ថៃកំពុងពន្លឿនការកសាងសំណង់រឹងនៅលើទឹកដីខ្មែរតាមបណ្ដោយព្រំដែនជាច្រើនទីតាំង ដោយប្រជាពលរដ្ឋ និងព្រះសង្ឃថៃ បានប្រមូលកម្លាំងគ្នា បង្កើតការដ្ឋានសាងសង់នៅនឹងកន្លែង។ ស្របពេលជាមួយគ្នានេះដែរ នៅខាងកម្ពុជា ចំកណ្ដាលរាជធានីភ្នំពេញវិញ កូនប្រុសពៅរបស់លោក ហ៊ុន សែន គឺលោក ហ៊ុន ម៉ានី បានប្រមូលព្រះសង្ឃ និងប្រជាពលរដ្ឋ មកសម្ពោធរូបគំនូរដែលបង្ហាញពីសោកនាដកម្មដោយសារសង្គ្រាមថៃឈ្លានពានអមដោយស្នូរទះដៃ។ មន្ត្រីបក្សប្រឆាំងថា សកម្មភាពនេះ គ្មានប្រយោជន៍ផ្នែកយុទ្ធសាស្ត្រសម្រាប់ប្រឆាំងនឹងការឈ្លានពានរបស់ថៃនោះឡើយ ក្រៅតែពីធ្វើឱ្យពលរដ្ឋខ្មែរ មានអារម្មណ៍កម្សត់។
ក្រោយសង្គ្រាមឈ្លានពាន និងចូលកាន់កាប់ទឹកដីខ្មែរ តាមបណ្ដោយព្រំដែនអស់រយៈពេលជាង ២ខែមកនេះ យោធាថៃបានសម្រុកសាងសង់សំណង់ និងហេដ្ឋារចនាសម្ព័ន្ធ ក្នុងទឹកដីខ្មែរ បានជាច្រើនទីតាំង។
នៅលើភ្នំ២២៥ ជិតតំបន់ប្រាសាទតាក្របី ស្ថិតក្នុងខេត្តឧត្តរមានជ័យ ពលរដ្ឋថៃប្រុសស្រី រួមទាំងព្រះសង្ឃ បានសាងសង់ទីកន្លែងតម្កល់ព្រះពុទ្ធរូប និងហេដ្ឋារចនាសម្ពន្ធ័ផ្សេងៗទៀត ដោយពួកគេបានដំឡើងប្រព័ន្ធអគ្គិសនី និងរៀបចំធ្វើគ្រោងដែកជាច្រើន សម្រាប់ធ្វើលេណដ្ឋាន។ នៅជិតគ្នានេះដែរ ក្នុងតំបន់ភ្នំ៣៥០ ថៃកំពុងសាងសង់ស្តូបអនុស្សាវរីយ៍ សម្រាប់រម្លឹកដល់ទាហានថៃដែលពលី នៅលើច្រាំងថ្ម។
រីឯនៅខេត្តព្រះវិហារ នៅក្នុងតំបន់តាថាវ នៅលើកំពូលភ្នំតាស៊ឹម និងភ្នំ៤០០ ពលរដ្ឋថៃរាប់រយនាក់ បាននាំគ្នារៀបឥដ្ឋ ចាក់បេតុង ខណៈក្រុមព្រះសង្ឃ បាននាំគ្នាចងគ្រោងដែក និងស្វានទម្លុះថ្ម ដើម្បីសាងសង់លេណដ្ឋាន កន្លែងតម្កល់ព្រះពុទ្ធរូប និងផ្លូវថ្នល់។ ក្នុងនោះ នៅភ្នំ៦៧៧ ក្នុងតំបន់អានសេះ យោធាថៃបានសម្រុកធ្វើជណ្ដើរឡើងទៅកាន់កំពូលភ្នំ។
ចំណែកនៅតំបន់បឹងត្រកួន ក្នុងខេត្តបន្ទាយមានជ័យ សភាពការណ៍កាន់តែអាក្រក់ ដោយទាហានថៃបានបន្តសកម្មភាពឈ្លានពាន ដោតទង់ជាតិ និងរាយបន្លាលួស នៅតាមតំបន់មួយចំនួនក្នុងទឹកដីខ្មែរ។ ដោយឡែកនៅ តំបន់ថ្មដា ក្នុងខេត្តពោធិ៍សាត់ ទាហានថៃបានសាងសង់ប៉មនៅពីលើទូកុងតឺន័រ និងដាក់កាមេរ៉ាសុវត្ថិភាព ជាច្រើនទីតាំង។
ក្រឡេកមកមើលទីតាំងឈរជើងនៅខាងភាគីកម្ពុជាឯនេះវិញ ទាហានខ្មែរដែលកំពុងឈរជើង នៅតាមតំបន់មួយចំនួន បានបន្តសាងសង់លេណដ្ឋានដោយប្រើប្រាស់ចបកាប់ និងកម្លាំងទាហានសែងបង្គោលថ្ម។ ក្រៅតែពីការងារជីកដី និងលីសែង ទាហានខ្មែរនៅតែខ្វះខាតទឹកប្រើប្រាស់ និងសម្ភារៈផ្សេងទៀត មានដូចជាវិទ្យុទាក់ទង ឬអាយកូម និងសំពត់តង់កៅស៊ូជាដើម រហូតទាហានមួយចំនួន បានថតវីដេអូ ដោយលើកដៃសំពះ ស្នើសុំជំនួយពីសប្បុរសជនទៀតផង។
ខណៈក្រុមយោធា និងប្រជាពលរដ្ឋថៃ កំពុងបង្កើនល្បឿនកសាងសំណង់នៅក្នុងទឹកដីកម្ពុជាតាមព្រំដែននោះ កូនប្រុសពៅរបស់លោក ហ៊ុន សែន ដែលជាឧបនាយករដ្ឋមន្ត្រី និងជារដ្ឋមន្ត្រីក្រសួងមុខងារសាធារណៈ គឺលោក ហ៊ុន ម៉ានី បានកៀរគរមន្ត្រីរាជការ ពលរដ្ឋ និងព្រះសង្ឃ មកសម្ពោធរូបគំនូរមួយ ដែលគេដាក់ឈ្មោះថា «សិល្បៈដើម្បីសន្តិភាព»។
ផ្ទាំងគំនូរដែលមានទំហំ ១៧៥ម៉ែត្រការ៉េនេះ បានឆ្លុះបញ្ចាំងអំពីទុក្ខវេទនារបស់ពលរដ្ឋខ្មែរ ការបំផ្លិចបំផ្លាញហេដ្ឋារចនាសម្ព័ន្ធ បេតិកភណ្ឌរបស់កម្ពុជា នៅក្នុងជម្លោះព្រំដែនជាមួយថៃ និងរំលេចដោយរូបភាពសមាជិកគ្រួសាររបស់មេដឹកនាំកម្ពុជា។
ទោះបីជាអត្ថន័យនៅក្នុងរូបគំនូរនេះ បង្កប់នូវភាពសោកសៅយ៉ាងណាក្ដី ក៏ទិដ្ឋភាពនៃការសម្ពោធនេះហាក់មិនស៊ីគ្នាទៅនឹងខ្លឹមសារនោះឡើយ ដោយមានការប្រកាសអបអរសាទរ លាយឡំនឹងស្នូរទះដៃជាដើម។
ប្រមុខដឹកនាំស្ថាប័នអធិបតេយ្យជាតិព្រំដែន និងអន្តោប្រវេសន៍ នៃរដ្ឋាភិបាលកម្ពុជាឯករាជ្យ ២៣តុលា លោក អ៊ុំ សំអាន យល់ឃើញថា សកម្មភាពនេះ គ្មានប្រយោជន៍ផ្នែកយុទ្ធសាស្ត្រសម្រាប់ប្រឆាំងនឹងការឈ្លានពានរបស់ថៃនោះឡើយ ក្រៅតែពីធ្វើឱ្យពលរដ្ឋខ្មែរ មានអារម្មណ៍កម្សត់ និងដើម្បីបង្វែរចំណាប់អារម្មណ៍របស់មហាជន។
លោក អ៊ុំ សំអាន៖ «ខ្ញុំយល់ថា គួរតែបង្ហាញពីអានុភាពរបស់ខ្លួនវិញ ល្អជាង។ គួរតែបង្រួបបង្រួមជាតិឱ្យខ្មែរខ្លាំងទៅ។ បង្ហាញសាច់ដុំតាមរយៈការពង្រឹងវិស័យយោធា មានអាវុធទំនើប ទើបប្រទេសជិតខាងគេខ្លាចញញើត ហើយសហគមន៍អន្តរជាតិ គេនៅខាងយើង ហើយនៅពេលយើងទន់ខ្សោយ គ្មាននរណានៅខាងយើងនោះទេ ព្រោះយើងកាន់អំណាចផ្ដាច់ការ»។
មន្ត្រីគណបក្សប្រឆាំងរូបនេះ បានព្រមានថា ប្រសិនបើកម្ពុជា នៅតែអែអង់ក្នុងការប្រើប្រាស់យន្តការច្បាប់ ដើម្បីទប់ស្កាត់ការឈ្លានពានរបស់យោធាថៃ នោះកម្ពុជានឹងបាត់បង់ទឹកដីកាន់តែច្រើន ហើយទឹកដីទាំងអស់នោះ នឹងត្រូវថៃគ្រប់គ្រងជាអចិន្ត្រៃយ៍ តាមរយៈការដាក់តាំងរដ្ឋបាលគ្រប់គ្រង ដូចករណីកោះគជ់ ជាមិនខាន៕
