ជនភៀសសឹកទទូចឱ្យរដ្ឋាភិបាលផ្ដល់កញ្ចប់ថវិកា គាំពារសង្គម ឱ្យបានសមរម្យ ខណៈពួកគាត់ កំពុងតែ ជួបទុក្ខលំបាក។ ទន្ទឹមគ្នានោះ ពួកគាត់ថា ចាប់តាំងពីមានការភៀសសឹក ដោយសារសង្គ្រាមឈ្លានពានរបស់ថៃ មកលើកម្ពុជាជាលើកទី២នេះមក អាជ្ញាធរបានផ្ដល់ថវិកា ដល់ជនភៀសសឹក បានពីរលើកដោយក្នុង១លើក ទឹកប្រាក់ចំនួន ៦ម៉ឺនរៀល សម្រាប់មួយគ្រួសារ។
ពលរដ្ឋនៅភូមិជោគជ័យ ដែលកំពុងតែស្នាក់នៅក្នុង ជំរំជនភៀសសឹកវត្តចាន់ស៊ី ស្ថិតក្នុងឃុំកូប ស្រុកអូរជ្រៅ ខេត្តបន្ទាយមានជ័យ លោក ព្រំ ចិត្ត ប្រាប់ទូរទស្សន៍អាស៊ីសេរី នៅថ្ងៃទី១៣ ខែមករាថា ពលរដ្ឋដែលកំពុងភៀសសឹក មកស្នាក់នៅ វត្តចាន់ស៊ី មានជាង ១ពាន់គ្រួសារ ដែលមកពីភូមិជោគជ័យ និងភូមិព្រៃចាន់ ក្រោយពីភូមិទាំងនោះ ត្រូវបានពួកយោធាថៃចូលកាន់កាប់ ហើយបច្ចុប្បន្ន អ្នកភូមិកំពុងតែដេកព្រួយ រឿងបាត់បង់ដីធ្លី និងផ្ទះសម្បែង ខណៈពួកគាត់មិនដឹងត្រូវអ្វីទៀតនោះទេ បានត្រឹមតែអង្គុយរង់ចាំ ដំណឹងពីរដ្ឋាភិបាល ឱ្យជួយដោះស្រាយ។
ជាមួយគ្នានោះ លោកអះអាងថា ចាប់តាំងពីភៀសខ្លួនមកទីសុវត្ថិភាព លោកធ្លាប់ទទួលបានប្រាក់ឧបត្ថម្ភពីរដ្ឋាភិបាល ចំនួន២លើក ដោយក្នុង១លើក បានថវិកាចំនួន ៥ ទៅ៦ម៉ឺនរៀលក្នុង១គ្រួសារ។ លោកថា ថវិកានេះ ជាចំនួនតិចតូច ទើបធ្វើឱ្យលោកចាយវាយដោយត្បិតត្បៀតបំផុត។ លោកស្នើឱ្យរដ្ឋាភិបាល គួរតែផ្ដល់បន្ថែមឱ្យបានច្រើនជាងនេះ អាចចន្លោះពី ៤០ ទៅ ៥០ម៉ឺនរៀល ក្នុង ១ខែ។ លោកថា ជនភៀសសឹក ភាគច្រើនមានជីវភាពខ្វះខាត ខណៈផ្ទះនិងសម្ភារៈប្រើប្រាស់ ត្រូវបានយោធាថៃ ដុតបំផ្លាញចោលអស់។
លោក ព្រំ ចិត្ត៖ «សម្រាប់ខ្ញុំ ខ្ញុំចង់បានថវិកាបន្តិចបន្តូចពីរាជរដ្ឋាភិបាល ដែលគាត់ជាអ្នកមើលខុសត្រូវយើងអ៊ីចឹង ឱ្យគាត់ សមរម្យបន្តិច យើងអាចប្រកបមុខរបរទៅខាងមុខទៀត។ ដើម្បីឱ្យសមរម្យល្មម យើងអាចរកស៊ីបាន។ លំបាកណាស់បើរាជរដ្ឋាភិបាលគាត់អត់បានជួយទេ វាលំបាកខ្លាំង»។
ក្រោយសង្គ្រាមឈ្លានពានរបស់ថៃ ពលរដ្ឋខ្លះស្ទើរតែបាត់បង់ស្មារតី និងអ្នកខ្លះទៀតឈឺចាប់ និងដេកយំ នៅពេលនឹកដល់ ទ្រព្យសម្បត្តិ ដែលសន្សំ អស់ជាច្រើនឆ្នាំ បែរជាត្រូវមករលាយអស់មួយ រំពេច ខណៈដែលរដ្ឋាភិបាលក៏គ្មាន វិធានការអ្វីសោះ ទើបធ្វើឱ្យយោធាថៃបំផ្លិចបំផ្លាញផ្ទះសម្បែង និងប្លន់ទ្រព្យសម្បត្តិ អ្នកភូមិ តាមតែអំពើចិត្ត រួចហើយបង្ហោះវីដេអូ និងរូបភាព ឌឺដងពលរដ្ឋខ្មែរ លើបណ្ដាញសង្គម។
ជនភៀសសឹកម្នាក់ទៀត នៅខេត្តឧត្តរមានជ័យ ដែលមានផ្ទះនៅជាប់នឹងតំបន់ប្រាសាទតាមាន់ធំ ឃុំគោកមន ស្រុកបន្ទាយអំពិល លោក សេន សារ៉ាន់ លើកឡើងថា រដ្ឋាភិបាលគួរតែផ្ដល់កញ្ចប់ថវិកាក្នុងគ្រាអាសន្ន ឬ ថវិកាគាំពារសង្គម ដើម្បីឱ្យពលរដ្ឋដែលរងផលប៉ះពាល់ អាចយក ទៅធ្វើដើមទុន ប្រកបមុខរបរផ្សេងៗ គ្រាន់បានចំណូលខ្លះ ខណៈដែលស្ថានភាព នៅតាមព្រំដែន នៅតែមានភាពផុយស្រួយដដែល។
លោក សេន សារ៉ាន់៖ «គេឱ្យយើង ហូរចុកបានតែមួយរស់ៗ ដោះស្រាយសិនប៉ុណ្ណោះឯង។ ករណីថា គេមានកញ្ចប់ថវិកាឱ្យយើងមានការងារធ្វើ កញ្ចប់ថវិកាឱ្យយើងដោះស្រាយបន្តិចបន្តូចអី មិនទាន់មានទេ។ បើសិនជាបាន អរគុណរដ្ឋាភិបាល ព្រោះយើងជាជនភៀសសឹកនេះមិនមែនទៅងាយឯណា រត់លូនពេញតែដុប ពេញតែព្រៃ។ ពួកខ្ញុំនេះមកនៅតែក្នុងដុប ក្នុងព្រៃដេកតែលើដីមានកន្លែងណានឹងដេកបើ រត់ចោលផ្ទះហើយ»។
ទូរទស្សន៍ អាស៊ីសេរីពុំអាចទាក់ទងប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា ដើម្បីឆ្លើយតបជុំវិញរឿងនេះបានទេនៅថ្ងៃទី១៣ ខែមករា។ ចំណែក អ្នកនាំពាក្យក្រសួងសង្គមកិច្ច អតីតយុវជន និងយុវនីតិសម្បទា លោក ឯម ច័ន្ទមករា ក៏មិនអាចទាក់ទងបាន។
បើទោះជាបែបនេះក្ដី ស្របពេលពលរដ្ឋកំពុងជួបទុក្ខលំបាក ដោយសារសង្គ្រាម គេសង្កេតឃើញ សេវាកិច្ចគាំពារសង្គម របស់រដ្ឋាភិបាលហាក់ធ្វើឡើង ដោយគ្មានភាពច្បាស់លាស់ និងខ្វះតម្លាភាពខណៈពលរដ្ឋ រងទុក្ខរាប់ពាន់គ្រួសារ បែរជាពុំទទួលបានការឧបត្ថម្ភថវិកាសមរម្យពីរដ្ឋាភិបាល។
ទាក់ទិនរឿងនេះ ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក យង់ គិមអេង លើកឡើងថា រដ្ឋាភិបាលគួរតែគិតពិចារណាឡើងវិញ ក្នុងការផ្ដល់សេវាគាំពារសង្គមដល់ជនភៀសសឹក ឱ្យបានត្រឹមត្រូវ ព្រោះថា ពួកគាត់គឺ ជាជនរងគ្រោះដែលរដ្ឋាភិបាល ត្រូវតែចាត់ទុក ជាអាទិភាពខ្ពស់។ ទន្ទឹមគ្នានោះ លោកសោកស្ដាយ នៅពេលដែលឮថា ពលរដ្ឋទទួលបានថវិកា ពីសេវាគាំពារសង្គម ត្រឹមតែ៦ម៉ឺនរៀល ក្នុង១លើក ព្រោះថា ចំនួននេះតិចតួចពេក ដែលពលរដ្ឋមិន អាចចាយវាយ សម្រាប់ការហូបចុកប្រចាំថ្ងៃ គ្រប់គ្រាន់នោះទេ។
លោក យង់ គិមអេង៖ «ចង់ឃើញការគិតគូរការដោះស្រាយ ព្រោះថាជំនួយសង្គមកិច្ចសម្រាប់ជនភៀសសឹក ធ្វើយ៉ាងណាឱ្យបានទៀងទាត់ប្រចាំខែ ហើយឱ្យបានសមរម្យដែលគាត់អាចរស់នៅ សម្រាប់ទ្រទ្រង់ជីវភាព ប្រចាំថ្ងៃគាត់បាន។ ប្រសិនបើដូចការអះអាង របស់គាត់ថាបានត្រឹម ៦ម៉ឺនរៀលអីនោះ គឺវាតិចពេក»។
ថ្មីៗនេះ រដ្ឋាភិបាលកម្ពុជាទើបទទួលបានថវិកាជំនួយឧបត្ថម្ភដល់ជនភៀសសឹកពីប្រទេសមួយចំនួនដូចជាអាមេរិក ចិន អូស្ត្រាលី និងជប៉ុន ជាដើម។ ទោះជាយ៉ាងណា អ្នកឃ្លាំមើលថា ស្របពេលបណ្ដាប្រទេស មួយចំនួន បានផ្ដល់ជំនួសដល់ជនភៀសសឹកជាបន្តបន្ទាប់នោះ រដ្ឋាភិបាល ក៏ត្រូវឧបត្ថម្ភថវិកា ដល់ជនភៀសសឹកឱ្យបានត្រឹមត្រូវ និងមានតម្លាភាព ប្រចាំខែដើម្បីឱ្យពលរដ្ឋ អាច រស់នៅដោយអារម្មណ៍ ភាពកក់ក្ដៅខ្លះស្របពេលពួកគាត់ កំពុងតែកើតទុក ព្រោះបាត់បង់ដីធ្លី និង ផ្ទះសម្បែង មិនដឹងពេលណា អាចទាមទារពីថៃ វិញបាន នោះឡើយ៕
