគឺលោក ស្រ៊ុន សុភាព មានអាយុ ៥៧ឆ្នាំ បញ្ជាក់ថា ក្នុងអំឡុងពេលទាហានថៃចូលរុះរើផ្ទះប្លន់ទ្រព្យសម្បត្តិលោក លឹម ហៃ នោះត្រូវបានក្រុមទាហានថៃភ្ជង់មិនរត់នៅណាឡើយ ហើយពួកក្រុមទាហានថៃក៏បានចែកកម្លាំង ដើម្បីតាមស្វែងរកលោក លឹម ហៃ ដែលកំពុងសំងំលាក់ខ្លួនក្នុងព្រៃទៀតផង។ ក្រោយមកទាហានថៃក៏បានដោះលែងលោក ហើយក៏ជិះម៉ូតូស្វែងរកលោក លឹម ហៃ ដើម្បីទៅពិនិត្យមើលផ្ទះសម្បែង។
លោក ស្រ៊ុន សុភាព៖ «ខ្ញុំបានឃើញឡានកង ១០ ពីច្រកព្រំដែន ៧៧៨ ហ៊ុយដីទ្រលោមខ្ញុំក៏មិននឹកស្មានថា ឡានថៃ គិតថា ឡានហ្នឹងឡានខ្មែរទេបានហ៊ានបើកមក តែខ្ញុំមើលយូរៗទៅកាន់តែពិនិត្យទៅស្រាប់តែម៉ូតូវា វ៉ាឡាន [កង១០] សម្រុកមករកខ្ញុំតែម្ដង វាស្ពាយអឹមសី ខ្ញុំដឹងថា ថៃ ខ្ញុំស្រែកប្រាប់គាត់ [លោក លឹម ហៃ] ថា ឱ្យគេចពួកថៃវាមក ៣ម៉ូតូហើយ។ ខ្ញុំស្មានតែពួកវាទៅបាត់ខ្ញុំបើកម៉ូតូគេចៗ ស្ថានការណ៍របស់គាត់ស្រាប់តែវាចេញពីដើមស្វាយព្រៃមក ភ្ជង់ខ្ញុំបណ្ដោយប្រហែល ៣០ម៉ែត្រ។ វាបក់និយាយថៃដាក់ខ្ញុំថា កាប់ កាប់ កាប់ ខ្ញុំក៏លើកដៃអរគុណវាដែរ ខ្ញុំត្រឡប់ទៅវិញទៅ។ មកវិញខ្ញុំក៏មិនចោលគាត់ [លោក លឹម ហៃ] ទៀត ខ្ញុំនឹកឃើញថា វាយកម៉ូតូបាត់ហើយមិនដឹងថា មានម៉ូតូឯណាជិះទេ ខ្ញុំក៏បើករ៉េះៗ ជុំវិញភូមិដើររកគាត់»។
មកដល់ពេលនេះ ពលរដ្ឋជាច្រើនគ្រួសារដែលមានផ្ទះសម្បែង និងអាជីវកម្មនៅតំបន់អគារអូរ៣ជាន់ស្ថិតក្នុងភូមិអូរស្មាច់ ស្រុកសំរោង ខេត្តឧត្តរមានជ័យ មិនហ៊ានចូលផ្ទះសម្បែងរបស់ខ្លួននោះ ព្រោះខ្លាចទាហានថៃបាញ់ ហើយតំបន់នោះក៏ត្រូវបានកម្លាំងទាហានថៃចុះល្បាតជាប្រចាំ។ លើសពីនេះទៀត ផ្ទះសម្បែងពលរដ្ឋជាច្រើនខ្នងនៅតំបន់អគារអូរ៣ជាន់នោះ ក៏ត្រូវទាហានថៃវាយកម្ទេច និងចូលរុះរើសម្ភារៈប្លន់យកទ្រព្យសម្បត្តិមានតម្លៃផងដែរ។
ពលរដ្ឋម្នាក់ដែលមានផ្ទះនៅតំបន់អូរ៣ជាន់ ថ្លែងសុំលាក់ឈ្មោះព្រោះបារម្ភពីសុវត្ថិភាពឱ្យទូរទស្សន៍អាស៊ីសេរីដឹងដែរថា ផ្ទះរបស់លោកត្រូវបានទាហានថៃចូលរុះរើវាយកម្ទេច ហើយទ្រព្យសម្បត្តិមានតម្លៃមួយចំនួនធំដូចជាគ្រឿងអលង្ការជាដើម ក៏ត្រូវបានទាហានថៃគាស់ទូដែកប្លន់យកទៅអស់ដែរ។
ពលរដ្ឋថ្លែងលាក់ឈ្មោះ៖ «និយាយឱ្យចំខ្ញុំអត់នៅក្នុងហេតុការណ៍ហ្នឹងទេ ប៉ុន្តែខ្ញុំពឹងអ្នកស្គាល់គ្នាឱ្យចូលយកអីវ៉ាន់នៅផ្ទះខ្ញុំ ចូលទៅវារើអស់រលីង វារើខោអាវយើងពេញហ្នឹងទាំងអស់ ហើយទូដែកអីវាវាយយកអស់ កុំព្យូទ័រ (Laptop) ខ្ញុំម៉ាស៊ីនព្រីនស៍របស់ខ្ញុំ កង្ហារដាក់ទឹកត្រជាក់ និយាយទៅរបស់មានតម្លៃក្នុងហ្នឹងវាយកទៅទាំងអស់រលីង។ បើទូទឹកកកនៅខាងក្រៅដូចជាអត់អីទេ អស់ខាងក្នុងទេទូដែកមានលុយ មានគ្រឿងអលង្ការប្រពន្ធមួយចំនួន យកទាំងអស់ដូចជាខ្សែដៃ ខ្សែក តែវាអត់យកចិញ្ចៀន វាយកតែខ្សែក ខ្សែដៃ។ ចិត្តខ្ញុំវិញចាត់ទុកវាជាចោរហ្មង វាបំផ្លាញទ្រព្យសម្បត្តិរបស់ប្រជាពលរដ្ឋយើងហើយវាបំពានបទឈប់បាញ់ ហើយវានៅតែដើរបំពានយើង»។
កាលពីថ្ងៃទី២៣ ខែធ្នូ ឆ្នាំ២០២៥ ក្រុមទាហានថៃប្រមាណ ៣០នាក់បានបាញ់សម្លាប់មន្ត្រីម្នាក់ពេលចុះល្បាត និងចាប់ចងពលរដ្ឋខ្មែរ ៣នាក់ទៀតធ្វើទារុណកម្ម និងបាញ់គំរាមបង្ខំឱ្យប្រាប់ពីទីតាំងយោធាខ្មែរ ក្នុងពេលដែលពួកគាត់ទៅមើលផ្ទះសម្បែងនៅតំបន់អូរស្មាច់ ដែលយោធាថៃទម្លាប់គ្រាប់នៅអំឡុងសង្គ្រាម។
ក្នុងសង្គ្រាមឈ្លានពានរបស់ថៃក្នុងរយៈពេលជាង ២០កន្លងទៅនេះអ្នកស្រុកអូរស្មាច់ឱ្យដឹងថា ភូមិសាស្ត្រក្នុងសង្កាត់អូរស្មាច់ដូចជា ភូមិវត្តអូរខ្លាឃ្មុំ តំបន់អូរទីពីរ ភ្នំប៉ោយ ជួរភ្នំដងរែក តំបន់ស្វាយចន្ទី ទីស្នាក់ការកងវរសេនាតូចនគរបាលការពារព្រំដែនគោកលេខ ៧០២ ទីស្នាក់ការប៉ុស្តិ៍រដ្ឋបាលនគរបាលអន្តោប្រវេសន៍ រួមទាំងតំបន់កាស៊ីណូទាំងពីររបស់លោក លឹម ហេង និងលោក លី យ៉ុងផាត់ ត្រូវបានទាហានថៃចូលកាន់កាប់ព័ទ្ធបន្លាលួស និងចុះល្បាតជាប្រចាំ៕
