អតិថិជនរបស់ក្រុមហ៊ុនហួយវ័ន ផេ (Huione Pay) ជាង១០០នាក់ បានប្រមូលផ្តុំគ្នាតវ៉ានៅខាងមុខធនាគារជាតិនៅរសៀលថ្ងៃទី៧ ខែមេសា ដើម្បីស្នើសុំឲ្យជួយអន្តរាគមន៍ដោះស្រាយបញ្ហាលុយរបស់ពួកគាត់ដែលមិនអាចដកពីគណនីបានរយ:ពេលជាង៤ខែមកនេះ បន្ទាប់ពីក្រុមហ៊ុនមួយនេះ រងទណ្ឌកម្មរបស់សហរដ្ឋអាមេរិក ។ អតិថិជនដែលបានចូលរួមតវ៉ានេះ មានទាំងជនជាតិខ្មែរ និងជនជាតិចិនមួយចំនួនផងដែរ។
អតិថិជនខ្លះ បានស្នើសុំឲ្យធនាគារជាតិនិងរដ្ឋាភិបាលកម្ពុជា ជួយដោះស្រាយបញ្ហាលុយដែលជាប់គាំងនេះ ព្រោះពួកគាត់ កំពុងជួបការលំបាកខ្លាំងក្នុងជីវភាព។ អតិថិជនខ្លះទៀត រៀបរាប់ថា លុយដែលពួកគាត់ បានដាក់ផ្ញើនៅក្នុងក្រុមហ៊ុនហួយវ័នផេនេះ គឺជាលុយដែលពួកគាត់ ខំរកដោយលំបាក និងសន្សំជាច្រើនឆ្នាំមកហើយ ដូច្នេះពួកគាត់ទាមទារឲ្យធនាគារជាតិ និងក្រុមហ៊ុននេះ ត្រូវទទួលខុសត្រូវ និងពន្លឿនការដោះស្រាយជូនពួកគាត់ឲ្យបានឆាប់។
អតិថិជនរបស់ក្រុមហ៊ុនហួយវ័ន ផេ បានប្រមូលផ្តុំគ្នាតវ៉ានៅខាងមុខធនាគារជាតិ ពីរលើកមកហើយ ប៉ុន្តែមកទល់ពេលនេះ ពុំមានដំណោះស្រាយនៅឡើយ។
ក្រុមហ៊ុន ហួយវ័ន ផេ គឺជាផ្នែកមួយនៃក្រុមហ៊ុន ហួយវ័ន គ្រុប (Huione Group of Cambodia) មានកម្មវិធីទីផ្សារ និងភ្នាក់ងារទូទាត់លុយតាមអនឡាញរបស់ជនជាតិចិន និងមានក្មួយបង្កើតប្រធានគណបក្សប្រជាជនកម្ពុជាលោក ហ៊ុន សែន គឺលោក ហ៊ុន តូ ជាសហប្រធាននៃក្រុមហ៊ុននេះ។ កាលពីថ្ងៃទី៣១ ខែមីនា ក្រសួងមហាផ្ទៃកម្ពុជា បានប្រកាសព័ត៌មានស្ដីពីការចាប់ខ្លួនប្រធានក្រុមហ៊ុន Huione Group ឈ្មោះ លី សុង (LI XIONG) ជាជនជាតិចិន មានសញ្ជាតិខ្មែរ ហើយបញ្ជូនទៅកាន់ប្រទេសចិន ដើម្បីបន្តនីតិវិធីតាមច្បាប់ ពាក់ព័ន្ធបទល្មើសឆបោកតាមប្រព័ន្ធបច្ចេកវិទ្យា (Online Scam)។ ទោះជាយ៉ាងណា រដ្ឋាភិបាលត្រកូលហ៊ុន មិនទាន់បានចាប់ខ្លួនលោក ហ៊ុន តូ នោះឡើយ។
សហរដ្ឋអាមេរិក និងចក្រភពអង់គ្លេសបានសហការចាត់វិធានការរួមដាក់ទណ្ឌកម្មលើក្រុមហ៊ុន ហួយវ័ន គ្រុប (Huione Group) កាលពីចុងឆ្នាំ២០២៥ ដោយសារតែរកឃើញថា គឺជាក្រុមហ៊ុនធំពាក់ព័ន្ធនឹងអំពើឧក្រិដ្ឋកម្ម និងបានជួយលាងលុយកខ្វក់ឱ្យក្រុមឧក្រិដ្ឋជនឆបោកតាមអនឡាញ និងក្រុមចោរព័ត៌មានវិទ្យាកូរ៉េខាងជើងយ៉ាងហោចណាស់ ៤ពាន់លានដុល្លារ៕
