ថៃបានបន្តធ្វើសកម្មភាពឈ្លានពានកម្ពុជា ទោះនៅក្នុងអំឡុងការបោះឆ្នោតនៅប្រទេសថៃ ដោយអ្នកជាតិនិយម និងក្រុមយោធាថៃ បានតម្រៀបទូកុងទឺន័រ រាប់រយម៉ែត្រនៅតំបន់ថ្មដា ព័ទ្ធយកទីតាំងជនស៊ីវិលរបស់កម្ពុជា។ មន្ត្រីបក្សប្រឆាំងថា ករណីនេះ បានបង្ហាញពីភាពកម្សោយ និងជំហរទន់ជ្រាយរបស់មេដឹកនាំកម្ពុជា ដែលបណ្ដោយឱ្យថៃចូលឈ្លានពានកម្ពុជា ទោះបីជាថៃជាប់រវល់បោះឆ្នោតយ៉ាងណាក្ដី។
ទោះបីជាការបោះឆ្នោតសភា គឺជាព្រឹត្តិការណ៍សំខាន់យ៉ាងណាក្ដី ក៏ក្រុមយោធា និងអ្នកជាតិនិយមថៃ នៅតែឆ្លៀតពេលចូលឈ្លានពានទឹកដីកម្ពុជា ដោយគ្មានចន្លោះពេលវេលានោះឡើយ។
ជាក់ស្ដែង នៅតំបន់ថ្មដា ក្នុងខេត្តពោធិ៍សាត់ នៅពេលនេះ ត្រូវក្រុមអ្នកជាតិនិយម និងយោធាថៃ បានដាក់តម្រៀបទូកុងតឺន័ររួចរាល់ហើយ ដោយបិទផ្លូវជាតិលេខ៥៥ និងព័ទ្ធយកទាំងហាងខ្មែរ និងហាងចិន។ ភាគីថៃបានប្រើប្រាស់ឡានស្ទូច និងរថយន្តលើកទំនិញមកស្ទូច និងលើកទូកុងតឺន័រ ជាង ៥០ទូ តម្រៀបជាជួរ ដូចមហាកំពែងចិន តាំងពីថ្ងៃទី៦ ខែកុម្ភៈ មកម្ល៉េះ ដោយនៅក្នុងសកម្មភាពឈ្លានពាននេះ ភាគីថៃ បានឈ្លោះប្រកែកគ្នា ជាមួយទាហានខ្មែរ និងអាជីវករជនជាតិចិន រហូតដល់មានការគំរាមប្រើប្រាស់អំពើហិង្សា និងការជេរប្រមាថ ពីសំណាក់អ្នកជាតិនិយមរបស់ថៃ មកលើពាណិជ្ជករចិនទៀតផង។
កាន់តែធ្ងន់ធ្ងរជាងនេះ យោធាថៃ បានតបណ្ដាញអគ្គិសនី ភ្ជាប់ទៅបន្លាលួស និងទូកុងតឺន័រដែក ដើម្បីរារាំងភាគីកម្ពុជា មិនឱ្យចូលទៅក្បែរទីតាំងទាំងនោះឡើយ។
ចំណែកនៅតំបន់ប្រាសាទព្រះវិហារវិញ ថៃបានចាក់បេតុងមកដល់ខ្លោងទ្វារផ្លូវឡើងទៅប្រាសាទ ដែលចូលមកក្នុងទឹកដីកម្ពុជា ខណៈទាហានខ្មែរ ដែលកំពុងឈរជើងនៅទីនោះ បានត្រឹមតែថតបង្ហោះវីដេអូ ដោយបង្ហាញពីក្ដីឈឺចាប់ ដោយសារពួកគេមិនអាចធ្វើអ្វីបាននោះឡើយ ក្រៅពីឈរសម្លឹងមើលសកម្មភាពឈ្លានពាន និងការឌឺដងរបស់ភាគីថៃ។ ដោយឡែក នៅតំបន់ភ្នំទ្រព្យ ថៃដាក់ទូរកុងតឺន័រ ធ្វើជារបងព្រំដែនចូលមកក្នុងទឹកដីកម្ពុជាជាច្រើនម៉ែត្រ។
រីឯនៅតំបន់មុំបី ទាហានខ្មែរ និងទាហានថៃ បានបន្តប៉ះសម្ដី និងតឹងសរសៃកដាក់គ្នា ដោយសារទាហានថៃ បានដេញទាហានខ្មែរឱ្យចេញពីទីតាំងឈរជើងរបស់កម្ពុជា ប៉ុន្តែទាហានខ្មែរបានប្រកែក និងស្នើឱ្យមេបញ្ជាការភាគីទាំង២ មកជួបដើម្បីសម្របសម្រួលគ្នា។ ចំពោះខេត្តឧត្តរមានជ័យវិញ ទាហានថៃ បានបើកប្រតិបត្តិការឈូសឆាយសំណង់អគារ និងហេដ្ឋារចនាសម្ព័ន្ធ នៅក្នុងភូមិអូរខ្លាឃ្មុំ និងភូមិរួតចំប៉ី ស្ថិតក្នុងសង្កាត់អូរស្មាច់ ស្ទើរតែអស់ទាំងស្រុងទៅហើយ។ ក្នុងនោះ ថៃបានសាងសង់ផ្លូវមួយខ្សែ ចេញពីទីតាំងទូកុងតឺន័របិទផ្លូវ ចេញពីភូមិអូរខ្លាឃ្មុំ ថែមទៀតផង។
ទាក់ទិននឹងរឿងនេះដែរ នៅថ្ងៃនេះ អ្នកនាំពាក្យរាជរដ្ឋាភិបាល បានលើកឡើង អំពីការតវ៉ាប្រឆាំងនឹងសកម្មភាពរំលោភបំពានរបស់ថៃ ដែលដាក់របាំងកុងតឺន័រ និងការសាងសង់ផ្លូវចូលទៅតំបន់មួយចំនួនក្នុងដែនអធិបតេយ្យរបស់កម្ពុជា នៅខេត្តឧត្តរមានជ័យ និងខេត្តពោធិ៍សាត់។ រដ្ឋាភិបាលកម្ពុជា បញ្ជាក់ថា ទីតាំងដែលថៃ បានដាក់ទូរកុងតឺន័រទាំងនោះ គឺស្ថិតនៅក្នុងទឹកដីកម្ពុជា ដែលកំណត់ក្នុងអនុសញ្ញាបារាំង-សៀម ឆ្នាំ១៩០៤ និងសន្ធិសញ្ញាឆ្នាំ១៩០៧ ហើយសកម្មភាពនេះ គឺផ្ទុយនឹងវិធានការ កាត់បន្ថយភាពតានតឹង ដែលភាគីទាំង២ បានព្រមព្រៀងគ្នា នាពេលកន្លងមក។
ទន្ទឹមគ្នានេះដែរ ក្រសួងវប្បធម៌កម្ពុជា កាលពីម្សិលមិញ ក៏បានប្រកាសបដិសេធ ចំពោះការអះអាងរបស់រដ្ឋមន្ត្រីក្រសួងវប្បធម៌ថៃ ដែលបានអះអាងថា ប្រាសាទតាក្របី និងតំបន់ប្រាសាទតាមាន់ ស្ថិតក្នុងដែនអធិបតេយ្យរបស់ថៃ។ ក្រសួងវប្បធម៌កម្ពុជា បញ្ជាក់ថា ទីតាំងប្រវត្តិសាស្ត្រទាំងនេះ គឺស្ថិតនៅក្នុងដែនអធិបតេយ្យរបស់កម្ពុជា ដែលកំណត់ច្បាស់ នៅក្នុងអនុសញ្ញា និងសន្ធិសញ្ញាបារាំង-សៀម និងជាមូលដ្ឋានផ្លូវច្បាប់ដែលតុលាការយុត្តិធម៌អន្តរជាតិ (ICJ) បានប្រើកាលពីឆ្នាំ១៩៦២ ដើម្បីកាត់ក្ដីសំណុំរឿងប្រាសាទព្រះវិហារផងដែរ។
ជុំវិញរឿងនេះ ប្រមុខដឹកនាំស្ថាប័នអធិបតេយ្យជាតិព្រំដែន និងអន្តោប្រវេសន៍ នៃរដ្ឋាភិបាលកម្ពុជាឯករាជ្យ ២៣តុលា លោក អ៊ុំ សំអាន លើកឡើងថា ការចេញសេចក្ដីថ្លែងការណ៍ និងថ្កោលទោសរបស់រដ្ឋាភិបាលកម្ពុជា គឺជាវិធីការទូត ដែលមានភាពទន់ជ្រាយ និងមិនអាចទប់ស្កាត់សកម្មភាពឈ្លានពានរបស់យោធាថៃ មកលើកម្ពុជាបានឡើយ។
លោក អ៊ុំ សំអាន៖ «ក្រៅពីវិធីការទូតដ៏ទន់ជ្រាយរបស់ត្រកូលហ៊ុន គ្រានតែថ្កោលទោស និងចេញសេចក្ដីថ្លែងការណ៍នេះ ជម្រើសដ៏ល្អបំផុត រដ្ឋាភិបាលរបស់លោក ហ៊ុន ម៉ាណែត ត្រូវប្រញាប់ប្ដឹងថៃទៅតុលាការយុត្តិធម៌អន្តរជាតិ និងប្ដឹងទៅសហប្រធាន នៃកិច្ចព្រមព្រៀងសន្តិភាពទីក្រុងប៉ារីស ទើបអាចការពារទឹកដីយើងបាន និងអាចយកទឹកដីពីថៃមកវិញបាន»។
លោក អ៊ុំ សំអាន អះអាងថា គិតមកដល់ពេលនេះ ទឹកដីកម្ពុជា ដែលយោធាថៃបានឈ្លានពាន និងដណ្ដើមយក ទាំងមុន និងក្រោយសង្គ្រាម គឺមានទំហំជិតស្មើនឹងផ្ទៃក្រឡារបស់ខេត្តតាកែវ មួយទៅហើយ។ លោកបន្តថា ក្រោយសម័យអាណានិគមបារាំង គ្មានសម័យណា ដែលកម្ពុជា បាត់បង់ទឹកដីច្រើនជាងគេ ដូចក្នុងសម័យតេជោធិបតី របស់គ្រួសារត្រកូលហ៊ុន នេះឡើយ។
ចំណែកពីខាងភាគីថៃ ឯណោះវិញ កាសែតថៃ ឈ្មោះ The Nation Thailand បានចុះផ្សាយកាលពីថ្ងៃទី៨ ខែកុម្ភៈ ថា ក្រុមមន្ត្រីសន្តិសុខថៃ បានចេញសេចក្តីព្រមានអំពីលទ្ធភាពនៃការវាយប្រយុទ្ធគ្នាជុំទី៣ នៅតាមព្រំដែនកម្ពុជា-ថៃ។ សារព័ត៌មានថៃមួយនេះ បានអះអាងថា ពួកគេបានទទួលប្រភពពីរបាយការណ៍សម្ងាត់មួយចេញពីមន្ត្រីសន្តិសុខថៃម្នាក់ ដែលសុំមិនបញ្ចេញឈ្មោះ ដែលបានអះអាងថា កម្ពុជាកំពុងទិញសព្វាវុធទំនើប ដើម្បីប្រឆាំងយន្តហោះ ហើយកម្ពុជាក៏ទទួលបានសព្វាវុធ ដែលមានសមត្ថភាពខ្ពស់ក្នុងការប្រយុទ្ធ ដែលជាការគំរាមដល់សន្តិសុខរបស់ថៃ។
ទោះជាយ៉ាងណា សេចក្ដីរាយការណ៍របស់កាសែតថៃមួយនេះ មិនបានយោងលើប្រភពផ្លូវការណាមួយពីស្ថាប័នរដ្ឋាភិបាលនោះទេ ដោយយោងតែតាមប្រភព ដែលគេអះអាងថា ជាចារកម្ម និងមន្ត្រីសន្តិសុខថៃ ដែលមិនបង្ហាញអត្តសញ្ញាណ។
ចំណែក នាយករដ្ឋមន្ត្រីថៃ ចាំផ្ទះ លោក អានុទីន ចាន់វីរៈគុល (Anutin Chanvirarkul) បានប្រាប់អ្នកសារព័ត៌មាន នៅថ្ងៃនេះថា ស្ថានភាពនៅតាមព្រំដែនកម្ពុជា កំពុងមានស្ថិរភាព ហើយមិនចាំបាច់សួរជីកកកាយឡើងវិញនោះឡើយ។ ក្នុងនោះ លោក អានុទីន បានបដិសេធមិនឆ្លើយសំណួរ ដែលសួរថា លោកបានឈ្នះការបោះឆ្នោត ដោយសារតែធ្វើសង្គ្រាមជាមួយកម្ពុជាឬអត់នោះទេ។
ទោះជាយ៉ាងណា អ្នកវិភាគមើលឃើញថា ការឈ្នះឆ្នោតរបស់លោក អានុទីន នៅពេលនេះ គឺបង្ហាញពីគំនិតជាតិនិយមជ្រាលជ្រៅរបស់ពលរដ្ឋថៃពោរពេញដោយមហិច្ឆតាឈ្លានពានទឹកដីខ្មែរ ទើបពួកគេបោះឆ្នោតឱ្យគណបក្សភូមិចៃថៃ ដែលជាបក្សនយោបាយបានយកបញ្ហាការពារជាតិ និងបូរណភាពទឹកដីធ្វើជាគោលនយោបាយស្នូល ក្នុងការឃោសនារកសំឡេងឆ្នោត។ អ្នកវិភាគក៏មើលឃើញដែរថា ជ័យជំនះរបស់លោក អានុទីន ក៏អាចជាឧបសគ្គសម្រាប់ការដោះស្រាយជម្លោះជាមួយកម្ពុជា ហើយសង្គ្រាមឈ្លានពានលើកទី៣ របស់ថៃមកលើកម្ពុជា ក៏អាចមានលទ្ធភាពកើតឡើងច្រើន ដោយសារតែទំនាក់ទំនងល្អរវាងលោក អានុទីន ជាមួយក្រុមយោធា និងរាជវាំងថៃ៕
