អ្នកនាំពាក្យក្រសួងការពារជាតិកម្ពុជា អ្នកស្រី ម៉ាលី សុជាតា ថ្លែងនៅក្នុងសន្និសីទកាសែតនៅព្រឹកថ្ងៃទី១២ ធ្នូ ថា យោធាថៃបន្តវាយប្រហារចូលដីខ្មែរ ស្ទើរតែគ្រប់ទីតាំងដែលយោធាថៃបានឈ្លានពាន។
អ្នកស្រីអះអាងថា កងទ័ពកម្ពុជាកំពុងបន្តឈរជើងការពារយ៉ាងមុតមាំ និងស្វាហាប់គ្រប់ទិសដៅដែលយោធាថៃកំពុងវាយប្រហារ។ ទោះជាយ៉ាងណា អ្នកស្រីនៅតែអំពាវនាវឱ្យយោធាថៃងាកមកគោរពបទឈប់បាញ់ និងកិច្ចព្រមព្រៀងសន្តិភាព។
អ្នកស្រី ម៉ាលី សុជាតា បន្តទាមទារឱ្យយោធាថៃ បញ្ឈប់នូវរាល់ទង្វើឈ្លានពានរបស់ខ្លួនចូលទឹកដីខ្មែរ ការផ្សព្វផ្សាយព័ត៌មានបំភ្លៃ ការវាយប្រហារដោយមិនរើសគោលដៅ ជាពិសេសទៅលើប្រជាជនស៊ីវិល និងហេដ្ឋារចនាសម្ព័ន្ធស៊ីវិលជាដើម។ អ្នកស្រីក៏ស្នើឱ្យយោធាថៃបង្ហាញពីភាពស្មោះត្រង់ និងសុឆន្ទៈ បើថៃពិតជាចង់បានសន្តិភាពពិតប្រាកដមែន ព្រោះសន្តិភាពមិនអាចកើតមានតែតាមរយៈការនិយាយប៉ុណ្ណោះទេ ប៉ុន្តែតាមរយៈសកម្មភាពជាក់ស្តែង។
កាសែតក្នុងស្រុកបានរាយការណ៍ថា ទាហានថៃ បានបាញ់ផ្លោង និងបញ្ជូនទ័ពថ្មើរជើងចូលដីកម្ពុជា តាំងពីព្រឹកព្រលឹម រហូតមកដល់ម៉ោងជាង៩ ថ្ងៃទី១២ ខែធ្នូ ឆ្នាំ២០២៥នេះ។
សូមរង់ចាំតាមដានព័ត៌មានពិស្ដារ…
