កម្ពុជាយល់ព្រមទទួលយកនូវបទឈប់បាញ់ដែលផ្ដួចផ្ដើមដោយប្រធានប្ដូរវេនអាស៊ាន លោកនាយករដ្ឋមន្ត្រីម៉ាឡេស៊ី អាន់វ៉ា អ៊ីប្រាហ៊ីម (Anwar Ibrahim) នៅត្រឹមយប់ម៉ោង១០ ថ្ងៃទី១៣ ធ្នូ នេះ ប៉ុន្តែ ភាគីថៃនៅតែអះអាងថា ខ្លួនពុំទទួលនូវបទឈប់បាញ់ឡើយ។
លោកនាយករដ្ឋមន្ត្រី ហ៊ុន ម៉ាណែត សរសេរលើហ្វេសប៊ុករបស់លោកនៅរសៀលនេះ ថា កម្ពុជាស្វាគមន៍និងគាំទ្រគំនិតផ្ដួចផ្ដើមរបស់លោក អាន់វ៉ា អ៊ីប្រាហ៊ីម សម្រាប់ការឈប់បាញ់នាយប់នេះ ដោយមានការតាមដានពីក្រុមត្រួតអ្នកសង្កេតការអាស៊ាន (AOT) និងចូលរួមដោយសហរដ្ឋអាមេរិក។
ឆ្លើយនឹងសារលោក អ៊ីនវ៉ា ប្រាហ៊ីម នាយករដ្ឋមន្ត្រីថៃចាំផ្ទះ លោក អានុទីន ឆាន់វីរៈគុល (Anutin Chanvirarkul) អះអាងប្រាប់អ្នកកាសែតនៅរសៀលថ្ងៃទី១៣ ធ្នូ ថា យប់នេះ នៅបន្តបាញ់គ្នាដដែល ព្រោះអត់មានបទឈប់បាញ់ ដោយយោធាថៃ នៅតែបន្តប្រយុទ្ធជាមួយកងទ័ពខ្មែរដដែល។
ថ្លែងប្រាប់អ្នកសារព័ត៌មាន នៅអាកាសយានដ្ឋានយោធា ក្នុងទីក្រុងបាងកក នារសៀលថ្ងៃទី១៣ ខែធ្នូនេះ លោក អានុទីន បានអះអាងថា លោកមិនបាននិយាយអំពីបទឈប់បាញ់នោះជាមួយប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) នោះទេ ដោយលោកបានប្រកាសថា លោកនឹងការពារអធិបតេយ្យភាពរបស់ប្រទេសថៃ ដោយមិនស្តាប់អ្នកដទៃឡើយ៕
កាលពីព្រឹកថ្ងៃដដែលនេះ នាយករដ្ឋមន្ត្រីថៃចាំផ្ទះរូបនេះ បានបញ្ជាក់ជំហរនៅលើហ្វេសប៊ុកនៅព្រឹកថ្ងៃទី១៣ ធ្នូ ថា ថៃនឹងធ្វើសង្គ្រាមជាមួយកម្ពុជារហូតដល់ពេលថៃ មានអារម្មណ៍ថា ឈប់មានការគំរាមកំហែងពីកម្ពុជា។ លោកថា ថៃពុំព្រមទទួលបទឈប់បាញ់តាមការអន្តរាគមន៍របស់ប្រធានាធិបតីអាមេរិក លោក ដូណាល់ ត្រាំ ឡើយ។
ចំណែកកម្ពុជាវិញតែងបង្ហាញជំហរទទួលបទឈប់បាញ់ និងអំពាវនាវដល់ភាគីថៃឱ្យត្រឡប់ចូលតុចរចាដើម្បីឱ្យមានបទឈប់បាញ់ពិតប្រាកដ និងឯកភាពតាមសេចក្ដីថ្លែងការណ៍រួមស្ដីពីសន្តិភាពនៅប្រទេសម៉ាឡេស៊ី កាលពីថ្ងៃទី២៦ តុលា៕
