ក្រសួងការពារជាតិកម្ពុជាអះអាងថា យោធាថៃនៅតែបន្តវាយប្រហារឈ្លានពានចូលទឹកដីកម្ពុជាដដែល បើទោះបីជាភាគីទាំងពីរព្រមព្រៀងបើកកិច្ចប្រជុំលេខាធិការដ្ឋាននៃគណៈកម្មាធិការព្រំដែនទូទៅ GBC នៅលើទឹកដីថៃដើម្បីបើកផ្លូវឱ្យមានជំនួបរវាងរដ្ឋមន្ត្រីការពារជាតិនៃប្រទេសទាំងពីរនៅថ្ងៃទី២៧ ធ្នូ ខាងមុខ តាមការចង់បានរបស់ថៃក៏ដោយ។
អ្នកនាំពាក្យក្រសួងការពារជាតិ អ្នកស្រី ម៉ាលី សុជាតា ថ្លែងនៅព្រឹកថ្ងៃទី២៥ ធ្នូ ថា យោធាថៃបានបន្តវាយប្រហារលើកម្ពុជា តាំងពីល្ងាចថ្ងៃទី២៤ រហូតដល់ម៉ោង ៨ព្រឹកថ្ងៃទី២៥ ធ្នូ នេះ។ អ្នកស្រីអះអាងថា យោធាថៃបានប្រើប្រាស់រថគ្រោះ និងទ័ពថ្មើរជើងរុលចូលខ្លាំងនៅតំបន់វាលឥន្ទ្រី ចម្ការចេក ៥មករា និងសំបុកឃ្មុំ ពិសេសតំបន់ប្រាសាទព្រះវិហារ ត្រូវបានយោធាថៃប្រើដ្រូនអត្តឃាត កាំភ្លើងធំវាយប្រហារកាន់តែខ្លាំង។
ទោះជាយ៉ាងណា អ្នកស្រី ម៉ាលី សុជាតា អះអាងថា កងកម្លាំងកំពុងប្រយុទ្ធតស៊ូយ៉ាងស្វិតស្វាញ និងឆ្លើយតបដោយយកចិត្តទុកដាក់ និងប្រុងប្រយ័ត្នខ្ពស់ជានិច្ចដើម្បីការពារបូរណភាពទឹកដី ដោយសេចក្ដីក្លាហាន និងមិនញញើតសត្រូវឈ្លានពាននោះទេ។ អ្នកស្រីបន្តថា ក្រៅពីតំបន់ព្រះវិហារ យោធាថៃក៏វាយប្រហារលើតំបន់ផ្សេងទៀតដែរ ដូចជា តំបន់បឹងត្រកួន ប៉ោយប៉ែត ភូមិព្រៃចាន់ និងភូមិជោគជ័យជាដើម។
កិច្ចប្រជុំក្រុមលេខាធិការដ្ឋាននៃគណៈកម្មាធិការព្រំដែនទូទៅកម្ពុជា-ថៃ (GBC) ធ្វើឡើងចាប់ពីថ្ងៃទី២៤ ដល់ថ្ងៃទី២៦ ខែធ្នូ ក្រោមការឃ្លាំមើលពីក្រុមអ្នកសង្កេតការណ៍អាស៊ាន (AOT)។ កិច្ចប្រជុំនេះធ្វើឡើងនៅខេត្តចន្ទបុរី របស់ថៃ ជាប់នឹងព្រំដែនខេត្តប៉ៃលិនរបស់កម្ពុជា។
ក្រសួងការពារជាតិថា នៅម៉ោង ៨:៤១នាទីព្រឹក ថ្ងៃទី២៥ ធ្នូ យោធាថៃបានបាញ់ផ្លោងកាំភ្លើងធំ ចូលភូមិសាស្ត្រភូមិតាឡី ឃុំគោករមៀត ស្រុកថ្មពួក បណ្តាលឱ្យពលរដ្ឋស៊ីវិលស្លូតត្រង់កម្ពុជាបាត់បង់ជីវិតចំនួន ១នាក់ ដែលធ្វើឱ្យចំនួនជនស៊ីវិលកម្ពុជាស្លាប់កើនសរុបដល់ ៣១នាក់ គិតត្រឹមព្រឹកថ្ងៃទី២៥ ធ្នូនេះ៕
