អ្នកឃ្លាំមើលលើកឡើងថា ទោះបីកម្ពុជាអនុវត្តបទឈប់បាញ់ និងដកទ័ពចេញពីតំបន់ជម្លោះនៅតាមព្រំដែនយ៉ាងណាក្ដី ក៏ភាគីថៃនឹងនៅតែបំពាន ហើយបន្តចូលឈ្លានពានកម្ពុជាកាន់តែជ្រៅ ដូចដែលយោធាថៃ បានធ្វើក្រោយសង្គ្រាមព្រំដែនលើកទី១។ ពួកគាត់យល់ថា កងទ័ពកម្ពុជាគួរតែបន្តឈរជើងនៅព្រំដែន ដើម្បីទប់ស្កាត់ការឈ្លានពានរបស់យោធាថៃ និងម្ខាងទៀត កម្ពុជាត្រូវប្រើប្រាស់យន្តការច្បាប់អន្តរជាតិ ដើម្បីលាតត្រដាងអំពីឧក្រិដ្ឋកម្មនៅក្នុងសង្គ្រាមរបស់ថៃមកលើកម្ពុជា។
ស្របពេលដែលយោធាថៃបានបន្តវាយប្រហារមកលើកម្ពុជាទាំងយប់ទាំងថ្ងៃនោះ ភាគីថៃបានដាក់សម្ពាធឱ្យភាគីកម្ពុជា ឱ្យទទួលយកលក្ខខណ្ឌ ឈប់បាញ់ជាមុន និងដកថយ ខណៈថៃខ្លួនឯង កំពុងចូលឈ្លានពានមកក្នុងទឹកដីកម្ពុជាកាន់តែជ្រៅ។
ប្រមុខដឹកនាំស្ថាប័ន អធិបតេយ្យជាតិ ព្រំដែន និងអន្តោប្រវេសន៍ នៃរដ្ឋាភិបាលកម្ពុជាឯករាជ្យ ២៣តុលា លោក អ៊ុំ សំអាន ប្រាប់ទូរទស្សន៍អាស៊ីសេរី នៅថ្ងៃទី២២ ខែធ្នូ ថា សំណើរបស់ភាគីថៃ ដែលឱ្យកម្ពុជាត្រូវប្រកាសបទឈប់បាញ់មុននោះ គឺជាឧបាយកលរបស់យោធាថៃ ដើម្បីចូលឈ្លានពានកម្ពុជា។ លោកបន្តថា ប្រសិនបើកម្ពុជាឯកភាពលើចំណុចនេះ នោះកម្ពុជា ដែលជាភាគីរងគ្រោះ នឹងត្រូវយោធាថៃមួលបង្កាច់ថា ជាភាគីឈ្លានពាន ហើយទន្ទឹមគ្នានេះ យោធាថៃនឹងចូលរាយបន្លាលួសមកក្នុងទឹកដីកម្ពុជា កាន់តែជ្រៅ ដូចដែលយោធាថៃបានធ្វើ ក្រោយចុះកិច្ចព្រមព្រៀងបទឈប់បាញ់ជាមួយកម្ពុជាដូច្នេះដែរ។
លោក អ៊ុំ សំអាន៖ «ថៃគេសុខចិត្តចំណាយអាយុជីវិតទាហាន និងគ្រាប់កាំភ្លើងរបស់គេ ដើម្បីឈ្លានពានទឹកដីខ្មែរយើង រឿងអីទឹកដីដែលគេឈ្លានពានបានក្នុងកំឡុងសង្គ្រាមហ្នឹង គេផ្ដល់មកឱ្យយើងវិញ គេមិនប្រគល់ដីមកឱ្យយើងវិញទេ ប្រសិនបើយើងមិនច្បាំងយកមកវិញ ឬប្ដឹងទៅតុលាការអន្តរជាតិ ICJ»។
ក្នុងសង្គ្រាមតាមបណ្ដោយព្រំដែនរវាងកម្ពុជា និងថៃ ដែលបានចាប់ផ្ទុះឡើងកាលពីថ្ងៃទី២៤ ខែកក្កដា ភាគីថៃបានបំពានបទឈប់បាញ់ជាមួយកម្ពុជាម្ដងរួចមកហើយ បន្ទាប់ពីភាគីទាំង២ បានចុះកិច្ចព្រមព្រៀង កាលពីថ្ងៃទី២៨ ខែកក្កដា ក្រោមការឃ្លាំមើលរបស់សហរដ្ឋអាមេរិក(USA) និងប្រធានប្ដូរវេនអាស៊ាន គឺប្រទេសម៉ាឡេស៊ី(Malaysia)។
ក្នុងសង្គ្រាមលើកទីពីរនេះ យោធាថៃ បានបង្ខំឱ្យកម្ពុជា ទទួលយកលក្ខខណ្ឌបីចំណុច រួមមានឱ្យកម្ពុជាបញ្ឈប់ការវាយប្រហារជាមុន ហើយធ្វើឡើងដោយជាក់លាក់ និងចូលរួមសហការបោសសម្អាតមីននៅតាមព្រំដែន។
ទោះជាបែបនេះក្ដី ប្រធានអ្នកឃ្លាំមើលកម្ពុជា លោក ម៉ែន ណាត លើកឡើងថា ប្រសិនបើកម្ពុជាទទួលយកលក្ខខណ្ឌរបស់យោធាថៃទាំងនេះ គឺស្មើនឹងយកទឹកដីដូរសន្តិភាព ដោយសារលក្ខខណ្ឌទាំងនេះ គឺជាការបើកផ្លូវឱ្យយោធាថៃ ចូលឈ្លានពានកម្ពុជា កាន់តែជ្រៅ និងងាយស្រួល ខណៈយោធាថៃ កំពុងមានប្រៀបលើសមរភូមិរួចទៅហើយ។ លោកបន្តថា ប្រឈមនឹងស្ថានភាពបែបនេះ កម្ពុជាត្រូវតែសាមគ្គីគ្នា ទប់ទល់ការឈ្លានពានរបស់យោធាថៃ នៅតំបន់ព្រំដែន និងម្ខាងទៀត កម្ពុជាត្រូវប្រញាប់ប្ដឹងថៃ ដោយប្រើប្រាស់យន្តការច្បាប់អន្តរជាតិ។
លោក ម៉ែន ណាត៖ «យើងមើលជំហររបស់រដ្ឋាភិបាលកម្ពុជាសព្វថ្ងៃនេះ គឺគ្រាន់តែទប់ស្ថានការណ៍ គ្រាន់តែកន្លែងណាដែលថៃវាយចូលមក មិនឱ្យចូលបន្ថែម។ អ៊ីចឹងហើយរដ្ឋាភិបាលកម្ពុជា មិនអាចទន់ខ្សោយ មិនអាចធ្វើតាមអ្វីដែលថៃ ទាមទារលើចំណុចនេះចំណុចនោះបានទេ»។
នៅក្នុងសង្គ្រាមឈ្លានពានមកលើកម្ពុជា យោធាថៃបានប្រើប្រាស់សព្វាវុធទំនើបៗ មានដូចជាយន្តហោះចម្បាំង កាំភ្លើងធំ នាវាពិឃាដ និងរថក្រោះធុនធ្ងន់មកវាយប្រហារកម្ពុជា ដែលអាវុធទាំងនេះ គឺមិនសមាមាត្រទៅនឹងវិស័យយោធាកម្ពុជាដែលមានភាពទន់ខ្សោយជាងនោះឡើយ។
ទោះបីជាការវាយប្រហារនេះ បានបណ្ដាលឱ្យប្រជាពលរដ្ឋខ្មែរជាច្រើននាក់បានស្លាប់ និងរាប់សែននាក់ បង្ខំចិត្តជម្លៀសខ្លួនយ៉ាងណាក្ដី ក៏មេដឹកនាំនយោបាយ និងមេយោធាថៃ ដែលជាអ្នកបញ្ជានៅពីក្រោយនោះ បានអះអាងដោយគ្មានភាពអៀនខ្មាសថា ថៃជាជនរងគ្រោះ និងប្រើសិទ្ធការពារខ្លួនជាដើម។
អ្នកឃ្លាំមើលលើកឡើងថា ស្ថិតក្នុងកាលៈទេសៈដែលប្រទេសជាតិកំពុងជួបគ្រោះបែបនេះ មេដឹកនាំកម្ពុជាគួរតែភ្ញាក់ខ្លួន តាមរយៈការបើកផ្លូវឱ្យមានការផ្សះផ្សាបង្រួបបង្រួមជាតិឡើងវិញ និងកែប្រែរបៀបដឹកនាំនយោបាយចាស់ ដើម្បីប្រឆាំងនឹងការឈ្លានពានរបស់យោធាថៃ តាមប្រព័ន្ធការទូត និងច្បាប់អន្តរជាតិ ព្រោះបើតតាំងតាមផ្លូវយោធា កម្ពុជានឹងរឹតតែចាញ់ប្រៀប ហើយយោធាថៃ នឹងប្រើលេសមួយនេះ មកវាយប្រហារកម្ពុជាកាន់តែខ្លាំង៕
