រដ្ឋមន្ត្រីក្រសួងការបរទេសថៃ លើកឡើងថា កិច្ចប្រជុំគណៈកម្មការចម្រុះខណ្ឌសីមាព្រំដែនគោក(JBC) កម្ពុជា-ថៃ នឹងត្រូវរង់ចាំរហូតដល់រដ្ឋាភិបាលថ្មីរបស់ថៃ ចូលកាន់តំណែង ដើម្បីបង្កើតគណៈកម្មាធិការថ្មី។ អ្នកឃ្លាំមើលថា ស្ថិតក្នុងស្ថានភាពមិនច្បាស់លាស់បែបនេះ កម្ពុជាត្រូវមានផែនការត្រៀមផ្សេងទៀត ដើម្បីតតាំងជាមួយថៃក្នុងផ្លូវការទូត ក្រៅពីវិធីចរចាទ្វេភាគី។
មកដល់ពេលនេះ ប្រទេសថៃនៅមិនទាន់កំណត់ពេលកិច្ចប្រជុំ(JBC)ដើម្បីកំណត់ព្រំដែនជាមួយកម្ពុជា ឱ្យបានច្បាស់លាស់នៅឡើយ ខណៈយោធាថៃកំពុងសង់លេណដ្ឋាន និងសំណង់រឹងមាំតាមបណ្ដោយព្រំដែនក្នុងទឹកដីកម្ពុជា ជាច្រើនទីតាំង។
ថ្លែងនៅវិមានរដ្ឋាភិបាលថៃ នៅថ្ងៃទី១០ ខែមីនា នេះ រដ្ឋមន្ត្រីក្រសួងការបរទេសថៃ លោក ស៊ីហាសាក់ ភួងកេតកែវ (Sihasak Phuangketkeow) លើកឡើងថា កិច្ចចរចាគណៈកម្មការចម្រុះខណ្ឌសីមាព្រំដែនគោក(JBC) រវាងកម្ពុជា-ថៃ មិនអាចធ្វើទៅតាមសំណើរបស់កម្ពុជា ដោយកំណត់ពេលជាក់លាក់ណាមួយនោះឡើយ។ លោកអះអាងថា ដំណើរការរៀបចំកិច្ចប្រជុំ JBC នេះគឺត្រូវរង់ចាំរហូតដល់រដ្ឋាភិបាលថ្មីរបស់ថៃ ចូលកាន់តំណែង ដោយការពិភាក្សាអំពីការបោះបង្គោលព្រំដែន និងការឈរជើងរបស់យោធានៅលើទីតាំងបច្ចុប្បន្ន ក្រោយសង្គ្រាមនៅតាមព្រំដែន គឺស្ថិតនៅក្នុងតួនាទី និងការសម្រេចរបស់រដ្ឋាភិបាលថ្មីទាំងស្រុង។
លោក ស៊ីហាសាក់ បញ្ជាក់ថា ដើម្បីឈានដល់កិច្ចប្រជុំ JBC ភាគីកម្ពុជា ត្រូវចូលរួមបោសសម្អាតមីននៅតាមព្រំដែន និងបោកសម្អាតឧក្រិដ្ឋកម្មឆបោកតាមអនឡាញ ជាមុនសិន ព្រោះបញ្ហាទាំងនេះ គឺជាកាតព្វកិច្ចដែលកម្ពុជាត្រូវអនុវត្តជាលទ្ធផលនៃកិច្ចប្រជុំ។
កាលពីថ្ងៃទី២៤ ខែកុម្ភៈ រដ្ឋលេខាធិការដ្ឋានកិច្ចការព្រំដែនកម្ពុជា បានស្នើទៅកាន់ភាគីថៃ ដើម្បីរៀបចំកិច្ចប្រជុំគណៈកម្មការចម្រុះខណ្ឌសីមាព្រំដែនគោក(JBC) កម្ពុជា-ថៃ ក្នុងអំឡុងសប្ដាហ៍ទី២ នៃខែមីនា និងកិច្ចប្រជុំអនុគណៈកម្មការបច្ចេកទេសចម្រុះព្រំដែន(JTSC) កម្ពុជា-ថៃ ក្នុងអំឡុងសប្ដាហ៍ទី១ ក្នុងខែដដែល។ ក៏ប៉ុន្តែសំណើនេះ មិនទទួលបានការឆ្លើយតបពីភាគីថៃនោះឡើយ។
ក្រៅពីរឿងកិច្ចប្រជុំ JBC ប្រមុខការទូតថៃរូបនេះ ក៏បានលើកឡើងពីគម្រោងលុបចោលអនុស្សរណៈ នៃការយោគយល់គ្នា ឆ្នាំ២០០១ ឬ MOU 44 ស្ដីពីកិច្ចព្រមព្រៀងកំណត់ព្រំដែនសមុទ្រ និងការរុករកប្រេងកាតនៅតំបន់ដែលអះអាងថា ត្រួតស៊ីគ្នា(OCA) ផងដែរ។ លោក ស៊ីហាសាក់ លើកឡើងថា ការលុបចោល MOU 44 នេះ ត្រូវរង់ចាំឱ្យរដ្ឋាភិបាលធ្វើសេចក្ដីថ្លែងការណ៍ ទៅកាន់សភា ដើម្បីពិភាក្សាលើការលុបចោល នៅពេលរដ្ឋាភិបាលថៃថ្មីបង្កើតឡើង។
ទូរទស្សន៍អាស៊ីសេរី មិនអាចទាក់ទងរដ្ឋមន្ត្រីទទួលបន្ទុក រដ្ឋលេខាធិការដ្ឋានកិច្ចការព្រំដែន លោក ឡាំ ជា ដើម្បីសុំការឆ្លើយតបជុំវិញបញ្ហានេះបានទេ នៅថ្ងៃទី១០ ខែមីនា។
ជុំវិញរឿងនេះ ប្រធានអ្នកឃ្លាំមើលកម្ពុជា លោក ម៉ែន ណាត យល់ឃើញថា ភាគីថៃកំពុងប្រើលេស ដើម្បីបដិសេធចូលតុចរចាជាមួយកម្ពុជា ដោយសារភាគីថៃ បានដឹងហើយថា កម្ពុជានឹងលើកយកសកម្មភាពឈ្លានពានទឹកដីខ្មែរ របស់យោធាថៃ លើសពីតំបន់ទាមទារ មកនិយាយនៅក្នុងកិច្ចពិភាក្សា។ លោកបន្តថា ស្ថិតក្នុងស្ថានភាពមិនច្បាស់លាស់បែបនេះ កម្ពុជាត្រូវមានផែនការត្រៀមផ្សេងទៀត ដើម្បីតតាំងជាមួយថៃក្នុងផ្លូវការទូត។
លោក ម៉ែន ណាត៖ «ក្នុងរបាយការណ៍ចរចា វាប្រាកដជាមានលេចឮទៅដល់ក្រុមអ្នកសង្កេតការណ៍អន្តរជាតិ AOT និងអ្នកការទូតអន្តរជាតិ។ដូច្នេះភាគីថៃមានតែត្រូវរកមធ្យោបាយពន្យារពេល ដើម្បីបង្កើតលេសខ្លួនឯង កុំឱ្យមានការជជែកផ្ទាល់មុខគ្នាក្នុងស្ថានភាពបច្ចុប្បន្នជាមួយកម្ពុជា»។
ពាក់ព័ន្ធនឹងជម្លោះព្រំដែននេះដែរ អ្នកនាំពាក្យកងទ័ពជើងគោកថៃ លោក វីនថៃ ស៊ូវារី (Winthai Suvari) បានចេញសេចក្ដីថ្លែងការណ៍ នៅថ្ងៃនេះ ដោយអះអាងថា ស្ថានភាពនៅតាមព្រំដែនកម្ពុជា-ថៃ មិនទាន់ជាមូលហេតុនៃការព្រួយបារម្ភនៅឡើយ ហើយមិនទាន់មានសញ្ញាណាមួយ នៃការកើនឡើងនៃជម្លោះនោះដែរ។
ទោះជាបែបនេះក្ដី ទាហានខ្មែរ ដែលឈរជើងនៅតំបន់ព្រំដែន បានអះអាងថា ស្ថានការណ៍នៅតំបន់ព្រំដែន នៅតែមានភាពតានតឹង ដោយទាហានថៃបានបង្កើនសកម្មភាពចូលឈ្លានពានក្នុងទឹកដីខ្មែរកាន់តែជ្រៅ ដោយយោធាខ្មែរបានចូលទៅហាមឃាត់ រហូតបណ្ដាលឱ្យមានការឈ្លោះប្រកែកគ្នាជាញឹកញាប់ ដោយពេលខ្លះទាហានថៃបានគំរាមបាញ់សម្លាប់ទាហានខ្មែរទៀតផង៕
